Read Yucateco Deuteronomio 13 Bible Online

Deuteronomio 13 - Yucateco bible

Deuteronomio 13

¹Wa cu yantal ichile'ex jun túul aj bóobat wa aj ilaj chíicul, cu yilic jun p'éel chíiculal wa máactzile',

²wa ca kuchuc úuchul le ba'ax tu tze'ectajo, wa ca kuchuc u ya'al te'ex: ¡Co'one'ex meyajtic u láak kuob ma' a kaj óole'exi', ca u ya'al te'ex xan; co'one'ex ca c kulte'exo'ob!

³Ma' a táan óoltique'exo'ob. Tumen Yuumtzil a Junab Kuexe', táan u túuntique'ex u ti'al u yojéeltic wa a yabilme'ex yéetel tuláacal a pucsi'ikale'ex yéetel xan tuláacal a wóole'ex.

⁴Tzaypachte'ex yéetel nojbe'encunse'ex chéen Yuumtzil a Kuex; dzo'ocbese'ex u nu'ucbe'en t'aano'ob, u'uye'ex u t'aan yéetel kulte'ex chéen leti'; cuxlene'ex chéen yéetel leti'.

⁵Leti' le aj bóobat wa aj ilaj chíicul beya', bíin xot kinta'ac j quíimil tumen tu ya'alaj ma' a wu'uyaj t'antique'ex Yuumtzil a Kuex, máax jóokese'ex ti' le palitzil yanile'ex ca'ach Egiptoo', bey xan tumen tu yóoltaj u beet a p'atque'ex le bej u nu'uctmaj te'ex Yuumtzil a Kuexo'. Beyo' ca xu'ulsique'ex le kaas bíin yanac ichile'exo'.

⁶Quex a sucu'un, wa a j xibil paal, wa a x ch'upul paal, wa a yabilaj atan, wa quex a nadza'an éet óol ca u mucul a kult u láak kuob ma' a kaj óol mix kaj óola'an tumen a taataobi',

⁷je'el bix u kuob le caajo'ob yano'ob naadz wa náach u bakpachmaje'exo'ob, tu naklic jun tzéel le lu'umo' wa tu naklic jun láak tzéel,

⁸ma' a kubicabáa ti' u yaanal dzíibolalo'ob u ti'al a beet ba'ax u káat mix a táan óoltic; mix a ch'a'ic óotzilil ti'; ma' a yaj óoltic mix a ta'aquic;

⁹ba'ale' quíimse. Teech ca bin a yáax líikes a kab tu yóokol, u ti'al a loobintic, cu dzo'ocole' tuláacal le caajo'.

¹⁰Quíims yéetel ch'iin tumen tu yóoltaj u tzelech tu beel Yuumtzil a Ku máax jóokesech Egipto tu'ux palitzilta'anech ca'achi'.

¹¹Beyo' tuláacal Israel bíin u yojéelt u ti'al u ch'a'ic sajaquil u beet ba'ax kaas je'el bix jun p'éel ba'al beya'.

¹²Wa ti' je'el ba'alac caajil ti' le u dzaama te'ex Yuumtzil a Kuex u ti'al a cajtale'ex ca wojéeltique'ex dzo'oc u yantal

¹³máaco'ob cu j ma' u'uyaj t'antico'ob Ku yéetel cu beetico'ob u p'a'atal u beel Ku tumen u cajnáalilo'ob a caajal, tu yo'olal táan u jíilta'alo'ob u kulto'ob kuob ma' kaj óola'ano'obe',

¹⁴unaj a xakal ilique'ex ma'alob. Wa ca wilique'ex jaaj le tzicbalo'ob tumen dzo'oc u beeta'al le p'ecbe'en ba'alo',

¹⁵te'ex túune' bíin a quíimse'ex yéetel u yej máascab u cajnáalilo'ob le caajo', bey xan tuláacal u ba'alche'ilo'ob yaan xan a xot kintique'ex u ti'al láaj xu'ulsa'al tuláacal ba'ax yaan ichil.

¹⁶Ca much'quintique'ex tuláacal u co'ocoj ba'alo'ob chúumuc u kíiwiquile', ca láaj tóoquique'ex le caaj pa'ate' yéetel tuláacal le ba'ax ta luksaje'ex ti' le aj p'eeco', ca láaj tóoquique'ex bey ti'ibil óolal ti' u nojbe'enil Yuumtzil a Kuex. Le caajo' bíin p'áatac x lab caajil tuláacal ja'abo'ob, mix bikin bíin ca cáajbesa'ac.

¹⁷Ma' u p'áatal te'ex mix ba'al ti' le dzo'oc u xot kinta'al u ti'al j xu'ulsa'alo', beyo' mix bikin bíin kuuxchajac Yuumtzil ta wéetele'ex; ba'ale' bíin u ch'a'a' óotzilil ti' te'ex u ti'al u beetic a ya'abtale'ex, je'el bix tu séeb chi'itaj ti' a máanja'an ch'i'ibale'exe',

¹⁸wa te'ex ca u'uyaj t'antique'ex Yuumtzil a Kuex bey xan ca dzo'ocbesique'ex u nu'ucbe'en t'aano'ob dzo'oc in dzáic te'ex bejela'a' yéetel ca beetique'ex ba'ax utz tu yich.