Read Yucateco San Juan 14 Bible Online

San Juan 14 - Yucateco bible

San Juan 14

¹Ma' u jach sa'atal a wóole'ex. A wocsmaj a wóole'ex ti' Kue' ocs a wóole'ex xan ti' teen.

²Tu yotoch in Taatae' yaan ya'abcach cúuchilo'ob tu'ux cu yúuchul cajtal. Wa ma' bey anilo', tene' dzo'oc in wa'alic ti' te'exe'. Bey túuno' bin in ca'aj in nu'uct jun p'éel cúuchil a ti'al te'ex.

³Cu dzo'ocol in bin yéetel in nu'uctic te'ex jun p'éel cúuchile' yaan in suut tu ca'a téen u ti'al ca in bise'ex tin wéetel, u ti'al ca yanaque'ex ti' le cúuchil tu'ux quin wantal teno'.

⁴Te'exe' a wojele'ex tu'ux quin bin yéetel a wojele'ex u bejil.

⁵Tomase' tu ya'alaj ti': Yuumtzil, ma' c ojel tu'ux ca bini' ¿Bix je'el u páajtal c ojéeltic u bejile'?

⁶Jesuse' tu núucaj ti': Teen le bejo', teen le jaajo' yéetel teen le cuxtalo'. Chéen tin wo'olale' cu páajtal u taal máac ti' le Taatao'.

⁷Wa ca kaj óoltiquene'exe' bey xan ca kaj óoltique'ex in Taata. Beora' dzo'oc a kaj óoltique'ex tumen táan a wilique'ex.

⁸Felipe' tu ya'alaj túun ti': Yuumtzil, e'es to'on le taatáo, yéetel lelo' cu qui'imactal c óol.

⁹Jesuse' tu núucaj ti': Felipe, buca'aj kiin yanaquen ta wéetele'ex ¿ma' páatac wa a kaj óoltiqueni'? Le máax cu yilquen tene' cu yilic le Taatao', ¿Ba'axten túun ca káatic teen ca in we'es te'ex le Taatao'?

¹⁰¿Ma' ta wocsaj óoltic wa ti' yanen ti' le Taatao' Yéetel le Taatao' ti' yaan ti' tene'? Le ba'alo'ob quin wa'alic ti' te'exa' ma' táan in wa'alic tu juunal in wóoli'. Le Taata cuxa'an teno', leti' máax cu meyaj.

¹¹Ocsaj óolte'ex tene' ti' yanen ti' le Taatao' bey xan le Taatao' ti' yaan ti' tene'. Wa ma' ta wocsaj óoltique'ex lela', ocsaj óoltene'ex tu yo'olal ba'ax quin beetic.

¹²Tu jaajil, tu jaajil quin wa'alic ti' te'ex, le máax ocsaj óoltiquene' yaan u beetic xan le ba'alo'ob quin beetico', ba'alo'ob mas nuuctac cun u beete, tumen tene' táan in bin tu'ux yaan le Taatao'.

¹³Tuláacal ba'ax ca a káate'ex tin kaaba'e' bíin in beete, u ti'al ca e'esa'ac u nojbe'enil le Taatao' tumen le Paalo'.

¹⁴Tene' bíin in beet je'el ba'alac ca káate'ex tin kaaba'e'.

¹⁵Wa a yaabiltmaene'exe' dzo'ocbese'ex in wa'almaj t'aano'ob.

¹⁶Teen túune' yaan in káat óoltic ti' le Taatao' ca u túuxt ti' te'ex u láak máax áantique'ex yéetel u dzáic a wóole'ex, u ti'al ca yanac mantadz ta wéetele'ex:

¹⁷u Pixanil le jaajo', le máaxo'ob yóokolcaabilo'obo' ma' tu páajtal u kamico'ob, tumen ma' tu yilico'ob mix u kaj óolo'obi'. Ba'ale' te'exe' a kaj óole'ex tumen leti'e' ti' yaan ta wéetele'ex yéetel yaan u p'áatal mantadz ti' te'ex.

¹⁸Ma' táan in xúump'attique'ex. Yaan in suut u ti'al c yanaquen ta wéetele'ex.

¹⁹Ichil jun p'íit kiine' ma' tin ilbil tumen máaco'ob, ba'ale' te'exe' yaan a wiliquene'ex; tumen cuxa'anen tene', te'exe' yaan a cuxtale'ex xan.

²⁰Ti' le kiino; te'exe' yaan a kaj óoltique'ex tene' ti' yanen ti' in Taatae', te'exe' ti' yane'ex ti' tene' yéetel tene' ti' yanen ti' te'exe'.

²¹Le máax u yojel yéetel cu dzo'ocbesic in wa'almaj t'aano'obe' táan u ye'esic jach tu jaajil u yaamaen. In Taatae' yaan u yaabiltic le máax u yaamaene', teen xane' yaan in yaabiltic yéetel yaan in we'esiquimbáa ti'.

²²Judas ma' Iscarioteil tu ya'alaj ti': Yuumtzil ¿Ba'axten can a we'esabáa ti' to'on, ba'ale' ma' ti' u máaquilo'ob yóokolcaabi'?

²³Jesuse' tu núucaj ti': Le máax u yaabiltmaene' cu dzo'ocbesic ba'ax quin wa'alic. Bíin yaabilta'ac tumen in Taata, in Taata yéetel tene' bíin taalaco'on cuxtal tu yéetel.

²⁴Le máax ma' u yaabiltmaene' ma' tu dzo'ocbesic ba'ax quin wa'alic. Le t'aan ca wu'uyque'exa' ma' in ti'ali', u ti'al le Taata máax túuxteno'.

²⁵Táan in wa'alic te'ex tuláacal le ba'alo'oba' ca'aliquil ti' yanen ta wéetele'exe'.

²⁶Ba'ale' le Quili'ich Pixan cun u túuxt le Taata tin kaaba'o', u ti'al ca u yáante'ex yéetel u dzáic a wóole'exe', leti' cun u ca'ans te'ex tuláacal ba'al, yéetel yaan u ka'ajsic te'ex tuláacal le ba'alo'ob dzo'oc in wa'alic te'exo'.

²⁷Táan in bin, p'áatene'ex ich jéedzel. In jéedzel quin dzáic ti' te'ex. Ba'ale' ma' táan in dzáic je'el bix cu dzáic jéedzel le máaxo'ob yóokolcaabilo'. Ma' u sa'atal a wóole'ex mix a sajactale'ex.

²⁸Dzo'oc a wu'uyique'ex in wa'alic táan in bin yéetel yaan in suut u ti'al ca yanaquen ta wéetele'ex tu ca'a téen. Wa tu jaajil a yaabiltmaene'exe' dzo'oc ca'ach u qui'imactal a wóole'ex le ca ta wojéeltaje'ex táan in bin ti' le Taatao', tumen leti'e' mas nojoch ti' teen.

²⁹Táan in wa'alic te'ex lela' ma'ili' úuchuque', beyo' le quéen úuchuque' ca wocsaj óolte'ex.

³⁰Ma' ya'ab t'aan quin in beet ta wéetele'exi, tumen táan u taal le máax cu tusbel way yóokolcaabe', quex mina'an mix jun p'íit páajtalil ti' tin wóokol.

³¹Bey unaj, u ti'al ca u yojéelt yóokolcaabe' tene' in yaabiltmaj le Taatao' yéetel táan in beetic le ba'ax tu ya'alaj ca in beeto'. Líikene'ex. Co'one'ex lukul waye'.