Read Yucateco Deuteronomio 32 Bible Online

Deuteronomio 32 - Yucateco bible

Deuteronomio 32

¹Ca'an u'uyej, bin in ca j t'aan; lu'um, ch'en xiquint ba'axo'ob quin in wa'ale.

²in ca'ansaje' bíin báanac bey u káaxal ja'e', in tze'eque' bíin báanac bey u káaxal p'uul ja'e', bey x tóosja' yóokol xíiwe', bey u ch'ach'ajanquil ja' tu yóokol ma'alob xíiwe'.

³Bíin in k'a'ayt u kaaba' Yuumtzil: ¡éejem te'exe', u seten nojochil Ku!

⁴Leti' máax canantico'on, u meyajo'obe' sen ma'alobtac, ba'axo'ob cu beetique' tojtac. Leti' u Kuil jaaj, ti' leti'e' mina'an ba'ax ma' tu beeli', ¡leti'e' aj ti'ibil bej, leti' xan u jaajil!

⁵Loolob wíinique'ex, táaj keechele'ex, dzo'oc a poch'ique'ex Ku, ma' ta najmatique'ex u paaliltique'ex;

⁶¿bey úuchic a bo'otique'ex Yuumtzilo'? ma' na'at caaje'ex, j mina'an a kaj óolale'ex, ¿ma' wa leti' a taata, leti' xan máax patech? ¡Leti' j beetech, leti' j dzáa a cuxtal!

⁷Sut a paacat paachil, ka'ajac teech le kiino'ob dzo'oc u máano'obo'; a'al ti' a taata ca u ka'ajestech, ti' le ch'ijano'ob ca u tzicbalto'ob teech:

⁸Yanchaj jun p'éel u kiinil, le aj Sen Ca'anilo' tu beetaj u t'ooxil j xiibo'ob yéetel múuch' caajo'ob, tu dzaj u xu'ukilo'ob u xuul le caajo'obo'. Ba'ale' tu dzaj xan u paacat yóokol le j israelitaobo',

⁹tumen ba'al u ti'al Yuumtzil, u caajil Jacob.

¹⁰Tu nuptáantajo'ob te x tocoy lu'umo', tiquin yéetel ja'aja'adza'ano'ob tumen iik; tu méekajo'ob, tu ca'anbesajo'ob tu canantajo'ob xan bey u tuknel u yiche'.

¹¹Je'el bix le j cóot cu xiknal sutulsutil yóokol u ku' u ti'al u beetic u taactal u xiknal u mejenilo'obe', bey tu xit'ilac u xiik Yuumtzil ca tu cuchajo'ob u biso'ob.

¹²Chéen Yuumtzil j e'es bej ti'ob, mix máac u láak; ¡ma' j áanta'abo'ob tumen mix jun túul yaanal kui'!

¹³Tu bisajo'ob yéetel u xíimbalil béeychajal tu ca'anal caabilo'ob le múuch' caajo', tu tzéentajo'ob yéetel u yich káax, ti' le tzekelo' tu dzaj u yuko'ob caab ti' le dzu'uy toko', tu dzaj aceite ti'ob;

¹⁴ti' u wacaxo'obo', yanchaj leche yéetel mantequilla, tu jaantajo'ob xan u asab ma'alobil mejen j tamano'ob, u j tamanilo'ob Basán yéetel j xiibil yuuco'ob; tu jaantajo'ob u asab ma'alobil u neek trigoo' tu yukajo'ob xan u kab uva, u ki'ikel uvaob.

¹⁵Ba'ale' Jesurune',[7] polocchaji cóochaknaj xan (tu yo'olal sen polocchaje', léembalnaj u pu'uch), tu xúump'attaj u Ku máax beetmail; tu kéex óoltaj máax canantic yéetel máax lojic.

¹⁶Tu léecsajo'ob u p'eequil u ke'exel Ku tu beetajo'ob u p'u'ujul iquil úuchic u kultico'ob p'ecbe'en beetbil kuob;

¹⁷tu táanbesajo'ob quíimsbil ba'alche'ob ti' ba'abalo'ob ti' beetbil kuob ma' u kaj óoltmajo'ob ca'achi'; túumben kuob táant u kujsa'alo'ob, mix jun téen j kulta'abo'ob tumen u taataob.

¹⁸Israel, ta tu'ubsaj a taata máax canantiquech; ta tu'ubsaj a Ku máax dzáa a cuxtal.

¹⁹Ku túune' j kuuxchaj tu yo'olal lela', ma' tu kamaj u j xibil paalal mix u x ch'upul paalali';

²⁰ca tu ya'alaj: Bin in ca'aj in sut in paach ti'ob, ¡bíin in wila'a' bix bíin dzo'ococo'ob! Tu jaajile' sen loolob máaco'ob, paalal ma' tu páajtal u yocsaj óolta'alo'ob.

²¹Tu p'u'ujsajo'ob ti' teen u p'eequil in ke'exel yéetel jun p'éel ku ma' Junab Kui', tu beetajo'ob u sen p'u'ujul xu'ululbe'en kuob; ¡teen xane' bíin in beet u p'u'ujul u p'eequil u ke'exelo'ob yéetel jun p'éel caaj ma' caaji', bíin in beet u kuuxilo'ob yéetel jun p'éel caaj ma' tu yocol t'aan tu pool!

²²Dzo'oc u t'a'abal in p'u'ujul bey káake', bíin tóoch'balnac tac tu taamil cúuchilo'ob; bíin u láaj tóoc le lu'um yéetel u yicho'ob bíin u t'ab káak tu chuun pu'uco'ob.

²³Yóokolo'ob bíin in láal tuláacal le kaaso'obo', tu yóokolo'ob bíin in láal tuláacal in x julubo'ob;

²⁴bíin quíimco'ob yéetel wi'ij bey xan yéetel x elel chocwil jun p'éel yaayaj báan quíimil bíin xu'ulsico'ob; bíin in túuchi'it tu yóokolo'ob dzíidzic ba'alche'ob yéetel j chi'ibal cano'ob.

²⁵Ti' le bejo'ob, bíin lúubuc u paalalo'ob tu yej máascab, ti' le najo'obo' bíin yanac ja'asaj óol; bíin quíimico'ob j xibil paalal yéetel x ch'upul paalal, nuxibo'ob yéetel mejen paalal cu chu'ucho'ob.

²⁶Tene' dzo'oc ca'ach in tucultic in ki'itbesico'ob bey xan in beetic a tu'ubsa'alo'ob yóokolcaab,

²⁷ba'ale', j náak ti' teen u p'a'as le aj p'eeco'; ma' tin cha'aj u ca'analtal u yich in aj p'eeco'obi' ca kuchuc u ya'alo'ob: Ma' Yuumtzil beet lela'; to'on t beetaj yéetel c muuk.

²⁸Israele' jun p'éel caaj dzo'oc u chocoltal u pool; ¡mina'an u na'at!

²⁹Wa aj ojéelo'obe', je'el u ch'a'a nu'uctico'obe' je'el u na'atico'ob bix bíin dzo'oco'obe'.

³⁰¿Bix úuchic u beeta'al u yáalcab mil máaco'ob tumen jun túuli'ili' máac? ¿Bix úuchic u beeta'al yáalcab diez mil máaco'ob tumen chéen ca'a túul máaco'ob? ¡Lelo' chéen tumen Yuumtzil máax canantico'obe', tu yóoltaj u kub ti' le aj p'eeco'!

³¹Aj p'eeco'obe', ma'alob yojelilo'ob ma' tu páajtal u quetico'ob máax canantico'ob yéetel máax canantico'on.

³²Leti'obe' beyo'ob u x péetpachil uva dzo'oc u kastale', u ch'i'ibalo'ob Sodoma yéetel Gomorra káajtac u yich, cu beetic loob xan;

³³u kab u yo'och uvaobe' u kab u chi' j chi'ibal cano'ob, ¡u kab u chi' j chi'ibal can cu quíimsaj!

³⁴Tuláacal lela' táan in p'atic in ti'alint; táan in much'quintic bey co'ocoj ba'ale',

³⁵u ti'al le kiin quéen in suut u jeel loob, le quéen in dzáa ti'ob ba'ax cu najmatico'ob u ti'al quéen kuchuc u kiinil u lúubul. Naadz yanil u kiinil u xu'ulsa'alo'ob, ¡táan u kuchul u kiinil!

³⁶Yuumtzile' bíin jóokoc u ti'al u toc u caajal le quéen u yila'a' táan u lúubul u muuke'; Yuumtzile' bíin u ch'a'a óotzilil ti' u palitzilo'ob le quéen u yila'a' ma' p'áatal mix jun p'íit u muuko'ob.

³⁷Bíin túun u ya'al ti'ob ¿Tu'ux yaan a kuex, le máaxo'ob canantique'ex, a woquesmaj a wóole'ex xan ti'ob,

³⁸le ma'axo'ob jaantic ca'ach u tzaatzel a quíimsbil ba'alche'obo' bey xan cu yukico'ob u kab le uva ca táanbesique'exo'? ¡Líikco'ob u yáante'exo'ob! ¡talaco'ob u canante'exo'ob!

³⁹Chéen teen Junab Kuen; jun páay ti' tene' mina'an u láak kuob. Teen dzáic le cuxtalo', teen xan lukesic; teen beetic le yajo', teen xan dzaquic. ¡Mix máac bíin páatac u toquicubaáa ti' in páajtalil!

⁴⁰Quin líikesic in kab j ca'ane', quin jalach t'aan tu yo'olal in mina'an in xu'ulul

⁴¹le quéen in ja'a' u yej in léembal máascabe' u ti'al quéen chúunuc in t'oxic jadze', bíin in sut u jeel loob ti' in aj p'eeco'ob. ¡Bíin in dzáa ba'ax cu najmatic máaxo'ob p'ecmailen!

⁴²Bíin in papak ki'ikt in x julubo'ob, bíin xu'ulsa'aco'ob tumen in máascab; ¡u ki'ikel máaco'ob loobilta'ano'ob yéetel máaco'ob dzo'oc u lúubulo'ob ich ba'atel! ¡u ki'ikel máaxo'ob quiimbesa'ano'ob yéetel máaxo'ob kala'ano'ob! ¡u nuuquil aj p'eeco'ob, chowactac u tzo'otzel u poolo'ob!

⁴³¡Múuch' caaje'ex, qui'imacchajac a wóole'ex yéetel u caajal Ku! ¡Leti'e' bíin u sut u jeel quíimsa'abic u palitzilo'ob, bíin u sut u jeel loob ti' u aj p'eeco'ob, bíin u sa'ats u si'ipil le u múuch' caajo'ob bey xan bíin u sa'ats u caajal!

⁴⁴Moisese' jóok tu táan tuláacal u caajil Israele', leti' yéetel Josué u paal Nune', tu kayaj le kaaya', tu chúunbal tac tu dzoocbal.

⁴⁵

⁴⁶Cu dzo'ocole' tu ya'alaj ti' le j israelitaobo': tuculte'ex ma'alob tuláacal le ba'ax dzo'oc in wa'alic te'ex bejela'a', a'ale'ex ti' a paalale'ex ca u dzo'ocbeso'ob tuláacal ba'ax cu ya'alic le a'almaj t'aana'.

⁴⁷Tumen ma' jun p'éel báaxali'; le a'almaj t'aana' cuxtal a ti'ale'ex tumen leti'e' bíin u beet a cuxtale'ex ya'ab kiino'ob tu yóokol le lu'um yaan tu láak jun tzéel le Jordano', bíin a ch'a'ex a ti'alinte'ex.

⁴⁸Ti' le kiinaco' Yuumtzile' tu t'anaj Moisese' ca tu ya'alaj ti':

⁴⁹Xeen tu witzilo'ob Abarim, na'aquen tu witzil Nebo le yaan tu lu'umil le j moabitaob actáan ti' Jericó, te'elo', pact u lu'umil Canaán, le bíin in dzáa ti' le j israelitaob u ti'alinto'obo'.

⁵⁰Te'elo', te j witz tu'ux bíin na'acaquecho', bíin quíimquech u ti'al a much'tal yéetel a láako'obo', je'el bix quíimic a sucu'un Aarón tu witzil Hor ca j bin much'tal yéetel u láako'ob.

⁵¹Te'ex ca'a túule'exe', ta j ma' ocsaj óoltene'ex tu táan le j israelitaob, ca'aliquil ti' yane'ex tu ja'ilo'ob Meriba-cades, tu x tocoy lu'umil Zin, ma' ta tziquene'ex tu táano'obi'.

⁵²Le t o'olale' bíin a wil náach le lu'um bíin dzáa ti' le j israelitaobo', ba'ale' ma' bíin ojquechi'.