Read Yucateco Deuteronomio 5 Bible Online

Deuteronomio 5 - Yucateco bible

Deuteronomio 5

¹Moisese' tu much'quintaj tuláacal u caajil Israele' ca tu ya'alaj ti'ob: Israelita'ex, u'uye'ex le a'almaj t'aano'ob yéetel le ca'anbesajilo'ob quin dzáic ti' te'ex bejela'a'. Cane'ex ma'alob yéetel dzo'ocbese'ex.

²Yuumtzil c Kue' tu beetaj jun p'éel nup t'aan t éetel tu witzil Horeb.

³Ma' tu beetaj chéen yéetel c máaja'an ch'i'ibalo'obi', ba'ale' tu beetaj xan t éetel le much'ucbalo'on bejela'a'.

⁴Yuumtzile' j t'aanaj ta wéetele'ex quetlan ich te j witz tu chúumuc le káako'.

⁵Tene' ti' yanchajen chúumuc ti' te'ex yéetel ti' Yuumtzil u ti'al in dzáa te'ex u t'aan Yuumtzil, tumen j yanchaj te'ex sajaquil ti' le káako', yéetel ma' j na'aque'ex te' j witzo'. Yuumtzile' tu ya'alaj teen:

⁶Teen Yuumtzil a Ku máax jóokesech Egipto tu'ux palitzilta'ane'ex ca'achi'.

⁷Ma' u yantal teech yaanal kuob wa ma' teen.

⁸Ma' a beetic mix jun p'éel patbil ku, mix u yoochel ba'ax yaan j ca'an, mix le ba'ax yaan yáanal lu'umo', mix ti' le ba'ax yaan te j ka'anab yáanal lu'umo'.

⁹Ma' a chíin pooltico'ob, mix a kultico'ob, tumen teen Yuumtzil a Junab Kuex, jun túul Ku u p'ec u ke'exel, cu jadzic u kasa'anil le taataob tu yo'olal u p'ectmajeno'ob, líikbal ti' u paalalo'obe' tac ti' u ca'a áabilo'ob.

¹⁰ba'ale' quin we'esic in yaacunaj ti' mil ch'i'ibalo'ob ti' le máaxo'ob u yaabiltmajeno'ob yéetel cu dzo'ocbesico'ob in wa'almaj t'aano'ob.

¹¹Ma' ch'a'a chi'itic u kaaba' Yuumtzil a Ku chéen cunel, tumen leti'e' ma' bíin u p'at x ma' jaadzil máax ch'achi'itic u kaaba' chéen cuneli'.

¹²Ka'ajac teech sábado u ti'al ca jun páaycunt ti' Yuumtzil, je'el bix tu tzolbe'en t'antaj teech Yuumtzil a Kuo'.

¹³Meyajnen seis kiino'ob, beet ichilo'obe' tuláacal ba'ax kabéet a beetic,

¹⁴ba'ale' u siete kiine' sábado jun páaycuna'an u ti'al Yuumtzil a Ku. Teche' ma' bíin meyajnaquech ti' le kiino', mix a j xibil paal, mix a x ch'upul paal, mix a palitzil, mix a x palitzil, mix a walak wacax mix a walak burro, mix jun túul a walak ba'alche'ob, mix le j táanxel lu'umil cajnáal ta caajalo'obo', tu yo'olal beyo' a palitzil yéetel a x palitzile' cu je'elel je'el bix teche'.

¹⁵Ka'ajac teech a beetmaj a palitzilil Egipto, ba'ale' Yuumtzil a Kue' tu ye'esaj u nojoch páajtalile', ca tu jóoksajechi'. Let o'olal Yuumtzil a Kue', cu ya'alic teech ma' a manba'alcunsic sábadoo'.

¹⁶Tzic a taata, tzic xan a maama', jach je'el bix u ya'almaj teech Yuumtzilo', u ti'al ca chowacchajac u kiinilo'ob a cuxtal tu yóokol le lu'um cu dzáic teech Yuumtzil a Kuo'.

¹⁷Ma' a quíimsic wíinic.

¹⁸Ma' a beetic núup keban.

¹⁹Ma' a wocol.

²⁰Ma' a tus u ti'al a dzáic kaasil a láak.

²¹Ma' dzíiboltic a toquic u yatan a láak. Ma' a dzíiboltic a ti'alintic u yotoch a láak, mix u cool, mix u palitzil, mix u x palitzil, mix u wacax, mix u burro, mix je'el ba'axac u ti'ale'.

²²Lelo'oba' leti' t'aano'ob tu ka'am a'alaj Yuumtzil ichil le káak yéetel ichil jun p'éel tat múuyal, le ca j much'laj tuláacal le caaj tu chuun le witzo'. Cu dzo'ocole' mix ba'al u láak tu ya'alaj, ca tu dzíibtaj le t'aano'oba' ti' ca'a p'éel jaajay tuunicho'obe', ca tu kubaj ti' teen.

²³Ba'ale' le ca ta wu'uyaje'ex le t'aan cu jóokol ichil le éekjoche'enilo', bey xan ta wilaje'ex le witz ich tóoch'bal káako', tuláacale'ex u nuuquile'ex u múuch' cajtalilo'ob le j otochnáalo'ob yéetel u nuuquile'ex le caajo', j taale'ex j t'aan tin wéetel

²⁴ca ta wa'alaje'ex teen: Tu jaajile' Yuumtzil c Kue' dzo'oc u ye'esic to'on u nojbe'enil yéetel u páajtalil, dzo'oc xan c u'uyic u juum t'aan cu jóokol ichil le káako'. Bejela'e' dzo'oc c ilic je'el u páajtal u p'áatal cuxa'an le máaco'ob cu t'aan Ku yéetelo'obe'.

²⁵Ba'ale' ¿ba'ax u biilal c chokicbáa u ti'al tóocbil tumen le sajbe'entzil káaka'? Wa ca táabco'on u'uy u juum u t'aan Yuumtzil c Ku tu ca'a téene', je'el c quíimile'.

²⁶¿Yaan wa máac cu páajtal u yu'ubic u juum u t'aan le cuxa'an Ku tu chúumuc le káak je'el bix úuchic c u'uyic to'on ma' u quíimilo'?

²⁷Asab ma'alob ca a nadzabáa teech a wu'uy tuláacal ba'ax bíin u ya'al Yuumtzil c Kuo', cu dzo'ocole' ca wa'alic to'on ba'ax tu ya'alaj teech, u ti'al ca c dzo'ocbes ba'ax bíin u ya'alej.

²⁸Ca'aliquil táan a t'ane'ex tin wéetele', Yuumtzile' tu yu'ubaj ba'ax ta wa'alaje'ex ca tu ya'alaj túun teen: Dzo'oc in wu'uyic tuláacal ba'ax cu ya'alic le caaja', ma'alob ba'ax cu ya'alico'ob.

²⁹¡Quexi' ca tuuculnaco'ob bey tuláacal kiin u ti'al u nojbe'enilcunsiqueno'ob yéetel u dzo'ocbesico'ob in wa'almaj t'aano'ob tuláacal kiin, tu yo'olal u yantal qui' óolal ti'ob bey xan ti' u paalalo'ob!

³⁰Xeen a'al ti'ob ca suunaco'ob tu chuybil paselo'ob;

³¹Ba'ale' teche' p'áaten tin wicnal, tumen bin in ca'aj in wa'al teech tuláacal le nu'ucbe'en t'aano'ob, le a'almaj t'aano'ob yéetel le ca'anbesajo'ob bíin a ca'anbes ti'ob u ti'al u dzo'ocbesico'ob te j lu'um bíin in dzáa u ti'alinto'obo'.

³²Le t o'olale' beete'ex tuláacal le ba'ax dzo'oc u ya'alic te'ex Yuumtzilo', ma' kéechele'ex ti'.

³³Xíimbalte'ex le bej tu ye'esaj te'ex Yuumtzil Kuo', ca xi'ic te'ex utzil yéetel ca cuxlaque'ex ya'ab ja'abo'ob te j lu'um bíin u dzáa a ti'alinte'exo'.