Read Yucateco Deuteronomio 27 Bible Online

Deuteronomio 27 - Yucateco bible

Deuteronomio 27

¹Moisés yéetel u nuuquilo'ob Israele', tu ya'alajo'ob ti' le caaj, le t'aano'oba': Dzo'ocbese'ex tuláacal le ba'ax dzo'oc in wa'alic te'ex bejela'a'.

²Le quéen a ch'acte'ex u áalcab ja'il Jordán u ti'al a woocbale'ex te j lu'um bíin u dzáa te'ex Yuumtzil a Kuexo', bíin a mulquinte'ex nucuch tuunicho'obe', cu dzo'ocole' ca bonique'ex sac yéetel ta'an,

³u ti'al a dzíibtique'ex tuláacal le a'almaj xiquino'ob dzo'oc in dzáic te'exo'. Beete'ex bey le quéen ocoque'ex te j lu'um tu'ux cu yáalcab leche yéetel caab bey u yáalcab ja'e', tumen Yuumtzil a Kuexe', bíin u dzáa te'ex je'el bix tu séeb chi'itajil ti' a máaja'an ch'i'ibale'exo'.

⁴Bey túuno' le quéen a ch'acte'ex u yáalcab ja'il le Jordano', u najmal a much'quintique'ex yóokol u witzil Ebal le tuunicho'ob dzo'oc in wa'alic te'exo', ca bonique'ex sac yéetel ta'an.

⁵Unaj xan a beetique'ex jun p'éel u multuunil kultaj yéetel tuunich u ti'al Yuumtzil a Kuex. Le tuunicho'obo' unaj túuliso'ob ma' póolano'obi'. Tu yóokol le multuunil kultajo', ti' bíin a táanbese'ex le ba'alche'ob cu láaj tóoca'alo'obo',

⁷bey xan u quíimsbil ba'alche'ilo'ob ca'a bisajbáil; tu táan Yuumtzil a Kuexo', te'elo' bíin janaque'ex bey xan bíin qui'imacchajac a wóole'ex.

⁸Ti' le tuunicho'obo', unaj a dzíibtique'ex ma'alob chica'anil le a'almaj xiquino'ob dzo'oc in dzáic te'exo'.

⁹Cu dzo'ocole' Moisese', láakinta'an tumen le aj kiino'ob levitaobo', ca tu ya'alaj ti' le j israelitaobo': J israelitaex, ch'e'en xiquintene'exi'. Bejela'e', dzo'oc a sute'ex u caajal Yuumtzil a Kuex.

¹⁰Le t o'olalo', u najmal a wu'uyaj t'antique'ex u najmal xan a dzo'ocbesique'ex u nu'ucbe'en t'aano'ob yéetel u ya'almaj t'aano'ob quin dzáic te'ex bejela'a'.

¹¹Láili' ti' le kiino', Moisese' tu ya'alaj ti' le caaj beya':

¹²Le quéen dzo'ococ a ch'actique'ex u yáalcab ja'il le Jordano', u ch'i'ibalo'ob Simeón, Leví, Judá, Isacar, José yéetel Benjamine', bíin yanaco'ob tu witzil Gerizim, u ti'al u qui' t'aanil caaj,

¹³bey xan u ch'i'ibalo'ob Rubén, Gad, Aser, Sabulón, Dan yéetel Neftalie', bíin yanaco'ob tu witzil Ebal, u ti'al u loolob t'aanil le caaj.

¹⁴Le j levitaobo' bíin u sutuba'ob tu tojil le j israelitaobo', ca u ka'am a'alo'ob:

¹⁵Loolob t'aan u ti'al máax bíin u beet jun p'éel póolbil wa joybil ku beeta'an tumen jun túul máax beetic jadzutz ba'alo'ob u ti'al u dzáa ti' jun p'éel ta'acbil cúuchil, tumen lelo' sen p'ecbe'en ba'al tu táan Yuumtzil. Tuláacal le caajo' bíin u núuc: Ca béeyac.

¹⁶Loolob t'aan u ti'al máax bíin u kex óolt u taata wa u maama. Tuláacal le caajo' bíin u núuc: Ca béeyac.

¹⁷Loolob t'aan u ti'al máax bíin u kex u xu'ukilo'ob u lu'um u ti'al máax cajnáal tu tzéel u ti'al u yocoltic u lu'um. Tuláacal le caajo' bíin u núuc: Ca béeyac.

¹⁸Loolob t'aan u ti'al máax bíin u tus le ch'óop u ti'al u satic u beel. Tuláacal le caajo' bíin u núuc: Ca béeyac.

¹⁹Loolob t'aan u ti'al máax bíin u beet ba'ax ma' tu beel ti' jun túul táanxel lu'umil, wa ti' jun túul x quimen íicham wa ti' jun túul j ma' taata. Tuláacal le caajo' bíin u núuc: Ca béeyac.

²⁰Loolob t'aan u ti'al máax bíin chilac yéetel u yatan u taata, tumen cu pajic u subtal. Tuláacal le caajo' bíin u núuc: Ca béeyac.

²¹Loolob t'aan u ti'al máax bíin u nupubáa yéetel jun túul ba'alche'. Tuláacal le caajo' bíin u núuc: Ca béeyac.

²²Loolob t'aan u ti'al máax bíin chilac yéetel u quiic, wa yéetel u x yíidzin u x ch'upul paal u taata wa u x ch'upul paal u maama. Tuláacal le caajo' bíin u núuc: Ca béeyac.

²³Loolob t'aan u ti'al máax bíin chilac yéetel u maama u yatan. Tuláacal le caajo' bíin u núuc: Ca béeyac.

²⁴Loolob t'aan u ti'al máax bíin u náis yóol u láak u ti'al u quíimsic. Tuláacal le caajo' bíin u núuc: Ca béeyac.

²⁵Loolob t'aan u ti'al máax bíin u kam taakin u ti'al u quíimsic máax mina'an u si'ipil. Tuláacal le caajo' bíin u núuc: Ca béeyac.

²⁶Loolob t'aan u ti'al máax ma' bíin u tzic ba'axo'ob dzo'oc in wa'alic, wa ma' xan tu dzo'ocbesic. Tuláacal le caajo' bíin u núuc: Ca béeyac.