Read Yucateco San Juan 10 Bible Online

San Juan 10 - Yucateco bible

San Juan 10

¹Tu jaajil, tu jaajil, quin wa'alic ti' te'ex, le máax ma' tu yocol tu jool najil tu'ux cu ka'alal j tamano'obe', ba'ale' cu yocol táanxel tu'uxe', jun túul j ocol yéetel loolob máac.

²Ba'ale' le máax cu yocol tu jool najile' leti' le máax canantic le j tamano'obo'.

³Le j canan jool najo' cu je'ic le jool naj ti'o' u ti'al ca ococ, bey xan le j tamano'obo' cu kaj óoltico'ob u t'aan. Cu t'anic u j tamano'ob yéetel u kaaba'ob u ti'al u jóokesico'ob.

⁴Cu dzo'ocol u jóokesic tuláacal u j tamano'obe' cu xíimbal táanil ti'ob; le j tamano'obo' cu bino'ob tu paach tumen u kaj óolo'ob u t'aan.

⁵Ba'ale' ma' tu bino'ob tu paach jun túul máac ma' u kaj óolo'obi'; ba'ax cu beetico'obe' cu púudzulo'ob ti', tumen ma' u kaj óolo'ob u t'aan yaanal máaqui'.

⁶Jesuse' tu ya'alaj ti'ob le queet t'aana', ba'ale' leti'obe' ma' tu na'atajo'ob ba'ax tu jo'oltaj u ya'ali'.

⁷Jesuse' tu ca'a a'alaj ti'ob túun: Tu jaajil, tu jaajil quin wa'alic ti' te'ex: Teen le jool naj tu'ux cu yocol le j tamano'obo'.

⁸tuláacal le j taalo'ob táanil ti' tene' j oocolo'ob yéetel loolob máaco'ob, ba'ale' ma' u'uya'ab u t'aano'ob tumen le j tamano'obo'.

⁹Teen le jool najo'; le máax cu yocol ti' tene' bíin to'ococ, yéetel bíin béeychajac je'el bix jun túul j taman cu yocol yéetel cu jóokol u ti'al u caxtic u janal.

¹⁰Le j oocolo' chéen cu taal u ti'al oocol, quiimsaj yéetel xu'ulsaj, ba'ale' tene' taalaja'anen u ti'al ca yanac cuxtal ti'ob, cuxtal ca jach ya'abac ti'ob.

¹¹Teen le ma'alob aj canan tamano'. Le ma'alob aj canan tamano' cu dzáic u cuxtal tu yo'olal u j tamano'ob.

¹²Ba'ale' le máax cu meyaj chéen tu yo'olal le bo'olalo', le quéen u yil u taal le kaakas ba'alche'o' cu p'atic le j tamano'obo' u ti'al u púudzul, tumen ma' leti' le aj canan tamano' yéetel le j tamano'obo' ma' u ti'ali'. Bey túuno' le kaakas ba'alche'o' cu jáanpaytic yéetel cu t'i'it'besic le j tamano'obo'.

¹³Le máaca' cu púudzul tumen chéen cu meyaj tu yo'olal le bo'olalo', u ti'al leti'e' mixba'al le j tamano'obo'.

¹⁴Teen le ma'alob aj canan tamano'. In kaj óol in tamano'ob, le in ti'alo'obo' u kaj óoleno'ob xan,

¹⁵je'el bix in Taata u kaj óoleno', yéetel in kaj óol in Taatao'. Tene' quin dzáic in cuxtal tu yo'olal le j tamano'obo'.

¹⁶Yaan teen xan u láak j tamano'ob mina'ano'ob ti' le cúuchila': yaan in taasico'ob xan. Leti'obe' yaan u yu'ubico'ob in t'aan, yaan u yantal jun p'éelili' u múuch'ul j tamano'ob yéetel jun túulili' aj canan taman.

¹⁷Le Taatao' u yaamaen tumen quin dzáic in cuxtal u ti'al in kamic tu ca'a téen.

¹⁸Mix máac cu lukesic in cuxtal ba'ale' teen dzáic tu juunal in wóolal. Yaan teen páajtalil in dzáic bey xan yaan teen páajtalil u ti'al in kamic tu ca'a téen. Bey tu ya'aljilac teen in Taata.

¹⁹Le judíobo' le ca tu yu'ubajo'ob le t'aano'oba' tu jatzuba'ob tu ca'a téen.

²⁰Ya'ab ichilo'obe' tu ya'alajo'ob: Yaan jun túul kaakas pixan ti' yéetel choco u pool. ¿Ba'axten ca wu'uyique'ex u t'aan?

²¹Ba'ale' u láako'obe' tu ya'alajo'ob: Mix máac ca yanac jun túul kaakas pixan ti' cu páajtal u t'aan beya'. ¿Cu páajtal wa jun túul kaakas pixan u dzáic u paacat le ch'óopo'obo'?

²²U kiinilo'ob que'elil, táan túun u kiinbesa'al Jerusalene' u kiinil cáajic u kulta'al Yuum Ku te j kulnajo'.

²³Táan u xíimbal Jesús te j kulnajo' ti' u Portalil Salomón

²⁴ca bakpachta'ab tumen le judíobo' ca tu káat chi'ito'ob ti': ¿Tac ba'ax kiin can a p'ato'on yéetel ca'a p'éel óolal? Wa teech le Cristoo' a'al to'on tu jaajil a wóol jun puli'.

²⁵Jesuse' tu núucaj ti'ob: Dzo'oc in wa'alic ti' te'ex, ba'ale' ma' ta wocsaj óolte'exi'. Le meyajo'ob quin beetic tu yo'olal u páajtalil in Taatae' jach sáasil u t'aano'ob tin wo'olal.

²⁶Ba'ale' te'exe' ma' ta wocsaj óolale'ex tumen ma' in j tamane'exi', je'el bix tin wa'alaj te'exo'.

²⁷In tamano'obe' cu kaj óoltico'ob in t'aan, tene' in kaj óolo'ob yéetel cu taalo'ob tin paach.

²⁸Teen dzáic cuxtal mina'an u xuul ti'ob, mix bikin bíin quíimico'ob, yéetel ma' bíin jáanpayta'aco'ob tin kab tumen mix máaqui'.

²⁹Dza'ano'ob ti' teen tumen in Taata, leti'e' mas nojoch ti' tuláacal, mix máac cu páajtal u jáanpaytico'ob tu kab leti'.

³⁰Teen yéetel le Taatao' jun túulili'on.

³¹Le judíobo' tu ch'a'ajo'ob tuunich tu ca'a téen u ti'al u muruxtuntico'ob Jesús.

³²Jesuse' tu ya'alaj túun ti'ob: Dzo'oc in beetic ya'ab ba'alo'ob ma'alobtac ta táane'ex yéetel u páajtalil in Taata. ¿Tu yo'olal máacalmáac ti' le ba'alo'ob can a muruxtuntene'exo'?

³³Le judíobo' tu núucajo'ob ti': Ma' táan c muruxtuntiquech tu yo'olal mix jun p'éel ma'alob ba'al a beetmaj, ba'ale' tumen dzo'oc a wa'alic ba'al ti' Yuum Ku. Teche' chéen jun túul máaquech, ba'ale' táan a beetcabáa Kuil.

³⁴Jesuse' tu ya'alaj túun ti'ob: Ti' a wa'almaj t'aane'exe' dzíiba'ane' Kue' tu ya'alaj: Te'exe' kue'ex.

³⁵C ojel ma' tu páajtal u mixba'alcunta'al ba'ax cu ya'alic le Quili'ich Dzíibo'obo'; Kue' tu ya'alaj kuo'ob le máaxo'ob tu kamajo'ob u t'aano'.

³⁶Wa Ku tu jun páaycunten ca tu túuxtajen yóokolcaabe', ¿bix je'el u páajtal a wa'alique'ex táan in wa'alic ba'al ti' Ku tumen tin wa'alaj: Tene' u Paalen Ku?

³⁷Wa ma' tin beetic le ba'alo'ob cu beetic in Taatae' ma' a wocsaj óoltiquene'ex.

³⁸Ba'ale' wa táan in beetique', quex ma' a wocsaj óoltiquene'exe' ocsaj óolte'ex le ba'alo'ob quin beetico', u ti'al ca a wojéelte'ex jun puli'e' le Taatao' ti' yaan ti' tene', yéetel tene' ti' yanen ti' le Taatao'.

³⁹Tu yóoltajo'ob tu ca'a téen u mach u biso'ob, ba'ale' Jesuse' púudz ti'ob.

⁴⁰Jesuse' j suunaj túun tu lakin u áalcab ja'il Jordán ca j p'at te'elo', ti' le cúuchil tu'ux dza'ab ocja' tumen Juano'.

⁴¹Ya'abcach máaco'ob bin ilic ca tu ya'alajo'ob: Tu jaajile' quex Juan ma' tu beetaj mix jun p'éel nojoch chíiculale', jaaj tuláacal ba'ax tu ya'alaj tu yo'olal le máaca'.

⁴²Ya'ab máaco'ob tu yocsaj óolto'ob Jesús ti' le cúuchilo'.