Read Yucateco San Juan 18 Bible Online

San Juan 18 - Yucateco bible

San Juan 18

¹Cu dzo'ocol u ya'alic le ba'alo'oba' Jesuse' jóok yéetel u aj canbalo'ob u ti'al u binbal ti' u láak jun tzéelil u ja'il Cedrón. Yaan ca'ach jun p'éel huerto te'elo' tu'ux j ooc Jesús yéetel u aj canbalo'ob.

²Bey xan Judas, le máax kubico', u kaj óol le cúuchilo', tumen Jesuse' ya'ab u téenel tu much'ubáa yéetel u aj canbalo'ob te'elo'.

³Bey túuno' Judase' j kuch te'elo' yéetel jun múuch' soldado'ob yéetel dze'edzec u aj cananilo'ob kulnaj j túuxta'abo'ob tumen u nuuctaquil le aj kiino'obo' yéetel le fariseobo'. U ch'a'amo'ob u nu'ucul ba'atel, táan xan u bisico'ob tzuubo'ob yéetel tajche'ob.

⁴Ba'ale' tumen Jesús u yojel tuláacal ba'ax cu úuchule', jóok tu táano'obe' ca tu káat chi'itaj ti'ob: ¿Máax ca caxtique'ex?

⁵Leti'obe' tu núucajo'ob ti': Jesús Nazaretil. Jesuse' tu núucaj ti'ob: Teen lelo'. Judase', le máax kubico', ti' yaan tu yicnalo'obe'.

⁶Le ca tu ya'alaj Jesús: Teen lelo', j bino'ob paachil ca j lúubo'ob lu'um.

⁷Jesuse' tu káataj ti'ob tu ca'a téen. ¿Máax ca caxtique'ex? Leti'obe' tu ya'alajo'ob: Jesús Nazaretil.

⁸Jesuse' tu ya'alaj túun ti'ob: Dzo'oc in wa'alic ti' te'ex teen lelo'. Wa teen ca caxtiquene'exe', cha'ex u bin lelo'oba'.

⁹Lela' j úuch u ti'al ca dzo'ocpajac le t'aan tu ya'alaj Jesús: Ti' le máaxo'ob ku'ubo'ob teen, tumen le Taatao' mix jun túul sa'ati'.

¹⁰Simón Pedroe', tumen yaan u máascabe', tu jíilpaytaj ca tu ch'acaj u le' u x no'oj xiquin jun túul máac, Malco' u kaaba', lela' u palitzil u nojoch le aj kiino'obo'.

¹¹Ba'ale' Jesuse' tu ya'alaj ti' Pedro: Oques le máascab tu pixo'. Wa le Taata u káat ca máanaquen ti' le yaayaj óolala', ¿ma' wa unaj ca náaqueni'?

¹²Le soldado'ob túuno' yéetel u nojchilo'obe' jun múuch' yéetel le aj canano'ob j túuxta'abo'ob tumen le judíobo' tu macho'ob Jesuse' ca tu kaxo'ob.

¹³Cu dzo'ocole' ca tu biso'ob tu yotoch Anas, tumen Caifás, máax u nojoch le aj kiino'ob ti' le ja'abo'obo' u ja'an Anas.

¹⁴Le caifasa' leti' máax tu ya'alaj ti' le judíobo' mas ma'alob ca quíimic jun túulili' máac tu yo'olal le caajo'.

¹⁵Simón Pedro yéetel u láak jun túul aj canbale' j bino'ob tu paach Jesús. Le u láak jun túul aj canbalo' kaj óola'an tumen u nojoch le aj kiino'obo', le o'olale' j ooc yéetel Jesús tac tu táancabil u yotoch u nojoch le aj kiino'obo'.

¹⁶Ba'ale' Pedroe' j p'áat paachil, tu jool naj. Le o'olale' le aj canbal kaj óola'an tumen u nojoch le aj kiino'obo' Jóoke' ca j t'aanaj yéetel le x canan jool najo' ca tu yocsaj Pedro.

¹⁷Le x canan jool najo' tu káataj túun ti' Pedro: ¿Ma' wa teech jun túul ti' u aj canbalo'ob le máaco'? Pedroe' tu núucaj: Ma', tene' ma'.

¹⁸Tumen táan u beetic que'ele', le palitzilo'ob yéetel le aj canano'obo' tu t'abo'ob káake' ca j wa'alajo'ob u kíintuba'obi'. Ti' wa'alacbal xan Pedro yéetelo'obi' táan u kíinticubáa tu tzéel le káako'.

¹⁹U nojoch le aj kiino'obo' jo'op' u káat chi'itic ti' Jesús máax u aj canbalo'ob yéetel ba'ax cu ca'ansic.

²⁰Jesuse' tu ya'alaj ti': Tene' t'aanaja'anen tu táan tuláacal máaco'ob. Mantadz ca'ansajnajen te j sinagogaobo' yéetel te j kulnajo', tu'ux cu much'tal tuláacal le judíobo'. Bey túuno' mixba'al in mucult a'almaj.

²¹¿Ba'axten ca káatic ti' teen? Káat ti' le máaxo'ob tu yu'ubajeno'obo', ca u ya'alo'ob teech ba'ax tin wa'alaj ti'ob. Leti'obe' u yojelo'ob ba'ax in wa'almaj.

²²Le ca tu ya'alaj Jesús lela', jun túul u aj cananilo'ob kulnaj yaan te'elo', tu lajaj tu yich ca tu ya'alaj ti': ¿Bey a núuquic u t'aan u nojoch aj kiino'obo'?

²³Jesuse' tu núucaj ti': Wa tin wa'alaj ba'al kaase', a'al tu'ux yaan u kaasil. Ba'ale' wa ma'alob ba'ax tin wa'alaje', ¿ba'axten ca lajiquen?

²⁴Anas túune' tu túuxtaj Jesús kaxa'an tu táan Caifás u nojoch le aj kiino'obo'.

²⁵Ca'aliquil táan u yúuchul lela', Pedroe' láili' wa'alacbal táan u kíinticubáa tu tzéel le káako', ca j a'ala'ab ti': ¿Ma' wa teche' jun túul ti' u aj canbalo'ob le máaco'? Pedroe' tu núucaj, táan u ya'alic: Ma', tene' ma'.

²⁶J káata'ab túun ti' tumen jun túul u palitzilo'ob u nojoch, le aj kiino'obo', jun túul u láaktzil le máax ch'a'ac u xiquin tumen Pedroo': ¿Ma' wa tin wilajech te j huerto tu yéetelo'?

²⁷Pedroe' tu ca'a a'alaj: Ma', ti' le jun súutuc túuno' j kaaynaj le j t'eelo'.

²⁸J lukesa'ab túun Jesús tu yotoch Caifase' ca j bisa'ab tac tu chúumuc naj le jalach wíinico'. Táan u taal u sáastal, le o'olale' le judíobo' ma' j ooco'ob te j chúumuc najo' u ti'al ma' u kascunticuba'ob u ti'al ca páatac u jaantico'ob le Pascuao'.

²⁹Le o'olale' jóok Pilato j t'aan yéetelo'ob, ca tu ya'alaj ti'ob: ¿Ba'ax tacpoolil ca taasique'ex tu yóokol le máaca'?

³⁰Leti'obe' tu núucajo'ob: Wa ma' jun túul kaakas máaque' bejela' ma' táan c kubic teche'.

³¹Pilatoe' tu ya'alaj túun ti'ob: Bise'ex ca a p'is óolte'ex yéetel a wa'almaj t'aane'ex. Le judíobo' tu núucajo'ob ti': To'on judíone' ma' tu cha'abal c quíimsic mix máac.

³²Bey dzo'ocpajic ba'ax tu ya'alaj Jesús tu yo'olal bix cun quíimil.

³³Pilatoe' j ooc tu ca'a téen te j chúumuc najo', tu t'anaj Jesuse' ca tu káataj ti': ¿Teech wa u ajaw le judíobo'?

³⁴Jesuse' tu ya'alaj ti': ¿Táan a káatic tu juunal a wóol lela', wa j a'ala'ab teech tin wo'olal tumen u láako'ob?

³⁵Pilatoe' tu núucaj ti': ¿Judíoen wa? A wéet caajalo'ob yéetel u nuuctaquil le aj kiino'ob kubecho'ob ti' teno'. ¿Ba'ax a beetmaj?

³⁶Jesuse' tu núucaj túun ti': In ajawile' ma' yóokolcaabili'. Wa yóokolcaabile' in tzaypacho'obe' dzo'oc ca'ach u ba'atelo'obe' u ti'al ma' in ku'ubul ti' le judíobo'. Ba'ale' in ajawile' ma' wayile'.

³⁷Pilatoe' tu ya'alaj túun ti': ¿Bey túuno' teche' ajawech? Jesuse' tu núucaj ti': Ajawen, je'el bix dzo'oc a wa'alico'. Tene' j síijen yéetel j taalen way yóokolcaabe' u ti'al in t'aan tu yo'olal le jaajo'. Tuláacal máax cu yu'ubic le jaajo', cu yu'ubic in t'aan.

³⁸Pilatoe' tu ya'alaj ti': ¿Ba'ax le jaajo'? Cu dzo'ocol u káatic lela', Pilatoe' jóok t'aan tu ca'a téen yéetel le judíobo' ca tu ya'alaj ti'ob: Mix jun p'éel si'ipil quin wilic ti' le máaca'.

³⁹Ba'ale' suuca'an ti' te'ex in jáalkabtic jun túul kala'an wíinic ichil u kiinbesajil le pascuao'. ¿A káate'ex wa ca in jáalkabt u ajaw le judíobo'?

⁴⁰Tuláacalo'ob tu ca'a yaawtajo'ob: ¡Lela' ma'! ¡Jáalkabt Barrabás! Le Barrabasa' jun túul j ocol.