Read Yucateco Deuteronomio 8 Bible Online

Deuteronomio 8 - Yucateco bible

Deuteronomio 8

¹Dzo'ocbese'ex le nu'ucbe'en t'aano'ob tin dzaj te'ex bejela'a', u ti'al ca páatac a cuxtale'ex tu yo'olal ca kuchuc a beetaba'ex jun p'éel caaj sen ya'ab u cajnáalilo'ob u ti'al a jáanpaytique'ex le lu'um tu séeb chi'itaj Yuumtzil ti' a taataexo'obo'.

²Ka'ajac te'ex tuláacal le bej tu beetaj a xíimbaltique'ex Yuumtzil a Kuex te x tocoy lu'um ichil cuarenta ja'abo'obe', u ti'al u cabalcuntic a wóole'ex yéetel u túuntique'ex, tu yo'olal u kaj óoltic a tuucule'ex ca páatac u yojéeltic wa bíin a dzo'ocbese'ex u nu'ucbe'en t'aano'ob, wa ma'.

³Quex tumen tu beetaj a mukyaje'ex yéetel a máansique'ex wi'ijile', cu dzo'ocole' tu tzéentaje'ex yéetel maná, jun p'éel janal ma' a kaj óoltmaje'ex te'ex mix a máanja'an ch'i'ibale'ex, tu yo'olal u dzáic a wojéelte'ex ma' chéen yéetel waaj bíin cuxlac wíiniqui', ba'ale' yéetel tuláacal t'aan cu jóokol tu chi' Yuumtzil.

⁴Ichil tuláacal le cuarenta ja'abo'oba', ile'ex ma' j xu'up a nooke'exi' mix j chu'up a wooque'exi'.

⁵Ch'a'a nu'ucte'ex, Yuumtzil a Kuexe', tu nu'uctaj a cuxtale'ex je'el bix jun túul taata cu nu'uctic u cuxtal u paale'.

⁶Dzo'ocbese'ex túun u nu'ucbe'en t'aano'ob Yuumtzil a Kuex, tzique'ex yéetel dzo'ocbese'ex le ca'ansajo'ob tu dzaj ti' te'exo'.

⁷Tumen Yuumtzile' bíin u bise'ex ti' jun p'éel ma'alob lu'um, jun p'éel lu'um chuup yéetel mejen áalcab ja'ob, tul ja'ob bey xan yéetel sayabo'ob cu jóokolo'ob ti' le kóom lu'umo'obo', yéetel ti' le witzo'obo';

⁸jun p'éel lu'um tu'ux yaan trigo, cebada, uva, higueraob, granadaob, olivo'ob yéetel caab.

⁹Te j múuch' caajo'obo' ma' bíin a yaayante'ex ba'al a jaante'ex wa tu yo'olal u láak wa ba'ax; ti' u tuunichilo'obe' yaan a nuptáantique'ex fierro, yéetel ti' u witzilo'obe' yaan jóokesique'ex cobre.

¹⁰Ba'ale' le quéen dzo'ococ a janale'ex yéetel le quéen a wu'uyaba'ex na'ajexe', unaj a qui' t'antique'ex Yuumtzil a Kuex tu yo'olal le ma'alob lu'um dzo'oc u dzáic te'exo'.

¹¹Táan óolte'ex ma' a tu'ubsique'ex Yuumtzil a Kuex. Bic p'áatac ma' dzo'ocbesique'ex u nu'ucbe'en t'aano'ob, u ca'anbesajo'ob yéetel le a'almaj t'aano'ob dzo'oc u ya'alic te'ex bejela'a' ca a beete'exo'.

¹²Le quéen dzo'ococ a janale'ex ca wu'uyicaba'ex na'aje'ex, yéetel ca cajtale'ex ti' najo'ob ma' te'ex beet ma'ajilo'ob,

¹³bey xan ca wilique'ex dzo'oc u ya'abtal a wacaxe'ex, a ma'alob oroex, a plata'ex yéetel tuláacal ba'al a ti'ale'exe',

¹⁴ma' a chu'upule'ex yéetel ca'anal ichil, mix a tu'ubsique'ex Yuumtzil a Kuex tu jóokesaje'ex Egipto tu'ux ca'ach palitzilta'ane'ex.

¹⁵Tu beetaj xan a máane'ex te j nojoch yéetel sajbe'entzil x tocoy lu'um chuup yéetel chi'ibal cano'ob, bey xan yéetel síinano'ob, cu dzo'ocole' mina'an ca'ach ja' u ti'al ukbili', ba'ale' leti'e' tu jóokesaj ja' ti' jun p'éel nojoch tok tuunich ca tu dzaj a wuke'ex.

¹⁶Te j x tocoy lu'umo' tu tzéentaje'ex yéetel maná, janal ma' j kuch kaj óoltbil tumen a máanja'an ch'i'ibale'ex, u ti'al u cabalcunsic a wóole'ex bey xan u túuntique'ex, u ti'al ca xi'ic te'ex utzil.

¹⁷Bic táabaque'ex a tuculte'ex ca a wa'ale'ex: Tuláacal le ayikalila' to'on t náajaltaj yéetel c muuk.

¹⁸Unaj u ka'ajal te'ex Yuumtzil a Kuex, tumen leti' tu dzaj te'ex u muukil u ti'al ca a ti'alinte'ex, iquil úuchic u dzo'ocbesic le nup t'aan tu beetaj úuch ca'ach yéetel a taataexo'obe'.

¹⁹Ba'ale' wa cu tu'ubul te'ex Yuumtzil a Kuex u ti'al a bine'ex tu paach u láak kuob u ti'al ca a kulte'exo'obe', tene' quin wa'alic te'ex bejela'a' jun puli'e', bíin láaj xu'ulsa'aque'ex.

²⁰Je'el bix cun xu'ulsbilo'ob tumen Yuumtzil le múuch' caajo'obo', bey xan can j xu'ulsbile'ex tumen ta j ma' u'uyaj t'ante'ex Yuumtzil a Kuex.