Read Yucateco Deuteronomio 22 Bible Online

Deuteronomio 22 - Yucateco bible

Deuteronomio 22

¹Wa jun túul ti' te'ex cu yilic satal u wacax wa u j taman u yéet caajale', ma' unaj u chéen iliqui', ba'ale' unaj u bisic ti' u yéet caajal.

²Ba'ale' wa ma' naadz tu yotoch cajnáal u taataile' mix u kaj óole', bíin u bis tu yotoch tac le kiin bíin káata'ac ti' tumen u yéet caajale'; leti' túune' bíin u sut ti'.

³Bey xan bíin beeta'ac yéetel jun túul burro, wa jun p'éel búuc, wa je'el ba'alac cu sa'atal ti' wa máax cu nactáant ichile'exe'. Ma' a chéen ca wile'exi'.

⁴Wa ichile'ex cu yilic luubul j bej u yalak burro, wa u wacax u yéet caajale', ma' unaj u chéen iliqui', ba'ale' unaj u yáantic u líikesej.

⁵Co'olele' ma' u najmal u búuquintic u búuc j xiibi', mix le j xiib u najmal u búuquintic u búuc co'oleli', tumen ti' Yuumtzile' cu lúubul kaasil máax beetic beyo'.

⁶Wa yaan máax cu nactáantic tu beel u ku' ch'íich'o'ob ti' jun cúul che' wa j lu'um, yaan u mejen ch'íichi'lo'ob wa u ye'elo'ob ti' pacacbal u na'il yóokolo'obe', ma' unaj u ch'a'ic le na'il pa'ate' yéetel u mejenilo'obi';

⁷unaj u ch'a'ic chéen u mejenile', ca u cha'a u bin u na'il. Beyo' bíin qui'imacchajac u yóol bey xan bíin chowacchajac u cuxtal.

⁸Le máax ichile'ex cu beetic u jun p'éel túunben pakil naje', u najmal u dzáic u káasab pakil yóokol le najo'; beyo' bíin u canant ma' u si'ipil quíimil mix máac tu yotoch wa yaan máax cu lúubul tu najil.

⁹Ma' pakique'ex ta coole'ex jejeláas i'inajo'ob, ma' xan ca láaj sa'atac a wi'inaji', yo'olal ma' u xu'ulul a tóoquic le ba'ax bíin a pako', mix u p'áatal ma' a joochil u yich a paakal.

¹⁰Ma' a nupic jun túul wacax yéetel jun túul burro u ti'al a bukic u lu'umil a cool.

¹¹Ma' búuquintique'ex nook xa'akbesa'an u jiit'il u tzo'otzel j taman yéetel lino.

¹²Dza'ex u chúuchuch káxilo'ob u sáabchi' u can ti'itzil le buclis nook iquil a pixcaba'exo'.

¹³Wa jun túul xiib cu dzo'ocol u beel yéetel jun túul x co'olel, cu p'ectic le quéen dzo'ococ u nupicubáa x yéetel

¹⁴cu jo'op'ol u t'aan kaas tu yóokol táan u ya'alic: Tene' j dzo'oc in beel yéetel le co'olela', ba'ale' le ca tin nupinbáa x yéetele' tin wilaj ma' x sujuyi',

¹⁵u taata yéetel u maama le x ch'úupal túuno', bíin u ch'a'ob u chíiculal u x sujuyil u ti'al u ye'eso'ob tu táan u nuuquil le caajo',

¹⁶u taata le x ch'úupalo', bíin u ya'al ti' u nuuquilo'ob le caajo': Tene' tin dzaj in x ch'upul paal ti' le wíinica', ba'ale' leti'e' dzo'oc u p'ectic

¹⁷bey xan táan u taquic u pool iquil u ya'alic ma' x sujuy ca'achi'. Ba'ale' je'el u chíiculal u sujuyila'. Ca'aliquil táan u t'aane', bíin u xit' le teep' tu táan u nuuquilo'ob le caajo'.

¹⁸Leti'ob túune' bíin u macho'ob le máac u ti'al p'is óoltbil,

¹⁹bíin xot kinta'ac u bo'ot cien sac taakino'ob, u ti'al u kub ti' u taata le x ch'úupal úuchic u t'aan kaas tu yo'olal jun túul u sujuy x ch'úupalil Israel. Cu dzo'ocole' leti'e' cu p'áatal láili' u yatane', ma' bíin páatac u p'áatic tuláacal u kiinil u cuxtali'.

²⁰Ba'ale' wa cu jóokol jaajil ma' x sujuye',

²¹bíin jóokesa'ac tu jool yotoch u taata u ti'al quíimsbil yéetel ch'iin tumen u j xiibilo'ob le caajo', tumen tu beetaj ba'ax sen kaas iquil úuchic u sublaccunsic u yotoch u taata. Beyo' ca xu'ulsique'ex le ba'ax kaas yaan ichile'exo'.

²²Wa cu chu'ucul jun túul máac chilicbal yéetel jun túul co'olel dzoca'an u beele', tu ca'a túulal bíin xot kinta'ac j quíimil. Beyo' ca xu'ulsique'ex ba'ax kaas cu yantal Israelo'.

²³Wa jun túul x ch'úupal dza'an u t'aanil dzo'ocol beel ti' tumen jun túul j xiib, cu nactáanta'al tumen u láak j xiib te j caaj cu chital x yéetelo',

²⁴tu ca'a túulal bíin bisa'aco'ob tu táan u aj p'is óolilo'ob le caajo', te'elo' bíin xot kinta'aco'ob j quíimil yéetel ch'iin: le x ch'úupalo' tumen ma' tu kataj áantaj quex ti' yaan ti' jun p'éel caaji', le j xiibo' tumen tu manba'alcuntaj u yatan u láak. Beyo' ca lukesique'ex le kaas yaan ichile'exe'.

²⁵Ba'ale' wa jun túul j xiib cu nactáantic jun túul x co'olel ich cool u núucmaj u dzo'ocol u beel yéetel u láak j xiib cu cóolic j chital x yéetele', lelo', chéen bíin quíimsa'ac le j xiib chilaj x yéetelo'.

²⁶Le x ch'úupalo' ma' bíin beeta'ac mix ba'al ti', tumen ma' u beet mix ba'al u ti'al u yantal u si'ipil u quíimsa'ali'; lelo' bey je'el bix jun túul máac cu pulicubáa yóokol u láak máac u ti'al u quíimsique';

²⁷tumen leti'e' tu nactáantaj tu juunal le x ch'úupal te j coolo', quex awatnaque', mix máac bíin u'uyic u ti'al áantic.

²⁸Wa jun túul j xiib cu nactáantic jun túul x ch'úupal ma' u dzaama u t'aanil dzo'ocol beel, cu cóolic j chital x yéetel, cu yila'alo'obe',

²⁹le j xiib túuno' bíin u kub cincuenta sac taakino'ob ti' u taata le x ch'úupalo': bey xan je'el bix dzo'oc u sublaccunsico', yaan u dzo'ocol u beel x yéetel, cu dzo'ocole' ma' bíin páatac u xunp'ajtic tuláacal u kiinil u cuxtali'.

³⁰Mix máac u najmal u nupicubáa yéetel u yatan u taata, tumen yéetel lelo' cu pajic u subtal.