Read Yucateco Deuteronomio 26 Bible Online

Deuteronomio 26 - Yucateco bible

Deuteronomio 26

¹Le quéen ocoquech te j lu'um bíin u dzáa teech Yuumtzil a Ku a ti'alinto', cu dzo'ocol a jedzic a cajtale'

²bíin a ch'a'a' u yáax icho'ob a paakal te j lu'umo', u ti'al ca bis ichil jun p'éel xaac tu táan Yuumtzil a Ku te j cúuchil tu yéeyaj u ti'al u kaaba'o'.

³Te'elo', bíin xi'iquech tu táan le aj kiin cu meyajo', ca wa'alic ti': Bejela'e', quin wa'alic tu táan Yuumtzil in Ku, dzo'oc in wocol ti' le múuch' caajo'ob tu séeb chi'itaj ti' c máanja'an ch'i'ibalo'ob u dzáic to'ono'.

⁴Le aj kiino' bíin u ch'a'a' le xaac ca kubic ti'o', cu dzáic tu táan u multuunil u kulta'al Yuumtzil a Ku;

⁵ca wa'alic túun tu táan Yuumtzil a Ku le t'aano'oba': In máanja'an ch'i'ibalo'ob ca'ache', chéen jun p'éel chan u múuch'ul arameob ma' jedzecbalo'ob mix tu'uxi', j bino'ob Egiptoe' ca j p'áato'ob cajtali', cu dzo'ocole' j suunajo'ob nojoch múuch' caajil, mu'uka'an yéetel sen ya'abcach.

⁶Ba'ale' le j Egiptoilo'obo' tu loobiltajo'ono'ob, tu yedzajo'ono'ob bey xan tu beetajo'ob c mukyajtic yaayaj palitzilil.

⁷To'on túune', t káat óoltaj ti' Yuumtzil u Ku c taataex ca u yáanto'one', leti'e' tu yu'ubaj c káat óol, ca tu yilaj c óotzilil, le meyajo'ob yéetel bix yedza'anilo'ono';

⁸tu ye'esaj u nojoch páajtalil ichil jun p'éel nojoch sajbe'entzil yéetel jak óol ba'alo'obe', ca tu jóokeso'on Egiptoe',

⁹ca tu taasajo'on ti' le cúuchila', ca tu dzáa to'on le lu'uma', tu'ux le leche yéetel le caabo', cu yáalcabo'ob bey ja'e'.

¹⁰Let o'olal bejela'e' quin taasic, u yáax icho'ob le lu'um tu dzaj teen Yuumtzilo'. Tu séeblaquil bíin a dzáa le xaac tu táan Yuumtzil a Kuo', ca xoltal tu táan leti'.

¹¹Cu dzo'ocole', bíin a beet kiinbesaj tu yo'olal tuláacal ba'ax tu dzaj Yuumtzil a Ku ti' teech yéetel ti' a wotoch. Yaan xan u much'icuba'ob ti' a qui'imac óolal le j levitaob bey xan le j táanxel lu'umilo'ob cajnáalo'ob ichile'exo'.

¹²Le quéen kuchuc le óox ja'ab u kiinil u ku'ubul u diezmoil tuláacal ba'alo', le quéen dzo'ococ a jun páaycuntic u diezmoil tuláacal u yich a paakal bey xan dzo'oc a t'oxic ti' le j levitaob, bey xan ti' le j táanxel lu'umilo'ob cajnáal ta múuch' caajo'obo', je'el bix ti' le j ma' taataob yéetel x quimen íichamo'ob u ti'al u páajtal u jaantico'ob ichil a caajal tuláacal le buca'aj u káato'obe',

¹³bíin a wa'al tu táan Yuumtzil a Ku beya': Dzo'oc in jun páaycuntic ti' in wotoch u jaatzil in jooch unaj in jun páaycuntico', dzo'oc xan in t'oxic ichil j levitaob, yéetel j táanxel lu'umilo'ob cajnáalo'ob t múuch' caajo'obo', bey xan ichil le j ma' taataob yéetel x quimen íichamo'ob, u ti'al in dzo'ocbesic tuláacal ba'ax a wa'almaj teen, ma' tin j ma' u'uyaj t'antaj, mix tin tu'ubsaj mix jun p'éel a wa'almaj t'aano'obi'.

¹⁴Ma' tin ch'a'aj mix jun p'íit u ti'al in jaant ca'aliquil táan in woktic quimeni', mix tu kiinilo'ob ma' utz yanileni', mix in táanbes ti' quimeno'obi'. Yuumtzil in Ku, tin wu'uyaj t'antajech bey xan tin dzo'ocbesaj tuláacal ba'ax ta wa'alaj teen.

¹⁵Pact líikbal ta ca'anil líikbal ta quili'ich naje', qui' t'ant a caajal Israel, bey xan le lu'um dzo'oc a dzáic to'ono', le tu'ux cu yáalcab leche yéetel caabo', bey u yáalcab ja' jach je'el bix ta séeb chi'itaj ti' c máanja'an ch'i'ibalo'obo'.

¹⁶Yuumtzil a Kue' cu ya'alic teech bejela'a' ca a dzo'ocbes u ya'almaj t'aano'ob yéetel le tzolbe'en t'aano'oba'; dzo'ocbeso'ob yéetel tu jaajil a pucsi'ikal bey xan yéetel tuláacal a wóol.

¹⁷Teche' dzo'oc a wa'alic bejela'e', Yuumtzil leti' a Ku, dzo'oc xan a séeb chi'itic a xinbal tu beelo'ob bey xan a dzo'ocbesic u ya'almaj t'aano'ob u tzolbe'en t'aano'ob yéetel u ca'anbesajo'ob dzo'oc xan a wa'alic a wu'uyaj t'antico'ob sáamsamal.

¹⁸Bey xan Yuumtzile' dzo'oc u ya'alic bejela'e' teche' Israel, u caajalech ba'al u ti'alech, jach je'el bix u séeb chi'itmailo', teche' bíin a dzo'ocbes tuláacal u nu'ucbe'en t'aano'ob.

¹⁹Leti'e', bíin u sutech jun p'éel caaj sen ca'anal a tzicbe'enil yéetel a nojbe'enil ti' u láak múuch' caajo'ob u beetmajo', teche' bíin p'áataquech je'el bix u ya'almajile', jun p'éel caaj jun páaycuna'an u ti'al Yuumtzil a Ku.