Read Yucateco Deuteronomio 24 Bible Online

Deuteronomio 24 - Yucateco bible

Deuteronomio 24

¹Wa jun túul j xiib cu ch'a'ic jun túul co'olel u ti'al u dzo'ocol u beel x yéetele', ba'ale' cu yilic ma' utz tu t'aan tumen yaan ba'ax ti' ma' u najmali', bíin u dzáa u ju'unil x p'at atanil ti', cu dzo'ocole' cu jóoksic tu yotoch.

²Leti'e', cu dzo'ocol p'atic le najo', cu páajtal dzo'ocol u beel yéetel u láak;

³ba'ale' wa j ca'a íicham cu kex óoltic xan yéetel cu dzáic u ju'unil x p'at atane', cu tojolch'inta'al tu yotoche', wa ca kuchuc j quíimil u ca'a íichame',

⁴le máax tu yáax íichamte' ma' bíin páatchajac u ca'a dzo'ocol u beel x yéeteli', tu yo'olal j p'áat ma' utz yanili; wa ca kuchuc dzo'ocol u beelo'obe' jun p'éel ba'al seten p'ecbe'en tu táan Yuumtzil, te'exe' ma' bíin a manba'alcunte'ex le caajo'ob j dzaab a ti'alte'ex tumen Yuumtzil a Kuex.

⁵Wa táant u dzo'ocol u beel jun túul j xiib, ma' u najmal u bin te j ba'atelo', mix bíin beeta'ac u meyaj bul ja'abi'; beyo' cu p'áatal tu yotoch tuláacal le kiino'obo' u ti'al u qui' óolal u yatan.

⁶Ma' a káatique'ex ti' mix máac, u kab u ca', mix u ca'il u juuch', tu yo'olal u p'axmaje'ex, tumen lelo' láili' bey táan a káatque'ex u cuxtale'.

⁷Wa cu nactáanta'al jun túul j israelil táan u yocol chuquic u yéet caajal u ti'al u palitzilte', wa u ti'al u cone', bíin xot kinta'ac u ti'al quíimil, tu yo'olal u xu'ulsa'al le ba'ax kaas cu yantal ichile'exo'.

⁸Wa ca kuchuc yantal u koja'anil jáawaye', dzo'ocbese'ex tuláacal le a'almaj xiquino'ob bíin u dza'ob le aj kiino'ob levitaobo'. Unaj a beetique'ex jach je'el bix bíin u ya'alo'obe'.

⁹Ka'ajac te'ex ba'ax tu beetaj Yuumtzil a Kuex yéetel x María te j bej cu dzo'ocol a jóokole'ex Egiptoo'.

¹⁰Wa ca dzáique'ex ba'al u páay a láake'exe', ma' a wocole'ex tu yotoch a cha'ex mix jun p'éel kax p'aaxi'.

¹¹P'áatene'ex paachil, p'áate'ex u jóokesic le ba'ax bíin u dzáa te'ex u ti'al kax p'aaxo'.

¹²Wa jun túul máac óotzile' ma' u najmal a p'áatale'ex bul áakab yéetel u teep' bey kax p'aaxe';

¹³yaan a sutique'ex tu yocbal kiin, u ti'al u tep'icubáa le quéen weneque'. Beyo' leti'e' bíin u qui' t'ante'ex bey xan bíin a beete'ex ba'ax utz tu táan Yuumtzil a Kuex.

¹⁴Ma' a wocoltique'ex le máax nakan óotzilo', mix a xáancuntique'ex a bo'otique'ex, a wéet caajale'ex, wa le j táanxel lu'umil cajnáal ti' jun p'éel a caajale'exo'.

¹⁵Bo'ote'ex u meyaj ti' le kiino', ma' a pa'atique'ex u t'úubul kiin, leti'e' óotzil, kabéet le taakin ti' u ti'al u cuxtal. Wa ma'e', bíin káat óolnac u ti'al u taquic a poole'ex ti' Yuumtzil, te'ex xane' yaan a cuchique'ex u kebanil.

¹⁶Le taataobo', ma' bíin xot kinta'aco'ob j quíimil tu yo'olal u paalalo'obi', mix le paalalo'ob tu yo'olal ba'ax tu beetajo'ob u taataob, ba'ale' tu jujun túulil bíin quíimic tu yo'olal u keban.

¹⁷Ma' a beetique'ex mix jun p'éel ba'ax ma' tu beel yéetel le j táanxel lu'umilo'obo', mix ti' le j ma' taataobo', mix a ch'a'ique'ex u nook le x quimen íicham tu yo'olal kax p'aax

¹⁸Ma' a tu'ubsique'ex palitzilta'abe'ex Egiptoo', Yuumtzile' tu jóokese'ex; le t o'olal quin wa'alic te'ex ca láaj dzo'ocbese'ex le ba'alo'oba'.

¹⁹Wa ca'aliquil táan a joche'ex ta coole'ex cu tu'ubul te'ex a molique'ex jun chúuch u kaxbilo'ob a trigo'exe', ma' a sute'ex a ch'a'ex; p'ate'ex u ti'al j mo'olol tumen wa máax j táanxel lu'umil cajnáal ichile'exo', wa le j ma' taata, wa le x quimen íichamo', tu yo'olal beyo' Yuumtzil a Kuexe' bíin u qui' t'antique'ex ti' tuláacal ba'ax bíin a beete'exe'.

²⁰Le quéen a tíite'ex le aceitunaob tu kab a olivaexe', ma' a xakal caxtique'ex tuláacal u kabo'ob; le aceitunaob cu p'áatalo'obo', p'ate'ex u ti'al le j táanxel lu'umilo'ob, u ti'al j ma' taataob yéetel u ti'al x quimen íichamo'obo'.

²¹Le quéen a t'oque'ex u yich a pakal uvaexe', ma' a xakal caxtic tu jujun cúulil; le cu p'áatale', p'at u ti'al le j táanxel lu'umilo'obo', le j ma' taataobo' yéetel le x quimen íichamo'obo'.

²²Ka'ajac te'ex palitzita'abe'ex Egipto; le t o'olal quin wa'alic te'ex ca láaj dzo'ocbese'ex tuláacal le ba'alo'oba'.