Read Yucateco Deuteronomio 2 Bible Online

Deuteronomio 2 - Yucateco bible

Deuteronomio 2

¹Cu dzo'ocole' j bino'on te x tocoy lu'um tu bejil chac ka'anab je'el bix tu ya'alajil Yuumtzilo', ca j máan ya'ab kiino'ob táan c xíimbal tu bakpach u witzilo'ob Seir.

²Yuumtzil túune' tu ya'alaj teen:

³Dzo'oc u sen xáantal xi'ic u bin a bakpachtique'ex le witzo'oba'; bejela'e' xeene'ex j xaman.

⁴A'al ti' le caaja': Te'exe' bin a ca'aje'ex j máan tu lu'umo'ob u ch'i'ibal Esaú, le cajacbalo'ob Seir, leti'obe' a láaktzile'exo'ob. Leti'obe' sajaco'ob ti' te'ex; ba'ale', p'il ma'alob a wiche'ex,

⁵ma' a ba'ateltique'exo'ob tumen tene' ma' bíin in dzáa te'ex mix jun xéet' u lu'umo'obi', tumen u witzilo'ob Seire', ba'al u ti'al u ch'i'ilancabo'ob Esaú. Tene' tin dzáa ti' leti'ob.

⁶Te'exe' bíin a káate'ex ca u cono'ob te'ex le janal kabéet, te'exe' bíin a bo'ote'ex ti'ob tac le ja' bíin a wuke'exe'.

⁷Yuumtzil a Kuexe' tu qui' t'anje'ex ti' tuláacal ba'ax dzo'oc a beetique'ex; tuláacal le cuarenta ja'abo'oba' ti' yanchaj ichile'ex u canant a xíimbale'ex ti' le nojoch x tocoy lu'um u ti'al ma' u bineltic te'ex mix ba'al.

⁸Cu dzo'ocole' j náachchajo'on tu bejil Arabá, Elat, yéetel Ezióon-gebere', ca j máano'on tu lu'umo'ob c láaktzilo'ob, u ch'i'ilancabo'ob Esaú u cajnáalilo'ob Seir, ca t bakpachtaj u ti'al c ch'a'ic u beel u x tocoy lu'umil Moab.

⁹Yuumtzil túune' tu ya'alaj teen: Ma' a chi'ichnaccunsique'ex mix a bin a ba'atelte'ex le moabitaobo', tumen u ch'i'ilancabo'ob Lot, ma' bíin in dzáa te'ex mix jun chan xéet' u lu'umo'obi'. Tene' tin dzaj ti'ob u ti'alinto'ob u lu'umil Ar.

¹⁰(Ti' le lu'uma' cajlajo'ob úuch ca'ach le emitaobe' nucuch máaco'ob yéetel sen ya'abo'ob, cu dzo'ocole' sen j ca'anal baaquelo'ob je'el bix u paalal j wa'apáach' Anaque'.

¹¹Tu jaajile' le máaco'obo' cu tucultico'ob ca'ache' refaitaob, quex tumen le j moabitaobo' cu ya'alico'ob emitaob.

¹²Ti' u lu'umil Seira' ti' cajlajo'ob ca'ach le j horeobo', ba'ale' u ch'i'ilancabo'ob Esaue' tu xu'ulsaj u cajnáalilo'ob le ca j ooco'ob ti' le lu'umo', ca j p'áato'ob cajtal je'el bix tu beetilac Israel yéetel le lu'um dzo'oc u dza'abal ti' tumen Yuumtzilo'.)

¹³Ca tu ya'alaj Yuumtzil: Bejela'e' j xíimbalnene'ex, ch'acte'ex u t'o'ol ja'il Zered.

¹⁴Ti' le kiina' jóoko'on Cades-barnea tac ti' le kiin ca t ch'actaj u t'o'ol ja'il Zerede', j máan treita yéetel ocho ja'abo'ob. Dzo'oquili' túun u quíimil tuláacal le c éet ja'abil j ba'atel máaco'ob yano'ob tu'ux cu yúuchul je'elel je'el bix tu séeb chi'itaj ca'ach Yuumtzilo'.

¹⁵U kab Yuumtzil j lúub yóokolo'ob tac úuchic u láaj quíimilo'ob.

¹⁶Le ca j quíim tuláacal le j ba'atel máaco'obo',

¹⁷t'aanaj Yuumtzile' ca tu ya'alaj teen:

¹⁸Bejela'e' bíin a ch'act u xu'ukilo'ob Moab u ti'al a bin Ar,

¹⁹ba'ale' le quéen a nuptáant le j amonitaob u ch'i'ilancabo'ob j Lote', ma' a chi'ichnaccunsico'ob, mix a pulicabáa tu yóokolo'ob, tumen ma' bíin in dzáa teech mix jun xéet' u lu'umo'obi', tumen dzo'oc in dzáic ti'ob u ti'alinto'ob.

²⁰(Le lu'uma' cu tuculta'al xan ca'ach u lu'um refaitaob, tumen úuch ca'ache' ti' cajlaj le refaitaob dza'ab u kaaba'into'ob zomzomeob[1] tumen le j amonitaobo';

²¹leti' ca'ache' jun p'éel nojoch caaj ya'ab u cajnáalilo'ob, sen ca'analo'ob xan je'el bix u paalal j wa'apáach' Anaque', ba'ale' j xu'ulsa'abo'ob tumen Yuumtzil tu chúumuc le j amonitaobo', ca j p'áato'ob leti'ob cajtal junpuli' te j lu'umo'.

²²Lelo' chica'an ti' le ba'ax tu beetaj u ch'i'ilancabo'ob Esaú cajnáalo'ob Seir le ca tu xu'ulsajo'ob le j horeob u ti'al u p'áatalo'ob cáajal te'elo'.

²³Bey xan úuchic ti' le heveob, cajacbalo'ob ca'ach tu cajtalilo'ob Gaza, xu'ulsa'abo'ob tumen le filisteob tu pa'atajo'ob Creta ca j taalo'ob cajtali'.)

²⁴Yuumtzile' tu ya'alaj: ¡Xíimbalnene'ex, ch'acte'ex u áalcab ja'il Arnón! Teen bíin in beet u lúubul ta kabe'ex Sehón amorreo u ajaw Hesbón, bey xan u lu'um. ¡Xeene'ex tu lu'um cáajse'ex a ba'atele'ex!

²⁵Líikbal ti' le kiina', bin in ca'aj in beet u lúubul sajaquil ti' tuláacal u cajnáalilo'ob le lu'um ta táane'exo'. Le quéen u yu'ubo'ob a tzicbalile'exe' bíin cáajac u quiquilaanquilo'ob tac u t'úubulo'ob ich yaayaj óol.

²⁶Líikbal tu x tocoy lu'umil Cademot tin túuchi'itaj jujun túul aj bisaj t'aano'ob ti' Sehón u ajawil Hesbón, u ti'al in wa'alic yéetel qui'imac óol beya':

²⁷Táan in tucultic in máan ta lu'um u ti'al in bin te j noj bej, ma' bíin j pe'echakt mix jun xéet' a lu'umi'.

²⁸Bíin c bo'ot teech yéetel taakin le janal kabéet to'one', bey xan le ja' bíin c uke'. Chéen táan c káatic ca cha'a' c káatal,

²⁹je'el bix tu cha'ajilo'ob u ch'i'ilancabo'ob Esaú u cajnáalilo'ob Seire', bey xan tu beetajo'ob le j moabitaob u cajnáalilo'ob Are', tac u dzo'ocbal c ch'actic u áalcab ja'il Jordán u ti'al ca kuchuco'on ti' le lu'um bíin dza'abac to'on tumen Yuumtzilo'.

³⁰Ba'ale' ajaw Sehone' ma' tu yóoltaj ca ch'acatnaco'on tu' lu'umi', Tumen Yuumtzil a Kuexe' tu beetaj u pechicubáa u ti'al u kubic ta kabe'ex je'el bix yanil tac bejela'e'.

³¹Yuumtzil túune' tu ya'alaj teen: Líikbal ti' le kiina' quin kubic ta kab Sehón yéetel tuláacal u lu'um; ooquene'exi' jáanpayte'ex ti'.

³²Sehone' jóok u nuptáanto'on yéetel tuláacal u aj ba'atelo'ob, u ti'al u cáajsic u ba'atel t éetel Jahasa;

³³ba'ale' Yuumtzil c Kue' tu beetaj u lúubul t kabe' ca t dzáanche'etaj leti', u paalal yéetel tuláacal u aj ba'atelo'ob.

³⁴Tuláacal u caajalo'ob j lúub t kabe' ca t xot kintaj u ti'al xu'ulsajil; t quíimsaj j xiibo'ob co'olelo'ob yéetel paalal; mix máac t p'ataj cuxa'an.

³⁵Chéen ba'axo'ob t ch'a'aj c ti'alinte, wacaxo'ob yéetel le ba'axo'ob co'oj u tojolo'ob t nactáanto'ob ti' le caajo'ob j lúubo'ob t kabo'.

³⁶Líikbal tu caajil Aroer, yaan tu jáal u yáalcab ja'il Arnón, yéetel le caaj yaan táax lu'um tac Galaad, ma' yanchaj ca j p'áat wa'alacbal t táani'; Yuumtzil c Kue' tu beetaj u láaj lúubulo'ob t kab.

³⁷Chéen ba'ax lu'umilo'ob ma' t ba'atelto'obe' leti' lelo'oba': le u ti'al le j amonitaobo', tuláacal u tojil u áalcab ja'il Jaboc, u caajilo'ob le witzo'obo', yéetel tuláacal le cúuchilo'ob tu ya'alaj Yuumtzil ma' c ba'ateltico'obo'.