Read Yucateco San Juan 19 Bible Online

San Juan 19 - Yucateco bible

San Juan 19

¹Pilato tu túuxtaj túun jadzbil Jesús.

²Le soldado'obo' tu jit'ajo'ob jun p'éel péet jo'ol yéetel ki'ix ca tu dzajo'ob tu pool Jesús, ca tu beeto'ob u búuquintic jun p'éel box chac nook.

³Cu dzo'ocole' tu nadzuba'ob ti', táan u ya'alico'ob: ¡Te'escun ti' u ajaw le judíobo'! Ca tu la'alajo'ob xan tu yich.

⁴Pilatoe' jóok tu ca'a téen ca tu ya'alaj ti'ob: Ile'ex, táan in jóokesic waye' u ti'al ca a wojéelte'ex mix jun p'éel si'ipil quin wilic ti' le máaca'.

⁵Ca jóok Jesús yéetel le péet jo'ol jit'a'an yéetel ki'ix dza'an tu poolo', u búuquintmaj xan le box chac nooko', Pilatoe' tu ya'alaj túun ti'ob: ¡Je'el le j xiiba'!

⁶Le ca j ila'ab tumen u nuuctaquil le aj kiino'obo' yéetel le aj canano'obo', jo'op' u yaawtico'ob: ¡Sin ti' cruz! ¡Sin ti' cruz! Pilatoe' tu ya'alaj ti'ob: Bise'ex te'ex ca sine'ex ti' cruz, tumen tene' ma' tin wilic mix jun p'éel si'ipil ti'.

⁷Ba'ale' le judíobo' tu núucajo'ob ti': To'one' yaan to'on jun p'éel a'almaj t'aan. Cu ya'alic le a'almaj t'aano' leti'e' unaj u quíimil tumen tu beetubáa u Paal Ku.

⁸Le ca tu yu'ubaj Pilato lela' ca mas sajacchaji'.

⁹Ca j ooc tu ca'a téen te j chúumuc najo' ca tu káataj ti' Jesús: ¿Tu'uxilech? Ba'ale' Jesuse' mixba'al tu núucaj ti'.

¹⁰Pilatoe' tu ya'alaj túun ti': ¿Ma' ta núuquic in t'aan? ¿Ma' wa a wojel yaan teen páajtalil u ti'al in siniquech ti' cruz yéetel yaan teen páajtalil u ti'al in jáalkabtiquechi'?

¹¹Jesuse' tu núucaj ti': Mix jun p'éel páajtalil je'el u yantal teech tin wóokol, wa ma' tu dza'abal teech tumen Kui'. Le o'olale' le máax tu kubajen teche' mas nojoch u keban ti' teech.

¹²Tu yo'olal lelo' Pilatoe' jo'op' u caxtic bix je'el u páajtal u jáalkabtic Jesuse', ba'ale' le judíobo' tu yaawtajo'ob ti': ¡Wa ca jáalkabtique'; ma' amigoech yéetel Cesari'! Je'el máaxac ca u beetubáa ajawe' u aj p'eec César.

¹³Pilatoe' le ca tu yu'ubaj lela' tu túuxtaj jóokesbil Jesuse' ca j culaj ti' le jalach káanche' yaan ti' le cúuchil cu kaaba'intic Gabata ich hebreo, lela' u káat u ya'ale' máaka'anta'an yéetel póolbil tuunich.

¹⁴Míin chúumuc kiin ti' le kiin cu taal táanil ti' le Pascuao'. Pilatoe' tu ya'alaj túun ti' le judíobo': ¡Je'el a ajawe'exa'!

¹⁵Ba'ale' leti'obe' tu yaawtajo'ob: ¡Quíimic! ¡Sin ti' cruz! Pilatoe' tu ya'alaj ti'ob: ¿Yaan wa in sinic ti' cruz a ajawe'exa'? Ba'ale' u nuuctaquil le aj kiino'obo' tu núucajo'ob ti': To'one' mina'an to'on u láak ajaw chéen César.

¹⁶Yéetel lela' Pilatoe' tu kubaj Jesús ti'ob u ti'al ca si'inic ti' cruz. Leti'ob túune' tu bisajo'ob.

¹⁷Jesuse' jóok túun táan u bisic u cruz u ti'al u binbal te j cúuchil cu kaaba'intic u Baaquel pool, ich hebreoe' u kaaba'e' Gólgota.

¹⁸Te j si'in ti' cruz yéetel u láak ca'a túul máaco'ob, Jesuse' chúumuc, leti'obe' tu tzéelo'ob.

¹⁹Pilatoe' tu túuxtaj dzaabil tu yóokol le cruzo' jun p'éel dzíib cu ya'alic beya': Jesús Nazaretil, u Ajaw le judíobo'.

²⁰Ya'ab ti' le judíob tu xoco'ob le dzíibo', tumen le cúuchil tu'ux si'in Jesús ti' cruzo' naadz ti' le caajo'. Le dzíibo' dzíiba'an ich hebreo, griego yéetel latín.

²¹Le o'olale' u nuuctaquil u aj kiino'ob le judíobo' tu ya'alajo'ob ti' Pilato: Ma' a dzíibtic: u Ajaw le judíobo', unaj a dzíibtic: Le máax cu ya'alicubáa u Ajaw le judíobo'.

²²Ba'ale' Pilatoe' tu núucaj ti'ob: Le ba'ax dzo'oc in dzíibtico' bey cun p'áatalo'.

²³Le soldado'obo' cu dzo'ocol u sinico'ob Jesús ti' cruze' tu ch'a'ajo'ob u nooke' ca tu jóokeso'ob can jatz ti', jun jatz u ti'al jujun túul soldado'. Tu ch'a'ajo'ob xan u búuc, ba'ale' mina'an u chuuyil, tumen jun p'éelili' jit'a'anil ca'anal tac cabal.

²⁴Le soldado'obo' tu ya'alajo'ob tu baatzilo'ob: Ma' c jatic. Co'ox bulic u ti'al ca c il máax cun ti'altic. Bey dzo'ocbesa'abic le Quili'ich Dzíib cu ya'alic beya': Tu t'oxajo'ob in nook yéetel buulnajo'ob tu yóokol in búuc. Le soldado'ob j beet lela'.

²⁵Tu yicnal u cruz Jesuse' ti' yaan u maama, u quiic u maama, María u yatan Cleofas yéetel María Magdalena.

²⁶Jesuse', le ca tu yilaj u maama yéetel le aj canbal jach u yaabiltmaj wa'alacbal te'elo', tu ya'alaj ti' u maama: Co'olel, je'el a paalo'.

²⁷Cu dzo'ocole' ca tu ya'alaj ti' le aj canbalo': Je'el a maamao'. Le aj canbal túuno' tu kamaj tu yotoch.

²⁸Cu dzo'ocol lela', tumen u yojel Jesús dzo'ocpaja'an tuláacale', u ti'al ca dzo'ocpajac le Quili'ich Dzíibo', tu ya'alaj: Ukajen.

²⁹Ti' yaan ca'ach te'elo' jun p'úul su'udz vino, tu ch'ulajo'ob túun jun p'éel esponja yéetel le su'udz vinoo', tu dzajo'ob ti' jun p'éel u kab hisopoe', ca tu nadzajo'ob tu chi'.

³⁰Jesuse' tu yukaj le su'udz vinoo', cu dzo'ocole' tu ya'alaj: Dzoca'an tuláacal. Ca tu chinaj u poole' ca j quíimi.

³¹Lela' leti' le kiin cu taal táanil ti' le Pascuao', le o'olale' le judíobo' ma' u káato'ob ca p'áatac le wíinclilo'ob te j cruzo'ob sábadoo', tumen le sábadoo' jun p'éel kiin jach quili'ich. Le o'olale' tu káatajo'ob ti' Pilato' ca u túuxt cachbil u yooco'ob le máaxo'ob sina'ano'ob ti' cruzo' u ti'al ca lukesa'ac u wíinclilo'ob te'elo'.

³²Le soldado'obo' j bino'ob túun ca tu cacho'ob u yooc yáax jun túuli', bey xan ti' le u láak sina'an ti' cruz yéetel Jesuso'.

³³Ba'ale' le ca tu nadzuba'ob ti' Jesuse', tu yilajo'ob dzo'oc u quíimil, le o'olale' ma' tu cachajo'ob u yooqui'.

³⁴Ba'ale' jun túul ti' le soldado'obo' tu lomaj u ch'ala'atel Jesús yéetel jun p'éel lóomte', ca jóok ki'ik yéetel ja'.

³⁵Le máax tzicbaltic lela' tu yilaj yéetel táan u ya'alic u jaajil; leti'e' u yojel táan u ya'alic u jaajil, u ti'al ca ocsaj óolnaque'ex tac te'ex.

³⁶Tumen le ba'alo'oba' j úucho'ob u ti'al ca dzo'ocpajac le Quili'ich Dzíib cu ya'alic: Ma' bíin ca'achac mix jun p'éel u baaqueli'.

³⁷Yaan xan u láak Quili'ich Dzíib cu ya'alique': Yaan u pactico'ob máax tu lomajo'ob.

³⁸Cu dzo'ocol lela' José Arimateail tu káataj ti' Pilato ca cha'abac ti' u bisic u wíinclil Jesús. Josee' jun túul u aj tzaypach Jesús, quex u mucultmaj tumen sajac ti' le judíobo'. Pilatoe' tu ya'alaj ma'alobil ti', Josee' j bine' ca tu bisaj u wíinclil Jesús.

³⁹Bey xan Nicodemo', le máax bin tzicbal tu yicnal Jesús yéetel áakabe', j kuch yéetel míin treinta kilos qui'iboc xíiwo'ob lela' mirra xa'akta'an yéetel sáabila.

⁴⁰José yéetel Nicodemoe' tu to'ajo'ob u wíinclil Jesús yéetel nooko'ob qui'iboquinta'ano'ob yéetel le xíiwo'obo', je'el bix suuca'an u mu'ucul le quimeno'ob tumen le judíobo'.

⁴¹Ti' le cúuchil tu'ux si'in Jesús ti' le cruzo' yaan ca'ach jun p'éel huerto'; ti' le huerto' yaan jun p'éel túumben mucnal tu'ux mix máac dza'abaqui'.

⁴²Ti' j dza'ab u wíinclil Jesusi', tumen le mucnalo' naadz yanil yéetel ta'aytac u cáajal sábado u ti'al le judíobo'.