Read Yucateco San Juan 17 Bible Online

San Juan 17 - Yucateco bible

San Juan 17

¹Cu dzo'ocol u ya'alic le ba'alo'oba', Jesuse' j paacatnaj ca'ane' ca tu ya'alaj: In Yuum, dzo'oc u kuchul u yorail. Nojbe'encunt a Paal, u ti'al ca u nojbe'encuntech xan a Paal.

²Tumen teche' a dzaamaj páajtalil ti' a Paal yóokol tuláacal máac, u ti'al ca u dzáa cuxtal mina'an u xuul ti' tuláacal le máaxo'ob ta kubaj ti'o'.

³Le cuxtal mina'an u xuulo' leti' lela': ca u kaj óolto'ob teech chéen jun túulili' Ku, yéetel ca u kaj óolto'ob Jesucristo le máax ta túuxtajo'.

⁴Tene' dzo'oc in nojbe'encuntiquech way yóokolcaabe'. Dzo'oc in dzo'ocsic le meyaj ta túuxtajen in beeto'.

⁵Beora', in Yuum, dzáa teen ta táan le nojbe'enil yaan ti' teen ca'ach ta wicnal ma'ili' yanac le yóokolcaaba'.

⁶Le máaxo'ob ta yéeyaj ti' ichil le yóokolcaabilo' u ti'al a kubo'ob ti' teno', tin beetaj u yojéeltico'ob máaxech teech. A ti'alo'ob ca'achi', ca ta kubo'ob ti' teen, dzo'oc xan u yu'ubico'ob a t'aan.

⁷Beora' u yojéelo'obe' tuláacal ba'ax ta dzaj ti' tene' ti' teech u taal.

⁸Tumen dzo'oc in dzáic ti'ob le ma'alob péectzil ta dzaj ti' teno', dzo'oc xan u kamico'ob. Dzo'oc u yilico'ob jach tu jaajil ti' teech taalaja'anen, yéetel dzo'oc u yocsaj óoltico'ob teech túuxten.

⁹Tene' táan in káat óolal tu yo'olalo'ob; ma' táan in káat óolal tu yo'olal le yóokolcaabilo'obo', ba'ale' tu yo'olal le máaxo'ob ta kubaj ti' teno', tumen a ti'alo'ob.

¹⁰Tuláacal ba'ax in ti'ale', a ti'al; yéetel le ba'ax a ti'ale', in ti'al; yéetel in nojbe'enile' cu yila'al ti' leti'ob.

¹¹Tene' ma' táan in p'áatal way yóokolcaabe', ba'ale' leti'obe' yaan u p'áatalo'ob way yóokolcaabe'. Tene' táan in bin u ti'al in wantal ta wicnal. In Quili'ich Yuum, canant yéetel u páajtalil a kaaba' le máaxo'ob ta kubaj teno', u ti'al ca jun p'élili'chajco'ob je'el bix to'one'.

¹²Le ca yanjien tu yéetelo'ob way yóokolcaabe' tin canantaj yéetel u páajtalil a kaaba' le máaxo'ob ta kubaj teno', tin toco'ob xan ti' kaas. Mix jun túul ti'ob sa'ati', chéen le máax sa'atalili'e, u ti'al ca dzo'ocpajac ba'ax cu ya'alic le Quili'ich Dzíibo'.

¹³Beora' táan in bin tac tu'ux yanecho', ba'ale' ca'aliquil ti' yanen yóokolcaabe' quin wa'alic le ba'alo'oba', u ti'al ca chu'upuc u pucsi'ikalo'ob yéetel qui'imac óolal yaan ti' teno'.

¹⁴Tene' dzo'oc in dzáic ti'ob a ma'alob péectzil, ba'ale' p'ecta'ano'ob tumen yóokolcaab tumen ma' yóokolcaabilo'obi' je'el bix teen ma' yóokolcaabilene'.

¹⁵Ma' táan in káatic teech ca a lukeso'ob ti' le yóokolcaaba', táan in káatic ca a toco'ob ti' kasilba'al.

¹⁶Je'el bix ma' yóokolcaabilene' bey xan leti'ob ma' yóokolcaabilo'obi'.

¹⁷Jun páaycunto'ob a ti'al teech yéetel le jaajo', a ma'alob péectzile' leti' le jaajo'.

¹⁸Je'el bix ta túuxtilaquen yóokolcaabe', bey xan teen táan in túuxtico'ob yóokolcaab.

¹⁹Tu yo'olalo'obe' táan in jun páaycuntquinbáa a ti'al teech, u ti'al ca jun páaycunta'aco'ob leti'ob xan a ti'al teech yéetel le jaajo'.

²⁰Ba'ale' ma' táan in káat óolal ti' teech chéen tu yo'olal lelo'oba', ba'ale' tac tu yo'olal le máaxo'ob bíin u yocsaj óolteno'ob tu yo'olal u tze'ec lelo'oba'.

²¹Quin káatic teech ca jun p'éelili'ichajac tuláacalo'ob, ca jun p'éelili'ichajco'ob jun múuch' t éetel, in Yuum, je'el bix teech yanech ti' teen yéetel teen yanen ti' teech. Ca jun p'éelili'ichajco'ob u ti'al ca ocsaj óolta'ac tumen yóokolcaabe' teech túuchi'itmailen.

²²Dzo'oc in dzáic ti'ob le nojbe'enil a dzaamaj teno' u ti'al ca jun túulili'ichajco'ob je'el bix to'on jun túulili'one'.

²³Teen ti' leti'ob yéetel teech ti' teen, u ti'al ca jach jun túulili'ichajco'ob, beyo' ca ila'ac tumen yóokolcaabe' teech túuchi'itmailen, yéetel a yaabiltma'ob je'el bix a yaabiltma'ene'.

²⁴In Yuum, teech kubo'ob ti' teen; in káat túune' ca yanaco'ob tin wéetel tu'ux quin j antal, u ti'al ca u yilo'ob le nojbe'enil a dzaamaj teno', tumen ta yaabilten ma'ili' beeta'ac yóokolcaabe'.

²⁵In Yuum, ca beetic tuláacal ba'al tu beel, le máaxo'ob yóokolcaabilo'obo' ma' u kaj óolecho'obi', ba'ale' tene' in kaj óolech, yéetel lelo'oba' dzo'oc u yojéeltico'ob teech túuchi'itmailen.

²⁶Tin dzáa u yojéelto'ob máaxech, la'ili' yaan in dzáiquech kaj óoltbile', u ti'al ca yanac ti'ob le yaacunaj yaan teech ti' teno' u ti'al ca yanaquen ti'ob xan.