Read Yucateco Deuteronomio 28 Bible Online

Deuteronomio 28 - Yucateco bible

Deuteronomio 28

¹Wa tu jaajil ca wu'uyaj t'antic Yuumtzil a Ku, ca dzo'ocbesic tuláacal u nu'ucbe'en t'aano'ob quin dzáic teech bejela'a', Yuumtzile' bíin u dzáatech tu yóokol tuláacal u caajilo'ob yóokolcaab.

²Tuláacal xan le qui' t'aano'oba' bíin lúubuco'ob ta wóokol tumen ta wu'uyaj t'antaj Yuumtzil a Ku.

³Bíin qui' t'anta'aquech ta caajal bey ta cool.

⁴Bíin qui' t'anta'aco'ob a paalal bey a joocho'ob, u yaal a x wacaxo'ob bey a x tamano'ob yéetel tuláacal a waalako'ob.

⁵Bíin qui' t'anta'ac a xaac, bey tu'ux ca ya'ach'tic juuch',

⁶bíin qui' t'anquech, ti' tuláacal ba'ax ca beetico'.

⁷Yuumtzile' bíin u kub ta kab a aj p'eeco'ob le quéen u puluba'ob ta wóokole'. Ma'alob u tzolmiluba'ob le quéen náadzaco'ob u puluba'ob ta wóokol, ba'ale' bíin ki'itpajaco'ob le quéen áalcabnaco'ob ti' teech.

⁸Yuumtzile' bíin u túuchi'it u qui' t'aan yóokol a ch'iilo'ob bey xan yóokol tuláacal ba'ax bíin a beete', bíin u beet a cuxtal yéetel qui' óolal te j lu'um bíin u dzáa techo'.

⁹Wa ca dzo'ocbesic u nu'ucbe'en t'aano'ob yéetel ca xíimbal tu beele', Yuumtzil a Kue', bíin u p'atech bey caaj jun páaycuna'an u ti'al, je'el bix u jalach t'antmailo'.

¹⁰Tuláacal túun u caajilo'ob yóokolcaabe' bíin u yilo'ob cu ch'a'a chi'ita'al u kaaba' Yuumtzil, ta wóokol, bíin xan u ch'a'ob teech sajaquil.

¹¹Yuumtzile' bíin u ye'es teech u yutzil iquil u dzáic ya'ab a paalal, ya'ab u mejenil a wacaxo'ob bey xan ya'ab u joochil a cool te j lu'um tu séeb chi'itaj ti' a máaja'an ch'i'ibalo'ob bíin u dzáa te'exo'.

¹²Bíin u je'eláant u ya'abcach ayikalil, leti'e' ca'ano', u ti'al u beetic u káaxal le ja' kabéet ti' a lu'umo'; u ti'al u beetic u ya'abtal u yich a meyaj. Bíin páatac a dzáic páayil ti' ya'ab múuch' caajo'ob, ba'ale' teche' ma' bíin a káat mix ba'al páayil ti' mix máaqui'.

¹³Yuumtzile' bíin u táanilcunsech, ma' bíin u dzáech tu xuuli'; mantadz bíin yanaquech yóokol u láak caajo'ob, mix bikin bíin yanaquech yáanalo'ob, wa ca ch'e'en xiquintic u nu'ucbe'en t'aano'ob Yuumtzil a Ku quin dzáic teech bejela'a' u ti'al ca cuxlaquech je'el bix u ca'ansique',

¹⁴ma' bíin a tzelabáa ti'obi' ti'olal a tzaypachtic u láak kuob yéetel a kulto'ob.

¹⁵Ba'ale' wa ca j ma' u'uyaj t'antic Yuumtzil a Ku, mix xan ta dzo'ocbesic tuláacal u nu'ucbe'en t'aano'ob yéetel u ya'almaj t'aano'ob quin wa'alic teech bejela'a', bíin talac ta wóokol u nactáantech le loolob t'aano'oba':

¹⁶Bíin loolob t'anta'aquech, ti' caaj bey ich cool.

¹⁷Bíin lúubuc le loolob t'aana', ichil a xaac yéetel tu cúuchil a ya'ach'tic a juuch'.

¹⁸Bíin loolob t'anta'ac, a paalal, a joocho'ob, u mejenil a wacaxo'ob yéetel u mejenil a j tamano'ob bey xan tuláacal a walak ba'alche'ob.

¹⁹bíin loolob t'anta'ac tuláacal ba'ax bíin a beete.

²⁰Yuumtzile', bíin u túuchi'it teech loolob t'aan, sat óolal yéetel yaayaj óolal ti' tuláacal ba'ax bíin a beete, ma' bíin xáanac quéen láaj xu'ulsa'aquech tu yo'olal ta p'atilac yéetel a kaakas cuxtal

²¹Yuumtzile' bíin u túuchi'it báan quíimil u ti'al u xu'ulsiquech ti' le múuch' caaj tu'ux bíin cajlaquecho'.

²²Bíin xan u túuchi'it teech yaayaj quíimilo'ob, chuuchup wíinclilo'ob, cucup ooxol, yáax kiinil yéetel u báan koja'anilo'ob ichil u coolilo'ob a trigo, yaayaj koja'anilo'ob u ti'al u páakal ti' teech tac quéen u xu'ulsech.

²³Le ca'ano' bíin u yóolt u láal teech u ja'il; le lu'uma' ma' bíin u yóolt u dzáa teech u yicho'obi'.

²⁴Yuumtzile' bíin u beet u káaxal u ma'ay lu'um yéetel sa'am lu'um ta wóokol tu keexil ja' tac u beetic a xu'ulsa'al

²⁵pech'a'anech tumen a aj p'eeco'ob. Ma'alob a tzolmilabáile'ex bíin xi'iquech a ba'atelte, ba'ale' bíin xa'aka'an áalcabnaquech, bíin a beetabáa u ja'akal yóol tuláacal u ajawilo'ob yóokolcaab.

²⁶Ch'íich'o'ob yéetel dzíidzic ba'alche'ob bíin jaantic a j quimen wíinclile'ex, ma' bíin yanac máax p'u'usico'obi.

²⁷Yuumtzil bíin u beet a mukyajtic xaacal wíinclil je'el bix tu beetaj ti' le j egipciobo', bey xan chu'uchumo'ob, we'echo'ob, yéetel páawo' u júutul u tzo'otzel a pool, u yajile' ma' bíin yanac dzaaquil ti' a koja'anilo'obi'.

²⁸Bey xan bíin u beet a mukyajtic choco poolal, ch'óopil bey satal óolal,

²⁹bíin xíimbalnaquech táan a t'at'alkab je'el bix le ch'óop éekjoch'e'enil. Mix ba'al bíin jóokoc teech utzil; mantadz bíin a mukyajt u ye'edzel a cuxtal bey xan táan u yocla'al a muuk, cu u yajile' mix máac bíin talac u yáantech.

³⁰Bíin a kax u t'aanil dzo'ocol beel, ba'ale' yaanal j xiib bíin chilac yéetel a x ba'al; bíin a beet a wotoch, ba'ale' ma' bíin cajlaquech ichili'; bíin a pak u x péetpachil uva, ba'ale' ma' bíin a jaant u yicho'obi';

³¹bíin quíimsa'ac a wacax ta táan, ba'ale' ma' bíin a jaant u bakeli'; bíin to'ococ teech a walak burro tu táan a wich, cu dzo'ocole' ma' bíin su'utuc techi'; a j tamano'obe' bíin lúubco'ob tu kab a aj p'eeco'ob, ma' bíin yanac máax áantiquech u ti'al a ca'a ti'alintiqui'.

³²Tu táan a wich bíin ku'ubuc a j xibil paalal yéetel a x ch'upul paalal ti' táanxel lu'umilo'ob, cu dzo'ocole' sáamsamal bíin taacchajac a wilico'ob, ba'ale' ma' bíin páatac a beetic mix ba'ali'.

³³U joochil a cool yéetel u yich tuláacal a meyaje', bíin jaanta'ac tumen máaxo'ob ma' a kaj óoltmajo'ob ca'achi', cu dzo'ocole' bíin a mukyajt mantadz u yedziquecho'ob yéetel u loolob t'antiquecho'ob.

³⁴Le quéen a wil tuláacal lelo', bíin chocochajac a pool.

³⁵Yuumtzile' bíin u beet a mukyajtic u x ma' dzaaquil xaacalilo'ob a píixo'ob, u muuk a wooco'ob yéetel tuláacal a wíinclil, ma' bíin yanac dzaac a ti'ali'.

³⁶Yuumtzile', bíin u beet a bisa'al, yéetel a ajaw ti' jun p'éel múuch' caajo'ob ma' a kaj óoltmaj mix kaj óolta'ab tumen a máanja'an ch'i'ibalo'obi'. Te'elo' bíin a kult u láak kuob beeta'ano'ob yéetel che' bey xan yéetel tuunich,

³⁷bíin suunaquech jak óolal, bíin jóokesa'ac a tzicbalil bey xan bíin p'a'asta'aquech ti' tuláacal le caajo'ob tu'ux bíin u bisech Yuumtzilo'.

³⁸Bíin a pak ya'ab i'inaj, ba'ale' bíin a jooch chéen jun p'íit u yich tumen bíin láaj jaanta'ac tumen j sáak.

³⁹Bíin a pak u x péetpachil uva yaan a canantic, ba'ale' ma' bíin a wuk u kabi', mix bíin a mol u yicho'obi' tumen bíin láaj xu'ulsa'ac tumen x nookolo'ob.

⁴⁰Bíin yanac teech u x péetpachil olivo tuláacal tu'ux, ba'ale' ma' bíin a qui'ibocquintabáa yéetel u aceiteili' tumen chéen tu juunal bíin báanac u aceitunailo'ob.

⁴¹Bíin yanac a j xibil paalal yéetel a ch'upul paalal, ba'ale' ma' bíin yanaco'ob ta wicnali' tumen bíin lúubuco'ob cuxa'ano'ob ti' ba'atel u ti'al ca bisa'aco'ob táanxel múuch' caajo'ob.

⁴²Tuláacal u che'ilo'ob yéetel u yich a lu'ume' bíin xu'ulsa'ac tumen j sáako'ob.

⁴³Le j táanxel lu'umilo'ob cajnáalo'ob ta múuch' caajo'obe', junjun p'íitil bíin xi'ic u mu'uka'antalo'ob, ba'ale' teche' bíin xi'ic u bin u lúubul a muuk.

⁴⁴Leti'obe' bíin u dzáa ba'al a páaye, ba'ale' teche' ma' bíin yanac mix ba'al a dzáa j páayili', leti'ob bíin culaco'ob yáax cúuchil, ba'ale' teche' tu dzooc cúuchil bíin culaquech.

⁴⁵Tuláacal le loolob t'aano'oba', bíin talac ta wóokol, bíin xan u pechubáa u xu'ulsech, tumen ma' ta wóoltaj a wu'uyaj t'ant Yuumtzil a Kui', mix ta dzo'ocbesaj u nu'ucbe'en t'aano'ob yéetel u ya'almaj t'aano'ob u ya'almajo'.

⁴⁶Le ba'alo'oba', jun p'éel chíiculal ma' bíin páatac ta'aca'al a ti'al yéetel a ch'i'ibalo'ob u ti'al mina'an u xuul,

⁴⁷tu yo'olal ma' ta kultaj Yuumtzil a Ku yéetel qui'imac óolal, mix yéetel táan óolal quex tumen ya'ab ayikalil tu dzaj teech ca'achi'.

⁴⁸Bíin palitzilta'aquech tumen le aj p'eeco'ob cu bíin j túuchi'itbilo'ob tumen Yuumtzil u beeto'ob teech loob; bíin a mukyajt wi'ij, ukaj, chacnulil yéetel tuláacal talam óotzilil. Yuumtzile' bíin u beet a mukyajtic yaayaj palitzilil, tac u xu'ulsiquech.

⁴⁹Líikbal tu sen náach u múuch' caajilo'ob yóokolcaabe', Yuumtzile' bíin u beet u pulicubáa ta wóokol, je'el bix u júul xiknal jun túul j cóote', jun múuch' caaj ma' bíin a na'at u t'aani',

⁵⁰máaco'ob dzíictac yicho'ob ma' tu tziquico'ob nuxibo'obi', mix bíin u ch'a'ob óotzilil ti' mejen paalal.

⁵¹Bíin u jaanto'ob u yaalo'ob a wacax bey xan u yicho'ob a paakal, tac quéen u p'áatech nakan óotzilil; ma' bíin u p'at teech trigoi', mix u kaab uva, mix aceite, mix u yaalo'ob a x wacaxo'ob, mix u yaalo'ob a j tamano'ob, bíin quíimiquech yéetel wi'ij.

⁵²Bíin u bakpacht a caajalo'ob u ti'al u pulicubáa tu yóokolo'ob u jut u asab ca'analil yéetel u piimpim pakilo'ob u tuulumilo'ob ti' ba'axo'ob a dzaama ca'ach a táan óolal; bey bíin u bakpacht bíin u pulubáa tu yóokol tuláacal u caajilo'ob le múuch' caajo'ob tu dzaj teech Yuumtzil a Kuo'.

⁵³Ca'aliquil u bakpachtmaj a caajalo'ob le aj p'eeco'obo', tu yo'olal sen wi'ijeche' bíin a jaant tac a paalal, le a j xiibil paalal yéetel le a x ch'upul paalal tu dzaj teech Yuumtzil a Kuo'.

⁵⁴Tac le j xiib jach utz muun xan u pucsi'ikal yaan ichile'exe', bíin u loolob pact u sucu'un, u yatan jach u yaabiltmajo'obo', bey xan u paalal cuxa'ano'obo',

⁵⁵u ti'al ma' u t'oxic ti'ob u bakel u paalal cu jaantico'. Ma' bíin yanac ba'al jaantbil ca'aliquil táan u beetic teech loob a aj p'eeco'ob te ta caajalo'obo', u ti'al u beetico'ob a yaayaj mukyaj.

⁵⁶Tac le co'olel sen muun u pucsi'ikal yéetel jach x nuum u ti'al u pe'ech'act lu'um x ma' xanabile', bíin u loolob pact u yíicham jach u yaabiltmajo' bey xan u paalal

⁵⁷tu yo'olal ma' u t'oxic ti'ob le paalal cu síijsico' mix u sóol paal le cu jóokol tu jobnelo', bíin u ta'acbesubáa u ti'al u jaantej, tumen ma' bíin yanac mix ba'al u ti'al jaantbil ca'aliquil táan u beetic teech loob a aj p'eeco'ob tu yóokol a caajalo'obo'.

⁵⁸Wa ma' ta dzo'ocbesic tuláacal le a'almaj xiquino'ob dzíibta'an ti' le ju'un mix ta tziquic u nojbe'en sajbe'entzil kaaba' le Yuumtzil a Kuo',

⁵⁹Leti'e' bíin u túuchi'it nucuch sajbe'entzil báan quíimilo'ob ta wóokol, tu yóokol a ch'i'ibalo'ob bey xan kaakas koja'anilo'ob mina'an dzaac u ti'alo'ob.

⁶⁰Bíin u beet u taal ta wóokol le báan quíimilo'ob j taalo'ob tu yóokol Egipto, le tu sen ja'aksajo'ob a wóole', yaan a mukyajtico'ob mantadz.

⁶¹Bíin in túuchi'it teech xan u láak koja'anilo'ob yéetel u láak báan quíimilo'ob ma' tu ch'a'a chi'ita'alo'ob tu ju'unil le ca'anbesaja', u ti'al ca u xu'ulsech.

⁶²Israel, teech túune' sen ya'abech beyech ca'ach je'el bix u eekilo'ob ca'ane', bíin p'áataquech chéen jun chan p'íit, tumen ma' ta wu'uyaj t'antaj Yuumtzil a Kui'.

⁶³Je'el bix ca'ach cu qui'imacchajal u yóol Yuumtzil u beetic utz teech u ya'abcuntiquecho', bejela'e' cu qui'imacchajal u yóol a quíimil yéetel a xu'ulul, tumen bíin jáanpayta'aquech te j lu'um tu'ux bíin ocoquecho'.

⁶⁴Yuumtzile' bíin u ki'itbesech ti' tuláacal múuch' caajo'ob, ti' jun ti'itze' tac tu láak jun ti'itz yóokolcaab, te'elo', bíin a kult jela'an kuob, kuob che' u ca'ajo'ob yéetel tuunich u ca'ajo'ob, ma' a kaj óoltmaj, mix kaj óolta'ab tumen a máanja'an ch'i'ibalo'obi'.

⁶⁵Ca'aliquil ti' cajacbalech ti' le múuch' caajo'obo', ma' bíin yanac teech jéedzel mix je'elel, tumen Yuumtzil a Kue' bíin u beet a cuxtal jaka'an a wóol, okom óolo'ob a wicho'ob chupech xan yéetel yaayan óolal.

⁶⁶A cuxtale' mantadz bíin yanac tu chi' quíimil; bíin sajacchajquech yéetel kiin bey xan yéetel áakab, cu dzo'ocole', ma' xan jach ma'alob jedzecbalil a cuxtali'.

⁶⁷Tu yo'olal a sen sajaquile' ya'abcach ba'alo'ob bíin a wile', ja'atzcab kiine', bíin a wa'al: ¡Quexi' wa áakabe'! yéetel áakabe', bíin a wa'al: ¡Quexi' wa yéetel kiine'!

⁶⁸Quex tumen Yuumtzil tu ya'alaj teech ma' bíin suunaquech tu ca'a téen tu bejil Egiptoe', quex beyo' bíin u sutech ti' cheemo'ob te'elo', bíin u conech bey palitzil ti' a aj p'eeco'ob; ba'ale' mix máac bíin u yóolt u manech.