Read Yucateco San Juan 13 Bible Online

San Juan 13 - Yucateco bible

San Juan 13

¹Lela' leti' le kiin cu taal táanil ti' u kiinbesajil le Pascuao'. Jesuse' u yojel dzo'oc u kuchul u kiinil u p'atic le yóokolcaaba' u ti'al u bin ti' le Taatao'. Je'el bix tu yaabiltaj le máaxo'ob u ti'alo'ob yano'ob way yóokolcaaba', tu yaabiltajo'ob tac tu xuul.

²Jesús yéetel u aj canbalo'obe' culucbalo'ob janal. Kasilba'ale' dzo'oc u yocsic tu pucsi'ikal Judas Iscariote, u paal Simón, u tuuculil u kubic Jesús.

³Jesuse' u yojel dza'an tuláacal páajtalil ti' tumen u Taata u yojel xan ti' Ku taalaja'an, yéetel ti' Ku cu bin.

⁴J líik túun ti' le mayacche'o', tu pitaj jun yáal u nooke' ca tu kaxnaktubáa yéetel jun p'éel x cho'obol ja'.

⁵Tu dzáa ja' ti' jun p'éel cáat kate' ca jo'op' u p'o'ic u yooc u aj canbalo'ob yéetel u tiquincuntic yéetel le x cho'obol ja' u kaxnaktmajo'.

⁶Le ca tu yóoltaj u p'o'o u yooc Simón Pedroe', lela' tu ya'alaj ti': Yuumtzil ¿Teech p'o'ic in wooc?

⁷Jesuse' tu núucaj ti': Bejela'e' ma' ta na'atic ba'ax quin beetic, ba'ale' cu dzo'ocole' yaan a na'atic.

⁸Ba'ale' Pedroe' tu ya'alaj ti': Mixbikin bíin a p'o'o in wooc. Jesuse' tu núucaj ti': Wa ma' tin p'o'ic a wooque' mixba'al yaan a wil tin wéetel.

⁹Simón Pedroe' tu ya'alaj ti': Yuumtzil, wa beyo', ma' chéen in wooqui', p'o'o tac in kab bey xan in pool.

¹⁰Jesuse' tu ya'alaj ti': Le máax dzo'oc u yichquile', chéen kaabéet u p'o'ic u yooc, tumen láaj p'o'an. Te'exe' p'o'ane'ex quex ma' tuláacale'exi'.

¹¹Tu ya'alaj: Ma' p'o'ane'ex tuláacale'exi', tumen u yojel máax cun kubic.

¹²Cu dzo'ocol u p'o'oic u yooco'obe' Jesuse' tu ca'a búuquintaj u nooke', culaj tu ca'a téen ti' le mayacche'o' ca tu ya'alaj ti'ob: ¿Ca na'atique'ex ba'ax dzo'oc in beetic ti' te'exa'?

¹³Te'exe' ca wa'alique'ex teen aj ca'anbesaj yéetel Yuumtzil, u jaajil ba'ax ca wa'alique'ex tumen leti'en.

¹⁴Bey túuno', wa teen quex aj ca'anbesajen yéetel Yuumtzilen dzo'oc in p'o'ic a wooque'exe', bey xan te'ex unaj a p'o'ic a wooque'ex ta baatzile'ex.

¹⁵Tumen dzo'oc in we'esic te'ex bix u beeta'al, u ti'al ca a beete'ex je'el bix dzo'oc in beetic ti' te'exo'.

¹⁶Tu jaajil, tu jaajil quin wa'alic ti' te'ex mix jun túul palitzil mas nojoch ti' u dzuulil, yéetel mix jun túul j túuchi'il mas nojoch ti' le máax túuchi'ito'.

¹⁷Wa ca na'atique'ex le ba'alo'oba' yéetel ca beetique'exe', yaan u yantal te'ex qui'imac óolal.

¹⁸Ma' táan in t'aan tu yo'olal tuláaclile'ex. Tene' in wojel máaxo'ob in yéeymaj. Ba'ale' yaan u dzo'ocpajal ba'ax cu ya'alic le Quili'ich Dzíibo': Le máax cu janal tin wéetele', dzo'oc u suticubáa tin contra.

¹⁹Táan in wa'alic te'ex ma'ili' úuchuque'; lela' beyo' le quéen úuchuque' ca wocsaj óolte'exe' tene' teen.

²⁰Tu jaajil tu jaajil quin wa'alic ti' te'ex, le máax cu kamiquene' cu kamic máax túuxten.

²¹Cu dzo'ocol u ya'alic lela' Jesuse' jach péecnaj u yóol tac tu taamil u pucsi'ikal ca tu ya'alaj jach t'áalcab: Tu jaajil, tu jaajil quin wa'alic ti' te'ex, jun túul ti' te'exe' cun kubiquen.

²²U aj canbalo'ob túune' jo'op' u pacticuba'ob tu baatzilo'ob, tumen ma' u yojelo'ob máax o'olalil tu ya'alaj lela'.

²³Jun túul ti' le aj canbalo'obo', le máax jach yaabilta'an tumen Jesuse', culucbal janal tu tzéel Jesús.

²⁴Simón pedroe' tu béech'kabtaj u ti'al ca u káat ti' Jesús máax o'olalil tu ya'alaj lela'.

²⁵Leti' túune' tu jach nadzubáa ti' Jesuse' ca tu káataj ti': Yuumtzil ¿Máaxi'?

²⁶Jesuse' tu núucaj ti': Bin in ca'aj in ch'ul jun xet' waaj, ti' le máax quin in dzáe' leti'. Bey túuno' tu ch'ulaj jun xet' waaje' ca tu dzaj ti' Judas Iscariote, u paal Simón.

²⁷Le ca tu kamaj Judas le waajo', tu séeblaquil ooc Satanás tu pucsi'ikal, Jesuse' tu ya'alaj túun ti': Le ba'ax can a beeto', beet séeba'an.

²⁸Ba'ale' mix jun túul ti' le máaxo'ob culucbalo'ob janal tu na'ataj ba'axten tu ya'alaj ti' lela'.

²⁹Tumen Judase' leti' máax canantic u bolsail le taakino'; le o'olale' yaan tu tucultajo'obe' táan u ya'ala'al ti' tumen Jesuse' ca u man wa ba'ax kaabéet u ti'al le kiinbesajo', wa ca u dzáa dze'edzec taakin ti' le óotzilo'obo'.

³⁰Judase', cu dzo'ocol u kamic le waajo', jóoki'. Dzo'oc u yáakabtal.

³¹Cu dzo'ocol u jóokol Judase', Jesuse' tu ya'alaj ti'ob: Beora' cu chíicpajal u nojbe'enil u Paal Máac, yéetel u nojbe'enil Kue' cu chíicpajal ti' leti'.

³²Wa u Paal Máac cu ye'esic u nojbe'enil Junab Kue', Ku túune' yaan u ye'esic u nojbe'enil u Paal Máac, yéetel séeba'an cun u beetil.

³³In paalale'ex, chéen dze'edzec kiino'ob mas quin wantal ta wéetele'ex. Te'exe' yaan a caxtiquene'ex, ba'ale' je'el bix tin wa'alaj ti' le judíobo' quin wa'alic ti' te'ex beora': Ma' tu páajtal a taale'ex te tu'ux quin bino'.

³⁴Quin dzáic ti' te'ex le túumben a'almaj t'aana': Yaabiltaba'ex ta baatzile'ex. Je'el bix in yaabiltma'exe' te'exe' unaj a yaabiltcaba'ex ta baatzile'ex.

³⁵Wa ca yaabiltcaba'ex ta baatzile'exe' tuláacal yóokolcaab cun u kaj óolte' te'exe' in aj canbale'ex.

³⁶Simón Pedroe' tu káat chi'itaj ti' Jesús: Yuumtzil ¿Tu'ux ca bin? Jesuse' tu núucaj ti': Tu'ux quin bine' ma' tu páajtal a taal tin paach beora', ba'ale' cu dzo'ocole' yaan a taal tin paach.

³⁷Pedroe' tu ya'alaj túun ti': Yuumtzil, ¿ba'axten ma' tu páajtal in taal ta paach beora'? Chuca'an in wóol in dzáa in cuxtal ta wo'olal.

³⁸Jesuse' tu núucaj ti': ¿Tu jaajil chuca'an a wóol a dzáa a cuxtal tin wo'olal? Tu jaajil, tu jaajil quin wa'alic ti' teech, ma'ili' kaaynac le t'eelo' quéen a wa'al óox téen ma' a kaj óoleni'.