Read Yucateco San Juan 3 Bible Online

San Juan 3 - Yucateco bible

San Juan 3

¹Yanji jun túul fariseo u kaaba'e' Nicodemo, lela' jun túul ti' u nuuctaquil le judíobo'.

²Nicodemoe' j bin u xíimbalt Jesús yéetel áakab, ca tu ya'alaj ti': Aj ca'anbesaj, c ojel Ku túuxtmailech u ti'al ca'ansaj, tumen mixmáac cu páajtal u beetic chíiculalo'ob je'el bix ca beetic techo' wa mina'an Ku tu yéetel.

³Jesuse' tu ya'alaj ti': Tu jaajil, quin wa'alic ti' teche', le máax ma' tu síijil tu ca'a téene' ma' tu páajtal u yilic u ajawil Ku.

⁴Nicodemoe' tu káat chi'itaj ti': ¿Bix je'el u páajtal u síijil tu ca'a téen jun túul máac dzo'oc u nojochtale'? ¿Je'el wa u páajtal u yocol tu jobnel u maama u ti'al u síijil tu ca'a téene'?

⁵Jesuse' tu núucaj ti': Tu jaajil quin wa'alic ti' teche', le máax ma' tu síijil ti' ja' yéetel ti' Quili'ich Pixane' ma' tu páajtal u yocol tu ajawil Ku.

⁶Le ba'ax cu síijil ti' lu'umcabil taataobe', lu'umcabil; le ba'ax cu síijil ti' Quili'ich Pixane', pixan.

⁷Ma' u ja'akal a wóol tumen tin wa'alaj teech: Kaabéet a síijile'ex tu ca'a téen.

⁸Le iiko' cu jóopsaj je'el tu'uxac u káate'; ca wu'uyic u juum, ba'ale' ma' a wojel tu'ux u taali' mix tu'ux cu bini'. Bey tuláacal le cu síijilo'ob ti' Quili'ich Pixano'.

⁹Nocodemoe' tu káat chi'itaj tu ca'a téen: ¿Bix je'el u páajtal u yúuchul lela'?

¹⁰Jesuse' tu núucaj ti': Teche' jun túul u nojoch aj ca'anbesajil Israel ¿ma' a wojel le ba'alo'oba'?

¹¹Tu jaajil tu jaajil quin wa'alic ti' teche', to'one' c a'alic le ba'ax c ojelo', yéetel c jaajcuntic le ba'ax c ilmao', ba'ale' te'exe' ma' táan a wocsaj óoltique'ex le ba'ax c a'alic ti' te'exo'.

¹²Wa ma' ta wocsaj óoltiquene'ex le quéen in wa'al ti' te'ex u ba'alo'obil le yóokolcaaba' ¿bix can a wocsaj óoltene'ex le quéen in wa'al ti' te'ex u ba'alo'obil ca'an?

¹³Mix máac na'ac te j ca'ano', chéen le máax éem ti' le ca'ano', u Paal Máac, le máax yaan te j ca'ano'.

¹⁴Bey je'el bix Moisés tu líikesaj le can te x tocoy lu'umo', bey xan u Paal Máac yaan u líiksa'al,

¹⁵u ti'al tuláacal le máax cu yocsic u yóol ti'e' ma' u sa'atal, ba'ale' ca yanac cuxtal mina'an u xuul ti'.

¹⁶Tumen Kue' tu sen yaabiltaj le yóokolcaaba, ca tu dzaj u jun túulili' a Paal, u ti'al tuláacal le máax cu yocsic u yóol ti'e' ma' u sa'atal, ba'ale' ca yanac cuxtal mina'an u xuul ti'.

¹⁷Kue' tu túuxtaj u Paal yóokolcaab ma' u ti'al u xot kinti', ba'ale' u ti'al u toque.

¹⁸Le máax cu yocsic u yóol ti' u Paal Kue', ma' xot kinta'ani', ba'ale' le máax ma' tu yocsaj óoltique', dzo'oc u xot kinta'al, tumen ma' tu yocsaj óoltaj u jun túulili' u Paal Kui'.

¹⁹Le máaxo'ob ma' tu yocsaj óolalo'obe' dzo'oc u xot kinta'alo'ob, tumen le ca j taal le sáasil yóokolcaabo', asab utzchaj tu t'aano'ob le éekjoch'e'enilo' ti' le sáasilo', tumen táan u beetico'ob ba'al kaas.

²⁰Tuláacal le máax cu beetic ba'al kaase' cu p'ectic le sáasilo', yéetel ma' tu náadzal ti' le sáasilo', u ti'al ma' u chíicpajal le ba'al kaas cu beetico'.

²¹Ba'ale' le máax cuxa'an tu bejil le jaajilo' cu náadzal ti' le sáasilo', u ti'al ca ila'ac ti' yaan Ku ti' ba'ax cu beetique'.

²²Cu dzo'ocol lela', j bin Jesús yéetel u aj canbalo'ob tac tu lu'umil Judea. Tu beetaj dze'edzec kiin yéetelo'ob te'elo' táan u dzáic ocja'.

²³Bey xan Juan táan u dzáic ocja' Enón, naadz ti' Salim, tumen yaan ya'abcach ja' te'elo' cu taalo'ob le máaco'obo', cu dza'abal ocja' ti'ob.

²⁴Lela' j úuch ma'ili' ka'alac Juani'.

²⁵Dze'edzec túun ti' u j tzaypacho'ob Juane' jo'op' u ba'atel t'aano'ob yéetel dze'edzec judíob tu yo'olal le p'o'obailo'.

²⁶J bino'ob túun u ya'alo'ob ti' Juan: Aj ca'anbesaj, le máax yaan ca'ach ta wéetel tu lakin u ja'il Jordane', le máax ta wa'alaj to'one', beoraa' táan u dzáic ocja'; táan xan u láaj bino'ob tu paach.

²⁷Juane' tu ya'alaj ti'ob: Mix máac cu páajtal u yantal ba'al ti' wa ma' tu dza'abal ti' tumen Ku.

²⁸Te'exe' ta wu'uye'ex in t'áalcab a'alic ma' teen Cristoo' tene' chéen jun túul máac túuxta'anen tu táan leti'.

²⁹Ti' jun p'éel dzo'ocol beele' le máax kamic le atantzilo' leti' le íichamtzilo'. U amigo le íichamtzil yaan te'elo' yéetel cu yu'ubic ba'ax cu ya'alique' cu jach qui'imacchajal u yóol iquil cu yu'ubic. Bey xan teen cu qui'imacchajal in wóol bejela'e'.

³⁰Leti'e' yaan u nojochtal láaj kiin, ba'ale' tene' yaan in chichantal.

³¹Le máax ca'anal u taale' yóokol tuláacal yaan. Le máax yóokolcaabile', lu'umcabil, yéetel cu ya'alic lu'umcabil ba'alo'ob. Ba'ale' le máax ca'an u taale' yóokol tuláacal yaan,

³²yéetel cu ya'alic ba'ax u yilmaj yéetel u yu'ubmaj, ba'ale' mixmáac ocsaj óoltic ba'ax cu ya'alic.

³³Ba'ale' wa yaan máax ocsaj óoltique', cu béeycuntic tan u ya'ala'al u jaajil tumen Ku.

³⁴Tumen le máax túuxta'an tumen Kue' cu ya'alic u t'aano'ob Ku, tumen Kue' cu dzáic u Quili'ich Pixan x ma' P'iisil.

³⁵Le Taatao' u yaabiltmaj le Paalo', yéetel u dzaamaj tuláacal ba'al tu kab.

³⁶Le máax cu yocsic u yóol ti' le Paalo' yaan cuxtal mina'an u xuul ti'. Ba'ale' le máax ma' u káat u yocsaj óolt le Paalo', ma' bíin yanac cuxtal ti'i', ba'ale' bíin u kam u yaayaj jadz Ku.