Read Yucateco Deuteronomio 4 Bible Online

Deuteronomio 4 - Yucateco bible

Deuteronomio 4

¹Bejela'a' túune' j israelita'ex, u'uye'ex le a'almaj t'aano'ob yéetel le tzolbe'en t'aano'ob dzo'oc in ca'anbesic te'exo', dzo'ocbese'ex xan u ti'al ca cuxlaque'ex yéetel a ti'alintique'ex le lu'um bíin dza'abac te'ex tumen Yuumtzil u Ku a máanja'an ch'i'ibale'exo'ob.

²Ma' a dzáique'ex mix ba'al mix a lukesique'ex mix ba'al ti' le in wa'almaj ca a beete'exo'. Dzocbese'ex u ya'almaj t'aano'ob Yuumtzil a Kuex quin wa'alic ca beete'exo'.

³Te'ex ta wilaje'ex ta wichile'ex ba'ax tu beetaj Yuumtzil Baal-peor, bey xan bix úuchic u xu'ulsic le máaxo'ob tu kultajo'ob u kuil le cúuchilo';

⁴ba'ale' tuláacale'ex le j p'áate'ex a kubmaj a wóole'ex ti' le Yuumtzil a Kuexo', tac bejela'a' cuxa'ane'exe'.

⁵Tene' in ca'anbesmaj ti' te'ex le a'almaj t'aano'ob yéetel le tzolbe'en t'aano'ob tu ya'alaj teen Yuumtzil in Ku ca a beete'exo', u ti'al ca a dzo'ocbese'ex te j lu'um tu'ux bíin cajlaque'exo'.

⁶Dzo'ocbese'ex yéetel beete'ex, tumen beyo' le caajo'obo' yaan u kaj óoltico'ob yaan na'at yéetel kaj óolal ti' te'ex, tumen le quéen kuchuc u kaj óolto'ob le a'almaj t'aano'oba', yaan u ya'alico'ob beya': ¡Buca'aj u na'at yéetel u kaj óolal le nojoch caaja'!

⁷Tumene' ¿Yaan wa u láak nojoch múuch' caaj cu yantal u kuob sen naadz ti' leti' je'el bix yanil c Ku c Yuumtzil t icnal je'el jay téen ca ch'a'a' chi'it u kaaba'e'?

⁸¿Ba'ax u láak nojoch caajil yaan ti'ob a'almaj t'aano'ob yéetel ca'anbesajo'ob tojtaco'ob je'el bix tuláacal le ca'anbesaj quin dzáic te'ex bejela'a'?

⁹Bey túuno', canante'ex ma'alob u ti'al ma' a tu'ubsique'ex le ba'axo'ob dzo'oc a wilique'exo', mix a luksique'exo'ob ta tuucule'ex; ba'ale' tzole'ex ti' a paalale'ex yéetel ti' a wáabile'exo'ob.

¹⁰Le kiinac ca j ti'anchaje'ex tu táan Yuumtzil a Kuex te tu witzil Horebo', Yuumtzile' tu ya'alaj teen: Much'quint le caaj u ti'al ca u yu'ubo'ob in t'aano'ob yéetel ca u cano'ob u tziqueno'ob tuláacal u kiinil u cuxtalo'ob, yéetel ca u ca'anbeso'ob u paalalo'ob u beeto'ob xan beyo'.

¹¹Te'exe' ta nadzajaba'ex tu chuun le witz tu'ux cu jóokol u tóoch'bal káak cu sen ca'analtal yéetel cu beetic jun p'éel tatat box múuyal;

¹²Yuumtzil túune' tu t'anaje'ex ca'aliquil ti' yaan chúumuc le káako'. Te'exe' ta wu'uyaje'ex u juum u t'aan, ba'ale', quex tumen ta wu'uyaje'ex u t'aane' ma' ta wilaje'ex mix jun p'éel u yoocheli'.

¹³Yuumtzile' tu dzaj te'ex u nup t'aan u ti'al a kaj óolte'ex, lela' diez a'almaj t'aano'ob tu dzíibtaj ti' ca'a p'éel jaajay tuunicho'ob yéetel tu ya'alaj te'ex ca dzo'ocbese'ex.

¹⁴Ti' tene' tu ya'alaj ca in ca'anbes te'ex le a'almaj t'aano'ob yéetel le ca'anbesajo'ob unaj a dzo'ocbesique'ex ti' le lu'um tu'ux bíin yanaque'exo'.

¹⁵Le kiinac ca j t'aanaj Yuumtzil ta wéetele'ex ichil le káak tu witzil Horebo', mix jun p'éel oochel ta wilaje'ex. Canantaba'ex túun

¹⁶u ti'al ma' a kebantale'ex ti' a beetique'ex wa ba'ax chica'an ti' j xiib wa ti' co'olel,

¹⁷mix ba'al chica'an ti' ba'alche'ob, mix ti' ch'íich'o'ob,

¹⁸mix ti' ba'alche'o'b cu jíilticuba'ob, mix ti' cayo'ob.

¹⁹Le quéen a líikes a wiche'ex j ca'an u ti'al a wilique'ex le kiin, le uj wa le eeko'obo', bic lúubuque'ex ti' túuntaj óol u ti'al ca a kultique'exo'ob, tumen Ku a Yuumtzile'exe' leti' máax beet sáasilo'ob u ti'al u caajilo'ob le lu'uma'.

²⁰Ba'ale' te'exe' tumen Yuumtzil tu ch'a'aje'ex yéetel tu jóoksaje'ex tu caajil Egipto bey ti' jun p'éel u chujcabil yibbil fierroe', ca'a u ti'alinte'ex bey u caajal je'el bix yanique'ex bejela'o'.

²¹Ba'ale' Yuumtzile' kuuxilnaj tin wéetel ta wo'olale'ex ca tu jalach t'antaj ma' bíin in ch'act u yáalcab ja'il Jordán mix bíin ocoquen ti' le ma'alob lu'um bíin u dzáa a ti'alinte'exo'.

²²Ba'ale' quex tumen bin in ca'aj quíimil ti' le lu'um ca'aliquil ma' in ch'act le Jordano', te'exe' bíin a ch'acte'ex u ti'al a ti'alintique'ex le ma'alob lu'umo'.

²³Ba'ale' canante'ex ma' u tu'ubul te'ex u nup t'aan Yuumtzil a Kuex u beetmaj ta wéetele'exo'. Ma' a beetique'ex mix jun p'éel beetbil ku mix u yoochelo'ob le ba'axo'ob u wet'maj Ku a beetique'exo',

²⁴tumen Yuumtzil a Junab Kuexe', jun túul Ku u p'ec u ke'exel, leti'e' ¡bey káak cu láaj jáabsic tuláacal ba'ale'!

²⁵Le quéen yanac a paalale'ex bey xan a wáabile'ex tumen dzo'oc u yúuchtal cajlaque'ex[2] ti' le lu'umo', wa ca kastale'ex tu yo'olal a p'atique'ex beetbil kuob yéetel yoochel wa ba'ax u ti'al a kebanchajle'ex tu táan Yuumtzil a Kuex u ti'al a beetique'ex u p'u'ujule',

²⁶tene' bejela'e' quin dzáic le lu'um yéetel le ca'an u ti'al aj jaajcunajilo'ob, séeba'an bíin quíimique'ex te j lu'um bíin a ti'alinte'ex yaan tu láak jun tzéel le Jordano'. Ma' ya'ab kiino'ob bíin cuxlaque'ex te j lu'umo', tumen yaan a jach láaj xu'ulsa'ale'ex.

²⁷Yuumtzil bíin u ki'itbese'ex ti' tuláacal múuch' caajo'ob, chéen jun chan p'íit ti' te'ex bíin p'áatac cajtali'.

²⁸Te'elo' bíin a meyajte'ex kuob beeta'ano'ob tumen chéen wíinic, beetbil kuob che' yéetel tuunich u ca'ajo'ob, ma' tu paacato'ob, ma' tu yu'ubajo'ob, ma' tu janalo'ob mix tu múus iiko'ob.

²⁹Ba'ale' wa te j cúuchil ca caxtique'ex Yuumtzil a Kuex yéetel tuláacal pucsi'ikal bey xan yéetel jaaj óolale', bíin a nuptáante'ex.

³⁰Le quéen dzo'ococ a máansique'ex tuláacal le mukyajo'ob yéetel yaayaj óolalo'obo', wa ca táan óoltique'ex Yuumtzil u ti'al a wu'uyique'ex u t'aane',

³¹leti' máax sen cu ch'a'ic te'ex óotzile', ma' bíin u xúump'atte'exi' mix bíin u xu'ulse'exi', mix xan bíin u tu'ubs le nup t'aan tu beetaj yéetel a máanja'an ch'i'ibale'ex tu jalach t'antaj u dzo'ocbesico'.

³²Xakal caxte'ex ti' le úuchben ja'abo'ob ma'ili' síijique'ex, líikbal tu kiinil tu beetaj Ku wíinic yóokol caab; xeene'ex tuláacal yóokol caab a káat chi'ite'ex wa dzo'oc u yúuchul quex jun téen jun p'éel nojoch ba'al je'el bix lela'.

³³¿Yanchaj quex jun p'éel caaj tu yu'ubaj je'el bix ta wu'uyajile'ex te'ex u t'aan Ku tu chúumuc jun p'éel káak, ma' u quíimil?

³⁴¿Dzo'oc wa u yantal jun túul ku u yéey jun p'éel caaj ichil u láak caajo'ob yéetel nucuch túuntajo'ob, chíiculalo'ob, bey xan máactzilo'ob yéetel ba'atel, u ti'al u ye'esic u nojoch páajtalil yéetel sajbe'entzil ba'alo'ob je'el bix tu beetaj Yuumtzil a Kuex tu táan a wiche'ex tu lu'umil Egiptoe'?

³⁵Lela' dzo'oc u ye'esa'al ti' te'ex u ti'al ca a wojéelte'ex Yuumtzile' leti' Junab Ku, mina'an u jeel.

³⁶Leti'e' ti' yaan j ca'an ca tu t'anaje'ex u ti'al u tojquintic a beele'ex, bey xan te j yóok lu'umo' tu ye'esaj te'ex u nojoch káak, ta wu'uyaje'ex xan u t'aan tu chúumuc le káako'.

³⁷Leti'e' tu yaacuntaj a taataexe' ca tu yéeyaj u ch'i'ibalo'obe', ca tu jóoksajo'ob tu lu'umil Egipto yéetel nojoch páajtalil.

³⁸Tu tojolch'intaj ta táane'ex múuch' caajo'ob asab mu'ukano'ob ti' te'ex, u ti'al ca u dzáa te'ex a ti'alinte'ex u lu'umo'ob je'el bix u yúuchul bejela'a'.

³⁹Bey túuno' t'ilcunte'ex ma'alob ta tuucule'ex, Yuumtzile' Junab Ku, je'el bix j ca'ane' bey j lu'um, cu dzo'ocole' mina'an u láak, chéen leti' Ku.

⁴⁰Dzo'ocbese'ex u ya'almaj t'aano'ob yéetel u nu'ucbe'en t'aano'ob quin dzáic te'ex bejela'a', ca xi'ic te'ex utzil bey xan ti' a paalale'ex, u ti'al ca cajlaque'ex ya'ab ja'abo'ob ti' le lu'um bíin u dzáa te'ex Yuumtzil a Kuex u ti'al tuláacal kiino'obo'.

⁴¹Moisés túune' tu yéeyaj óox p'éel caajo'ob u ti'al ta'acbesajil tu j lakin u yáalcab ja'il Jordán

⁴²tu yo'olal u yantal tu'ux u púudzul le máax cu quíimsic u láak máac ma' taaliti'i' u quíimsiqui' tu yo'olal ma' ba'atelnaja'an ca'ach yéetele', je'el u páajtal u bin u ta'acbesubáa tu yo'olal ma' u quíimsa'al.

⁴³Le caajo'oba' leti' lelo'oba': Beser le yaan tu táaxil le x tocoy lu'ume', u ti'al u ch'i'ibalo'ob Rubén; Ramot le yaan ca'ach Galaade', u ti'al u ch'i'ibalo'ob Gad; yéetel Golán le yaan ca'ach Basán, u ti'al u táancoch ch'i'ibalo'ob Manasés.

⁴⁴Lelo'oba' leti' le le ca'ansaj tu kubaj Moisés ti' le j israelitaoba',

⁴⁵bey xan le nu'ucbe'en t'aano'ob, a'almaj t'aano'ob yéetel le tzolbe'en t'aano'ob tu ya'alaj ti'ob le kiinac jóoko'ob Egipto,

⁴⁶ca'aliquil ti' yanili'ob tu lakin Jordán te j táax lu'um yaan actáan ti' Bet-peor, tu lu'um Sehón, u ajawil amorreob. Sehone' cajnáal ca'ach Hesbón, ba'ale' j dzáanche'eta'ab tumen Moisés yéetel tumen le j israelitaob le ca jóoko'ob Egiptoe'.

⁴⁷Le j israelitaobo' j ooco'ob cajtal tu lu'umo'ob bey xan tu lu'um Og u ajawil Basán, ca'a túul ajaw amorreob caja'ano'ob ca'ach tu lakin Jordán.

⁴⁸U lu'umo'obe' cu cáajbal ca'ach líikbal Aroer tu jáal u yáalcab ja'il Arnón, tac tu witzil Sirión, cu kaaba'intic xan Hermón,

⁴⁹bey xan tuláacal Arabá, tu lakin Jordán, tac te j quimen ka'anab, tu chuun u witzil Pisga.