Read Yucateco Deuteronomio 10 Bible Online

Deuteronomio 10 - Yucateco bible

Deuteronomio 10

¹Yuumtzil túune' tu ya'alaj ti' teen: póol ta kabil ca'a p'éel jaajay tuunicho'ob jach je'el bix le yáax ca'a p'éele', beet xan jun p'éel ba'asche', cu dzo'ocole' ca na'acal te j witz j t'aan tin wéetelo'.

²Tene' bin in ca'aj in dzíibt tu yóokol le jaajay tuunicho'obo', le t'aano'ob in dzíibtmaj ca'ach ti' le yáax ca'a p'éel ta pa'ajo', ca dza'ob ichil le ba'asche'o'.

³Tin beetaj túun jun p'éel ba'asche' yéetel u che'il acacia, ca tin póolaj ca'a p'éel jaajay tuunicho'obe', ca j na'aquen te j witzo'.

⁴Yuumtzile' tu dzíibtaj ti' le ca'a p'éel jaajay tuunicho'ob le diez nu'ucbe'en t'aano'ob, je'el bix tu dzíibtilac le yáax jun p'éel le ca tu t'aanaje'ex te j witz tu chúumuc le káake', le ca j láaj much'laje'exe'. Tu dzaj teen,

⁵tene' j éemen te j pu'uco'; cu dzo'ocole' tin dzaj le jaajay tuunicho'ob ichil le ba'asche' je'el bix tu ya'alajilac teen Yuumtzilo', tac bejela'a' ti' yano'obi'.

⁶Le j israelitaobo' jóoko'ob Beerot-bene-jaacane', ca tu ch'a'ajo'ob u tojil Mosera. Te'elo' ti' j quíim Aarón, ca j mu'uqui', ca j p'áat Eleazar u paal u jeelint u ti'al u beet u aj kiinil.

⁷Te'elo' j jóoko'ob u ti'al u bino'ob Gudgoda, cu jóokolo'ob Gudgodae' ca j bino'ob Jotbata, jun p'éel cúuchil tu'ux sen yaan ja'.

⁸Te túuno' Yuumtzile' tu yéeyaj u ch'i'ibalo'ob Leví u ti'al u cúuch queléembalto'ob u ba'asche'il u nup t'aan Yuumtzil, bey xan u ti'al j antal tu táan u beet u meeyjul kultaj yéetel u ti'al u pul u qui' t'aan tu kaaba' Yuumtzil je'el bix u beetico'ob tac bejela'o'.

⁹Le t o'olal le j levitaobo', ma' yanchaj ba'al u ti'alo'obi', mix u kamba'albáilo'ob, tumen u kamba'albáilo'ob leti'obe', Yuumtzil, lelo' bey u ya'almajil Yuumtzil.

¹⁰Tene' j yanchajen ti' le witz cuarenta kiino'ob yéetel cuarenta áakabo'ob, je'el bix le ca yáax binene'e', cu dzo'ocole' ti' le jeedzac je'ela' tu ch'e'en xiquintajen xan Yuumtzil, beyo' ma' tu yóoltaj u xu'ulse'exi',

¹¹ba'ale' tu ya'alaj teen: Xeen nu'ucbesabáa u ti'al j bin tu táan le caaj, u ti'al ca xi'ico'ob u ch'a'ob le múuch' caaj tin séeb chi'itaj in dzáic ti' u máanja'an ch'i'ibalo'obo'.

¹²Bejela'a' túune' j israelita'ex: ¿Ba'ax cu káatic te'ex Yuumtzil a Kuex? Chéen u káat ca a tzique'ex yéetel ca xíimbalnaque'ex tu beelo'ob; ca a yaabilte'ex yéetel ca a kulte'ex yéetel tuláacal a pucsi'ikale'ex bey xan yéetel a pixane'ex,

¹³dzo'ocbese'ex u nu'ucbe'en t'aano'ob yéetel u nup t'aano'ob, u ti'al ca xi'ic te'ex utzil.

¹⁴Dza'ex ta tuucule'ex u ti'al Yuumtzil a Junab Kuex le ca'ano' yéetel le ba'ax asab ca'anal ti' le ca'ano', le lu'umo' bey xan tuláacal ba'ax yaan yóokolcaab.

¹⁵Ba'ale' Yuumtzil tu yéeyaj u táan óoltic a j máanja'an ch'i'ibale'exe', ca tu yabiltajo'ob, cu dzo'ocole' tu yéeyaje'ex te'ex u ch'i'ilancabo'ob leti'ob ichil tuláacal u láak caajo'ob je'el bix a wilique'ex tac bejela'a'.

¹⁶Dzáa ta pucsi'ikale'ex u chíiculal le nup t'aana', p'at a dzu'uyquintic a pucsi'ikale'ex.

¹⁷Tumen Yuumtzil a Kuexe' leti' u Junab Ku tuláacal kuob, u Yuumtzil xan tuláacal yuumtzilo'ob; leti'e', nojoch Junab Ku yóokol tuláacal, sen nucuch páajtalil yéetel u sajbe'entzilil, ma' tu yilic jela'an mix máac, mix tu cha'ic u ma'anal yéetel siibalo'ob;

¹⁸cu beetic ba'al toj yéetel le j ma' taata bey xan yéetel le x quimen íichamo', cu yabiltic, cu tzéentic yéetel cu dzáic u nook le j táanxel lu'umil cu cajtal ichile'ex.

¹⁹Te'exe' yaabilte'ex le j táanxel lu'umilo', tumen te'exe' a beetmaba'ex j táanxel lu'umile'ex Egipto.

²⁰Nojbe'encunte'ex Yuumtzil a Kuex, kulte'ex chéen leti'; ocsaj óolte'ex, le quéen a beete'ex jun p'éel jalach t'aane', beete'ex tu kaaba'.

²¹Tumen leti' bíin a nojbe'encunte'ex; leti' a Kuex tu beetaj ta wéetele'ex nucuch jak óol ba'alo'ob ta wilaje'exo'.

²²Le ca j kucho'ob a máanja'an ch'i'ibale'ex Egiptoe', chéen setenta máaco'ob ca'achi', ba'ale' bejela'e' dzo'oc u beeta'al u ya'abtal bey u eekilo'ob ca'an tumen Yuumtzil a Kuexo'.