Read Yucateco Deuteronomio 7 Bible Online

Deuteronomio 7 - Yucateco bible

Deuteronomio 7

¹Yuumtzil a Kuexe', bin u ca'aj u yocse'ex te j lu'um bíin a ti'alinte'exo', bey xan bin u ca'aj u tzel ta táane'ex nucuch caajo'ob asab mu'uka'ano'ob ti' te'ex: je'el bix le hititaob, le gergeseob, le amorreob, le cananitaob, le ferezeob, le heveob yéetel le jebuseobo'.

²Le quéen u beet Yuumtzil a Kuex u lúubul le múuch' caajo'ob ta kabe'ex u ti'al a dzáanche'etique'exo', te'exe' unaj a xot kintique'ex u ti'al láaj xu'ulsaj, ma' unaj a beetique'ex mix jun p'éel nup t'aan yéetelo'obi', mix bíin a ch'a'ex óotzilil ti'obi'.

³Ma' xan unaj a láaktzilticaba'ex yéetelo'obi', mix a dzo'ocsique'ex u beel a j xibil paalale'ex wa a x ch'upul paalale'ex yéetel u ch'úupalalil wa u xi'ipalilo'ob le máaco'obo',

⁴tumen leti'obe' bíin u beeto'ob u kéechel a paalale'ex ti' u beel Yuumtzil u ti'al u kultico'ob u láak kuob; lelo' bíin u kuuxbes Yuumtzil u ti'al u xu'ulsique'ex jun súutuc, jun múudz ichil.

⁵Ba'ale' te'exe', bíin a láaj jute'ex u ma' ocsaj óol multuuno'ob, yaan a láaj kascuntique'ex le tuunicho' yéetel chuunche'ob cu kultico'obo', bey xan bíin a tóoque'ex u beetbil kuob.

⁶Tumen te'exe' jun p'éel caaj jun páaycunta'ane'ex chéen u ti'al Yuumtzil a Kuex, Yuumtzile' tu yéeyaje'ex ichil tuláacal u múuch' caajilo'ob lu'um u ti'al u caajalte'ex chéen u ti'al.

⁷Wa tumen Yuumtzil dzo'oc u táanilcuntique'ex yéetel tu yéeyaje'exe', ma' tucultique'ex wa tumen jun p'éel asab nojoch caaje'ex, tumen u jaajile' te'ex u asab chichanil tuláacal caajo'ob.

⁸Yuumtzile' tu jóokese'ex Egipto tu'ux palitzile'ex ca'achi', yéetel nojoch páajtalil tu jáanpayte'ex tu kab faraón, tumen u yaabiltmaje'ex, bey xan tu yóoltaj u dzo'ocbes le séeb chi' tu beetaj ti' a máanja'an ch'i'ibale'exo'.

⁹Bey túuno', kaj óolte'ex Yuumtzil a Junab Kuex, leti' u jaajil Ku, cu dzo'ocbesic yéetel chuca'an óol u nup t'aan ti' tuláacal ch'i'ilancabilo'ob yéetel le máaxo'ob yaabiltmajil yéetel cu dzo'ocbesico'ob u nu'ucbe'en t'aano'ob;

¹⁰ba'ale' cu xu'ulsic le máaxo'ob p'ectmajile'. Cu dzáic ti'ob ba'ax cu najmatico'ob ¡ma' tu xáantal u dzáic ba'ax cu najmatic le máaxo'ob p'ectmaile'!

¹¹Dzo'ocbese'ex túun le nu'ucbe'en t'aano'ob, le a'almaj t'aano'ob yéetel le ca'anbesajo'ob quin wa'alic te'ex bejela'a' ca a dzo'ocbese'exa'.

¹²Wa le quéen dzo'ococ a wu'uyique'ex le ca'anbesajo'oba', ca dzo'ocbesique'ex xan yéetel ca beetique'exe', Yuumtzil a Kuexe', bíin u dzo'ocbes yéetel chuca'an óol le nup t'aan yéetel le séeb chi' tu beetaj ti' a taataexo'obe'.

¹³Bíin u yaabilte'ex, bíin u qui' t'ante'ex yéetel bíin u beet a ya'abtale'ex; bíin u qui' t'ant a paalale'ex a joche'ex, a trigo'ex, u kab a wo'och uva yéetel a aceite'ex, u yaalo'ob a x wacaxe'ex yéetel a x tamane'ex, te j lu'um tu jalach t'antaj ti' a taataexo'ob u dzáic te'exo'.

¹⁴Te'exe' bíin asab qui' t'anta'aque'ex ti' u láak caajo'ob; ma' bíin yanac co'olel ca p'áatac ma' u x yo'ontali' mix xiib ca p'áatac ma' u yo'onquinaji', mix ichil a waalako'ob bíin yanac ba'alche'ob ca p'áatac ma' tu páajtal u yantal u mejenil.

¹⁵Yuumtzil bíin u náachcunt ti' te'ex tuláacal koja'anil bey xan sajbe'en báan quíimilo'ob je'el bix a wojelile'ex tu túuchi'itaj Egiptoe'; ba'ale' bíin u beet u mukyaj yéetelo'ob a aj p'eeque'exo'ob.

¹⁶Ba'ale' te'exe' bíin a xu'ulse'ex tuláacal le caajo'ob bíin u kub Yuumtzil a Kuex ta kabe'exe', ma' ch'aique'ex óotzilil ti' u kuob, mix a kultique'exo'ob tumen lelo' jun p'éel léech a ti'ale'ex.

¹⁷Te'exe' ma' xan ca kuchuc a tucultique'ex beya': Le múuch' caajo'oba' asab mu'uka'ano'ob ti' to'on; ¿Bix je'el u páajtal c jóokesico'obe'?

¹⁸¡Ma' ch'a'ique'ex sajaquil ti'ob! Ka'ajac te'ex ba'ax tu beetaj Yuumtzil a Kuex ti' faraón pa'ate' yéetel tuláacal le j egipciobo';

¹⁹tuculte'ex le nucuch jak óol ba'alo'ob ta wilaje'exo', bey xan le chíiculalo'ob yéetel le máactzilo'obo', le nojoch páajtalil tu ye'esaj Yuumtzil a Kuex le ca tu jóokesaje'ex Egiptoe'. Bey xan bíin u beet Yuumtzil ti' tuláacal le caajo'ob ti' máaxo'ob sajaque'exo'.

²⁰Yuumtzil xane' bíin u túuchi'it jun p'éel nojoch sajbe'en ba'al ichilo'ob u ti'al xu'ulsic le j p'áato'ob cuxa'ano'obo' bey xan le u ta'acmajuba'obo'.

²¹Le t o'olale' ma' a quiquilaanquile'ex tu táano'ob, tumen Yuumtzil a Kuexe', le nojoch sajbe'en Junab Kuo', ti' yaan ta wéetele'exe'.

²²Jujun p'íitil bíin u tojolch'int le múuch' caajo'oba'; te'exe', ma' bíin páatac a xu'ulsique'ex chéen jun puli'i', tumen dzíidzic ba'alche'ob bíin ya'abaco'ob ta bakpache'ex, bíin u ba'atelte'exo'ob.

²³Ba'ale' Yuumtzil a Kuexe', bíin u kub le caajo'ob ta kabe'ex u ti'al a láaj xu'ulsique'exo'ob.

²⁴U ajawilo'obe' bíin u kub ta kabe'ex, te'exe' bíin a beete'ex u tu'ubsa'alo'ob tumen tuláacal yóokolcaab. Mix jun túul ti'ob bíin wa'alac ta táane'ex le quéen xi'ique'ex a ba'atelte'exo'ob, bey túuno', te'exe' bíin a láaj xu'ulse'exo'ob.

²⁵Yaan a láaj tóoquique'ex u yoochel u kuob, ba'ale' ma' a tucultique'ex a p'áatale'ex yéetel le oro mix yéetel le plata to'anilo'obo'; ma' a lúubule'ex ti' le túuntajilo', tumen je'el a beetique'ex ba'ax p'ecbe'en tu táan Yuumtzile'.

²⁶Le t o'olale' ma' a bisique'ex ta wotoche'ex mix ba'al p'ecbe'en, tu yo'olal ma' xu'ulsa'ale'ex. Le je'elo'obo' xot kintano'ob u ti'al xu'ulsbil, unaj a wa'alique'ex p'ecbe'en ba'alo'ob.