Read Yucateco Deuteronomio 9 Bible Online

Deuteronomio 9 - Yucateco bible

Deuteronomio 9

¹U'uyene'ex j israelitaex: dzo'oc u kuchul u kiinil a ch'actique'ex le Jordano', u ti'al a pulicaba'ex a ch'a'ex le múuch' caajo'ob asab mu'uka'ano'ob ti' te'ex, bey xan nucuch caajo'ob bakpachta'ano'ob yéetel sen ca'anal tuulumo'ob;

²u cajnáalilo'obe', mu'uka'ano'ob bey xan ca'analo'ob je'el bix u ch'i'ibal j wa'apáach' Anaque', te'exe' a wojele'ex u tzicbalil: ¿Máax je'el u páajtal u ba'atel yéetel u ch'i'ibal j wa'apáach' Anaque'?

³Bejela'a' túune' unaj a wojéeltique'ex Yuumtzil Ku cu bin ta táane'ex, leti'e' bey káak cu láaj tóoc ta táane'ex u ti'al u láaj xu'ulsic yéetel u mix ba'alcuntic le múuch' caajo'obo'. Te'exe' bíin a tojolch'inte'exo'ob yéetel bíin a xu'ulse'exo'ob tu súutuquil jun p'éel p'il ich, je'el bix tu jalach t'antaj Yuumtzilo'.

⁴Le quéen dzo'ococ u tzéelelo'ob tumen Yuumtzil ta táane'exe', ma' a wa'alique'ex ta baatzile'ex: Chéen tumen toj c cuxtal tu táan Yuumtzile', tu dzaj to'on c ti'alint le lu'uma'; wa Yuumtzil tojolch'intico'obe', tu yo'olal u kasa'anilo'ob cu tojolch'inta'alo'ob.

⁵Ma', ma' tumen wa toj a cuxtale'ex tu táan Yuumtzili', mix tumen utzul máaque'ex bíin a ti'alinte'ex le lu'umo'; Yuumtzile' cu tzelic ta táane'ex tu yo'olal u kasa'anilo'ob, bey xan u ti'al u dzo'ocbesic le séeb chi' tu beetaj ti'ob Abraham, Isaac yéetel Jacob, a máanja'an ch'i'ibale'exo'ob.

⁶Unaj a wojéeltique'ex ma' tu yo'olal tumen toj a cuxtale'ex cu dza'abal te'ex tumen Yuumtzil a Kuex a ti'alinte'ex le ma'alob lu'umo', tumen te'exe' jun p'éele'ex caaj dzu'uy a pucsi'ikale'ex.

⁷Bic xi'ic tu'ubul te'ex úuchic a kuuxilcuntique'ex Yuumtzil ti' le x tocoy lu'umo'. Líikbal jóokique'ex Egipto tac kuchique'ex waye', ma' ta p'ataje'ex a j ma' u'uyaj t'aanile'exi'

⁸Te tu witzil Horebo' ta beetaje'ex u p'u'ujul Yuumtzil, sen p'u'uj ta wéetele'ex tu yo'olal lelo' óolac u láaj xu'ulse'ex.

⁹Tene' j na'aquen te j witz u ti'al in kam le jaajay tuunicho'obo', u jaajay tuunichilo'ob le nup t'aan tu beetaj Yuumtzil ta wéetele'exo', ca j p'áaten cuarenta kiino'ob yéetel cuarenta áakabo'ob x ma' janalil yéetel x ma' ukulil.

¹⁰Yuumtzil túune' tu dzaj teen le ca'a p'éel jaajay tuunicho'ob, tu dzíibtaj tu kabil, tu'ux yaan tuláacal le t'aano'ob tu ya'alaj teen te j witz tu chúumuc le káak, le kiin ca j láaj much'lajo'one'exe'.

¹¹Le ca j dzo'oc u máan le cuarenta kiino'ob yéetel cuarenta áakabo'obe', Yuumtzile' tu dzaj teen u ca'a p'éel u jaajay tuunichilo'ob le nup t'aano',

¹²ca tu ya'alaj teen: Séeb éemen, tumen le caaj ta jóokesaj Egipto dzo'oc u kastal. Séeba'an tu p'atilaco'ob u dzo'ocbesico'ob ba'ax tin wa'alaj ti'ob, dzo'oc xan u beetico'ob jun p'éel ku beeta'an yéetel yi'ibil máascab.

¹³Yuumtzile' tu ya'alaj teen xan: Dzo'oc in wilic jach dzu'uy u pucsi'ikal le caaja'.

¹⁴Tzelabáa tin beel tumen bin in ca'aj in xu'ulso'ob u ti'al ca tu'ubsa'aco'ob yóokolcaab; ba'ale' ti' teech bíin in jóokes jun p'éel múuch' caaj asab mu'uka'an bey xan asab ya'ab ti' leti'ob.

¹⁵Le ca j éemen te j witz láili' t'aba'ane' táan ca'ach in taasic tin kab u ca'a p'éel jaajay tuunichil le nup t'aano'.

¹⁶Ba'ale' le ca tin wilaj dzo'oc ca'ach a kebantale'ex tu táan Yuumtzil, bey xan dzo'oc a beetique'ex jun p'éel wacax beeta'an yéetel yi'ibil máascab, u ti'al a xúump'atique'ex u beel Yuumtzil je'el bix u ya'almajil te'exe',

¹⁷tin jalanch'intaj le ca'a p'éel jaajay tuunicho'ob quin taasic ca'ach tin kabo', ca tin xe'exet'aj ta táane'ex.

¹⁸Cu dzo'ocole' xolajen tu táan Yuumtzil, cuarenta kiino'ob yéetel cuarenta áakabo'ob je'el bix tin yáax beetilaque', ma' tin jaantaj mix tin wukaj mix ba'ali', tu yo'olal kebanchaje'ex, ca ta sen sublaccunte'ex Yuumtzil ca ta beetaje'ex u jach p'u'ujul.

¹⁹Tene' sen ja'ak in wóol tu yo'olal le sen p'uja'anil tu ye'esaj Yuumtzil ta wo'olale'exo', tumen tu yóoltaj u xu'ulse'ex; ba'ale' Yuumtzile' tu ca u'uyaj in kat óolal.

²⁰Sen kuuxilnaj Yuumtzil xan yéetel Aarón, u káat ca'ach u quíimse, ba'ale' káat óolnajen tu yo'olal;

²¹cu dzo'ocole' tin machaj le wacax ta beetaje'ex iquil kebanchajique'exo', ca tin pulaj ich káak, cu dzo'ocole' tin ma'aycuntaj, ca tin pulaj ichil le t'o'ol ja' cu yéemel te j witzo'.

²²Bey xan Tabera, Masah yéetel Kibrot-hataabae', ta beetaje'ex u p'u'ujul Yuumtzil.

²³Le túun ca tu ya'alaj te'ex Yuumtzil ca lukuque'ex Cades-barnea u ti'al a bine'ex a ti'alinte'ex le lu'um dzo'oc u dzáic te'exo', ta pechaba'ex xan ti' ba'ax tu ya'alaj, ma' yanchaj te'ex ocsaj óoli' mix ta wóoltaje'ex a dzo'ocbesique'ex u t'aani'.

²⁴¡Líikbal le kiin ca tin kaj óolte'ex tac bejela'a', ca sen j ma' u'uyaj t'antique'ex Yuumtzil!

²⁵Bey tumen Yuumtzil tu ya'alaj u xu'ulsique'exo', tene' j p'áaten xoltal tu táan Yuumtzil cuarenta kiino'ob yéetel cuarenta áakabo'ob,

²⁶bey xan tin wa'alaj ti' yéetel káat óol: Yuumtzil ma' xu'ulsic le caaja' tumen a ti'al, teech ta jóokesaj yéetel nojbe'enil, ta jóokesaj Egipto yéetel nojoch páajtalil.

²⁷Ka'ajac teech a palitzilo'ob Abraham, Isaac yéetel Jacob. Ma' bisic yajil u j ma' u'uyaj t'aanil le caaja', mix u kasa'anil, mix u keban,

²⁸tu yo'ola'al ma' u ya'alal te j lu'um tu'ux ta jóokesajo'obo': Yuumtzile' ma' páatchaj u yocsico'ob te j lu'um tu séeb chi'itaj ti'obo', bey u p'ecmajo'ob xano', tu beetaj u jóokolo'ob waye' u ti'al u beet u quíimilo'ob te x tocoy lu'umo'.

²⁹Ba'ale' leti'obe' a caajalo'ob, a ti'alo'ob; teech ta jóokesajo'ob Egipto yéetel nojoch páajtalil.