Read Yucateco San Lucas 6 Bible Online

San Lucas 6 - Yucateco bible

San Lucas 6

¹Jun p'éel u kiinil sábadoe', ca'aliquil táan u xíimbal Jesús ichil pakalo'obe', u aj canbalo'obe' táan u bin u cachico'ob u yi'ij trigo. Cu dzo'ocole' cu yoxo'ontico'ob u ti'al u jaanto'ob.

²Dze'edzec túun ti' le fariseobo' tu káato'ob ti'ob: ¿Ba'axten ca beetique'ex meyaj ma' utz u beeta'al tu kiinil sábadoi'?

³Jesús tu núucaj ti'ob: ¿Ma' wa a xocmaje'ex ba'ax tu beetaj David le ca'aj wi'ijchaj leti' yéetel le máaco'ob yaan tu yéetele'?

⁴J ooc tu kulnaj Ku ca tu ch'a'aj le quili'ich waajo'obo' ca tu jaantaj ca tu dzáaj xan ti' le máaco'ob yaan yéetele', quex chéen aj kiino'ob utz u jaantico'ob le waajo'.

⁵Tu ya'alaj xan ti'ob: U Paal Máaque' yaan xan páajtalil ti' tu yóokol sábado.

⁶Tu láak sábadoe' j ooc Jesús sinagoga ca jo'op' u ca'ansaj. Te'elo' ti' yaan jun túul máaque' tiquin u x no'oj kabil.

⁷Le túun u aj ca'anbesajilo'ob le a'almaj t'aano' yéetel le fariseobo' táan ca'ach u ch'úuctico'ob Jesús u ti'al ca u yilo'ob wa je'el u tojquintic u yóol sábadoe', tu yo'olal u yantal ba'ax u taquico'ob u pool.

⁸Ba'ale' leti'e' u yojel ca'ach ba'ax cu tucultico'obe', ca tu ya'alaj ti' le máaco': Wa'alen way chúumuque'. Le máaco' j líike' ca j wa'alaji'.

⁹Ca túun tu ya'alaj Jesús ti' le u láak máaco'obo': Bin in ca'aj in beet te'ex jun p'éel káat chi': ¿Ba'ax unaj u beeta'al sábado, ba'ax utz wa ba'ax kaas? ¿U to'ocol cuxtal wa u luksa'al?

¹⁰Jesuse' tu pactaj túun tuláacal le máaco'ob yaan tu bakpacho', ca tu ya'alaj ti' le máaco': Tich' a kabo'. Le máaco' tu beetaj beyo' ca j utzchaj u kabo'.

¹¹Ba'ale' le u láak máaco'obo' kuuxilnajo'ob ca jo'op' u káatic tu baatzilo'ob ba'ax je'el u páajtal u beetico'ob ti' Jesuse'.

¹²Ti' le kiino'obo' j bin Jesús payalchi' ti' jun p'éel múul. Bul áakab táan u payalchi' ti' Yuum Ku.

¹³Cu sáastale' tu t'anaj u aj canbalo'ob ca tu yéeyaj doce ichilo'obe', apóstolo'ob úuchic u t'anico'ob.

¹⁴Leti' le je'elo'oba': Simón, le máax dzaab xan u kaaba'int Pedro; Andrés, u yíidzin Simón; Jacobo yéetel Juan, Felipe yéetel Bartolomé;

¹⁵Mateo yéetel Tomás; Jacobo u paal Alfeo; Simón, le máax oca'an ca'ach ichil cananistaob;

¹⁶Judas u sucu'un Jacobo; Yéetel Judas Iscariote, le máax j kub Jesuso'.

¹⁷Jesús j éem ti' le múul yéetelo'obo' ca je'el ti' jun p'éel táax lu'um yéetel u aj canbalo'ob. Te'elo' ya'ab máaco'ob taalaja'ano'ob ti' tuláacal u lu'umilo'ob Judea, Jerusalén yéetel tu jal u ka'anabil Tiro yéetel Sidón. Le je'elo'oba' kucha'ano'ob u ti'al u yu'ubo'ob u ca'ansaj Jesús, yéetel u ti'al ca dza'acaco'ob ti' u koja'anilo'ob.

¹⁸Le máaxo'ob cu mukyajo'ob ca'ach ti' kaakas pixano'obo' cu tojquinta'al yóolo'ob xan.

¹⁹Tuláacal máac u káat ca'ach u dzáalkabt Jesús, tumen leti'e' cu dzáic toj óolal yéetel u páajtalil.

²⁰Ca tu pactaj Jesús u aj canbalo'obe' ca tu ya'alaj ti'ob: Qui' a wóole'ex te'ex óotzile'ex, tumen a ti'ale'ex u ajawil Ku.

²¹Qui' a wóole'ex te'ex bejela' wi'ije'exe', tumen bíin na'ajcunsa'aque'ex. Qui' a wóole'ex te'ex bejela' ca wokole'exe', tumen cu dzo'ocole' yaan a che'eje'ex.

²²Qui' a wóole'ex te'ex le quéen ch'a'a p'ecta'aque'ex tumen máaco'ob, le quéen jóokesa'aque'ex, le quéen po'och'oque'ex, le quéen cúulpachcunsa'ac a kaaba'ex bey jun p'éel ba'al kaas tu yo'olal u Paal Máac.

²³Ba'ale' te'exe' sen qui'imacchajac u yóol a pucsi'ikale'ex ti' le kiino'ob le quéen beeta'ac ti' te'ex le ba'alo'oba', tumen yaan u yantal te'ex jun p'éel nojoch bo'olal te j ca'ano'. Tumen bey úuchic u beeta'al ti' le aj bóobato'ob tumen u úuchben láaktzilo'ob le máaco'obo'.

²⁴Ba'ale' óotzile'ex te'ex ayikale'ex, tumen dzo'oc u yantal a qui'imac óolalile'ex.

²⁵Óotzile'ex le na'aje'ex bejela'a', tumen bíin wi'ijchajque'ex. Óotzile'ex le ca che'eje'ex bejela'a', tumen bíin okolnaque'ex yéetel yaayaj óolal.

²⁶Óotzile'ex le quéen qui'iqui' t'anta'aque'ex tumen tuláacal máac, tumen bey tu beetajo'ob u úuchben láaktzilo'ob ti' le ma' jaajil aj bóobato'obo'.

²⁷Ba'ale' ti' te'ex ca wu'uyiquene'exe' quin wa'alic: Yaabilte'ex a aj p'eeco'ob, beete'ex utz ti' le máaxo'ob cu ch'a'a p'ectique'exo'.

²⁸Utzil t'ante'ex le máaxo'ob tu ya'alic te'ex ba'al kaaso', payalchi'inene'ex tu yo'olal le máaxo'ob cu poch'ique'exo'.

²⁹Wa yaan wa máax cu lajiquech ti' jun tzéel a wiche', suut xan le u láak jun tzéel ti'o'. Wa xan máax cu toquic teech a pimpim nooke', p'at xan u yáalal a nook ti'.

³⁰Je'el máax ca u káat teech wa ba'axe', dzáa ti', yéetel ti' le máax xan cu luksic teech ba'al a ti'ale' ma' a káatic ti'.

³¹Beete'ex ti' u láak máaco'ob le ba'ax a káate'ex ca u beeto'ob leti'ob ti' te'exe'.

³²Wa te'ex ca yaacuntique'ex chéen le máaxo'ob yaacuntmaile'exo', ¿ba'ax u ma'alobil ca beetique'ex? Tumen tac le kaakas máaco'obo' bey u beetico'obo'.

³³Wa xan ca beetique'ex utz chéen ti' le máaxo'ob beetic te'ex utzo', ¿ba'ax u ma'alobil ca beetique'ex? Tumen le kaakas máaco'obo' bey xan u beetico'obo'.

³⁴Wa xan ca dzáique'ex majnil wa ba'ax chéen ti' le máaxo'ob ca tucultique'ex a kamique'ex wa ba'axe', ¿ba'ax utzil ca beetique'ex? Tumen le kaakas máaco'obo' cu dzáico'ob majnil ti' le kaakas máaco'obo' u ti'al u kamico'ob xan wa ba'ax ti' leti'ob.

³⁵Ba'ale' te'exe' unaj a yaacuntic a p'ec óolale'ex, unaj a beetique'ex utz yéetel a dzáique'ex majan quex ma' a pa'atique'ex u su'utul te'ex u jeel. Beyo' bíin a kame'ex jun p'éel nojoch bo'olal yéetel bíin paalalta'aque'ex tumen Junab Ku yaan te j ca'ano'. Tumen leti' xane' cu ch'a'ic óotzilil ti' le chich u pucsi'ikalo'obo' yéetel ti' le kaakas máaco'obo'.

³⁶ch'a'ex óotzilil je'el bix a Taataex cu ch'a'ic óotzilile'.

³⁷Ma' a p'is óoltique'ex mix máac; beyo' ma' táan a p'is óolta'ale'ex tumen Ku. Ma' a xot kiine'ex, beyo' ma' táan a xot kinta'ale'ex tumen Ku. Sa'atsajnene'ex, beyo' bíin sa'atsa'aque'ex tumen Ku.

³⁸Dza'ex ti' u láak máaco'ob beyo' bíin dza'abac ti' te'ex tumen Ku. Bíin u dzáa te'ex jun p'éel ma'alob p'isib, chuca'an, chíicta'an yéetel chuup. Bíin meyajnac ti' Yuum Ku le p'isib cu meyaj ti' te'ex u ti'al a p'isique'ex u láak máaco'ob.

³⁹Jesús tu ya'alaj le queet t'aan ti'oba': ¿Cu páajtal wa u bisa'al jun túul ch'óop tumen u láak ch'óop? ¿Ma' wa tu ca'a túulalo'ob je'el u lúubulo'ob tu joomlil lu'umi'?

⁴⁰Mix jun túul aj canbal tip'a'an ti' u aj ca'anbesaj, ba'ale' le quéen dzo'ococ u canbale' bíin béeyac je'el bix ti' u aj ca'anbesajo'.

⁴¹¿Bix anil cu páajtal a wilic le chan sojol yaan tu yich a sucu'uno', Ba'ale' ma' táan a wilic le che' yaan ta wicho?

⁴²Wa ma' ta wilic le che' yaan ta wicho, ¿Bix je'el u páajtal a wa'alic ti' a sucu'une': Sucu'un, cha'aten in jóokesic le chan sojol yaan ta wicho'? ¡J ca'a p'éel ich! Jóokes táanil le che' yaan ta wich techo', ca páatac a wilic ma'alob le chan sojol yaan tu yich a sucu'uno'.

⁴³Mina'an mix jun cúul ma'alob che' cu dzáic kaakas icho'ob, mina'an xan jun cúul kaakas che' cu dzáic ma'alob icho'ob.

⁴⁴Tumen yéetel u yich cu kaj óolta'al jun cúul che'. Ma'atech u t'o'ocol higo'ob ti' ki'ixo'ob, mix xan uvaob ti' j muc.

⁴⁵Jun túul máac utze' ba'alo'ob ma'alobtac cu ya'alic, tumen le utzo' ti' yaan tu pucsi'ikale'; bey xan jun túul máac kasa'ane' cu ya'alic ba'alo'ob kaastac, tumen le kaaso' ti' yaan xan tu pucsi'ikale'. Tumen cu ya'alic yéetel u chi'e' le ba'ax chupmajil u pucsi'ikalo'.

⁴⁶¿Ba'axten ca wa'alique'ex teen: Yuumtzil, Yuumtzil, cu dzo'ocole' ma' táan a beetique'ex le ba'ax quin wa'alico'?

⁴⁷Bin in ca'aj in wa'al te'ex ti' máax chica'an le máax cu taal ti' tene', cu yu'ubic yéetel cu beetic le ba'axo'ob quin wa'alico':

⁴⁸Chica'an ti' jun túul máac tu beetaj jun p'éel naj, chéen ba'ale' táanile' tu páanaj jach taame' ca tu dzáaj u chuunpakil yóokol tuunich. Le ca'aj píitmáan u ca'anlil u ja'il le áalcab ja'o', le ja'o' j bin yéetel muuk tu yóokol le najo', ba'ale' ma' j páatchaj u péecsiqui', tumen yóokol tuunich yaan u chuunpakil.

⁴⁹Le máax cu yu'ubic ba'ax quin wa'alic ba'ale' ma' tu beetique' chica'an ti' jun túul máac tu beetaj u yotoch chéen yóokol lu'um, ma' tu dzáaj u chuunpakili'. Le ca'aj píitmáan u ca'anlil u ja'il le áalcab ja'o' ca bin tu yóokol le naj yéetel muuko', ca tu jenaj ca j p'áat mixba'al u biilal.