Read Yucateco Deuteronomio 31 Bible Online

Deuteronomio 31 - Yucateco bible

Deuteronomio 31

¹Moisese' t'aanaj tu ca'a téen yéetel tuláacal Israele' ca tu ya'alaj ti'ob:

²Tene' dzo'oc u chuquic ciento veinte in ja'abilo'ob, dzo'oc u p'áatal mina'an in muuk u ti'al in babal xíimbal. Dzo'oc xan u ya'alic teen Yuumtzil ma' bíin in ch'act le Jordano'.

³Ba'ale' Yuumtzile' bíin xi'ic táanil ti' te'ex u ti'al u xu'uls le múuch' caajo'ob tu'ux bíin cajlaque'ex u ti'al a woocle'ex a ti'alinte'ex u lu'umo'obo'. Josué bíin xi'ic actáan ti' te'ex je'el bix tu ya'alaj Yuumtzilo'.

⁴Yuumtzile' bíin u beet ti' le caajo'ob le ba'ax tu beetaj ti'ob Sehón yéetel Og u ajawo'ob le amorreob, yéetel le lu'umo'ob tu láaj xu'ulsajo'.

⁵Le quéen u beet Yuumtzil u láaj lúubul ta kabe'ex le múuch' caajo'ob u najmal a beetique'ex tu yéetelo'ob le ba'axo'ob u ya'almajo'.

⁶Xiixib máacchajaque'ex mu'uka'anchajac a wóole'ex; ma' a sajactale'ex mix u ja'akal a wóole'ex quéen ba'atelnaque'ex yéetelo'ob, tumen Yuumtzil a Kuexe' ti' yaan ta wéetele'exe', ma' bíin u xunp'ajte'exi'.

⁷Cu dzo'ocole' Moisese' tu t'anaj Josuee' ca tu ya'alaj ti' tu táan tuláacal Israel: Xiixib máacchajaquech mu'uka'anchajac a wóol, tumen teech bíin a bis le máaco'ob te j múuch' caajo'ob tu séeb chi'itaj Yuumtzil ti' a máanja'an ch'i'ibale'ex, bíin u dzáa te'exo', teech bíin a beet u ch'aico'ob u ti'alinto'ob.

⁸Yuumtzil bíin xi'ic ta táan, leti' bíin yanac ta wéetel; ma' bíin u xunp'ajtechi', mix bíin u p'atech x ma' áantajili'; let o'olale' ma' a ch'a'ic sajaquil mix a sajac óolta'al.

⁹Moisese' tu dzíibtaj le a'almaj t'aana', ca tu kubaj ti' le aj kiino'ob levitaob jun páaycuna'ano'ob u biso'ob u ba'asche'il u nup t'aan Yuumtzilo', bey xan ti' tuláacal u nuuquilo'ob Israel,

¹⁰tu ya'alaj xan ti'ob: tu jujun siete ja'abo'ob u ti'al u kuchbal u ja'abil sa'atsaj p'aaxo'ob, tu kiinilo'ob u kiin kujil máacano'obe',

¹¹le quéen much'lac tuláacal le j israelitaob tu táan Yuumtzil u Kuob ti' le cúuchil bíin u yéeye', bíin xo'ococ le a'almaj t'aan tu táan tuláacalo'obo'.

¹²Unaj much'ucbal tuláacal le caajo', je'el bix j xiibo'obe', bey x co'olelo'ob, mejen paalal yéetel le j táanxel lu'umilo'ob cajnáalo'ob ta caajale'exo'obe', u ti'al ca u yu'ubo'ob u xo'ocol le a'almaj t'aan, tu yo'olal u canico'ob u tzico'ob Yuumtzil a Kuex bey xan ca u dzo'ocbeso'ob tuláacal ba'ax dzíibta'ani'.

¹³Beyo' a paalale'ex ma' u yojelo'ob mix ba'al ti' lelo', bíin u yu'ubo'ob u ti'al ca u cano'ob u tzico'ob Yuumtzil a Kuex tuláacal u kiinilo'ob u cuxtalo'ob te j lu'um bíin ocoque'ex a ti'alinte'ex, le quéen a ch'acte'ex le Jordano'.

¹⁴Cu dzo'ocole' Yuumtzile' tu ya'alaj ti' Moisés: Ilej dzo'oc u náadzal u kiinil a quíimil; t'aan Josuee', ca xi'ique'ex ta ca'a túulile'ex tu noj Paselil Much'tal, u ti'al ca in wa'al te'ex ba'axo'ob bíin a beete'ex. Moisés yéetel Josuee', j bino'ob tu noj Paselil Much'tal,

¹⁵te'elo' j chíicpaj Yuumtzil ti' jun p'éel t'o'ol múuyale', le múuyalo' j p'áat tu jool le noj Paselo'.

¹⁶Yuumtzil túune' tu ya'alaj ti' Moisés: séeba'an bíin quíimiquech, le caaja' bíin sen kasac yéetel u kuilo'ob le táanxel lu'um tu'ux bíin ococ cajtalo'; bíin u xúump'atten u ti'al u mix ba'alcuntic le nup t'aan tin beetaj yéetelo'.

¹⁷Ba'ale' le quéen t'a'abac in p'u'ujulile' quin xúump'attico'ob; bíin in jach lukes in tuucul yóokolo'ob, sen ya'ab loobo'ob yéetel yaayaj óolo'ob bíin u mukyajto'obo', tu dzooque' bíin u ya'alo'ob: ¿Ma' wa táan c mukyaje'ex tumen mina'an Ku t éetelexi'?

¹⁸Ba'ale' le quéen kuchuc le kiino', bíin asab náachchajquen ti'ob, tu yo'olal tuláacal le kaas tu beetajo'ob ca tu kultajo'ob yaanal kuobo'.

¹⁹Bejela'e', dzíibte'ex le kaaya', ca'anbese'ex ti' le j israelitaob u ti'al u kayo'ob, u ti'al ca meyajnac tacpoolil.

²⁰Tumen le quéen dzo'ococ in wocsico'ob ti' le lu'um tin séeb chi'itaj yéetel jalach t'aan ti' u máanja'an ch'i'ibalo'ob, le lu'um tu'ux cu yáalcab leche yéetel caab bey u yáalcab ja'e', le quéen janalnaco'ob tac quéen na'ajaco'ob bey xan u poloctalo'obe', bíin xi'ico'ob tu paach yaanal kuob u ti'al ca u kulto'obe', bíin u kéex óolteno'ob, bíin u manba'alcunto'ob in nup t'aan.

²¹Ba'ale' le quéen lúubuc ya'abcach loobo'ob yéetel mukyajo'ob yóokolobe', le kaaya' bíin meyajnac tacpoolil tu táano'ob, tumen bíin ka'ajsa'ac, bíin ka'ayac xan tumen u ch'i'ibale'ex; tumen ma'ili' in wocso'ob ti' le lu'um in séeb chi'itmaj ti'obo', ma'alob in wojelil ba'ax cu tuclico'ob.

²²Ti' le kiino', tu dzíibtaj Moisés le kaayo' ca tu beetaj u ca'anbesa'al ti' le j israelitaobo'.

²³Ti' Josué u paal Nune', Yuumtzile' tu ya'alaj: Xiixib máacchajaquech mu'uka'anchajac a wo'ol yéetel mu'uka'anchajquech, tumen teech bíin a woques le j israelitaob te j lu'um in séeb chi'itmajo', tene' bíin yanaquen ta wéetel.

²⁴Le ca j dzo'oc u dzíibtic Moisés le a'almaj t'aano'ob ti' jun p'éel ju'un,

²⁵tu ya'alaj ti' le j levitaob jun páaycuna'ano'ob u ti'al u biso'ob u ba'asche'il u nup t'aan Yuumtzilo':

²⁶Ch'a'ex u ju'unil le a'almaj t'aana', dza'ex tu tzéel u ba'asche'il u nup t'aan Yuumtzil a Kuexe', u ti'al ca p'áatac te'elo' u ti'al u j meyaj tacpoolil ta táane'ex.

²⁷Tumen tene' in wojel te'exe', jun p'éele'ex caaj dzu'uy a poole'ex u ti'al u'uyaj t'aan; wa bejela'a' quex tumen ti' yanen ichile'ex ca beeticaba'ex aj ma' u'uyaj t'aane'ex ti' Yuumtzile', ¿ba'ax bíin a beete'ex cu dzo'ocol in quíimil?

²⁸Tase'ex way tuláacal u nuuquil a caajale'exe', bey xan u nuuquilo'ob u múuch' cajtalilo'ob a wotochnáale'ex, u ti'al ca in wa'al ti'ob le ba'alo'oba', ca in dzáa xan le ca'an yéetel le lu'um bey tacpoolilo'ob tu táano'obo'.

²⁹Tumen in wojel le quéen dzo'ococ in quíimile', bíin jach kaschajaque'ex, bíin a p'ate'ex le bej tin wa'alaj te'ex ma' a p'atique'exo'; in wojel xan bíin talac ta wóokole'ex loobo'ob tumen bíin a beete'ex ba'ax kaas tu táan Yuumtzil u ti'al beetique'ex u p'u'ujul.

³⁰Moisés túune' tu kayaj le kaaya', líikbal u cáajbale' tac u dzo'ocbal, tu táan tuláacal le j israelitaobo' much'ucbalo'obo':