Read Yucateco Deuteronomio 11 Bible Online

Deuteronomio 11 - Yucateco bible

Deuteronomio 11

¹Te'exe', yaabilte'ex Yuumtzil a Kuex, dzo'ocbese'ex u túuchi' t'aano'ob, u ya'almaj t'aano'ob, u ca'anbesajo'ob yéetel u nu'ucbe'en t'aano'ob.

²Utzil kaj óolte'ex bejela'e', u tzol xiquino'ob Yuumtzil a Kuex, máax ma' kaj óolta'an mix ila'ac tumen a paalale'exo'ob. Utzil kaj óolte'ex u nojochil yéetel u yilajbe'en páajtalil,

³bey xan le chíiculalo'ob yéetel le nucuch ba'alo'ob tu beetaj Egipto ti' faraón yéetel ti' tuláacal u lu'umilo'ob,

⁴le ba'ax tu beetaj ti' u aj ba'atelo'ob le egipciob, ti' u tzíimino'ob yéetel ti' u bolanil u ba'atelo'ob, bey xan bix úuchic u bulico'ob ichil u ja'il chac ka'anab le ca tu ch'a'apachte'exo'obe'. Yuumtzil láaj xu'ulsajo'ob jun puli'.

⁵Ka'ajac te'ex ba'ax tu beetaj ta wéetele'ex te x tocoy lu'um tac kuchique'ex waye';

⁶bey xan ba'ax tu beetaj ti' Datán yéetel Abiram, u paalal Eliab u ch'i'ilancab Rubén, bey xan bix je'epajic le lu'um u ti'al u láaj lu'ukulo'ob pa'ate' yéetel tuláacal u yotoch, u chuybil paselo'ob yéetel tuláacal ba'ax yaan ti'ob, tu táan yich tuláacal Israel.

⁷Te'exe' ta wilaje'ex ta wichile'ex tuláacal le nucuch ba'alo'ob tu beetaj Yuumtzilo'.

⁸Dzo'ocbese'ex bejela'a' tuláacal le nu'ucbe'en t'aano'ob dzo'oc in dzáic te'exa', ca mu'uka'anchajque'ex u ti'al a ti'alintique'ex le lu'um bin a ca'aj a jáanpayte'exo',

⁹u ti'al xan a cuxtale'ex ya'ab ja'abo'ob te j lu'um tu jalach t'antaj Yuumtzil u dzáic ti' a máanja'an ch'i'ibale'ex yéetel ti' u paalalo'obo'; lu'um tu'ux cu yáalcab leche yéetel caab bey u yáalcab ja'e'.

¹⁰Le lu'um bíin a jáanpayte'exo', ma' bey je'el bix u lu'umil Egipto tu'ux jóoke'exo'; te'elo' le quéen pakalnaque'ex ca'ache' yaan a jóoyabtique'ex yéetel a wooque'ex,[3] je'el bix u beeta'al ich paakalo'obe',

¹¹ba'ale' le lu'um bíin a ti'alinte'exo', u lu'umil witzo'ob yéetel táax lu'umo'ob, cu jóoyabta'al tumen u ja'il ca'an.

¹²Jun p'éel lu'um cu cananta'al tumen Yuumtzil; ti' u dzaama u paacat bul ja'abi'.

¹³Wa te'ex ca dzo'ocbesique'ex le nu'ucbe'en t'aano'ob dzo'oc in dzáic te'ex bejela'a', bey xan ca yaabiltique'ex Yuumtzil a Kuex, u ti'al a kultique'ex yéetel tuláacal a pucsi'ikale'ex yéetel xan tuláacal a pixane'exe',

¹⁴leti'e' bíin u beet u taal tu kiinile' u káaxal u ja'il j xaman ca'an, bey xan u ja'il ja'aja'al, u ti'al ca joche'ex a trigoe'ex bey xan ca yanac te'ex u kab uva yéetel aceite.

¹⁵Bíin u beet xan u nuuctal u xíiwilo'ob a cool u ti'al a wacaxe'ex tu yo'olal u chuca'an yantal a janale'ex.

¹⁶Ba'ale' bic táabaque'ex a cha'ex a tu'usule'ex; bic xi'ique'ex a p'ate'ex u beel Yuumtzil u ti'al a kultique'ex u láak kuob; ma' bíin chinlaque'ex tu táano'obi',

¹⁷tumen Yuumtzile' je'el u p'u'ujul ta wéetele'exe', ma' xan bíin u beet u káaxal ja'i'; le lu'um túuno' ma' bíin u dzáa u yichi', cu dzo'ocole' séeba'an bíin quíimique'ex te j ma'alob lu'um bíin u ca'aj u dzáa te'ex Yuumtzil.

¹⁸T'ilcunse'ex le t'aano'oba', ta pucsi'ikale'ex yéetel ta tuucule'ex; kaxe'ex bey chíiculalo'ob ta kabe'ex yéetel ta táan jo'ole'ex.

¹⁹Ca'anbese'ex a paalale'ex yéetelo'ob je'el bix ta wotoche'exe', bey te j bejo', bey xan le quéen chilaque'ex j wenel yéetel le quéen líikique'exe'.

²⁰Dzíibte'ex tu yocomilo'ob yéetel tu jool najil a wotoche'ex,

²¹u ti'al beyo' a cuxtale'ex yéetel u cuxtal a paalale'ex te' j lu'um tu séeb chi'itaj Yuumtzil u dzáic ti' a máanja'an ch'i'ibale'exo', bíin sen ya'abac je'el bix ya'abil u ja'abil le ca'an tu yóokol le lu'umo'.

²²Wa ca dzo'ocbesique'ex yéetel táan óolal tuláacal le nu'ucbe'en t'aano'ob quin dzáic te'ex bejela'a' a dzo'ocbese'exa' yéetel xan ca yaabiltique'ex Yuumtzil a Kuex yéetel ca máanaque'ex ti' tuláacal u beelo'ob yéetel chuca'an óolal,

²³Yuumtzile' bíin u tzel ta táane'ex tuláacal le múuch' caajo'obo', bíin xan a jáanpayte'ex caajo'ob asab ya'abo'ob yéetel asab mu'uka'ano'ob ti' te'ex.

²⁴Tu'ux bíin jéedzec a wooque'exe' ti' bíin p'áataque'exi'. U xu'ukilo'obe' bíin cáajac líikbal x tocoy lu'ume' tac Líbano, líikbal tu yáalcab ja'il Éufratese' tac tu ka'anabil Mediterraneo.

²⁵Mix máac bíin páatac u ba'atel ta wéetele'ex. Yuumtzil a Kuexe' bíin u beet u ki'itpajal yéetel jak óolal, sajaquil yéetel x pakil tuláacal tu'ux bíin máanaque'ex je'el bix u jalach t'antmailo'.

²⁶Bejela'a' ti' le kiina' quin dzáic te'ex a yéeye'ex le qui' t'aano'oba', wa le loolob t'aano'oba':

²⁷Qui' t'aan, wa ca wu'uyaj t'antique'ex u nu'ucbe'en t'aano'ob Yuumtzil a Kuex dzo'oc u ya'alic te'ex bejela'a'.

²⁸Loolob t'aan, wa ca bine'ex tu paach kuob ma' a kaj óole'ex, u ti'al a j ma' u'uyaj t'antique'ex u nu'ucbe'en t'aano'ob Yuumtzil a Kuex, bey xan wa ca tzelicaba'ex ti' le bej quin we'esic te'ex bejela'a'.

²⁹Le quéen u beet Yuumtzil a Kuex a woocle'ex te j lu'um bíin a jáanpayte'exo', bíin a dza'ex le qui' t'aan tu witzil Gerizim, bey xan le loolob t'aano', tu witzil Ebal.

³⁰Le witzo'obo' ti' yano'ob tu tzéel jordán, tu tojil j chikin, tu lu'um le j cananitaob caja'ano'ob te j táax kóom lu'ume', actáan ti' Gilgal tu tzéel u béequilo'ob More.

³¹Te'exe', ta'itac a ch'actique'ex Jordán u ti'al a jáanpaytique'ex le lu'um u jalach t'antmaj Yuumtzil u dzáic te'exo'. Le quéen dzo'ococ a jáanpaytique'exe', cajlaque'exi',

³²dzo'ocbese'ex tuláacal in wa'almaj t'aano'ob yéetel in tzolbe'en t'aano'ob dzo'oc in kubic te'exo'.