Read Yucateco San Lucas 3 Bible Online

San Lucas 3 - Yucateco bible

San Lucas 3

¹Tu quince ja'abil u jalachil emperador Tiberio, Poncio Pilato u jalachil Judea, Herodes u jalachil Galilea, Felipe u sucu'une' u jalachil Iturea yéetel Traconite, Lisanias u jalachil abilinia.

²Anas yéetel Caifase' u nojochilo'ob le aj kiino'obo'. Kue' tu dzaj jun p'éel péectzil te x tocoy lu'umo' ti' Juan u paal Zacarías.

³Juane' máan tuláacal tu'ux tu jáal u ja'il Jordán, táan u ya'alic ti' le máaco'obo' unaj u yocja'ob yéetel u kexic u tuuculo'ob tu yo'olal u sa'atsa'al u si'ipilo'ob.

⁴Lela' j úuch je'el bix tu dzíibtaj aj bóobat Isaías: Cu yu'ubal u t'aan jun túul máac cu ka'am t'aan x tocoy lu'um: Nu'ucte'ex u beel Yuumtzil, beete'ex jun p'éel toj bej ti'.

⁵Tuláacal cabal lu'um bíin bu'ut'uc, tuláacal pu'uc yéetel ca'anal lu'ume' bíin éemsa'ac, le looloch bejo'obo' bíin tojquinta'aco'ob, le koklemac bejo'obo' bíin táaxcunta'aco'ob.

⁶Yéetel tuláacal yóokolcaab cun u yil le tocsajil cu dzáic Kuo'.

⁷Le quéen jóokoc ca'ach le máaco'ob u ti'al u dza'abal ocja' ti'ob tumen Juane', leti'e' cu ya'alic ti'ob: ¡U ch'i'ibale'ex cano'ob! ¿Máax a'al te'ex ca púudzuque'ex ti' le nojoch jaadz cu náadzalo'?

⁸Xíimbalnene'ex tu beel u ti'al ca ila'ac jach tu jaajil dzo'oc a kexic a tuucule'ex, chéen ba'ale' ma' a wa'alique'ex: To'one' u paalalo'on Abraham. Tumen tu jaajil quin wa'alic te'exe' tac ti' le tuunicho'oba' Kue' je'el u páajtal u líiksic paalalo'ob u ti'al Abraham.

⁹Le báato' dzo'oc u ja'abal u ti'al u ch'a'acal le che'obo'. Tuláacal che' ma' tu dzáic ma'alob icho'obe', cu ch'a'acale' cu tóoca'al ti' káak.

¹⁰Le máaco'ob túuno' tu káato'ob ti': ¿Ba'ax túun unaj c beetic?

¹¹Juan tu núucaj ti'ob: Le máax yaan ca'a p'éel u nooke', unaj u dzáic jun p'éel ti' le máax mina'an mix jun p'éel ti'o'; bey xan le máax yaan ba'al u jaante', unaj u múul jaantic yéetel le máax mina'an ti'o'.

¹²J taalo'ob xan dze'edzec ti' le j kam páatan u ti'al ca dza'abac ocja' ti'ob, ca tu káat chi'ito'ob ti' Juan: Aj ca'anbesaj, ¿ba'ax unaj c beetic to'on?

¹³Juane' ca tu ya'alaj ti'ob: Tza'ex chéen le cu ya'alic le a'almaj t'aano'.

¹⁴Bey xan dze'edzec soldado'ob tu káat chi'ito'ob ti': Cux to'on, ¿ba'ax unaj c beetic? Leti'e' tu núucaj ti'ob: Ma' a luksique'ex mixba'al ti' mix máac, mix tu yo'olal yaayaj t'aan mix yéetel tacpool tu yo'olal ba'ax ma' u beeti', yéetel qui'imacchajac a wóole'ex yéetel a bo'olale'ex.

¹⁵Le máaco'ob túuno' táan u sen tucultico'ob ca'ache' wa Juane' leti' Cristo,

¹⁶ba'ale' Juane' ca tu ya'alaj ti' tuláacalo'ob: Tene' tu jaajile' quin dzáic te'ex ocja' yéetel ja', ba'ale' táan u taal jun túul bíin u dzáa te'ex ocja' yéetel Quili'ich Pixan yéetel káak. Leti'e' maanal tip'a'anil u páajtalil ti' teen, ti' máax ma' táan in najmatic in wach'ic u táab u xanab.

¹⁷U machmaj u x piquit u ti'al u pictic trigo tu yo'olal u tzelic ti' u sóol. Bíin u dzáa le trigo tu ch'iilo', ba'ale' bíin u tóoc u sóol ti' káak mix bikin bíin tu'upuc.

¹⁸Bey túuna' yéetel u láak ya'abcach tzol xiquino'obe', Juane' táan u tze'ectic le ma'alob péectzil ti' le máaco'obo'.

¹⁹Tu keyaj xan jalach Herodes tumen cajacbal yéetel Herodías u yatan Felipe u sucu'un, yéetel tu yo'olal u láak ba'alo'ob kaastac u beetmaj ca'achi'.

²⁰Ba'ale' Herodese' tu beetaj u láak ba'al jach kaas: tu kalaj Juan ti' kalab naj.

²¹Ma'ili' úuchuc le je'ela', ca'aliquil táan u dzáic ocja' Juan ti' tuláacal le máaco'obo', taal xan Jesús ca j dza'ab ocja' ti', ca'aliquil túun táan u payalchi'e', le ca'ano' je'ekabchaji.

²²Le túun le Quili'ich Pixano' j éem tu yóokol bey jun túul palomae', ila'abi yéetel j u'uya'ab jun t'aan te j ca'ano', táan u ya'alic: Teech in yaabilaj Paal, jach qui'imac in wóol ta wo'olal.

²³Yaan míin treinta ja'abo'ob ti' Jesús ca tu cáajsaj u meyaj. Leti'e' tuculta'ab ca'ache' u paal José, Josee' u paal Elí,

²⁴u paal Matat, u paal Leví, u paal Melqui, u paal Jana, u paal José,

²⁵u paal Matatías, u paal Amós, u paal Nahum, u paal Esli', u paal Nagai,

²⁶u paal Maat, u paal Matatías, u paal Semei, u paal José, u paal Judá,

²⁷u paal Joanán, u paal Resa, u paal Zorobabel, u paal Salatiel, u paal Neri,

²⁸u paal Melqui, u paal Adi, u paal Cosam, u paal Elmodam, u paal Er,

²⁹u paal Josué, u paal Eliezer, u paal Jorim, u paal Matat,

³⁰u paal Leví, u paal Simeón, u paal Judá, u paal José, u paal Jonam, u paal Eliaquim,

³¹u paal Melea, u paal Matata, u paal Natán,

³²u paal David, u paal Isai, u paal Obed, u paal Booz, u paal Salmón, u paal Naasón,

³³u paal Aminadab, u paal Aram, u paal Esrom, u paal Fares, u paal Judá,

³⁴u paal Jacob, u paal Isaac, u paal Abraham, u paal Taré, u paal Nacor,

³⁵u paal Serug, u paal Ragau, u paal Peleg, u paal Heber, u paal Sala,

³⁶u paal Cainan, u paal Arfaxad, u paal Sem, u paal Noe', u paal Lamec,

³⁷u paal Matusalén, u paal Enoc, u paal Jared, u paal Mahalaleel, u paal Cainan,

³⁸u paal Enos, u paal Set, u paal Adán, u paal Ku.