Read Yucateco San Juan 21 Bible Online

San Juan 21 - Yucateco bible

San Juan 21

¹Cu dzo'ocol lela' Jesuse' tu chíicbesubáa tu ca'a téen ti' u aj canbalo'ob tu jal u ka'anabil Tiberias. Tu chíicbesubáa beya'.

²Much'ucbalo'ob Simón Pedro, Tomás le máax cu ya'ala'al Dídimo' ti'e', Natanael máax Canail ti' Galilea, u paal Zebedeo yéetel u láak ca'a túul u aj canbalo'ob Jesús.

³Simón Pedroe' tu ya'alaj ti'ob: Tan in bin chuc cay. Leti'obe' tu ya'alajo'ob ti': To'on xane' táan c bin ta wéetel. J bino'ob ca j na'aco'ob ti' jun p'éel cheem, ba'ale' ti' le áakabo' ma' tu chucajo'ob mix ba'ali'.

⁴Táan u taal u sáastale' Jesuse' tu chíicbesubáa tu jáal le ja'o', ba'ale' le aj canbalo'obo' ma' u yojelo'ob wa leti'i.

⁵Tu ya'alaj túun ti'ob: Xi'ipale'ex, ¿mixba'al a chuque'ex? Leti'obe' tu núucajo'ob ti': Mixba'al.

⁶Jesuse' tu ya'alaj túun ti'ob: Pule'ex le u káanil chuc cay tu x no'oj le cheemo', u ti'al ca chuc caynaque'ex. Bey tu beetilo'ob, cu dzo'ocole' ma' páatji' u jóokesico'ob u káanil chuc cay ti' le ja'o' tu yo'olal le bajun cay tu chucajo'obo'.

⁷Le aj canbal jach yaabilta'an tumen Jesuso', tu ya'alaj ti' Pedro: ¡Leti' le Yuumtzilo'! Le ca tu yu'ubaj Simón Pedro leti' le Yuumtzilo', tu kaxnaktaj u nooke' (tumen u pitmaj ca'achi') ca tu pulubáa te ja'o'.

⁸Le u láak aj canbalo'obo' j kucho'ob tu jáal ja' yéetel le cheemo', táan u jíiltico'ob u káanil chuc cay chuup yéetel cayo'ob, tumen míin can dzáac ca'a tac táacoch yanilo'ob tu jáal le ja'o'.

⁹Le ca j éemo'ob lu'ume', tu yilajo'ob t'aba'an chúuc, yéetel jun túul cay dza'an tu yóokol; tu yilajo'ob xan waaj te'elo',

¹⁰Jesuse' tu ya'alaj ti'ob: Taase'ex dze'edzec ti' le cayo'ob táant a chuquique'exo'.

¹¹Simón Pedroe' j na'ac ti' le cheemo' ca tu jíiltaj tac tu jáal ja' le u káanil chuc cayo' chuup yéetel ciento cincuenta yéetel tres nucuch cayo'ob. Quex jach ya'abe' le u káanil chuc cayo' ma' jáati'.

¹²Jesuse' tu ya'alaj túun ti'ob: Co'otene'ex ukul. Mix jun túul ti' le aj canbalo'ob tu yóoltaj u káat ti': Teche' ¿Máaxech? Tumen u yojelo'ob leti' le Yuumtzilo'.

¹³Cu dzo'ocole' Jesuse' tu nadzuba'e', tu ch'a'aj le waajo', ca tu dzáa ti'ob, bey tu beetil xan yéetel le cayo'.

¹⁴Lela' u yóox páac u chíicbesicubáa Jesús ti' u aj canbalo'ob cu dzo'ocol u caapúut cuxtal ti' le quimeno'obo'.

¹⁵Cu dzo'ocol u yukulo'obe', Jesuse' tu káataj ti' Simón Pedro: Simón, u paal Jonás, ¿asab a yaabiltmaen ti' lelo'oba'? Pedroe' tu núucaj ti': Bey Yuumtzil, teche' a wojel in yaabiltmaech. Jesuse' tu ya'alaj ti': Canant túun in j tamano'ob.

¹⁶Tu káataj ti' tu ca'a téen: Simón, u paal Jonás, ¿a yaabiltmaen? Pedroe' tu núucaj ti': Bey, Yuumtzil, teche' a wojel in yaabiltmaech. Tu ya'alaj ti': Canant túun in mejen j tamano'ob.

¹⁷Tu yóox téen tu káataj ti': Simón, u paal Jonás, ¿a yaabiltmaen? Pedroe' yaji tu yóol tumen káata'ab ti' tu yóox téen wa u yaabiltmae', ca tu ya'alaj ti': Yuumtzil, teche' tuláacal ba'al a wojel. Teche' a wojel in yaabiltmaech. Jesuse' tu ya'alaj ti': Canant túun in j tamano'ob.

¹⁸Tu jaajil quin wa'alic ti' teech, le ca'ach táanquelmeche' ca búuquintic a nooke' yéetel ca bin je'el tu'uxac a káate'. Ba'ale' le quéen nuxibaqueche' yaan a tich'ic a kab u ti'al ca ta'acac teech a nook tumen yaanal máac, yéetel ca u bisech tu'ux ma' a káat bini'.

¹⁹Le ca tu ya'alaj lela', Jesuse' táan u dzáic ojéeltbile' bix cun quíimil Pedro u ti'al ca u nojbe'encunt Ku beyo'. Cu dzo'ocole' tu ya'alaj ti': ¡Tzaypachteni'!

²⁰Le ca tu sutjubáa Pedroe', tu yilaj táan u taal tu paacho'obe' le aj canbal jach yaabilta'an tumen Jesuse', le máax yanchaj tu tzéel Jesús le ca jaano'ob tu dzoocaque' yéetel tu káataj ti' Jesús: Yuumtzil, ¿máax cun kubiquecho'?

²¹Pedroe' le ca tu yilaje' tu káataj ti' Jesús: Yuumtzil, cux túun lela' ¿Ba'ax bíin úuchuc ti'?

²²Jesuse' tu núucaj ti': Wa in káat ca p'áatac tac quéen suunaquene', ¿ba'ax a káat ti'? ¡Teche' tzaypachteni'!

²³Jóok u tzicbalil ichil le sucu'uno'obo' le aj canbalo' ma' bíin quíimiqui'. Ba'ale' Jesuse' ma' tu ya'alaj ti' wa ma' bíin quíimiqui', ba'ax tu ya'alaje': Wa in káat ca p'áatac tac quéen suunaquene' ¿Ba'ax a káat ti'?

²⁴Lela' leti' le aj canbal cu jaajcuntic le ba'alo'oba', yéetel dzo'oc u dzíibtic. C ojel táan u ya'alic u jaajil.

²⁵Yaan xan u láak ya'abcach ba'alo'ob tu beetaj Jesús, wa ca láaj dzíibta'ac jujun p'éelile', quin tuclique' le libro'ob tu'ux cun dzíibtbilo' mix ti' tuláacal yóokolcaab je'el u páajtal u yantal tu'ux u dza'abalo'obe'. Amén.