Read Yucateco San Lucas 5 Bible Online

San Lucas 5 - Yucateco bible

San Lucas 5

¹Jun téene' ti' yaan Jesús tu jáal u ka'anabil Genesaret, táan u ya'ach'al tumen ya'abcach máaco'ob. Lelo'oba' j kucho'ob u yu'ubo'ob u tze'equil u t'aan Ku.

²Tu yilaj Jesús ca'a p'éel cheem tu jáal le ka'anabo'; le j chuc cayo'obo' dzo'oc u jóokolo'ob, táan u p'o'ico'ob u káanil u chuc cayo'ob.

³Ca túun j ooc Jesús ichil jun p'éel ti' le cheemo'obo', le ca'ach u ti'al Simón, ca tu ya'alaj ti' ca u chan náachcunt jun p'íit ti' u jáal le ja'o'. j culaj túun Jesús te j cheemo' ca jo'op' u ca'ansic le máaco'obo'.

⁴Le ca j dzo'oc u ca'ansaje'. ca tu ya'alaj ti' Simón: Bis le cheem tu taamil le ja'o', ca pul u káanil a chuc caye'ex, ca chuc caynaque'ex.

⁵Simón tu núucaj ti': Aj ca'anbesaj, j meyajnajo'on bul áakab, mixba'al t chucaj, ba'ale' bey teech a'alica' bíin in ca'aj in pul le u káanil chuc caya'.

⁶Le ca tu beeto'obe', ti' jach ya'abil cay tu chuco'obe', tac u káanil u chuc cayo'ob óolac jáatac.

⁷Ca túun tu béech' kabto'ob u yéet meyajo'ob yano'ob te tu láak cheemo' tu yo'olal ca taalac áantbilo'ob. Ca j taalo'obe' ca tu chupo'ob tu ca'a p'éelal le cheemo'obo'. Ti' jach chuupilo'obe' ta'aytac u búululo'ob ca'achi.

⁸Le ca tu yilaj Simón Pedro lela', xolaj tu táan Jesús ca tu ya'alaj ti': P'aten, in Yuum, tumen tene' j keban wíiniquen.

⁹Tumen Simón Pedroe' jaka'an u yóol ca'achi', bey xan tuláacal le yano'ob ca'ach yéetelo', tu yo'olal le chuc cay dzo'oc u beetico'obo'.

¹⁰Bey xan Jacobo yéetel Juan u paalalo'ob Zebedeo, u yéet meyajo'ob simón, jaka'an u yóolo'ob. Ba'ale' Jesús tu ya'alaj ti' Simón: Ma' a ch'a'ic sajaquil, bejela'e' bíin a ca'aj a chuc wíinico'ob.

¹¹Le ca túun tu biso'ob le cheemo'ob te j lu'umo', tu p'ato'ob tuláacale' ca j bino'ob yéetel Jesús.

¹²Ca'aliquil ti' yaan Jesús ti' jun p'éel le caajo'obo' j kuch jun túul máac koja'an ti' jáaway, le ca tu yilaj Jesuse' xolaje' ca tu takaj u yich lu'um, táan u ya'alic: Yuumtzil, wa a káate', je'el u páajtal a dzáic in toj óolale'.

¹³Jesús túune' ca tu dzáalkabtaj, táan u ya'alic: In káati. Quin dzáic a toj óolal. Tu séeblaquil j luk le jáaway ti' le koja'ano'.

¹⁴Jesús tu kuben t'antaj ti' ma' u tzicbaltic ti' mix máac lela'. Ba'ale' xeen, e'esabáa ti' le aj kiino'obo', kub xan tu yo'olal a toj óolal le siibal u ya'almaj Moisés, u ti'al ca ila'ac tumen máaco'ob dzo'oc a wutztal.

¹⁵Ba'ale' sen ki'itpaj u yutzil péectzilil Jesús, yéetel ya'ab máaco'ob cu much'talo'ob ca'ach u ti'al u yu'ubo'ob u ca'ansaj yéetel tu yo'olal u tojquinta'al u yóolo'ob ti' u koja'anilo'ob.

¹⁶Ba'ale' Jesuse' bin tu'ux mixmáac yaan u ti'al ca payalchi'inac.

¹⁷Jun p'éel kiine' táan u ca'ansaj Jesús, ti' culucbal ca'ach dze'edzec fariseobi' yéetel u aj ca'anbesajilo'ob le a'almaj t'aano'. Lelo'oba' taalaja'ano'ob ti' tuláacal u mejen caajilo'ob Galilea yéetel Judea, bey xan ti' Jerusalén. U páajtalil Kue' táan u ye'esicubáa ti' Jesús iquil u dzáic u toj óolal le koja'ano'obo'.

¹⁸Ca túun j kuch dze'edzec máaco'ob u cuchmajo'ob jun túul máac ti' kóochche' tumen tu'uch' u wíinclil. U káato'ob ca'ach u yocso'ob ichil le najo' tu yo'olal u dzáico'ob tu táan Jesús,

¹⁹ba'ale' ma' tu caxtajo'ob tu'ux u yocsico'obi', tumen jach ya'ab máac yani'. Ca túun j na'aco'ob yóokol le najo', ca tu jolo'obe' ca tu yéemsajo'ob le koja'an yanil tu kóochche'ilo' chúumuc ti' le máaco'obo', tu táan Jesús.

²⁰Le ca tu yilaj Jesús u yocsaj óolalo'obe', tu ya'alaj ti' le koja'ano': Wíinic, sa'atsa'an a kebano'ob.

²¹Je'el túuna' le u aj ca'anbesajilo'ob le a'almaj t'aano' yéetel le fariseobo' jo'op' u tucultico'ob: ¿Máax le máac cu ya'alic ba'al ti' Yuum Ku iquil u t'aan beya'? Mix máac cu páajtal u sa'atsic kebano'ob wa ma' chéen Ku.

²²Ba'ale' Jesuse' u yojel ba'ax cu tucultico'ob, ca tu ya'alaj ti'ob: ¿Ba'ax teen ca tuucule'ex beyo'?

²³¿Ba'ax asab séeba'an u ya'ala'al: Sa'atsa'an a kebano'ob, wa u ya'ala'al: Líiken xíimbalnen?

²⁴Ja'alibe' bíin in ca'aj túun in we'es te'ex yaan páajtalil ti' u Paal Máac u ti'al u sa'atsic kebano'ob. Ca túun tu ya'alaj ti' le máac tu'uch' u wíinclilo': Ti' teech quin wa'alic: líiken, ch'a'a kóochche'ilo', xeen ta wotoch.

²⁵Tu séeblaquil le máac tu'uch' u wíinclilo' j líik tu táano'ob ca tu ch'a'aj le kóochche' tu'ux chilicbal ca'acho' ca j bin tu yotoch táan u qui'iqui' t'antic Ku.

²⁶Tuláacalo'ob jaka'antac u yóolo'ob, ca tu qui'iqui' t'antajo'ob Ku. Ichil u sajaquilo'obe' tu ya'alajo'ob: Bejela'e' dzo'oc c ilic jak óolal ba'alo'ob.

²⁷Cu dzo'ocol lela' jóok Jesuse' ca tu yilaj jun túul máac cu kamic páatano'ob, Leví u kaaba', culucbal te tu'ux cu bo'ota'al le páatano'obo', ca tu ya'alaj ti': Tzaypachteni'.

²⁸J líik túun Leví, ca tu p'ataj tuláacale' ca j bin tu paach Jesús.

²⁹Cu dzo'ocole' tu beetaj leví jun p'éel nojbe'en janal tu yotoch u ti'al Jesús. Culucbalo'ob xan janal tu yéetelo'ob ya'abcach máaxo'ob cu kamico'ob páatano'ob, yéetel u láak máaco'ob.

³⁰Ba'ale' le fariseobo' yéetel u aj ca'anbesajilo'ob le a'almaj t'aano' jo'op' u ch'inch'in t'aano'ob tu contra u aj canbalo'ob Jesús, táan u ya'alico'ob: ¿Ba'axten ca janale'ex yéetel ca wukule'ex tu yéetel le j kam páatano'obo' bey xan tu yéetel le j kebano'obo'?

³¹Jesuse' tu núucaj ti'ob: Ma' kaabéet dzaac ti' le máaxo'ob toj yóolo'obo', ba'ale' ti' le máaxo'ob koja'antaco'obo'.

³²Tene' ma' taalaja'anen in t'aan le máaxo'ob utzo'obo' ba'ale' le máaxo'ob kebano'obo' tu yo'olal u kexic u tuuculo'ob.

³³Je'el túuna' leti'obe' tu káat chi'ito'ob ti' Jesús: ¿Ba'axten u aj canbalo'ob Juane' cu su'ukino'ob yéetel cu sen payalchi'ob, bey xan le u aj canbalo'ob le fariseobo', ba'ale' a aj canbalo'obe' mantadz táan u janalo'ob yéetel táan u yukulo'ob?

³⁴Jesús tu núucaj ti'ob: ¿Je'el wa a beetique'ex u su'ukin le máaxo'ob t'ana'ano'ob u ti'al jun p'éel dzo'ocol beel ca'aliquil le íichamtzil ti' yaan tu yéetelo'obo'?

³⁵Ba'ale' bíin taalac u kiinil le quéen luksa'ac le íichamtzil ichilo'obo', le túun quéen su'ukinaco'ob.

³⁶Tu ya'alaj ti'ob xan le queet t'aana': Mixmáac cu xotic jun xéet' túumben nook u ti'al u pakacoctic jun p'éel úuchben nook. Wa cu beetic beyo' cu kascuntic le túumben nooko', cu dzo'ocol xane' le túumben nooko' ma' ma'alob u yila'al yéetel le úuchben nooko'.

³⁷Mixmáac xan cu láalic túumben vino ti' úuchben kéewelo'ob. Wa cu beetic beyo', le túumben vinoo' cu tejic le kéewelo'obo', le vinoo' cu wéequel, le kéewel xano'' cu kastal.

³⁸Le beetique' kaabéet u láala'al le túumben vinoo' ti' túumben kéewelo'ob; beyo' mix jun p'éel cu kastali'.

³⁹Mixmáac túun cu dzo'ocol u yukic le úuchben vinoo' cu yóoltic u yuk le túumbeno', tumen yaan u ya'alic: Asab ma'alob le úuchbeno'.