Read Yucateco Deuteronomio 29 Bible Online

Deuteronomio 29 - Yucateco bible

Deuteronomio 29

¹Lelo'oba' leti' ba'axo'ob cu ya'alic le nup t'aan tu dzaj Yuumtzil ti' Moisés ca u beet yéetel le j israelitaob tu lu'umil Moab, pa'ate' yéetel le nup t'aan tu beetaj yéetelo'ob tu pu'uquil Horebe'.

²Moisese' tu much'quintaj tuláacal le j israelitaobo' ca tu ya'alaj ti'ob: Te'exe' ta wilaje'ex ba'ax tu beetaj Yuumtzil tu lu'umil Egipto ti' faraón, ti' u nucuch aj meyajo'ob yéetel ti' tuláacal u múuch' caajo'ob,

³te'ex xan cu páajtal a jaajcuntique'ex le nucuch chíiculalo'ob bey xan le nucuch máactzilo'obo'.

⁴Ba'ale' tac bejela'e' Yuumtzile' ma' u dzáa te'ex u na'atil mix u yóolt ca a táan óolte'ex ba'ax u káat u ya'al tuláacal le ba'ax úucho'.

⁵Bul cuarenta ja'abo'ob tin nu'uctaj a beele'ex te x tocoy lu'umo', ti' buca'aj kiino'obo', ma' j la'ab a nooke'exi' mix a xanabe'exi'.

⁶Ma' a jaante'ex waaji' mix a wuke'ex u kaab uvai', mix a wuke'ex mix jun p'éel ukul cu cáalcunaji', u ti'al ca a wojéelte'exe' le Yuumtzilo' a Kuex.

⁷Le ca j kucho'on te j lu'umo'oba', jóoko'ob u ba'atelto'ono'ob, Sehón u ajaw Hesbón, bey xan Og u ajawil Basán, ba'ale' t pa'aj u muuko'obe',

⁸ca t ch'a'aj u múuch' caajo'ob, ca t dzaj u ti'alint u ch'i'ibalo'ob Rubén, yéetel Gad, yéetel u táancoch u ch'i'ibal Manasés.

⁹Bey túuna', t dzo'ocbesaje'ex ba'axo'ob cu ya'alic le nup t'aano', beete'ex ba'ax cu ya'alic, u ti'al ca xi'ic te'ex utzil ti' tuláacal ba'ax bíin a beete'ex.

¹⁰Bejela'e', láaj much'ucbale'ex tu táan Yuumtzil a Kuex: u nuuquilo'ob a ch'i'ibale'ex, u nuuquilo'ob caaj, u nuuquilo'ob aj meyajo'ob, tuláacal u j xiibilo'ob Israel,

¹¹mejen paalal, co'olelo'ob yéetel le j táanxel lu'umilo'ob cajnáalo'ob ichile'exo', cu chúunul yéetel le cu ch'ac si'o' tac le cu púut ja'o',

¹²u ti'al jalach t'ante'ex u kax t'aanil le nup t'aan cu beetic Yuumtzil a Kuex ta wéetele'ex bejela'e'.

¹³Bejela'e', cu p'áatal jéedzelil, te'exe' u caajale'ex, leti'e' a Kuex je'el bix tu séeb chi'itajil ti' Abraham, Isaac yéetel Jacob a máanja'an ch'i'ibale'exo'obo'.

¹⁴Ba'ale' ma' chéen ta wéetele'ex cu beetic Yuumtzil le nup t'aan yéetel le jalach t'aana',

¹⁵ba'ale' tac yéetel le máaxo'ob mina'ano'ob t icnal bejela'a' tu táan leti'o'.

¹⁶Te'exe' jach ma'alob a wojelile'ex bix úuchic c cajtal Egipto, bey xan bix úuchic c ch'actic tuláacal le múuch' caajo'ob t nactáantaj t beelo',

¹⁷tu'ux t ilaj ma' jaaj kuobi', yéetel le j p'ecbe'en kuob beeta'ano'ob yéetel che', tuunich, plata yéetel oro cu kulta'alo'ob tumen le máaco'obo'.

¹⁸Bejela'e' ma' u yantal ichile'ex j xiib, mix co'olel, mix j otochnáalilo'ob, mix u múuch' cajtalil otochnáalo'ob ca u xúunp'at Yuumtzil c Junab Ku u ti'al ca u kult u kuob le múuch' caajo'obo'. Mix jun túul ti' te'ex ca béeyac bey jun cúul che' káaj u mootz, yéetel cu beetic loob u yiche'.

¹⁹Wa cu dzo'ocol a wu'uyique'ex ba'ax cu ya'alic le jalach t'aana', yaan máax ichile'ex cu ya'alic tu baatzil jach utz u cuxtal, cu tuucultic beya': Tuláacal ba'ax bíin jóokoc teen ma'alobil quex in beet chéen le ba'ax in káate', tu yo'olal leti'e' bíin u láaj xu'ulsa'ale'ex.

²⁰Yuumtzile' ma' bíin u yóolt u sa'ats u si'ipili', ba'ale' bíin u láal u p'uja'anil yéetel u sen kuuxilil tu yóokol le j xiibo', bíin lúubuc tu yóokol tuláacal le loolob t'aano'ob dzíibta'an te ju'una', bíin u beet Yuumtzil u sa'atal u kaaba' u ch'i'ibal yóokolcaab.

²¹Yuumtzile' bíin u tzel le j xiibo' ichil tuláacal u ch'i'ibalo'ob Israel, bíin u beet ca xi'ic kaasil ti' je'el bix u ya'alic u loolob t'aanilo'ob u ju'unil le a'almaj t'aano'.

²²Le máaxo'ob bíin síijico'ob, ti' a ch'i'ibale'ex cu dzo'ocol a quíimile'exe', bey xan le j táanxel lu'umilo'ob bíin talaco'ob ti' náanach múuch' caajo'obo', bíin u yilo'ob le báan quíimilo'ob yéetel le koja'anilo'ob bíin u túuchi'it Yuumtzil tu yóokol le lu'uma';

²³bíin ila'ac ti' tuláacal a múuch' caaje'exe', dzo'oc u p'áatal chéen asufre, ta'ab yéetel lu'um ela'an. Ma' bíin páatac u pa'akal le lu'umo', mix bíin páatac u dzáic ichi'; mix jun cúul u xíiwil bíin jóokoc je'el bix ca j xu'ulsa'ab u caajilo'ob Sodoma, Gomorra, Adma yéetel Seboim, le caajo'ob xu'ulsa'ab tumen Yuumtzil le ca sen p'u'uje'.

²⁴Tuláacal túun yóokolcaab bíin káat chi'itic: ¿Ba'axten tu beetaj bey Yuumtzil ti' le múuch' caaja'? ¿Ba'axten sen p'u'uji?

²⁵U núuc t'aanile': Tumen tu xúunp'ato'ob u nup t'aan Yuumtzil, u Ku u máanja'an ch'i'ibalo'ob, le tu beetaj yéetelo'ob ca tu jóokeso'ob Egiptoe',

²⁶ca j bino'ob u kulto'ob yéetel u chíinpolto'ob kuob ma' u kaj óoltmajo'ob, mix xan tu kamajo'ob mix ba'al ti'obi'.

²⁷Le t o'olal Yuumtzile' j p'u'uj ti' le lu'uma', ca tu beetaj u lúubul tu yóokolo'ob tuláacal le loolob t'aano'ob dzíibta'an ti' le ju'una';

²⁸ca tu xáacch'intajo'ob tu lu'umo'ob yéetel sen p'u'ujulil bey xan yéetel nojoch kuuxilil yéetel dzíiquil, ca tu tojolch'intajo'ob ti' táanxel múuch' caajilo'ob je'el bix u yúuchul bejela'a'.

²⁹Yaan ba'axo'ob ma' c ojele'exi': Lelo'obo' u ti'al Yuumtzil c Ku, ba'ale' yaan ba'axo'ob dzo'oc u chíicbesa'al to'on yéetel ti' c paalal u ti'al c dzo'ocbeso'ob mantadz; leti'ob tuláacal u nu'ucbe'en t'aanilo'ob le a'almaj t'aana'.