Read Yucateco San Juan 12 Bible Online

San Juan 12 - Yucateco bible

San Juan 12

¹Seis kiin u bin u kuchul le Pascuao' ca j bin Jesús Betania tu'ux caja'an Lázaro le máax caapúut cuxquinta'ab tumen Jesús ti' le quimeno'obo'.

²Te'elo' j beeta'ab jun p'éel janal u ti'al u tzi'iquil Jesús. Martae' táan u táan óoltic le janalo', Lazaroe' jun túul ti' le máaxo'ob culucbalo'ob janal yéetel Jesuso'.

³Mariae' tu taasaj túun míin táancoch litro qui'iboc aceite qui'ibocquinta'an chéen yéetel u nicte'il nardo, jach ya'ab u tojol, ca tu ji'ikabtaj tu yooc Jesús ca tu tiquincuntaj yéetel u tzo'otzel u pool. Tuláacal le najo' chu'up yéetel u qui'iboquil le aceiteo'.

⁴Judas Iscariotee', u paal Simón, le máax jun túul ti' u aj canbalo'ob Jesuse' yéetel le máax cun kubique', tu ya'alaj túun:

⁵¿Ba'axten ma' j co'on le qui'iboc aceitea' u ti'al ca dza'abac ti' óotzilo'ob? tumen je'el u tojoltic trecientos denariose'.

⁶Judase' tu ya'alaj lela', ma' tumen jach cu táan óoltic le óotzilo'obo', ba'ale' tumen j oocol, tumen leti' dza'an u canant le taakino' ba'ale' cu yoclic le ba'ax cu dza'abalo'.

⁷Jesuse' tu ya'alaj túun ti: p'ate, tumen u ta'acmaj lela' u ti'al u kiinil in mu'ucul.

⁸Mantadz cun yantal óotzilo'ob ta wéetele'ex, ba'ale' tene' ma' mantadz quin wantal ta wéetele'exi'.

⁹Ya'ab ti' le judíobo' j kuch u yojéelto'ob ti' yaan Jesús Betaniae' ca j bino'ob te'elo', ma' chéen u ti'al u yilico'ob Jesusi', ba'ale' u ti'al u yilico'ob xan Lázaro, máax caapúut cuxquinta'ab tumen Jesús ti' le quimeno'obo'.

¹⁰U nuuctaquil le aj kiino'obo' tu múuch' tucultajo'ob túun u quiimsico'ob tac Lázaro

¹¹tumen tu yo'olale' ya'ab ti' le judíobo' táan u tzelcuba'ob ti' le aj kiino'obo' u ti'al u yocsaj óoltico'ob Jesús.

¹²Ya'ab máaco'ob binja'ano'ob Jerusalén u ti'al u kiinbesajil le Pascuao'. Tu jeel kiine' tu yojéeltajo'ob yaan u kuchul Jesús ti' le caajo'.

¹³Tu ch'a'ajo'ob u le' xa'an ca jóoko'ob u kamo'ob Jesús táan u ka'am a'alico'ob: ¡Hosanna! ¡Qui'iqui' t'anta'ac máax cu taal tu kaaba' Yuumtzil! ¡Qui'iqui' t'anta'ac u ajaw israel!

¹⁴Jesuse' tu yilaj jun túul burroe' ca tu nat'aj, je'el bix cu ya'alic le Quili'ich Dzíibo':

¹⁵Ma' a sajactal, u caajil Sión; je'el túuna' táan u taal a Ajaw, culucbal yóokol jun túul burro.

¹⁶Ti' le kiino; u aj canbalo'obe' ma' tu na'atajo'ob le ba'alo'oba', ba'ale' cu dzo'ocol u nojbe'encunta'al Jesuse', ka'aj ti'ob dzíiba'an tuláacal le ba'alo'ob tu yo'olala', yéetel bey xan úuchic ti'.

¹⁷Le máaco'ob yano'ob ca'ach yéetel Jesús le ca tu t'anaj Lázaro ti' le mucnalo' yéetel ca tu caapúut cuxquintajo', táan u tzicbaltico'ob le ba'ax tu yilajo'obo'.

¹⁸Le o'olale' le máaco'obo' jóoko'ob u yilo'ob Jesús, tumen tu yojéeltajo'ob le nojoch chíiculal tu beetajo'.

¹⁹Le fariseob túuno' tu ya'alajo'ob tu baatzilo'ob: Il a wile'ex, ma' táan u páajtal u beeta'al mixba'al. Ile'ex tuláacal yóokolcaab táan u bin tu paach.

²⁰Ichil le máaco'ob j bino'ob Jerusalén u ti'al kultaj ti' le kiinbesajo', yaan dze'edzec griego'obi'.

²¹Lelo'oba' tu nadzuba'ob ti' Felipe, máax Betsaidail tu lu'umil Galileae', ca tu káat óoltajo'ob táan u ya'alico'ob ti': Dzuul to'one' j káat c il Jesús.

²²Felipe j bine' ca tu ya'alaj ti' Andrés. Ca j bino'ob tu ca'a túulilo'ob u tzicbalto'ob ti' Jesús.

²³Jesuse' tu ya'alaj túun ti'ob: Dzo'oc u kuchul u yorail cun nojbe'encunta'al u Paal Máac.

²⁴Tu jaajil tu jaajil, quin wa'alic ti' te'ex, wa jun p'éel u neek trigo ma' tu lúubul lu'um u ti'al ca quíimique', cu p'áatal láili' chéen jun p'éel neeke', ba'ale' wa cu quíimile' ya'ab u yich cu dzáic.

²⁵Le máax cu yaabiltic u cuxtale' bíin u sate, ba'ale' le máax cu p'ectic u cuxtal way ti' le yóokolcaaba', cu canantic u ti'al cuxtal mina'an u xuul.

²⁶Wa yaan máax u káat u meyajtene' u tzaypachten. Je'el tu'uxac ca yanaquene' ti' cun yantal xan le máax cu meyajtiqueno'. Wa yaan máax cu meyajtiquene' yaan u tzi'iquil tumen in Taata.

²⁷Beora' péecnaja'an in wóol. ¿Ba'ax túun quin in wa'ale? ¿Yaan wa in wa'alic: In Yuum, toquen ti' le ba'ax cun úuchul tena'? Ba'ale' taalaja'anen u ti'al lela'.

²⁸In Yuum, nojbe'encunt a kaaba'. U'uya'ab túun jun p'éel t'aan te j ca'ano' táan u ya'alic: Dzo'oc in nojbe'encuntic yéetel yaan in nojbe'encuntic tu ca'a téen.

²⁹Le máaco'ob yano'ob te'elo' le ca tu yu'ubajo'obe' yaan tu ya'alaje' cháac quíilbanaji, u láako'obe' tu ya'alajo'obe': Jun túul ángel t'ane.

³⁰Jesuse' tu ya'alaj túun ti'ob: Ma' tin wo'olal j u'uya'ab le t'aana', ba'ale' ta wo'olale'ex.

³¹Beora' u yorail le quéen p'is óolta'ac yóokolcaaba', beora' yaan u tojolch'inta'al le máax cu tusbel way yóokolcaabe'.

³²Le quéen líikesa'aquen tu yóokol le lu'uma', yaan in taasic tuláacal máac ti' teen.

³³Yéetel lela' táan u dzáic na'ata'al bix cun quíimil.

³⁴Le máaco'obo' tu núucajo'ob ti': C u'uymaj u xo'ocol ti' le a'almaj t'aano' leti' le Cristoo' yaan u cuxtal mantadz. ¿Bix túun a wa'alic teech yaan u líikesa'al u Paal Máac? ¿Máax le u Paal Máaca'?

³⁵Jesuse' tu ya'alaj ti'ob: Chéen jun p'íit kiin cun yantal le sáasil ichile'exo'. Xíimbanene'ex túun ca'aliquil yaan ti' te'ex le sáasila', u ti'al ma' u yáakabchajal te'ex, tumen le máax cu máan ti' le éekjoch'e'enilo' ma' u yojel tu'ux cu bini'.

³⁶Ocsaj óolte'ex le sáasilo' ca'aliquil ti' yaan ta wéetele'exe', u ti'al ca beetchajque'ex u paalale'ex sáasil. Cu dzo'ocol u ya'alic le ba'alo'oba' Jesuse' j bini ca tu ta'acajubáa ti'ob.

³⁷Quex tu beetaj Jesús ya'abcach nojoch chíiculalo'ob tu táano'obe', ma' tu yocsaj u yóolo'ob ti'i',

³⁸tumen yanchaj u dzo'ocpajal le ba'ax tu dzíibtaj aj bóobat Isaías: Yuumtzil, ¿Máax dzo'oc u yocsaj óoltic c tze'ec? ¿Ti' máax dzo'oc u ye'esic Yuumtzil u páajtalil?

³⁹Bey túuno' ma' páatji' u yocsaj óolalo'obi', tumen Isaiase' tu dzíibtaj xan:

⁴⁰Beeta'abo'ob ch'óopo'ob yéetel chich u pucsi'ikalo'ob tumen Ku, u ti'al ma' u paacato'ob yéetel u yicho'ob, mix ca u na'ato'ob yéetel u pucsi'ikalo'ob, mix u suuto'ob ti' teen u ti'al ca in dzáa u toj óolalo'ob.

⁴¹Isaiase' tu ya'alaj lela' tumen tu yilaj u qui'ichquelemil Jesús yéetel t'aanaj tu yo'olal leti'.

⁴²Quex beya', ya'ab ti' le judíobo' tu yocsaj u yóolo'ob ti' Jesús, tac dze'edzec ti' le u nuuctaquilo'obo', ba'ale' ma' tu ya'alajo'ob tu táan máaco'obi', tumen sajacchajo'ob ti' le fariseobo', u ti'al ma' u jóokesa'alo'ob ti' le sinagogao'.

⁴³Tumen mas utz tu t'ano'ob le tziquil cu dzáic máaco'obo' ti' le tziquil cu dzáic Kuo'.

⁴⁴Jesuse' ka'am tu ya'aljilac ti'ob: Le máax cu yocsic u yóol ti' tene' ma' táan u yocsic u yóol chéen ti' teen ba'ale' tac ti' le Taata máax túuxteno'.

⁴⁵Le máax cu yilquene' cu yilic xan le máax túuxteno'.

⁴⁶Teen le sáasilo' j taalen way yóokolcaabe' u ti'al tuláacal le máax cu yocsic u yóol ti' tene' ma' u p'áatal ti' éekjoch'e'enil.

⁴⁷Ba'ale' wa yaan máax cu yu'ubic in t'aan ba'ale' ma' tu dzo'obesique', ma' teen máax cun xot kintiqui', tumen tene' ma' taalaja'anen u ti'al in xot kint yóokolcaabi', ba'ale' u ti'al in toque.

⁴⁸Le máax ma' tu kamiquene' yéetel ma' tu dzo'ocbesic in t'aano'obe', yaan máax xot kintic: Le máax cun xot kintic tu dzo'oc kiino' leti' le in t'aano'ob dzo'oc in wa'alico'.

⁴⁹Tumen tene' ma' tu juunal in wóolal quin t'aani', le Taata máax túuxteno' u ya'almaj teen ba'ax unaj in wa'alic yéetel ba'ax unaj in ca'ansic.

⁵⁰In wojel xan u ya'almaj t'aan in Taatae' u ti'al cuxtal mina'an u xuul. Bey túuno' le ba'ax quin wa'alica' quin wa'alic je'el bix u ya'almaj teen in Taatae'.