Read Yucateco San Juan 2 Bible Online

San Juan 2 - Yucateco bible

San Juan 2

¹Tu yóox p'éel kiine' yanji jun p'éel dzo'ocol beel tu caajil Caná, ti' u lu'umil Galilea. U maama Jesuse' ti' yaan te'elo',

²Jesús yéetel u aj canbalo'obe' j t'a'ano'ob xan te j dzo'ocol beelo'.

³Xu'up le vinoo', ca j a'ala'ab ti' Jesús tumen u maama: Mina'an vino ti'ob.

⁴Ba'ale' Jesuse' tu núucaj ti': Co'olel, ¿ba'ax teen ca wa'alic teen lelo'? Ma' kuchuc in kiinili'.

⁵Ba'ale' u maamae' tu ya'alaj ti' le cu meyajo'obo' beete'ex tuláacal ba'ax cun u ya'al ti' te'ex.

⁶Yaan te'elo' seis u p'éelel cáat tuunich, je'el bix le cu meyaj ti' le judíobo' u ti'al u p'o'icuba'obo'. Ti' jun p'éel cáate' je'el u bin míin ochenta wa cien litros ja'e'.

⁷Jesuse' tu ya'alaj ti' le j meyajo'obo': Chupe'ex yéetel ja' le cáato'oba'. Ca tu túul chupto'ob.

⁸Jesuse' tu ya'alaj túun ti'ob: Beora' jóokse'ex jun p'íiti', ca a bise'ex ti' u noj poolil le qui'imac óolalo'. Bey tu beetilo'ob.

⁹U noj poolil le qui'imac óolalo' tu túuntaj le ja' dzo'oc u suut vinoilo', quex ma' u yojel tu'ux taali; chéen le j meyajo'ob u yojelo'obo', tumen leti'ob tu jóoksajo'ob le ja'o'. Bey túuno' le noj poolo' tu t'anaj le íichamtzilo'

¹⁰ca tu ya'alaj ti': Tuláacal máaque' cu t'oxic táanil le ma'alob vinoo', le quéen ukulnac ya'ab le u'ula'obo', cu t'oxic le x ma' paatal vinoo'. Ba'ale' teche' a ta'acmaj le ma'alob vino tac bejla'.

¹¹Le ba'ax tu beetaj Jesús tu caajil Caná le Galileao' leti' le yáax chíiculal tu beetaj, táan u ye'esic u nojbe'enil; u aj canbalo'ob túune' tu yocsaj u yóolo'ob ti'.

¹²Cu dzo'ocol lela', j bin tu caajil Capernaum, j láakinta'ab tumen u maama, u yíidzino'ob[1] yéetel u aj canbalo'ob. Ca j yanji'ob dze'edzec kiin te'elo'.

¹³Tumen táan u náadzal u kiinbesajil u pascua le judíobo', Jesuse' j bin tu caajil Jerusalén.

¹⁴Te'elo' tu yilaj te j kulnajo' le máaxo'ob táan u conico'ob wacaxo'ob, tamano'ob yéetel palomaob, bey xan tu yilaj le máaxo'ob culucbalo'ob tu cúuchil tu'ux cu kexico'ob taakin ti' le máaco'obo'.

¹⁵Le ca tu yilaj lela', Jesuse' tu beetaj jun p'éel u suumil jadz ca tu láaj tojolch'intajo'ob ti' le kulnajo', pa'ate' yéetel u tamano'ob yéetel u wacaxo'ob. Ti' le máaxo'ob cu kexico'ob taakino' tu kitaj u taakino'obe' yéetel tu walkesaj u mayacche'ob.

¹⁶Ti' le máaxo'ob cu conico'ob palomaobo' tu ya'alaj ti'ob: ¡Lukese'ex way le ba'alo'oba'! ¡Ma' a sutique'ex u najil in Taatae' jun p'éel u najil coonol!

¹⁷J ka'aj túun ti' u aj canbalo'ob le Quili'ich Dzíib cu ya'alic beya': In yaacunaj tu yo'olal a najile' tu t'abaj in wóol.

¹⁸Le judíob túuno' tu káatajo'ob ti': ¿Ba'ax chíiculal ca we'esic to'on u ti'al c kaj óoltic tu jaajil yaan teech páajtalil a beetic le ba'alo'oba'?

¹⁹Jesuse' tu núucaj ti'ob: Jene'ex le kulnaja', ichil óox p'éel kiine' tene' quin líikesic tu ca'a téen.

²⁰Le judíobo' tu ya'alajo'ob túun ti': Cuarenta y seis ja'abo'ob dzo'oc u man táan u beeta'al le kulnaja'. ¿Teche' bíin ca'aj wa túun a líikes ichil chéen óox p'éel kiino'ob?

²¹Ba'ale' le kulnaj cu ya'alic Jesuso' leti' le wíinclilo'.

²²Le o'olale' le ca j ca'a púut cuxlaj Jesús ti' le quimeno'obo' j ka'aj ti' u aj canbalo'ob le ba'ax tu ya'alaja', ca tu yocsaj óoltajo'ob le Quili'ich Dzíibo' bey xan le t'aano'ob u ya'almaj Jesús ti'obo'.

²³Le ca yanji' Jesús Jerusalén ti' u kiinbesajil le Pascuao', ya'ab máaco'ob tu yocsaj u yóolo'ob ti', le ca tu yilajo'ob le chíiculalo'ob cu beetico'.

²⁴Ba'ale' Jesuse' ma' tu kubaj u yóol ti'obi', tumen u láaj kaj óolo'ob.

²⁵Ma' kaabéet ca a'ala'ac ti' tumen mixmáac bix le máaco'obo', tumen leti'e' u yojel ba'ax yaan tu pucsi'ikal máac.