Read Yucateco San Juan 16 Bible Online

San Juan 16 - Yucateco bible

San Juan 16

¹Quin wa'alic ti' te'ex le ba'alo'oba' u ti'al ma' u lúubul a wóole'ex.

²Yaan a jóoksa'ale'ex ti' le sinagogaobo', yéetel bíin kuchuc u kiinil le quéen quíimsa'aque'ex tumen wa máaxe' bíin u tucult táan u meyajtic Ku beyo'.

³Lela' yaan u beetico'ob tumen ma' u kaj óolto'ob mix le Taatao' mix teen.

⁴Quin wa'alic ti' te'ex lela', u ti'al beyo', le quéen úuchuque' ca ka'ajac te'ex dzo'oc in wa'alic ti' te'ex. Lela' ma' tin wa'alaj ti' te'ex tu yáax chuni' tumen ti' yaanen ca'ach ta wéetele'exe'.

⁵Ba'ale' beora' táan in bin u ti'al in wantal yéetel máax túuxten, ba'ale' mix jun túul ti' te'ex cu katic teen tu'ux quin bin;

⁶chéen dzo'oc u okomtal a wóole'ex tumen tin wa'alaj ti' te'ex le ba'alo'oba'.

⁷Tene' quin wa'alic ti' te'ex u jaajil, asab ma'alob a ti'al te'ex ca xi'iquen. Tumen wa ma' tin bine' ma' túun taal u ti'al antal ta wéetele'ex le máax áantique'ex yéetel cu dzáic a wóole'exo', ba'ale' wa quin bine' yaan in túuxtic.

⁸Le quéen taalaque' yaan u beetic u kaj óoltic u máaquilo'ob yóokolcaabe' yaan u kebano'ob, yaan xan jun p'éel ma'alob bej, yéetel Ku xan cun p'is óoltico'ob.

⁹Leti'obe' j kebano'ob tumen ma' táan u yocsaj óoltiqueno'ob.

¹⁰Yaan u kaj óoltico'ob máacalmáac le ma'alob bejo' tumen tene' táan in bin tac tu'ux yaan le Taatao', yéetel ma' bíin a wilene'exi'.

¹¹Yéetel yaan u kaj óoltico'ob u p'is óolal Ku tumen dzo'oc u xot kinta'al le máax cu tusbel way yóokolcaaba'.

¹²Ya'ab u láak ba'alo'ob yaan u ti'al in wa'al te'ex, ba'ale' ma' táan u páajtal a na'atique'ex beora'.

¹³Le quéen taalac u Pixan le jaajo' leti' cun ca'ansic te'ex tuláacal le jaajo', tumen ma' túun t'aan tu juunal yóol, ba'ale' yaan u ya'alic tuláacal le ba'ax cun u yu'ube' yéetel yaan u beetic a wojéeltique'ex tuláacal le ba'alo'ob bíin úuchuco'.

¹⁴Leti'e' yaan u nojbe'encuntiquen tumen yaan u kamic ba'ax in ti'ale', u ti'al u dzáic a wojéelte'ex.

¹⁵Tuláacal ba'ax yaan ti' le Taatao' in ti'al xan, le o'olal tin wa'alaj yaan u kamic le Pixan ba'ax in ti'alo' u ti'al u dzáic a wojéelte'ex.

¹⁶Ichil jun p'íit kiine' ma' bíin a wilene'exi', ba'ale' le quéen máanac u láak jun p'íit kiine' bíin a wilene'ex tu ca'a téen, tumen tene' táan in bin tac tu'ux yaan le Taatao'.

¹⁷Dze'edzec túun ti' u aj canbalo'obe' tu káat chi'ito'ob tu baatzilo'ob: ¿Ba'ax u káat u ya'al lela'? Cu ya'alic ti' to'one': Ichil jun p'íit kiine' ma' bíin a wilene'exi', ba'ale' le quéen máanac u láak jun p'íit kiine' bíin a wilene'ex tu ca'a téen tumen tene' táan in bin tu'ux yaan le Taatao.

¹⁸¿Ba'ax u káat u ya'al Ichil jun p'íit kiin? Ma' táan c na'atic ba'ax cu ya'alic.

¹⁹Jesuse' tu kaj óoltaj yaan ba'ax u káat u káato'obe' ca tu ya'alaj ti'ob: Tene' tin wa'alaj ti' te'exe' ichil jun p'íit kiine' ma' bíin a wilene'exi', ba'ale' le quéen máanac u láak jun p'íit kiine' bíin a wilene'ex tu ca'a téen. ¿Leti' wa le ca káatique'ex ta baatzile'exo'?

²⁰Tu jaajil, tu jaajil quin wa'alic ti' te'exe' yaan a wokole'ex yéetel yaan u yantal te'ex yaayaj óolal, ba'ale' u máaquilo'ob yóokolcaabe' yaan u qui'imacchajal u yóolo'ob. Bey túuno', quex yaan te'ex yaayaj óolale', a yaayaj óolale'exe' yaan u suut qui'imac óolalil.

²¹Le quéen kuchuc u kiinil u síijsaj jun túul co'olele' cu mukyaj tumen dzo'oc u kuchul u kiinil u ki'inamtal; ba'ale' cu dzo'ocol u síijil le chaan palo' ma' táan u ka'ajal ti' u ki'inamil tu yo'olal u qui'imac óolalil iquil síijic jun túul chaan pal way yóokolcaabe'.

²²Bey xan te'ex táan a mukyaje'ex beora', ba'ale' yaan in suut in wile'ex; le quéen suunaquene' yaan u chu'upul a pucsi'ikale'ex yéetel qui'imac óolal, jun p'éel qui'imac óolal mix máac cun páajtal u lukesic te'ex.

²³Ti' le kiino' mixba'al can a káate'ex ti' teen. Tu jaajil, tu jaajil quin wa'alic ti' te'ex, tuláacal ba'ax ca a káate'ex tin kaaba' ti' le Taatao', bíin u dzáa te'ex.

²⁴Tac beora' mix ba'al a káate'ex tin kaaba'; káate'ex ca a kame'ex, u ti'al ca chu'upuc a pucsi'ikale'ex yéetel qui'imac óolal.

²⁵Dzo'oc in wa'alic te'ex le ba'alo'oba' ichil queet t'aano'ob, ba'ale' yaan u taal u kiinil in t'aan ta wéetele'ex x ma' queet t'aanilo'ob, tumen jach t'áalcab bíin t'aanaquen ta wéetele'ex tu yo'olal le Taatao'.

²⁶Ti' le kiino' te'exe' bíin káat óolnaque'ex tin kaaba'. Ma' táan in wa'alic ti' te'ex wa bíin káat óolnaquen ta wo'olale'ex ti' le Taatao',

²⁷tumen le Taatao' u yaabiltma'ex. U yaabiltma'ex tumen te'exe' a yaabiltmaene'ex yéetel dzo'oc a wocsaj óoltique'ex ti' Ku taalaja'anen.

²⁸Ti' u táan le Taatao' jóoken u ti'al in taal way yóokolcaabe', ba'ale' beora' táan in p'atic le yóokolcaaba' u ti'al in suut ti' le Taatao'.

²⁹U aj canbalo'obe' tu ya'alajo'ob túun ti': Beora' jach t'áalcab a t'aan, x ma' queet t'aanilo'ob.

³⁰Beora' táan c ilique' a wojel tuláacal ba'al, ma' kaabéet ca káatac a chi' tumen mix máaqui'. Le o'olale' c ocsaj óoltic ti' Ku taalaja'anech.

³¹Jesuse' tu núucaj ti'ob: ¿Bey túuno' beora' ca wocsaj óolale'ex?

³²Táan u taal u kiinil, lela' dzo'oc u kuchul, le quéen t'i'it'besa'aque'ex jujun túulil táanxel tzéelilo'ob, yéetel yaan a p'atiquene'ex tin juunal. Ba'ale' ma' tin juunal in wanili', tumen le Taatao' ti' yaan tin wéetele'.

³³Táan in wa'alic ti' te'ex tuláacal le ba'alo'oba' u ti'al ca yanac ti' te'ex jéedzel le quéen a nupaba'ex ti' teen. Ti' le yóokolcaabo' te'exe' yaan a mukyaje'ex, ba'ale' yanac a wóole'ex, tumen tene' dzo'oc in dzáanche'etic yóokolcaab.