Read Yucateco Deuteronomio 23 Bible Online

Deuteronomio 23 - Yucateco bible

Deuteronomio 23

¹Le máax puuch'ul u ye'el u j xiibil wa kupa'an u j xiibile', ma' bíin cha'abac u yocol ich u múuch' kultajo'ob Yuumtzili'.

²Le chéen caxantbil paalo' ma' bíin cha'abac u yocol ich u múuch' kultajo'ob Yuumtzili', quex máanac diez u ch'i'ibalo'ob.

³Le j amonitaob yéetel moabitaobo', mix bikin bíin ka'amaco'ob ichil u múuch' kultajo'ob Yuumtzili', quex máanac diez ch'i'ibalo'ob;

⁴tumen le ca j máane'ex tu lu'umo'ob, cu dzo'ocol a jóokole'ex Egiptoe', leti'obe' ma' tu dzajo'ob te'ex ja'i', mix tu dzajo'ob te'ex janali'; yéetel u láak ba'ale' tu bo'otajo'ob Balaam u paal Beor, ti' u taal ca'ach Petor tu lu'umil Mesopotamia u ti'al u loolob t'ante'ex.

⁵Yuumtzil a Kuexe' ma' tu yóoltaj u beet ba'ax cu ya'alic Balaami', ba'ale' tu sutaj qui' t'aanil u loolob t'antique'ex tumen u yaabiltmaje'ex.

⁶Ma' a dzíiboltique'ex u jéedzelo'ob, mix u yutzil antalo'ob tuláacal u kiinil u cuxtalo'ob.

⁷Ba'ale' ma' u najmal a p'ectique'exo'ob le j edomitaobo', tumen a láake'ex; mix le j egiciobo', tumen te'exe' j cajlaje'ex tu lu'umo'ob;

⁸u yóox yáal u ch'i'ibalo'obe', bíin páatchajac u yooclo'ob ichil u múuch' kultajo'ob Yuumtzile'.

⁹Le quéen a wilaba'ex ich ba'atel yéetel a aj p'eeque'exo'ob, tu kiinilo'ob le ba'atelo' canantaba'ex ma' beetique'ex ba'ax kaas.

¹⁰Wa yaan jun túul ichile'ex ma' utz yanil tumen ichil u wayak síimnaj u j xiibile', unaj u jóokol tu paach caaj, ma' unaj u yocol bul kiini'.

¹¹Tu yocbal kiine' bíin u p'o'ojubáa yéetel ja', ca páatac u ca'a ocol ich caaj.

¹²U ti'al a bine'ex táancabe', unaj a caxtique'ex jun p'éel cúuchil tu paach caaj.

¹³Ichil a nu'ucule'exe', unaj a bisique'ex jun p'éel dzop che', yo'olal quéen xi'ique'ex táancabe' ca beetique'ex jun p'éel jool u ti'al a muquique'ex a u ba'al a choochele'ex.

¹⁴Tumen Yuumtzil a Kuexe', cu máan ta wéetele'ex ichil a cajtalile'ex, u ti'al u canantique'ex, bey xan u ti'al u beet a dzáanche'etique'ex a aj p'eeque'ex; let o'olal u cúuchil tu'ux ca je'elele'exe', unaj quili'ich, tu yo'olal beyo' Yuumtzile' ma' u yilic mix ba'al kaas ichil, tumen wa ma' beyo' leti'e' bíin náachchajac ti' te'ex.

¹⁵Wa jun túul palitzil cu púudzul ti' u dzuulil cu káatic te'ex ca a kame'exe', ma' a kubique'ex ti' u yúuchben dzuulil.

¹⁶Cha'ex u p'áatal cajtal ichile'ex, cha'ex u p'áatal te j caaj bíin utzac tu yiche', bey te j cúuchil bíin u yéeye', mix máac xan bíin náacsic u yóol.

¹⁷Mix jun túul j xiib wa co'olel j israelitaob bíin u jun páaycuntubáa u ti'al tzuuquil[5] le suuc u beeta'al ich kultajil tumen le j ma' ocsaj óolo'ob.

¹⁸Ma' a cha'ique'ex u bisa'al tu quili'ich najil Yuumtzil a Kuex u bo'olal jun p'éel séeb chi' yéetel taakin náajalta'an ti' núup keban beyo', tumen jun p'éel ba'al suuc u beeta'al beyo', táaj kaas u yilic Yuumtzil.

¹⁹Ma' bíin a tza'ex ti' a wéet caajale'ex ca u bo'ot te'ex u tip'a'anil ba'ax ta dzaje'ex páaybil ti', quex wa taakin, quex wa ba'al u ti'al jaantbil wa quex je'el ba'axac cu dza'abal páayil suuc u bo'ota'al u tip'a'anil.

²⁰Ti' le j táanxel lu'umilo', je'el u páajtal a tzáic ca u bo'ot teech u tip'a'anil u páaye', ba'ale' ma' unaj a tzáique'ex ti' jun túul a wéet caajale'exi'. Beyo' Yuumtzil a Kuexe' bíin u qui' t'ante'ex yéetel tuláacal ba'ax bíin a beete'ex te j lu'um bíin u dzáa a ti'alinte'exo'.

²¹Le quéen a beete'ex jun p'éel séeb chi' ti' Yuumtzil a Kuexe', ma' u xáantal a dzo'ocbesique'ex, tumen unaj a wojéeltique'exe', Yuumtzile' bíin u tzáa te'ex, bíin si'ipilchajque'ex ti' keban.

²²Wa ma' ta beetique'ex jun p'éel séeb chi'e', ma' bíin kebanchajque'exi';

²³ba'ale' wa tu juunal a wóole'ex ca beetique'ex jun p'éel séeb chi' ti' Yuumtzil a Kuexe', unaj a dzo'ocbesique'ex.

²⁴Le quéen ocoque'ex ichil u pakal uva a láake'exe', bíin páatac a jaantique'ex tuláacal le uva a káate'exe', ba'ale' ma' bíin a bise'ex mix jun p'éel ichil le xaaco'.

²⁵wa ca wocole'ex ichil u pakal trigoe', je'el u páajtal a jaantique'ex u yi'ij le cu páajtal a joquique'ex yéetel a kabe'exe', ba'ale', ma' u najmal a xotique'ex yéetel lóobche'il.