Read Yucateco San Juan 15 Bible Online

San Juan 15 - Yucateco bible

San Juan 15

¹Tene' leti' le jun cúul jaajil uvao, in Taatae' leti' le máax canantic le pakalo'.

²je'el máacalmáac ti' in kabo'ob ma' tu yichanquile' cu lukesic; ba'ale' cu p'éep'ic u kaasil le in kabo'ob cu yichanquilo'obo', u ti'al ca mas ya'abac u yich.

³Te'exe' lukesa'an a kaasile'ex tu yo'olal le ca'ansajo'ob in dzaamaj te'exo'.

⁴P'áatac mantadz a nupmaba'ex ti' teen, je'el bix teen in nupminbáa mantadz ta wéetele'exe'. U kab jun cúul che'e ma' tu páajtal u yichanquil tu juunal wa ma' u nupmubáa mantadz ti' u che'il, bey xan te'ex ma' tu páajtal a dzáique'ex ich wa ma' a nupmaba'ex mantadz ti' teen.

⁵Teen leti' le jun cúul che'o', te'exe' u kabo'ob. Le máax cu p'áatal mantadz u nupmubáa ti' tene' bey xan teen in nupminbáa tu yéetele', jach ya'ab u yichanquil, tumen mixba'al cu páajtal a beetique'ex wa jun páay yanile'ex ti' teen.

⁶Le máax ma' tu p'áatal mantadz u nupmubáa ti' tene', yaan u pu'ulul táancab yéetel yaan u tijil, je'el bix u kabo'ob le che' cu mo'olol u ti'al ca tóoca'ac ti' káako'.

⁷Wa te'ex ca p'áatale'ex mantadz a nupmaba'ex ti' tene', bey xan in ca'ansajo'ob ca p'áataco'ob ti' te'exe', je'el ba'alac ca a káate'exe' yaan u dza'abal ti' te'ex.

⁸In Taatae' nojoch tziiquil cu kamic le quéen a dza'ex ya'ab ich, tumen beyo' ca béeychajle'ex tu jaajil in aj canbale'ex.

⁹Tene' in yaabiltma'ex bey je'el bix u yaabiltma'en le Taatao'. P'áatene'ex túun ti' in yaacunaj.

¹⁰Wa ca dzo'ocbesique'ex in wa'almaj t'aano'obe' bíin p'áataque'ex ti' in yaacunaj, je'el bix teen quin dzo'ocbesic u ya'almaj t'aan in Taatae' yéetel p'aatlen ti' u yaacunaj.

¹¹Tene' táan in t'aan ta wéetele'ex beya' u ti'al ca yanac in qui'imac óolal ti' te'ex yéetel u ti'al ca chúucpajac a qui'imac óolale'ex.

¹²In wa'almaj t'aane' leti' lela': Yaabiltaba'ex ta baatzile'ex, je'el bix in yaabiltma'exe'.

¹³U mas nojochil yaacunaj cu páajtal u yantal ti' jun túul máaque' leti' lela': u dzáic u cuxtal tu yo'olal u amigo'ob.

¹⁴Te'exe' in amigoex wa ca beetique'ex le ba'ax quin wa'alic te'exo'.

¹⁵Ma' táan in wa'alic wa palitzile'ex, tumen le palitzilo' ma' u yojel ba'ax cu beetic u dzuulili'. Táan in wa'alic te'exe' in amigoex, tumen dzo'oc in dzáic a wojéelte'ex tuláacal ba'ax tu ya'alaj teen in Taata.

¹⁶Ma' te'ex ta yéeyajene'exi', teen tin yéeyaje'ex ca tin kubentaj te'ex ca xi'ique'ex u ti'al ca a dza'ex ya'ab ich yéetel ca p'áatac mantadz a wiche'ex. Bey túuno' le Taatao' je'el u dzáic te'ex tuláacal ba'ax ca a káate'ex ti' tin kaaba'e'.

¹⁷Le ba'ax quin wa'alic ti' te'exa' leti' lela' yabiltaba'ex ta baatzile'ex.

¹⁸Wa yóokolcaab cu p'ectique'exe' ojéelte'exe' teen táanil tu p'ectajen.

¹⁹Wa te'ex yóokolcaabile'exe', u máaquilo'ob yóokolcaabe' je'el u yaabiltique'exe' je'el bix u yaabiltico'ob le máaxo'ob u ti'alo'obo'. Ba'ale' tene' tin yéeyaje'ex ti' ichil u máaquilo'ob yóokolcaab, le o'olale' yóokolcaabe' u p'ecmajex, tumen ma' yóokolcaabile'exi'.

²⁰Ka'ajac te'ex le ba'ax tin wa'alaj ti' te'exo': Mix jun túul palitzil mas nojoch ti' u dzuulil. Wa teen tu ch'a'apachteno'obe' bey xan te'ex yaan a ch'a'apachta'ale'ex; wa tu dzo'ocbeso'ob in ca'ansaje' bey xan yaan u dzo'ocbesico'ob a ca'ansaje'ex.

²¹Tuláacal lela' yaan u beeta'al ti' te'ex tin wo'olal tumen ma' u kaj óolo'ob máax túuxteni'.

²²Ma' bíin yanac ca'ach u si'ipilo'ob wa ma' in taal ca'ach in t'aano'obi'. Ba'ale' beora' mixba'al yaan u ya'alo'ob tu yo'olal u kebano'ob,

²³tumen le máaxo'ob u p'ecmajeno'obe' u p'ecmajo'ob xan in Taata.

²⁴Ma' bíin yanac ca'ach u si'ipilo'ob wa ma' in beetic ichilo'ob ba'alo'ob mix jun láak máac beetmail. Dzo'oc u yilico'ob le ba'alo'oba', cu dzo'ocole' quex beyo' u p'ecmajeno'ob yéetel u p'ecmajo'ob xan in Taata.

²⁵Ba'ale' le ba'alo'oba' cu yúuchul tumen ka'ana'an ca dzo'ocpajac le t'aano'ob dzíiba'an ti' u ya'almaj t'aano'obo': Tu p'ectajeno'ob quex mina'an ba'ax o'olal.

²⁶Ba'ale' le quéen taalac le máax cun u yáante'exo' yéetel cun u dzáa a wóole'exo', u Pixanil le jaajo' le máax bíin in túuxt te'exo', le máax ti' le Taata u taalo' leti' cun t'aan tin wo'olal.

²⁷Te'ex xane' yaan a táane'ex tin wo'olal, tumen yanji'ex tin wéetel tu yáax chuun.