Read Yucateco San Lucas 4 Bible Online

San Lucas 4 - Yucateco bible

San Lucas 4

¹Jesús chuup yéetel Quili'ich Pixane' j luk tu áalcab ja'il Jordano' ca j bisa'ab x tocoy lu'um tumen le pixano'.

²Ti' yanchaj cuarenta kiino'obi' táan u túunta'al u yóol tumen kasilba'al. Ma' jaan ti' le kiino'obo', le beetique' tu yu'ubaj wi'ij.

³Le kasilba'alo' ca túun tu ya'alaj ti': Wa tumen u Paalech Kue', a'al ca suunac waajil le tuunicha'.

⁴Jesús tu núucaj ti': Le quili'ich Dzíibo' cu ya'alic: Ma' chéen yéetel waaj bíin cuxlac wíiniqui', ba'ale' tac xan yéetel tuláacal u t'aan Ku.

⁵Cu dzo'ocole' le kasilba'alo' tu bisaj Jesús ti' jun p'éel ca'anal múul, jun súutuc ca tu ye'esaj ti' tuláacal u caajilo'ob yóokolcaab,

⁶le kasilba'alo' ca tu ya'alaj ti': Tene' je'el in dzáic teech tuláacal le páajtalila' yéetel u nojbe'enil le caajo'oba'. Tumen tene' in kamaj tuláacal lela', yéetel quin dzáic ti' le máax bíin in wóolte'.

⁷Wa teech ca xoltal a kultene' tuláacal bíin a ti'alinte.

⁸Ba'ale' Jesús tu núucaj ti': Tzelabáa tin táan, kasilba'al, tumen le Quili'ich Dzíibo' cu ya'alic: Kult Yuumtzil a Ku yéetel meyajt chéen leti'.

⁹Cu dzo'ocole' le kasilba'alo' tu bisaj Jesús tu caajil Jerusalén ca tu na'acsaj tu yóokol le kulnajo', ca tu ya'alaj ti': Wa tumen u Paalech Kue', pulabáa lu'um,

¹⁰tumen ti' le Quili'ich Dzíibo' cu ya'alic: Kue' yaan u ya'alic ti' u ángelo'ob ca u canantecho'ob.

¹¹Yaan u kamiquecho'ob tu kabo'ob tu yo'olal ma' a kolic a wooc ti' tuunich.

¹²Jesús tu núucaj ti': Cu ya'alic xan le Quili'ich Dzíibo': Ma' a túuntic u yóol Yuumtzil a Ku.

¹³Le ca tu yilaj le kasilba'al ma' tu caxtic bix u túuntic u yóol Jesuse', ca j náachchaj ti' leti' dze'edzec kiin.

¹⁴Jesuse' suunaj Galilea chuup yéetel u páajtalil Quili'ich Pixan, yéetel cu yúuchul tzicbal tu yo'olal ti' tuláacal le lu'umo'.

¹⁵Ca'ansajnaj cajal caaj tu sinagogailo'ob yéetel nojbe'encunsa'ab tumen tuláacal máaco'ob.

¹⁶Ca j bin Jesús Nazaret le caaj tu'ux ch'íiji'. Tu kiinil sábado j ooc sinagoga je'el bix suuquile', ca j wa'alaj u xoc le Quili'ich Dzíibo'.

¹⁷Ca j dza'ab ti' le dzíibil ju'un tu beetaj aj bóobat Isaíaso'. Ca tu je'aj ca tu caxtaj le tu'ux dzíibta'an beya':

¹⁸U pixan Yuumtzile' ti' yaan tin wóokole', tumen u jun páaycunsmajen u ti'al in dzáa ma'alob péectzil ti' le óotzilo'obo', u túuxtmajen in dzáa toj óolal ti' le cu mukyaj u pucsi'ikalo'obo', u ti'al in ka'ayt jáalkabil ti' le kala'ano'obo', u ti'al in dzáa u sáasil le ch'óopo'obo', u ti'al in jáalkabt le loobilta'ano'obo',

¹⁹yéetel u ti'al in tze'ect u ma'alob kiinil Yuumtzil.

²⁰Jesús ca tu nup'aj le dzíiba'an ju'uno' ca tu dzáaj ti' u j áantajil le sinagogao' ca j culaji'. Tu yo'olal láili' táan u pacta'al tumen tuláacal le máaco'ob yano'ob ca'ach te j sinagogao',

²¹leti'e' t'aanaje' ca tu ya'alaj: Bejela'e' dzo'ocpaja'an ta táane'ex le dzíibo'oba'.

²²Tuláacalo'ob táan u yutzil t'aano'ob tu yo'olal Jesús, yéetel jaka'an u yóolo'ob tu yo'olal le t'aano'ob jach jadzutztac cu ya'alico'. Táan xan u káatico'ob tu baatzilo'ob: ¿Ma' wa u paal José lela'?

²³Jesuse' tu ya'alaj ti'ob: Jach in wojel bíin in ca'aj a wa'ale'ex teen le queet t'aana': J dzacyaj, dzacabáa ta juunal. Yéetel yaan a wa'alique'ex tene': Le ba'ax t u'uyaj ta beetaj Capernaume', beet xan way ta lu'ume'.

²⁴Ca túun tu ya'alaj: Jach tu jaajil quin wa'alic te'ex mina'an aj bóobat cu yutzil ka'amal tu caajal.

²⁵Tu jaajil quin wa'alic te'ex, ya'ab x quimen íichamo'ob, yaan ca'ach tu caajil Israel tu kiinilo'ob aj bóobat Elías le ca j p'áat ma' tu káaxal ja' ichil óox p'éel ja'abo'ob ca'a tac táan chúumuc, yéetel yanchaj ca'ach wi'ij ti' tuláacal le lu'umo',

²⁶ba'ale' Kue' ma' tu túuxtaj Elías tu yicnal mix jun túul ti' le x quimen íichamo'ob yano'ob ca'ach tu caajil Israelo' ba'ale' tu yicnal chéen jun túul cajacbal ca'ach Sarepta, naadz ti' u caajil Sidón.

²⁷Yaan xan ca'ach Israel ya'ab koja'ano'ob ti' jáaway tu kiinilo'ob aj bóobat Eliseo, ba'ale' mix jun túul ti' leti'ob dza'aqui', chéen Naamán leti'e' Siria u taal.

²⁸Le ca tu yu'ubajo'ob le ba'alo'oba', tuláacal le yano'ob te j sinagogao' sen kuuxilnajo'ob.

²⁹Ca j líiko'obe' ca tu jóokesajo'ob Jesús te j caajo' ca tu biso'ob tu xuul ca'anlil le múul tu'ux yaan le caajo' u ti'al u léench'intico'ob ca'ach te'elo'.

³⁰Ba'ale' Jesuse' j máan chúumuc ti'obe' ca j bini.

³¹Ca j bin Jesús Capernaum, jun p'éel caaj ti' Galilea, te'elo' tu ca'ansaj le máaco'ob tu kiinil sábadoo'.

³²Jaka'an yóolo'ob ca'ach ti' bix u ca'ansaj, tumen cu t'aan yéetel páajtalil.

³³Te j sinagogao' yaan ca'ach jun túul máac yaan kaakas pixan ti'e' ca j awatnaji:

³⁴P'ato'oni'. ¿Ba'axten ca wocsicabáa t éetel, Jesús Nazaretil? ¿Taalech wa u ti'al a xu'ulso'on? Tene' in kaj óolech, in wojel xan teech u Quili'ich Ku.

³⁵Jesús tu keyaj le kaakas pixano', táan u ya'alic: ¡Mac a chi' yéetel p'at le máaca'! Le kaakas pixan túuno' ca tu lúubsaj lu'um le máac actáan ti' leti'obo', ca jóok ti' leti' mix tu beetaj loob ti'i'.

³⁶Tuláacal ja'ak u yóolo'ob, táan u ya'alico'ob ca'ach tu baatzilo'ob: ¿Ba'ax t'aanil le beyo'oba'? Tumen le máaca' yéetel nojoch páajtalil cu ya'alic ca jóokoc le kaakas pixano'obo', leti'ob xane' cu jóokolo'ob.

³⁷Bey túuno' jóok u tzicbalil Jesús ti' tuláacal u bakpach le caajo'.

³⁸Jesús jóok ti' le sinagogao' ca j ooc tu yotoch Simón. U suegra Simone' jach koja'an ca'ach yéetel chocwil, ca j káat óolta'ab ti' Jesús tu yo'olal leti'.

³⁹Jesús j chinlaj tu yóokole' ca tu keyaj le chocwilo' ca tu luksaj ti'. Tu séeblaquil j líik le co'olelo' ca jo'op' u meyajtico'ob.

⁴⁰U ti'al u bin kiine' tuláacal le máaxo'ob yaan u koja'ano'ob ti' jejeláas koja'anilo'obo' tu taaso'ob tu yicnal Jesús. Leti' túune' tu dzáaj u kab tu yóokol jujun túulilo'obe' ca tu tojquintaj u yóolo'ob.

⁴¹Te ichil le koja'ano'obo' jóok xan ya'abcach kaakas pixano'obe' táan u yawato'ob yéetel táan u ya'alico'ob: Teech u paalech Ku. Ba'ale' Jesús tu keyaj le kaakas pixano'obo' yéetel ma' tu cha'aj u t'aano'obi', tumen leti'obe' u yojelo'ob leti'e' Cristo.

⁴²U ti'al u sáastale' jóok Jesús ti' le caajo' ca j bin ti' jun p'éel táanxel cúuchil. Ba'ale' jo'op' u caxta'al tumen le máaco'obo' yéetel j kucho'ob te tu'ux yano', tumen ma' u káato'ob ca xi'iqui',

⁴³ba'ale' jesús tu ya'alaj ti'ob: Kaabéet in dzáic u ma'alob péectzilil u ajawil Ku ti' u láak caajo'ob xan, tumen le u biilal túuxta'abilaquen.

⁴⁴Bey túun máanic Jesús táan u tze'ec ti' u sinagogailo'ob Galilea.