Read Yucateco San Lucas 7 Bible Online

San Lucas 7 - Yucateco bible

San Lucas 7

¹Le ca j dzo'oc u ca'ansic Jesús le máaco'obo', j bin Capernaum.

²Yaan ca'ach te'elo' jun túul centurión yaan jun túul u aj meyaj jach u yaacuntmaj, ta'aytac u quíimil tumen koja'an.

³Le ca tu yu'ubaj le centurión u yúuchul t'aan tu yo'olal Jesuse', tu túuxtaj dze'edzec u anciano'ob le judíobo' u ti'al u káat óolto'ob ti' Jesús ca taalac u dzáa toj óolal ti' le u j meyajo'.

⁴Leti'obe' tu nadzajuba'ob tu yicnal Jesús ca jo'op' u jach káat óoltico'ob ti', táan u ya'alico'ob: Le centuriona' cu najmaltic ca a wáante.

⁵Tumen jach u yaabiltmaj c caajal, leti' xan túuxt ca beeta'ac c sinagoga.

⁶Jesús túune' ca j bin tu yéetelo'ob. Ba'ale' le ca j náadz ti' le najo', le centuriono' tu túuxtaj dze'edzec u amigo'ob u ti'al a'alic ti' Jesús: Yuumtzil, ma' a ch'a'ic u meeyjul a taal, tumen ma' táan in najmatic ca ocoquech tin wotoch.

⁷Le beetique' mix tin wóoltaj j bin teen in caxantechi'. Chéen a túuchi'itic u t'aanile', cu yutztal le in j meyajo'.

⁸Tumen tene' tu yáanal páajtalil yanen xan, chéen ba'ale' yaan xan in soldado'ob tu yáanal in páajtalil. Le quéen in wa'al ti' jun túul ti'ob ca xi'ique' cu bin, le quéen in wa'al ti' u láak ca taalaque' cu taal, le quéen xan in wa'al ti' in aj meyaj ca u beet wa ba'axe', cu beetic.

⁹Le ca tu yu'ubaj Jesús lela', ja'ak u yóol tu yo'olal le máaco'; ca tu pactaj le máaco'ob tzaypachtico' ca tu ya'alaj: Jach tu jaajile' mix ichil u cajnáalilo'ob Israel in wilmaj sen nojoch ocsaj óolal je'el bix le yaan ti' le máaca'.

¹⁰Le ca j suunajo'ob tu yotoch le centurión le máaxo'ob j túuxta'abo'obo' tu yilajo'ob dzo'oc u yutztal le aj meyajo'.

¹¹Cu dzo'ocol lela', Jesuse' táan u bin ti' jun p'éel caaj, Naín u kaaba'. U yéet bin xan u apóstolo'ob yéetel u láak ya'ab máaco'ob.

¹²Le ca j náadz ti' le caajo', tu yilaj táan u bisa'al j mucbil jun túul quimen. Lela' jun túulili' paal ti' u maama, máax quimen u yíicham. Ya'ab u máaquilo'ob le caaj cu bino'ob yéetelo'.

¹³Le ca j ila'ab tumen Yuumtzile' ch'a'ab óotzilil ti', ca j a'ala'ab ti': Ma' a wokol.

¹⁴Ca túun j náadz Jesuse', ca tu dzáalkabtaj le caajao'. Ca j wa'alaj le máaxo'ob cuchmajilo'. Ca tu ya'alaj Jesús ti' le quimeno': Xi'ipal, teen a'alic teech: ¡Líiken!

¹⁵Le máax quimen ca'acho' j culaji' ca jo'op' u t'aan. Jesús túune' ca tu kubaj ti' u maama.

¹⁶Le ca tu yilajo'ob lela', láaj sajacchajo'ob, ca jo'op' u qui'iqui' t'antico'ob Ku, táan u ya'alico'ob: Jun túul nojoch aj bóobat dzo'oc u chíicpajal ichilo'on. Tu ya'alajo'ob xan: Ku dzo'oc u taal u ti'al u yáant u caajal.

¹⁷Ti' tuláacal Judea Yéetel tu bakpacho'obe' ojéelta'ab ba'ax dzo'oc u beetic Jesús.

¹⁸Juane' tu yojéeltaj tuláacal le ba'alo'oba', tumen u j tzaypacho'obe' tu tzicbaltajo'ob ti'. Ca tu t'anaj ca'a túul ti'obe'.

¹⁹Ca tu túuxtajo'ob tu yicnal Jesús u ti'al u káato'ob ti' wa jach jaj leti' le Cristo bíin taalaco' wa unaj u pa'atico'ob u yaanal.

²⁰U j túuchi'ob Juane' tu nadzajuba'ob tu yicnal Jesús, ca tu ya'alajo'ob ti': Juan Bautistae' tu túuxtajo'on u ti'al káatic teech wa teech le Cristo bíin taalaco' wa unaj c pa'atic u yaanal.

²¹Jach ti' le súutuc kuchico'obo' Jesuse' tu dzáaj u toj óolal ya'abcach máaco'ob ti' u koja'anilo'ob bey xan ti' pakbe'en koja'anilo'ob; tu jóokesaj kaakas pixano'ob, tu dzáaj xan u sáasilil yich ya'ab ch'óopo'ob.

²²Jesuse' tu núucaj ti'ob: Xeene'ex ca a wa'ale'ex ti' Juan le ba'ax dzo'oc a wilique'ex yéetel dzo'oc a wu'uyique'exo'; tzicbalte'ex ti'e' le ch'óop'obo' cu paacato'ob, móoch ooco'obo' cu xíimbalo'ob, le yaan jáaway ti'obo' cu tojquinta'al u yóolo'ob, le cóoco'obo' cu yu'ubajo'ob, le quimeno'obo' cu ca'a púut cuxquinta'alo'ob, yéetel ti' le óotzilo'obo' cu tzicbalta'al u péectzil tocsajil.

²³Utz yanil máax ma' tu lúubul u yóol tin wo'olal.

²⁴Le ca j bino'ob le máaxo'ob j túuxta'abo'ob tumen Juano', cáaj u t'aan jesús tu yo'olal Juan, táan u ya'alic: ¿Ba'ax bine'ex a wile'ex te x tocoy lu'umo'? ¿Jun cúul jalal cu yúumta'al tumen iik?

²⁵Wa ma'e', ¿ba'ax j bine'ex a wile'ex? ¿Jun túul máac u búuquintmaj co'ocoj nooko'ob? Te'exe' a wojele'exe' le máaxo'ob cu búuquintico'ob co'ocoj nooko'obe' yéetel cuxa'ano'ob ich ayikalile' ti' yano'ob tu najil ajawo'obe'.

²⁶Tu dzooque' ¿ba'ax j bine'ex a wile'ex? ¿Jun túul aj bóobat? Bey, jach jaj, jun túul máac asab nojoch ti' jun túul aj bóobat.

²⁷Tu yo'olal Juan cu ya'alic le Quili'ich Dzíibo': Quin túuxtic in aj bisaj t'aan táanil ti' teech u ti'al u nu'ucbes a beel.

²⁸Quin wa'alic te'exe', ichil tuláacal máaque', ma' yanac aj bóobat asab nojoch ti' Juan Bautistai. Ba'ale' le máax asab chichan tu ajawil Kue' asab nojoch ti' Juan.

²⁹Tuláacal le máaco'obo' yéetel le j kam páatano' tu kamajo'ob ocja' ti' Juane', le ca tu yu'ubajo'ob lela' tu kaj óolto'ob Kue' jach toj.

³⁰Ba'ale' le j fariseob yéetel u aj ca'anbesajilo'ob le a'almaj t'aano', le máaxo'ob ma' dza'an ocja' ti'ob tumen Juane', tu dzajo'ob jun tzéelil ba'ax tu yóoltaj u beet Ku tu yo'olalo'ob.

³¹Yuumtzile' tu ya'alaj: ¿Ba'ax yéetel quin in quetbes u máaquilo'ob le kiino'oba'? ¿Ti' ba'ax chica'ano'ob?

³²Chíica'ano'ob ti' le mejen paalal cu cutalo'ob j báaxal te j kíiwico' yéetel cu paclan yaawticuba'ob: T paxaj te'ex le jalalo', ma' óokotnaje'exi'; okom kaaynajo'on, ma' okolnaje'exi'.

³³Tumen j taal Juan Bautista ma'atech u jaantic waaj mix u yukic vino, te'exe' ca wa'alique'exe' yaan kaakas pixan ti'.

³⁴Cu dzo'ocole' ca j taal u Paal Máac, máax cu janal yéetel cu yukul; te'exe' ca wa'alique'exe' jach ya'ab u janal yéetel u yukul; cu biscubáa yéetel j kebano'ob bey xan yéetel j kam páatano'ob.

³⁵Ba'ale' u yojéelaj Kue' cu yila'al ti' le máaxo'ob yaan u na'ato'obo'.

³⁶Jun túul ti' le fariseobo' tu káat óoltaj ti' Jesús ca taalac janal tu yéetel. Jesús túune' j taal tu yotoch le fariseo' ca j culaj tu cúuchil janal.

³⁷Jun túul co'olel kaas u cuxtal cajacbal xan ti' le caajo', le ca tu yojéeltaj dzo'oc u bin Jesús tu yotoch le fariseo', j kuch túun táan u taasic jun p'éel chan p'úul chuup yéetel qui'iboc aceite.

³⁸Táan u yokol ca tu nadzubáa tu yooc Jesús ca tu ch'ulaj yéetel u ja'il u yich. Cu dzo'ocole' tu tiquincunsaj yéetel u tzo'otzel u pool, tu dzu'udzaj, ca tu wecaj xan le qui'iboc aceite' tu yóokolo'.

³⁹Le fariseo' máax t'anmail janal Jesuse' tu yilaj lela' ca tu tucultaj: Le máaca' wa jaj jun túul aj bóobate' je'el u na'atic máax machic yéetel ba'ax co'olelil lela', tumen jun túul co'olel kaas u cuxtal.

⁴⁰Ca túun j a'ala'ab ti' le fariseo tumen Jesuso'; Simón, yaan in wa'alic teech jun p'éel ba'al. Le fariseo túune' ca tu núucaj: A'al teen aj ca'anbesaj.

⁴¹Jesús tu ya'alaj: Ca'a túul máaco'obe' u p'axmajo'ob taakin ti' jun túul máac cu dzáic taakin majantbil. Jun túule' quinientos taakino'ob u p'axmaj ti'; le u láako' cincuenta.

⁴²Ba'ale' mix jun túul páatji' u bo'otic u p'axi'. Le máac túun p'axa'ano' tu sa'atsaj u p'ax tu ca'a túulal. A'al teen: ¿Máacalmáac ti' le ca'a túulo'ob cun asab yaabiltico'?

⁴³Simone' tu núucaj: Bey in wóol leti' le máax asab ya'ab sa'atsa'ab ti'o'. Jesuse' tu ya'alaj ti': Jaj a t'aan.

⁴⁴Jesús túune' tu pactaj le co'olelo' ca tu ya'alaj ti' Simón: ¿Táan wa a wilic le co'olela'? J ooquen ta wotoche', ma' ta dzáaj teen ja' u ti'al in wooqui', ba'ale' le co'olela' dzo'oc u ch'ulic yéetel u ja'il u yich, dzo'oc xan u tiquincunsic yéetel u tzo'otzel u pool.

⁴⁵Ma' ta dzu'udzajeni', ba'ale' leti'e' ma' xu'uluc u dzu'udzic in wooqui'.

⁴⁶Ma' ta dzáaj aceite' tin pooli', ba'ale' leti'e' tu wecaj qui'iboc aceite' tin wooc.

⁴⁷Le beetic xan quin wa'alic ti' teech, u nojoch yaacunaj le co'olela' cu ye'esic u ya'abil u kebano'obe' sa'atsa'an; ba'ale' le máax jun p'íit cu sa'atsa'al ti'e', jun p'íit u yaacunaj cu ye'esic.

⁴⁸Ca tu ya'alaj ti' le co'olelo': Sa'atsa'an a kebano'ob.

⁴⁹Le máaxo'ob túun t'ana'ano'ob, culucbalo'ob tu yéetel te'elo', jo'op' u ya'alico'ob tu baatzilo'ob: ¿Máax ta t'aan le máaca' cu sa'atsic tac kebano'ob?

⁵⁰Ba'ale' Jesús tu ya'alaj ti' le co'olelo': Dzo'oc a to'ocol tumen ocsaj óolnajech. Xeen yéetel jéedzel.