Read Yucateco Deuteronomio 16 Bible Online

Deuteronomio 16 - Yucateco bible

Deuteronomio 16

¹Le quéen kuchuc u winalil Abibe', kiinbese'ex u kiinilo'ob Táadz Máanbal u ti'al u nojbe'enil Yuumtzil a Junab Kuex, tumen ti' u áakabil le winalo' tu jóokese'ex Egipto, Yuumtzil a Kuex.

²Tu bulkiinilo'ob u kiinbesa'al le Táadz Máanbalo', bíin a táanbese'ex quíimsbil x wacaxo'ob yéetel x tamano'ob u ti'al Yuumtzil a Kuex te j cúuchil bíin u yéey u ti'al u kaaba'o'.

³Le ba'alche' quíimsa'ano' bíin a jaante'ex yéetel waaj x ma' levadura. Bul siete kiino'ob bíin a jaante'ex waaj x ma' levadura, lelo' u waajil mukyaj, tumen yanchaj a séeba'an jóokole'ex Egiptoo'; beyo' ca'aliquil cuxa'ane'exe' bíin ka'ajac te'ex le kiin ca j jóoke'ex Egipto'.

⁴Ti' le siete kiino'obo' ma' u najmal u yantal levadura ta cajtalile'exi'; le bak cu táanbesa'al tu yoocbal u yáax kiino', ma' u najmal u p'áatal mix jun p'íit u ti'al u láak kiini'.

⁵Ma' unaj a táanbesique'ex u quíimsbil ba'alche'ilo'ob Táadz Máanbali' ti' je'el ba'alac caajil ti' le bíin u dzáate'ex Yuumtzil a Kuexo',

⁶chéen ti' le cúuchil bíin u yéey u ti'al u kaaba'e', u najmal a táanbesique'ex tu yocbal kiin, tumen táan u t'úubul kiin ca jóoke'ex Egipto.

⁷Le bak táanbesa'ano' bíin a takancunte'ex u ti'al a jaante'ex ti' le cúuchil u yéeymaj Yuumtzil a Kuex, tu ja'atzcabil u láak kiine' ca sute'ex ta wotoche'ex.

⁸Bul siete kiino'ob bíin a jaante'ex waaj a x ma' levadura, tu siete kiine' ca kiinbesique'ex jun p'éel quili'ich much'tal ti' u nojbe'enil Yuumtzil a Kuex; ti' le kiino' ma' unaj a beetique'ex mix jun p'éel meyaji'.

⁹Le quéen máanac siete semanaob líikbal ti' le kiin cáajac u joochil trigoe',

¹⁰bíin a kiinbese'ex u kiin kujil semanaob u ti'al u nojbe'enil Yuumtzil a Kuex, bey xan bíin a táanbese'ex ti'ibil óolo'ob tu juunal a wóole'ex je'el bix buca'aj ba'ax dzo'oc u dzáic te'ex u qui' t'aan Yuumtzil a Kuexo'.

¹¹Bíin a beete'ex kiin kuj tu táan Yuumtzil a Kuex ti' le cúuchil u yéeymaj u ti'al u kaaba'e', múuch' yéetel a paalale'ex a palitzile'ex, bey xan le j levitaob, j táanxel lu'umilo'ob, j ma' taataob yéetel le x quimen íicham cajnáal ta caajale'exe'.

¹²Ka'ajac te'ex ta beetaje'ex xan a palitzilile'ex Egipto; let o'olale' láaj dzo'ocbese'ex in wa'almaj t'aano'ob.

¹³Le quéen dzo'ococ a jochique'ex le trigo yéetel xan a yedzique'ex u kaab a wo'och uvaexe', bíin a kiinbese'ex bul siete kiino'ob u kiin kujil máacano'ob.

¹⁴Qui'imacchajac a wóole'ex ti' le kiin kuj pa'ate' yéetel a paalale'ex, a palitzile'ex, bey xan le j levitaob, le j táanxel lu'umilo'ob, le j ma' taataob yéetel le x quimen íichamo'ob cajnáal ta caajale'exe'.

¹⁵Le kiin kuja' bíin a kiinbese'ex u ti'al u nojbe'enil Yuumtzil bul siete kiino'ob, ti' le cúuchil bíin u yéeye'; tumen Yuumtzil a Kuexe' bíin u qui' t'ante'ex ti' tuláacal u yich a meyaje'ex, te'ex xane', bíin sen qui'imacchajac a wóole'ex.

¹⁶Tuláacal j xiibil máaco'ob bíin xi'ico'ob óox téen jujun ja'ab tu táan Yuumtzil a Kuex ti' le cúuchil bíin u yéeye', u ti'al u kiinbesic le kiin kujo'oba': waaj x ma' levadura, semanaob yéetel u kiin kujil máacano'ob. Mix máac bíin xi'ic tu táan Yuumtzil x pikib kabil,

¹⁷bíin u bis u ti'ibil óolalilo'ob ti' le buca'aj ba'alo'ob dza'ab ti' tumen Yuumtzile'.

¹⁸Dza'ex aj ilaj tacpoolo'ob yéetel u nuuquilo'ob caaj ti' jujun p'éel le cajtalilo'ob bíin dzabac ti' u jujun p'éelil u múuch' cajtalil le j otochnáalo'ob, u ti'al u beeto'ob ti' le caajo' ba'ax no'oja'an yéetel ba'ax jaaj.

¹⁹Ma' u kechico'ob ba'ax toj mix u yilico'ob jela'an jun túul máac ti' u láak, mix u kamico'ob u bo'olal ta'acunaj si'ipil, tumen le kam bo'olal ta'acunaj si'ipilo' cu ch'óopquintic aj na'ato'ob bey xan cu kechic u t'aan máaco'ob toj u cuxtalo'ob.

²⁰Le ba'ax tu beel, chéen ba'ax tu beelo', u najmal a beetique'ex, u ti'al ca cuxlaque'ex bey xan a ti'alintique'ex le lu'um cu dzáic ti' te'ex Yuumtzil a Kuexo'.

²¹Ma' a pakique'ex mix jun cúul che' u ti'al a tziquique'ex mix jun p'éel beetbil ku, mix a nadzique'ex tu chúun u multuun Yuumtzil a Kuex.

²²Ma' a much'quintique'ex tuunicho'ob u ti'al u yúuchul x ma' ocsaj óolal kultaj, tumen lelo' u táaj p'ec Yuumtzil a Junab Kuex.