Read Yucateco Deuteronomio 18 Bible Online

Deuteronomio 18 - Yucateco bible

Deuteronomio 18

¹Le aj kiino'ob levitaob u ch'i'ibalo'ob Leví, ma' bíin dza'abac lu'umo'ob ti' leti'ob je'el bix u chuca'an j israelitaobo'. Bíin u tzéentuba'ob yéetel le ba'alche'ob cu quíimsa'alo'ob u ti'al j táanbesbil ti' Yuumtzil yéetel le ba'axo'ob u najmal u dza'abal ti'obe'.

²Ma' bíin dza'abac u lu'umo'ob je'el bix u yéet caajalo'obe', tumen u kamba'alba'obe' Yuumtzil, tumen bey u ya'almajilo'.

³Le ba'axo'ob unaj u dza'abal ti' le aj kiino'ob ti' le quíimsbil x wacaxo'ob wa mejen j tamano'ob cu dza'abal tumen le caajo', leti'elo'oba': Bíin dza'abac ti'ob u pu'uch, u cama'ach yéetel u x ca'a tzuuquel[4]

⁴bey xan u yáax icho'ob trigo, u kab uva, aceite yéetel le yáax tzo'otz cu ko'osol ti' le j tamano'obo';

⁵Tumen Yuumtzil a Kuex j yéeyo'ob, ichil tuláacal u chuca'an a múuch' cajtalil a wotochnáale'ex, tu yo'olal beyo', líikbal ti' u taataob tac u paalalo'obe' bíin yanac sáamsamal yáanal u kabo'ob u meeyjul u kulta'al Yuumtzil.

⁶Wa jun túul j leví cajnáal ti' je'el ba'alac a caajale'ex cu taactal u taal te j cúuchil u yéeymaj Yuumtzilo',

⁷bíin páatchajac u meyaj bey aj kiin tu kaaba' Yuumtzil, je'el bix u meyaj u chuca'an u láako'ob levitaob tu meeyjul Yuumtzile',

⁸bíin xan u kam le buca'aj janal cu kamic u láako'obe', bíin u kam xan le ba'ax bíin p'a'atac ti' tumen u taatae'.

⁹Le quéen dzo'ococ a wocole'ex te j lu'um bíin u dzáa te'ex Yuumtzil a Kuexe', ma' a beetique'ex le kaakas ba'alo'ob suuc u beetico'ob le múuch' caajo'obo'.

¹⁰Mix máac ichile'ex bíin u kub u paal u ti'al j máansa'al ich káak, mix u beeticubáa j meenil, mix u táabal u ya'al ba'axo'ob cu taal u kiinil, mix u beetic u j pulya'ajil,

¹¹mix u beetic u aj wáayil, mix u bin u káat chi'it le j chuchuc na'ato'ob, mix u káatanquil ti' pixano'ob, mix u t'aan yéetel quimeno'ob.

¹²Tumen Yuumtzile' u léem p'ec máaxo'ob beetic le ba'alo'obo'. Wa Yuumtzil a Kuex cu tojolch'intic ta táane'ex le múuch' caajo'obo', tumen leti'obe' suuc u beetico'ob ba'alo'ob sen kaaso'.

¹³Te'exe' unaj a wutzil biscaba'ex yéetel a Kuex.

¹⁴Le múuch' caajo'ob bíin u dzáate'exo', cu táan óoltico'ob máaxo'ob cu paticuba'ob u ya'alo'ob ba'ax cu taal u kiin yéetel le aj chuchuc na'ato'obo', ba'ale' te'exe' ma' bíin u cha'a' Yuumtzil a Kuex a beetique'ex beyo'.

¹⁵Yuumtzil a Kuexe' bíin u beet u jóokol ichile'ex jun túul aj bóobat je'el bix tena', unaj a wu'uyaj t'antique'ex.

¹⁶Tu jaajile' lela' leti' ta káataje'ex ti' Yuumtzil a Kuex tu lu'umil u witzil Horeb, le kiinac láaj much'laje'exe', ca ta wa'alaje'ex: Ma' c káat c u'uy u t'aan Yuumtzil Ku tu ca'a téeni', mix c ilic le káaka', tu yo'olal ma' c quíimil.

¹⁷Yuumtzil túune' tu ya'alaj teen: Ma'alob ba'ax dzo'oc u ya'alico'ob.

¹⁸Tene' bíin in beet u jóokol ichilo'ob jun túul aj bóobat je'el bix teche', jun túul u yéet caajalo'ob u ti'al u ya'alic ti'ob ba'ax bíin in wa'ale', bey xan ca u babal a'al ba'ax bíin in wa'al ti'.

¹⁹Tuláacal le máax ma' bíin táan óoltic ba'ax bíin u ya'al le aj bóobat tin kaaba'o', bíin in xot kinte.

²⁰Ba'ale' le aj bóobat cu ca'analtal yich u ya'alic t'aan tin kaaba'e', wa cu ya'alic ba'ax ma' in wa'almaj, wa cu quex cu t'aan tu kaaba' u láak kuobe', bíin xot kinta'ac j quíimil.

²¹Wa xan te'ex ca tucultique'ex: ¿Bix je'el u páajtal c ojéeltic wa u t'aan Yuumtzil cu ya'alique'? unaj a wojéeltique'ex lela':

²²Wa le ba'ax tu ya'alaj le aj bóobat tu kaaba' Yuumtzil ma' tu yúuchule', lelo' u chíiculal ma' Yuumtzil a'almajili', le aj bóobato' chéen j t'aanaj tu yo'olal u ca'anal ichil; let o'olale' ma' ch'a'ique'ex sajaquil ti'.