Read Yucateco Deuteronomio 14 Bible Online

Deuteronomio 14 - Yucateco bible

Deuteronomio 14

¹Te'exe' u paalale'ex Yuumtzil a Kuex. Ma' a loobiltique'ex a wíinclile'ex, mix a dziquic a táan jo'ole'ex quéen quíimic wa máaxe'.

²Tumen te'exe' jun p'éel caaj jun páaycunta'ane'ex u ti'al Yuumtzil a Kuex; leti'e' tu yéeyaje'ex ichil tuláacal u caajilo'ob lu'um u ti'al u caajalte'ex.

³Ma' jaantique'ex mix ba'al ma' utz u jaantalo'obi'.

⁴Lela' u kaaba' le ba'alche'ob cu páajtal a jaantique'exa': Wacaxo'ob, j tamano'ob, mejen j tamano'ob,

⁵tuláacal u jejeláasil quéejo'ob

⁶Je'el u páajtal a jaantique'ex tuláacal ba'alche'ob cu ca'a jach'o'ob ca xa'ay u maayo'obe',

⁷ba'ale' ma' unaj a jaantique'ex le ba'alche'ob cu ca'a jaach'o'ob, ba'ale' j ma' ca'a xa'ay u maayo'obo', leti' lelo'oba': Camello, j chi'ic, j tzuub; unaj a wa'alique'ex ma' utz u jaantalo'obi', tumen quex cu ca'a jach'o'obe', ma' ca'a xa'ay u maayo'obi'.

⁸Kéekene' quex tumen ca'a xa'ay u maaye', ma' tu ca'a jach'. Unaj a wa'alique'ex ma' janalbe'en ba'alche'i'. Ma' a jaantique'ex u bakel le ba'alche'oba', mix a machique'ex u quimenilo'ob.

⁹Le ba'alche'ob cajnáalo'ob ich ja'o', bíin páatac a jaantique'ex le yaan u sóolo'ob yéetel yaan u xiiko'ob u ti'al báabo'ob,

¹⁰ba'ale' ma' a jaantique'ex le mina'an u sóolo'ob mix u xiiko'ob u ti'al u báabo'ob; unaj a wa'alique'ex ma' janalbe'en ba'alche'o'obi'.

¹¹Bíin páatac a jaantique'ex tuláacal janalbe'en ch'íich'o'ob,

¹²ba'ale' yaan jujun túul ma' unaj a jaantique'exi': le j cóoto', le j cach baaco', u j cóotil ja',

¹³le j ch'úuy yéetel u jejeláasil j e'epip,

¹⁴tuláacal u jejeláasil j ch'oomo'ob,

¹⁵j noj áalcab ch'íich', j xooch', j sac boc, tuláacal u jejeláasil j ch'úuyo'ob,

¹⁶le j tunculuchujo', le j sac boc boox u poolo', le cuutzil ja'o',

¹⁷le p'ontoo', siidz kuux, j ch'oom

¹⁸le p'ontoo', p'ot x cusam mix le soodzo'.

¹⁹Tuláacal mejen ikelo'ob, unaj a wa'alique'ex ma' janalbe'eni'. Ma' u najmal a jaantique'exi'.

²⁰Ba'ale' le ch'íich'o'ob janalbe'eno'obo', je'el u páajtal a jaantique'exe'.

²¹Ma' a jaantique'ex j quimen ba'alche' le chéen cu quíimilo', tumen te'exe' jun p'éel caaj jun páaycuna'ane'ex u ti'al Yuumtzil a Kuex; ba'ale' je'el u páajtal u dza'abal ti' le j táanxel lu'umil cajnáal ichile'exe'. Je'el xan u páajtal a conique'ex ti' le táanxel lu'umil cu káatale'. Ma' chaquique'ex le chan j taman yéetel u kab yim u maama.

²²Tuláacal jujun ja'ab u najmal a jun páaycuntique'ex u diezmoil u jejeláas janalbe'en neeko'ob ca jochique'ex.

²³U diezmoil le trigo, u kab uva yéetel aceite, bey xan u yáax aal a x wacaxo'ob yéetel a x tamano'ob, bíin a jaante'ex tu táan Yuumtzil a Kuex te j cúuchil bíin u yéey u ti'al u kaaba' tu yo'olal a canique'ex a tzique'ex Yuumtzil mantadz.

²⁴Wa le quéen u qui'iqui' t'ante'ex Yuumtzil kabéet a xíimbale'ex ya'ab u ti'al a bisique'ex le diezmo tumen náach cajacbale'ex ti' le cúuchil u yéeymaj Yuumtzil u ti'al u kaaba'o',

²⁵ca conique'ex u diezmoil, ca bisque'ex u taakinil te j cúuchil u yéeymaj Yuumtzilo'.

²⁶Yéetel le taakino', je'el a manique'ex te j cúuchil le ba'axo'ob ca tuclique'ex kabéete': Wacaxo'ob, j tamano'ob, u kab uva, wa je'el ba'alac paj ukulile'; tuláacal ba'ax a káate'exe', ti' bíin a jaante'ex tu táan Yuumtzila' Kuexe', tumen bíin a beete'ex tich' kab múuch' yéetel a wotoche'ex.

²⁷Mix bikin unaj a kex óoltique'ex le j levitaob cajnáalo'ob ta caajalo', tumen leti'obe' ma' j dzaab u lu'umo'ob je'el bix te'exe'.

²⁸Tu jujun óox ja'ab unaj a jun páaycuntique'ex u diezmoil' le ja'abo', ca kalique'ex tu ch'iilil a caajale'ex.

²⁹Tu yo'olal le quéen talac le j levitaob ma' dzaab u lu'umo'ob, wa le táanxel lu'umil cajnáal ichile'ex, bey xan le ma' j taata yéetel le x quimen íichamo', bíin páatac u janalo'ob tac u na'ajtalo'ob. Beyo' Yuumtzil a Kuexe', bíin u qui' t'antic tuláacal ba'ax bíin a beete'exe'.