Read Yucateco Deuteronomio 17 Bible Online

Deuteronomio 17 - Yucateco bible

Deuteronomio 17

¹Ma' a táanbesique'ex u ti'al quíimsbil ba'alche' ti' Yuumtzil a Kuex mix jun túul j nuumil wacax wa j taman wa yaan ba'ax jela'an ti', tumen lelo' u táaj p'ec.

²Wa ti' jun p'éel le caajo'ob cu dzáic te'ex Yuumtzil a Kuex, ca nactáantique'ex jun túul j xiib wa co'olel táan u beetic ba'ax u p'ectmaj Yuumtzil, mix xan tu táan óoltic u nup t'aan

³tumen táan u kultic u láak kuob táan xan u xoltal tu táano'ob, tu táan kiin, wa tu táan uj, wa tu táan eeko'ob, ba'ax ma' u ya'almaj Yuumtzile',

⁴wa cu kuchul u tzicbalil ta xiquine'exe', xakal káat chi'ite'ex ma'alob le tzicbalo'; wa jaaj táan u beeta'al jun p'éel ba'al p'ecbe'en bey tu caajil Israelo',

⁵yaan u bisa'al tu táan u aj p'is óolo'ob le caajo' máax beet le p'ecbe'en ba'alo', bíin xot kinta'ac quíimil yéetel ch'iin.

⁶U xot kiinil quíimile' chéen je'el u béeytale' wa yaan ca'a túul wa óox túul máaxo'ob jaajcuntic, chéen tu yo'olal jun túul jaajcuntique', mix máac bíin xot kinta'ac j quíimil.

⁷Le aj jaajcunajo'obo', leti'ob bíin yáax ch'inic le máax xot kinta'an quíimilo', cu dzo'ocole' cu ch'i'inil tumen tuláacal le caajo'. Beyo' ca tzelique'ex tuláacal kaas ichile'ex.

⁸Wa yaan a wilique'ex jun p'éel talam paaclan tacpole', tu yo'olal quíimil wa ba'atel, wa loobquinaj wíinclil, wa je'el ba'axac cu yúuchul te j caajo', xeene'ex te j cúuchil u yéeymaj Yuumtzil a Kuexo'

⁹t'aanene'ex yéetel le aj kiino'ob levitaobo' bey xan yéetel u aj p'is óol caaj dza'an ti' le kiino', ca tzole'ex ti'ob le ba'ax úucho'. Leti'ob bíin u ya'alo'ob ba'ax xot kiinil bíin dza'abac,

¹⁰te'exe' bíin xot kiinaque'ex jach je'el bix bíin u tzolo'obe'.

¹¹Beete'ex jach je'el bix bíin u ya'alo'obe', ma' kexique'ex mix ba'al ti' le xot kiino'.

¹²Ba'ale' le máax bíin u beet ba'al chéen tu yo'olal u nonoj báil ma' tu dzo'ocbesic ba'ax tu ya'alaj le aj kiin máax meyajtic Yuumtzil, wa le ba'ax tu ya'alaj le aj p'is óolo', yaan u xot kinta'al j quíimil. Beyo' ca xu'ulsique'ex ba'ax kaas Israel,

¹³le quéen u yojéelt túun le caajo', bíin u ch'a'a sajaquil, bíin xan u p'at u beetic ba'ax yéetel nonoj báil.

¹⁴Wa le quéen ocoque'ex te j lu'um bíin u dzáa te'ex Yuumtzil a Kuex, tumen dzo'oc a jáanpaytique'ex u ti'al a cajtale'ex, ca kuchuc a wa'ale'ex: J káat ca yanac to'on jun túul ajaw u ti'al u méektáanto'on, je'el bix le yaan ti' le múuch' caajo'ob cajnáalo'ob t tzéela',

¹⁵Unaj a dzáique'ex u ti'al u ajawil a múuch' caaje'exe' jun túul a wéet caajale'ex le máax bíin yéeya'ac tumen Yuumtzil a Kuexe'. Ma' unaj a dzáique'ex u ti'al ajaw jun túul táanxel lu'umili', kabéet jun túul a wéet caajale'ex.

¹⁶Ba'ale' le ajawo' ma' unaj u yantal ya'ab u tzíimino'obi', mix unaj u túuchi'itic máaco'ob Egipto u ti'al u ya'abcuntic u tzíimino'obi', tumen Yuumtzile' u ya'almaj te'ex: Mix bikin bíin suunaque'ex tu ca'a téen ti' le bejo'.

¹⁷Mix xan unaj u yantal ya'ab co'olelo'ob ti', tu yo'olal ma' u p'atic in beel; mix unaj u yantal ti' ya'ab oro mix plata.

¹⁸Le quéen culac le ajaw tu jalach káanche'o', bíin u túuchi'it ca beeta'ac jun wáal u x ca'a dzíibil, je'el bix le yáax dzíibta'an le cu canata'al tumen le aj kiino'ob levitaobo'.

¹⁹Sáamsamal bíin yanac tu yicnal u x ca'a ju'unil le dzíiba', bíin u xoc sáamsamal tu kiinilo'ob u cuxtal, u ti'al u canic u tzic Yuumtzil u Ku, u ti'al ca u tzic tuláacal u ca'ansajilo'ob yéetel ca u dzo'ocbes u nu'ucbe'en t'aanilo'ob,

²⁰tu yo'olal ma' u tucultic wa asab nojoch ti' u chuucáan u yéet caajalo'ob mix u tzéelel ti' le nu'ucbe'en t'aano'obo'. Beyo', leti' yéetel u ch'i'ilancabo'obe', bíin sen úuchbenchajaco'ob u méektáano'ob Israel.