Read Yucateco Deuteronomio 20 Bible Online

Deuteronomio 20 - Yucateco bible

Deuteronomio 20

¹Le quéen jóokoque'ex j ba'atel yéetel a aj p'eeque'ex wa ca wilique'ex yaan u tzíimino'ob, yaan u bolanilo'ob u ba'atelo'ob bey xan asab ya'abo'ob u aj ba'atelo'ob ti' te'exe', ma' a ch'a'ique'ex sajaquil ti'ob, tumen ta wéetele'ex yaan Yuumtzil a Kuex máax jóokese'ex Egipto.

²Le quéen kuchuc u kiinil le ba'atelo', le aj kiino' bíin u t'aan le aj ba'atelo'obo',

³bíin u ya'al ti'ob: U'uye'ex, j israelita'ex, bejela'e' bin a ca'aje'ex ba'atel yéetel a aj p'eeque'exo'ob. Ma' u lúubul a wóole'ex mix a ch'a'ique'ex sajaquil; ma' quiquilaanquile'ex mix u ja'akal a wóole'ex,

⁴tumen Yuumtzil a Kuexe' ti' yaan ta wéetele'exe'; leti' bíin ba'atelnac yéetel a aj p'eeque'exo'ob bíin a dzáanche'ete'exo'ob.

⁵Cu dzo'ocole' bíin t'aanaco'ob u nuuquilo'ob u ti'al u ya'alico'ob: Wa yaan máax túumben u yotoch ma' cajlac ichile', xi'ic tu yotoch, ma' xan ca quíimic ti' le ba'atelo' ca yanchajac u cajtal u láak máac tu yotoch.

⁶Wa yaan máax ichile'ex u pakmaj uva ma' u t'oc u yiche', xi'ic tu yotoch, ma' xan ca quíimic ti' le ba'atelo' ca t'o'ococ tumen u láak máac u yo'och uva.

⁷Wa yaan máax u dzaama u t'aanil dzo'ocol beel ma' dzo'ococ u beele', xi'ic tu yotoch, ma' xan ca quíimic ti' le ba'atelo' ca dzo'ococ u beel yaanal máac yéetel u x ba'al.

⁸Cu dzo'ocole' u nuuquilo'obo' cu ca'a t'aano'ob yéetel le aj ba'atelo'obo' cu ya'alico'ob ti' leti'ob: Wa yaan máax sajac ma' chuca'an u yóole', xi'ic tu yotoch tu yo'olal ma' u lúubsic yóol u yéet ba'atelo'ob.

⁹Le quéen dzo'ococ u t'aano'ob u nuuquilo'obo', le náacomo'obo' cu máano'ob tu táan le aj ba'atelo'obo'.

¹⁰Le quéen a nadzaba'ex ti' jun p'éel caaj u ti'al a pulcaba'ex tu yóokole', táanil unaj a káatique'ex ti'ob ca u kububa'ob yéetel jéedzel óolal.

¹¹Wa u cajnáalilo'ob le caaj cu táan óoltico'ob u kubcuba'ob yéetel jéedzel, cu cha'ico'ob a wocole'exe', te'exe' bíin a palitzilte'exo'ob u ti'al a beete'ex u meyajo'ob quex ma' u káato'obi'.

¹²Ba'ale' wa ma' tu yóoltico'ob u kububa'ob te'ex yéetel jéedzel, tumen u káato'ob u pulicuba'ob j ba'atel ta wéetele'exe', te'exe' bíin a bakpachte'ex le caaj u ti'al a pulicaba'ex tu yóokol.

¹³Yuumtzil a Kuexe', bíin u beet u lúubul ta kabe'ex, te'exe' bíin a quíimse'ex tuláacal u cajnáalilo'ob yéetel u yej máascab.

¹⁴U co'olelilo'ob, le mejen paalalilo'ob, le wacaxo'ob yéetel tuláacal le ba'ax yaan ichil le caajo', a láaj ti'ale'ex; bíin qui'imacchajac a wóole'ex yéetel tuláacal le ba'ax bíin u yóolt Yuumtzil ca a toque'ex ti' le aj p'eeco'obo'.

¹⁵Bey xan bíin a beete'ex yéetel tuláacal le caajo'ob yano'ob náach ti' a cajtalile'ex ma' taakal ti' le múuch' caajo'oba'.

¹⁶Ba'ale' ti' u caajilo'ob le múuch' caajo'ob cu dzáic te'ex Yuumtzil a Kuex a ti'alinte'exo', ma' unaj a p'atique'ex cuxa'an mix ba'ali',

¹⁷ba'ale' bíin a xot kinte'ex u ti'al láaj xu'ulsajil, quíimsbil ti'ibil óolal u ti'al Yuumtzil, le j hititaob, le j amorreob, le j cananitaob, le ferezeob, le j heveob yéetel le jebuseob, je'el bix u ya'almajil Yuumtzilo',

¹⁸u ti'al ma' u ca'anbesico'ob te'ex a beete'ex le ba'alo'ob talam kaas cu beetico'ob tu nojbe'enil u kuob, u ti'al ca u beeto'ob a kebanchajle'ex ti' Yuumtzil a Kuex.

¹⁹Wa u ti'al a jáanpaytique'ex jun p'éel caaj yaan a bakpachtique'ex ya'ab kiino'obe', ma' a jay ch'actique'ex u che'ilo'ob yéetel báat, tumen kabéet te'ex u yicho'ob u ti'al a jaante'ex; cu dzo'ocole', lelo'obo' chéen u che'ilo'ob káax, ma' wíinico'ob ca páatchajac u ba'atelo'ob ta wéetele'exi'.

²⁰Ba'ale' bíin páatchajac a ch'aquique'ex le che'ob ma' janalbe'en u yicho'ob u ti'al a kalique'ex u bakpach le caajo' bíin a pulaba'ex yóokol, tac u lúubul ta kabe'exo'.