Read Yucateco Deuteronomio 6 Bible Online

Deuteronomio 6 - Yucateco bible

Deuteronomio 6

¹Lelo'oba' leti'ob le nu'ucbe'en t'aano'ob, le a'almaj t'aano'ob yéetel le ca'anbesajo'ob tu ya'alaj Yuumtzil a Kuex ca in ca'anbes te'ex u ti'al a beete'ex ti' le lu'um tu'ux bíin cajlaque'exo'.

²Beya' ca tziquique'ex Yuumtzil a Kuex, yaan xan a dzo'ocbesique'ex tuláacal u kiinil a cuxtale'ex le a'almaj t'aano'ob yéetel le nu'ucbe'en t'aano'ob quin dzáic ti' te'ex, ti' a paalale'ex yéetel ti' a wáabile'exo'ob; u ti'al a cuxtale'ex ya'ab ja'abo'ob.

³Le t o'olal túune' j israelita'ex, dzo'ocbese'exo'ob. Beyo' bíin xi'ic te'ex utzil bey xan bíin sen ya'abchajque'ex ti' le lu'um tu'ux cu yáalcab le leche yéetel le caab bey u yáalcab ja'e', je'el bix tu séeb chi'itilac Yuumtzil u Ku máanja'an ch'i'ibale'exo'.

⁴Israel, u'uyej: Yuumtzil c Junaj Kue', chéen leti' Yuumtzil.

⁵Yaabilt Yuumtzil a Ku yéetel tuláacal a pucsi'ikal, yéetel tuláacal a pixan bey xan yéetel tuláacal a muuk.

⁶T'ilcunt ta tuucul tuláacal le ba'axo'ob dzo'oc in wa'alic teech bejela'a'.

⁷Ca'anbes mantadz ti' a paalal; ka'ajes ti'ob je'el bix ichil a wotoche', bey ti' le bejo', bey xan le quéen chilaquech bey le quéen líikique'eche'.

⁸Kax ta kab le a'almaj t'aano'oba', dzáa bey chíiculal ta táan jo'ole',

⁹dzíibto'ob tu ocomilo'ob yéetel tu jool najilo'ob a wotoch.

¹⁰Yuumtzil a Kuexe', bin u ca'aj u beet a wocole'ex te j lu'um tu jalach t'antaj u dzáic ti'ob Abraham, Isaac yéetel Jacob a máanja'an ch'i'ibale'exo'obo'. Lelo' jun p'éel lu'um yéetel u qui'ichquelem caajilo'ob ma' a meyajtma'exi';

¹¹yaan u najilo'ob chupo'ob yéetel ma'alob ba'alo'ob ma' te'ex chupmaili; yaan u ch'e'enilo'ob ma' te'ex jolmailo'obi', bey xan u pakalilo'ob uva yéetel olivo'ob ma' te'ex pakma'ili', ba'ale' bíin a jaante'ex tac quéen náacac a wóole'ex.

¹²Le quéen kuchuc u kiinil u yúuchul beyo', bic táabque'ex a tu'ubse'ex Yuumtzil máax jóokese'ex Egipto tu'ux palitzilta'ane'ex ca'achi'.

¹³Kulte'ex Ku Yuumtzil, meyajte'ex chéen leti', le quéen kabéetchajac a séeb chi'exe', beete'ex chéen tu kaaba' Yuumtzil.

¹⁴Ma' a bine'ex tu paach le kuob cu kulta'al tumen le caajo'ob cajnáalo'ob ta tzéele'exo',

¹⁵tumen Yuumtzil Ku, le yaan ta wéetelexo', u p'ec u ke'exel, tumen je'el u kuuxtal ta wéetele'ex ca u láaj xu'ulse'exe'.

¹⁶Ma' a túuntaj óoltique'ex Yuumtzil a Kuex je'el bix beeta'abic Masahe'.

¹⁷Dzo'ocbese'ex yéetel ocsaj óol u nu'ucbe'en t'aano'ob Yuumtzil Ku, bey xan tuláacal ba'axo'ob tu ya'alaj ca beeta'ac, bey xan u ya'almaj t'aano'ob.

¹⁸Beete'ex ba'ax toj yéetel ba'ax utz tu yich Yuumtzil, tu yo'olal u bin te'ex utzil te j ma'alob lu'um bin a ca'aj a ti'alinte'ex je'el bix u jalach t'antmail u dzáic ti' a máanja'an ch'i'ibale'exo',

¹⁹u ti'al ca u beet Yuumtzil u púudzul tuláacal le aj p'eeco'ob bíin u yóolto'ob u ba'atelte'ex je'el bix u séeb chi'itmailo'.

²⁰Le quéen kuchuc u kiinil u káat chi'ita'al te'ex tumen a paalale'ex: ¿Ba'ax u káat u ya'al le nu'ucbe'en t'aano'ob, le a'almaj t'aano'ob yéetel le ca'anbesajo'ob u kuben t'antmaj to'on Yuumtzil c Kuo'?

²¹te'exe' bíin a núuque'ex ti'ob: To'one' u palitzilo'on ca'ach faraón, tu lu'umil Egiptoe', ca jóokesa'abo'on tumen Yuumtzil yéetel nojoch páajtalil.

²²To'one' t ilaj tuláacal le nucuch sajbe'entzil máactzilo'ob yéetel chíiculalo'ob tu beetaj Yuumtzil Egipto tu yóokol faraón yéetel u jalach naj;

²³ba'ale' to'one' tu jóokesajo'one' ca tu bisajo'on ti' le lu'um u jalach t'antmaj ti' c máanja'an ch'i'ibalo'obo', ca tu dzaj to'on.

²⁴Cu dzo'ocole' Yuumtzil c Kue' tu ya'alaj ca c dzo'ocbes tuláacal le nu'ucbe'en t'aano'oba' bey xan ca c tzique, tu yo'olal u bin to'on utzil yéetel ca u p'at c cuxtal je'el bix tac bejela'a'.

²⁵Le t o'olale' to'one' c beetic utz iquil c dzo'ocbesic le nu'ucbe'en t'aano'ob tu táan Yuumtzil c Ku je'el bix u ya'almajo'.