Read Yucateco Deuteronomio 21 Bible Online

Deuteronomio 21 - Yucateco bible

Deuteronomio 21

¹Wa ti' le lu'um bíin u dza'abac a ti'alinte'ex tumen Yuumtzil a Kuex ca nactáantique'ex j káax jun túul máac quíimsa'an ma' ojéelta'an máax quíimsmaile',

²u nuuquilo'ob le caaj yéetel u aj ilaj tacpoolo'obe', bíin u tuculto'ob buca'aj náachil yanil ti' jun p'éel caaj, buca'aj xan naadzil ti' u láak.

³U nuuquilo'ob túun le caaj naadzo', bíin u ch'a'ob jun túul chan x wacax mix jun téen dza'abac j meyaj,

⁴cu yéemsa'al tu beel ja' mantadz táan u yáalcab u ja'il, mix jun téen xan péecsa'ac u lu'umil mix úuchuc paakali', te'elo', ti' bíin ca'achac u cali'.

⁵Cu dzo'ocole' cu nadzicuba'ob le aj kiino'ob levitaobo', tumen Yuumtzil yéeyo'ob u ti'al ca u beeto'ob u meeyjul kultaj yéetel u ti'al u dza'ob qui' t'aanaco'ob tu kaaba' Yuumtzil. Ti' tuláacal ba'atel yéetel kuuxile', leti'ob bíin a'alic u dzo'oc t'aan.

⁶Cu dzo'ocole' tuláacal u nuuquilo'ob le caajo', bíin u p'o'ob u kabo'ob yóokol le chan x wacax quíimsa'ano',

⁷bíin u ya'alo'ob le t'aana': To'one' ma' t quíimsaj le máaca', mix t ilaj bix quíimsa'abiqui'.

⁸Yuumtzil, sa'ats u si'ipil a caajal Israel, le caaj ta manajo', ma' a sipa'ancunsic tu yo'olal úuchic u quíimil le máac mina'an u si'ipila'. Beyo' ma' bíin p'is óolta'aque'ex úuchic u quíimil le máaco',

⁹te'ex xane' bíin a beete'ex ba'ax tu beel tu yich Yuumtzil u ti'al a lukesic ti' te'ex u si'ipilil le quíimilo'.

¹⁰Le quéen xi'ique'ex a ba'atel te'ex a aj p'eeque'exo'obe', le quéen u kub Yuumtzil wíinico'ob ta kabe'exe',

¹¹wa jun túul ti' te'ex cu yilic ichilo'ob yaan jun túul x co'olel qui'ichpam cu yutztal tu yich cu dzo'ocol u beel x yéetele',

¹²unaj u bisic tu yotoch ca u beet u dziquic u pool, bey xan ca u kosláant u yíich'ac,

¹³cu kexic le nook u búuquintmaj le ca j ma'ach ti' le ba'atelo', cu p'áatal cajtal tu yotoch ca'aliquil u yoktic u taata bey xan u maama bul winal. Cu dzo'ocole' le j israelitaob cu páajtal u nupicubáa x yéetel; beyo' leti'e' cu p'áatal íichamil ti' leti', leti'e' cu p'áatal atanil ti' leti'.

¹⁴Wa cu dzo'ocol cu yilic ma' utz tu t'aane', cu páajtal u cha'ic u bin; ba'ale' ma' tu páajtal u conic mix u palitziltic tumen tu pa'aj u subtzil.

¹⁵Wa jun túul máac yaan ca'a túul u yatan, u yaabiltmaj jun túul, ma' bey u láak jun túulo', cu yantal u paalal ti' tu ca'a túulal, ba'ale' le j yáax paalo' cu síijil ti' le co'olel ma' u yaabiltmajo',

¹⁶le quéen kuchuc u kiinil u t'oxic u ayikalil ti' u paalale', ma' bíin páatac u dzáic ti' u paal le co'olel u yaabilmaj le ba'ax u najmal u dza'abal ti' le yáax paalo', tumen je'el u beetic kaas ti' u paal le x co'olel u p'ectmajo', tumen leti' jach yáax paal.

¹⁷Yaan u ka'ajal ti'e' máax jach u yáax paal u ti'al u dzáic ti' ca'a jatz tu pa'ate'il u ayikalo', tumen leti' u yáax yich u muuk, yéetel leti' najmatic, tumen j yáax paal.

¹⁸Le máax yaan jun túul u paal cu ma' j u'uyaj t'aan, ma' tu beetic ba'ax cu ya'alic u taata wa u maama quex tumen cu ja'adzal tu yo'olal u j ma' u'uyaj t'aanile',

¹⁹u taata yéetel u maamae' unaj u bisico'ob tu táan u nuuquilo'ob u caajal,

²⁰ca u ya'al ti'ob: C paale' j ma' u'uyaj t'aan yéetel ma' tu ya'alic wa bey ti' ba'ax c a'alic, mix tu chíin poltic c t'aan, leti'e' kaschaja'an yéetel j cáaltal wíinic.

²¹Bey túuno' bíin quíimsa'ac yéetel ch'iin tumen tuláacal u j xiibilo'ob le caajo'. Beyo' bíin a xu'ulse'ex le kasa'anil yaan ichil a caajale'exo', le quéen ojéelta'ac tumen le j israelitaobo', bíin u ch'a'ob sajaquil.

²²Wa jun túul máac cu xot kinta'al j quíimil ch'uyquintbil ti' jun cúul che'e' tumen yanchaj jun p'éel u nojoch si'ipile',

²³u wíinclile', ma' u najmal u p'áatal bul áakab te'elo', ba'ale' yaan u mu'ucul láili' ti' le kiino', tumen loolob t'anta'an tumen Ku le máax cu quíimil ch'uyucbal ti' jun cul che', let o'olal te'exe' ma' u najmal a cha'ique'ex u kastal a lu'ume'ex bíin u dzáa te'ex Yuumtzil a Kuex a ti'alinte'exo'.