Read Yucateco San Juan 20 Bible Online

San Juan 20 - Yucateco bible

San Juan 20

¹Tu yáax kiin ti' le winalo', láili' éekjoch'e'ene' ma'ili' píik sáasaque' j bin María Magdalena te j mucnalo', ca tu yilaj lukesa'an le tuunich cu maquic u jool le mucnalo'.

²Áalcabil j binic tac tu'ux yaan Pedro yéetel le u láak aj canbal jach yaabilta'an tumen Jesuso', ca tu ya'alaj ti'ob: Dzo'oc u lukesa'al Yuumtzil ti' le mucnalo', ma' c ojel tu'ux dza'abi'.

³Pedro yéetel le u láak aj canbalo' jóoko'ob túune', ca j bino'ob te j mucnalo'.

⁴Tu ca'a túulalo'ob queet u yáalcabo'ob ca'achi' ba'ale' le u láak aj canbalo' mas chich áalcabnajic ti' Pedro ca j kuch te j mucnalo'.

⁵Tu ch'enebtaj ca tu yilaj le nooko'ob dza'an te'elo', ba'ale' ma' j ooqui'.

⁶Paachil ti'e' j kuch Simón Pedro, lela' j ooc te j mucnalo'. Tu yilaj xan le nooko'ob dza'an te'elo'.

⁷Tu yilaj xan le nook meyajnaj u ti'al u to'obol u pool Jesuse' ma' dza'an yéetel le u láak nooko'obo', ba'ale' to'an jun páayil.

⁸Ooc túun xan le u láak aj canbalo', le máax j kuch táanil te j mucnalo', ca tu yilaj le ba'ax j úucho, ca j ocsaj óolnaji'.

⁹Tumen ma' u na'ato'ob ca'ach le Quili'ich Dzíibo'obo', wa kaabéet u caapúut cuxtal Jesús ti' le quimeno'obo'.

¹⁰Le aj canbalo'ob túuno' j suunajo'ob tu yotocho'ob.

¹¹Ba'ale' Maraie' j p'áat táancab táan u yokol tu tzéel le mucnalo'. Ca'aliquil táan u yokole' j chinlaj u ti'al paacat ichil le mucnalo',

¹²ca tu yilaj ca'a túul ángelo'ob sactac u nooko'ob, culucbalo'ob tu'ux dza'an ca'ach u wíinclil Jesús; jun túule' tu'ux yanji' u pool, u láake' tu'ux yanji' u yooc.

¹³Le ángelo'obo' tu káat chi'ito'ob ti': Co'olel, ¿ba'axten táan a wokol? Leti'e' tu ya'alaj ti'ob: Tumen dzo'oc u bisa'al in Yuumtzil, cu dzo'ocole' ma' in wojel tu'ux dza'abi'.

¹⁴Le ca tu ya'alaj lela', tu sutaj u yiche' ca tu yilaj Jesús ti' yaan te'elo', ba'ale' ma' u yojel wa Jesusi'.

¹⁵Jesuse' tu káat chi'itaj ti': co'olel, ¿ba'axten táan a wokol? ¿Máax ca caxtic? Leti'e' tu tuclaje' leti' le máax canantic le huerto' ca tu ya'alaj ti': Dzuul wa teech bise', a'alten tu'ux ta dzáa, u ti'al ca in bise.

¹⁶Jesuse' tu ya'alaj túun ti': ¡María! Leti'e' tu sutubae' ca tu ya'alaj ti' ich hebreo: ¡Raboni! U káat u ya'ale' aj ca'anbesaj.

¹⁷Jesuse' tu ya'alaj ti': Ma' a machiquen, tumen ma' na'acquen tac tu'ux yaan in Taata máax a Taataex xan, in Kue' Junab, a Kue'ex xan.

¹⁸María Magdalenae' j bin túun u ya'al ti' le aj canbalo'obo' leti'e' dzo'oc u yilic Yuumtzil máax a'al le ba'alo'ob ti'a'.

¹⁹Láili' ti' le kiino', u yáax kiin le semanao', le ca j áakabchaje'; j much'laj le aj canbalo'obo' ca tu kalo'ob le jool najo'obo' tumen sajaco'ob ti' le judíobo'. Jesuse' j ooque' a yanji' chúumuc ti' le aj canbalo'obo', ca tu ya'alaj ti'ob: Yanac te'ex jéedzel.

²⁰Cu dzo'ocol u ya'alic lela', tu ye'esaj ti'ob u kabo'ob yéetel u ch'ala'atel. Leti'ob túune', le ca tu yilajo'ob Yuumtzile' qui'imacchaj u yóolo'ob.

²¹Jesuse' tu ya'alaj ti'ob tu ca'a téen: Yanac te'ex jéedzel. Je'el bix tu túuxtilaquen le Taatao' bey xan quin túuxtique'ex te'ex.

²²Ca jóopsajnaj tu yóokolo'ob ca tu ya'alaj ti'ob: Kame'ex le Quili'ich Pixano'.

²³Ti' le máaxo'ob ca sa'atsique'ex u kebano'obe', sa'atsa'an ti'ob. Ti' le máaxo'ob ma' táan a sa'atsique'ex u kebano'obe', ma' sa'atsa'an ti'obi'.

²⁴Ba'ale' Tomase', jun túul ti' le doce aj canbalo'obo', le máax cu ya'ala'al Dídimo ti'e', mina'an tu yéetelo'ob le ca j taal Jesuso'.

²⁵Le u láak aj canbalo'ob tu ya'alajo'ob ti': Dzo'oc c ilic Yuumtzil. Ba'ale' Tomase' tu ya'alaj ti'ob: Wa ma' tin wilic tu kabo'ob u jool le clavo'obo', yéetel ca in woques u yaal in kabo'ob tu'ux ooc le clavo'obo', yéetel ca in woques in kab tu ch'ala'atele', ma' tu páajtal in wocsaj óoltic.

²⁶Cu dzo'ocol u máan ocho kiino'obe', much'ucbal le aj canbalo'ob tu ca'a téen ti' jun p'éel naj, ti' yaan Tomás túun, tu yéetelo'obe'. Quex kala'an le jool najo'obo', Jesuse' j ooqui' ca tu dzáajubáa chúumuc ti'ob, ca tu ya'alaj ti'ob: Yanac te'ex jéedzel.

²⁷Cu dzo'ocole' ca tu ya'alaj ti' Tomás: Oques u yaal a kab te'ela', pact in kabo'ob; tich' a kabo' ca a woques tin ch'ala'atel. Xu'uluc a ca'a p'éel óolal, ocsaj óolnen.

²⁸Tomase' tu núucaj ti': ¡In Yuumtzil, in Ku!

²⁹Jesuse' tu ya'alaj ti': Tomás, tumen ta wiljene' ocsaj óolnajech. Qui'imac u yóolo'ob le máaxo'ob ocsaj óolnajo'ob quex ma' tu yiljeno'obi'.

³⁰Jesuse' tu beetaj u láak ya'abcach chíiculalo'ob tu táan u aj canbalo'ob ma' dzíibta'ano'ob ti' le dzíibil ju'una'.

³¹Ba'ale' lelo'oba' dzíibta'ano'ob u ti'al ca a wocsaj óolte'ex Jesuse' leti' le Cristoo', u Paal Ku, yéetel u ti'al ca yanac te'ex cuxtal le quéen a wocsaj óolte'exe'.