Read Yucateco San Juan 7 Bible Online

San Juan 7 - Yucateco bible

San Juan 7

¹Cu dzo'ocol lela', Jesuse' xíimbalnaj Galilea. Ma' tu yóoltaj yantal Judeai', tumen te'elo' u káat quiimsbil tumen le judíobo'.

²Ba'ale' naadz u kiinil u kiinbesico'ob cajlajico'ob ti' máacano'obe', lela' jun p'éel ti' u kiinbesajilo'ob le judíobo'.

³Le o'olale' u yíidzino'obe'[2] tu ya'alajo'ob ti': Ma' a p'áatal waye'. Xeen Judea, u ti'al ca ila'ac ba'ax ca beetic tumen le aj canbalo'ob yano'ob te'elo'.

⁴Tumen wa yaan máax u káat ca kaj óolta'aque' ma' tu muclic ba'ax cu beetic. Wa táan a beetic le ba'alo'oba', beet tu táan tuláacal yóokolcaab.

⁵Tumen mix u yíidzino'ob u yocsmaj u yóolo'ob ti' leti'.

⁶Jesuse' tu ya'alaj túun ti'ob: In kiinile' ma' kuchuqui', ba'ale' a ti'al te'exe' je'el máacalmáac kiinile' ma'alob.

⁷Yóokolcaabe' ma' tu páajtal u ch'a'ap'ectique'ex, ba'ale' tene' cu ch'a'a p'ectiquen, tumen tene' quin beetic u yila'al jach kaas ba'ax cu beetic.

⁸Xeene'ex te'ex te j kiinbesajo'; tene' ma' táan in bini', tumen ma' kuchuc in kiinili'.

⁹Cu dzo'ocol u ya'alic ti'ob lela', j p'áat Galilea.

¹⁰Ba'ale' cu dzo'ocol u bin u yíidzino'obe', Jesuse' j bin xan ti' le kiinbesajo', quex ma' tu táan máaco'obi' ba'ale' ta'acbe'enbáil.

¹¹Le judíobo' jo'op' u caxantico'ob Jesús te j kiinbesajo', táan u ya'alico'ob: ¿Tu'ux yaan le máaco'?

¹²Ichil le máaco'obo' ya'ab táan u t'aano'ob tu yo'olal Jesús. Dze'edzeque' cu ya'alico'ob: Leti'e' jun túul ma'alob máac, ba'ale' u láako'obe' cu ya'alico'ob: Ma' beyi', tumen táan u tusic máaco'ob.

¹³Ba'ale' mix máac cu jéechcab t'aan tu yo'olal, tumen sajaco'ob ti' le judíobo'.

¹⁴Tu táan chúumuc anil le kiinbesajo' ca j ooc Jesús kulnaj, ca jo'op' u ca'ansaj.

¹⁵Le judíobo' jaka'an u yóolo'ob táan u ya'alico'ob: ¿Bix u yojéeltmail buca'aj ba'alo'ob le máaca' quex ma' xoocnaja'ani'?

¹⁶Jesuse' tu núucaj ti'ob: In ca'ansaje' ma' in ti'ali' ba'ale' u ti'al le máax túuxteno'.

¹⁷Wa yaan máax u káat u beet le ba'ax u káat Kue', bíin u kaj óolt wa ti' Ku cu taal in ca'ansaj wa chéen tu juunal in wóol quin t'aan.

¹⁸Le máax cu t'aan chéen tu juunal u yóole', cu beetic chéen u ti'al ca tzi'iquic tumen máaco'ob, ba'ale' le máax cu beetic u tzi'iquil le máax túuxto', leti'e' cu ya'alic ba'al jaaj, yéetel mina'an tuus ti' leti'.

¹⁹¿Ma' wa jaaj Moisés dzáa te'ex le a'almaj t'aano'? Cu dzo'ocole' mix jun túul ti' te'ex dzo'ocbesic le a'almaj t'aano'. ¿Ba'axten a káat a quiimsene'ex?

²⁰Le máaco'obo' tu núucajo'ob ti': Oca'an kaakas pixan ti' teech. ¿Máax u káat u quiimsech?

²¹Jesuse' tu ya'alaj ti'ob: Tu yo'olal chéen jun p'éel ba'al tin beetaj ti' sábadoe', ca láaj ja'akal a wóole'ex.

²²Ba'ale' Moisese' tu dzaj ti' te'ex le súutkuptajo' (quex ma' leti' cáajsi', ba'ale' a úuchben láakale'ex); le o'olale' te'exe' ca súut kutique'ex jun túul chaan pale' quex ti' sábado.

²³Le beetique' u ti'al ma' u mamba'alcunta'al u ya'almaj t'aan Moisese' te'exe' ca súut kuptique'ex jun túul chaan pale' quex sábado, ¿ba'axten túun ca kuuxile'ex tin wéetel tumen tin dzáa toj óolal tuláacal u wíinclil jun túul máac ti' sábado?

²⁴Ma' a p'is óole'ex chéen tu yo'olal le ba'ax cu yila'al tu yóok cabil ba'alo'ob, ba'ale' p'is óolnene'ex yéetel toj tuucul.

²⁵Dze'edzec túun ti' le máaxo'ob caja'ano'ob Jerusaleno' jo'op' u káatico'ob: ¿Ma' wa leti' le máax táan u caxta'al u ti'al quiimsbilo'?

²⁶Tumen táan u ca'ansaj tu táan caaj te'elo', cu dzo'ocole' mix máac a'alic mixba'al ti'. ¿Dzo'oc ta t'aan u kaj óoltic le jalach wíinico'obo' jach tu jaajil le máaca' leti' le Cristoo'?

²⁷Ba'ale' to'one'; c ojel tu'ux u taal lela', u jela'anile', le quéen taalac le Cristoo', mix máac cun ojéeltic tu'ux u taal.

²⁸Jesuse' táan u ca'ansaj te j kulnajo', ca tu ka'am a'alaj: ¡Bey túuno' a kaj óolene'ex yéetel a wojele'ex tu'ux in taal! Ba'ale' ma' taalaja'anen chéen tu juunal in wóoli', j taalen tumen túuxta'aben tumen jun túul máax chuca'an u yóol, le máaxa' te'exe' ma' a kaj óole'exi'.

²⁹Tene' in kaj óol, tumen leti' in taal, yéetel leti' túuxten.

³⁰Tu yóoltajo'ob túun u bis u kalo'ob, ba'ale' mix máac mache tumen ma' kuchuc u kiini'.

³¹Ba'ale' ya'ab máaco'ob tu yocsaj u yóolo'ob ti', ca tu ya'alajo'ob: Le quéen taalac le Cristoo' ¿bin u ca'aj u beet asab ya'ab chíiculalo'ob ti' le cu beetic le máaca'?

³²Le fariseobo' tu yu'ubajo'ob ba'ax cu ya'alic le máaco'ob tu yo'olal Jesuso', ca tu nupuba'ob yéetel le u nuuctaquil le aj kiino'obo' ca tu túuxtajo'ob palitzilo'ob u ti'al machic Jesús.

³³Jesuse' tu ya'alaj túun ti'ob: Bin in ca'aj antal ta wéetele'ex chéen jun p'íit kiino'ob, cu dzo'ocole' yaan in suut ti' le máax túuxteno'.

³⁴Te'exe' bíin a caxtene'ex, ba'ale' ma' bíin wilene'exi', tumen ma' tu páajtal a bine'ex tac tu'ux quin bin.

³⁵Le judíob túuno' jo'op' u káatico'ob tu baatzilo'ob: ¿Tu'ux je'el u bin le máaca' u ti'al ma' c caxtique'? ¿Je'el wa u bin ti' le judíob t'i'it'paja'ano'ob ichil le griego'obo', u ti'al u ca'ansic le griego'obo'?

³⁶¿Ba'ax u káat u ya'al le tu ya'alaj to'ono': Bíin a caxtene'ex, ba'ale' ma' bíin a wilene'exi', tumen ma' tu páajtal a bine'ex tac tu'ux quin bin?

³⁷U dzo'oc kiin le kiinbesajo' lela' leti' u asab nojochil. Ti' le kiino' j wa'alaj Jesuse' ca tu ka'am a'alaj: Wa yaan máax ukaje', taalac ti' teen ca ukulnac.

³⁸Je'el bix cu ya'alic le Quili'ich Dzíibo' yaan u yantal u sayabilo'ob cuxa'an ja' tu pucsi'ikal le máax cu yocsaj óoltiqueno'.

³⁹Jesuse' tu yóoltaj u ya'al lelo', bíin u kamo'ob Quili'ich Pixan tuláacal le máaxo'ob cu yocsic u yóolo'ob ti' leti'e'. Tumen ma'ili' taalac le Quili'ich Pixano'; tumen Jesuse' ma' nojbe'encunta'aqui'.

⁴⁰Dze'edzec ti' le máaco'obo', le ca tu yu'ubajo'ob lela', tu ya'alajo'ob: Tu jaajile' le máaca' leti' le aj bóobat unaj u taalo'.

⁴¹U láako'obe' tu ya'alajo'ob: Lela' leti' le Cristoo'. Ba'ale' u láako'obe' tu ya'alajo'ob: ¿Galilea wa bíin taalac le Cristoo'?

⁴²Le Quili'ich Dzíibo' cu ya'alique' le Cristoo' ti' u ch'i'ibal David bíin taalac yéetel Belén bíin síijic, tumen lela' u caajal David.

⁴³Bey túuno' le máaco'obo' tu jatzláantuba'ob tu yo'olal Jesús.

⁴⁴Yaan dze'edzec ti'obe' tu yóoltajo'ob u mach u biso'ob, ba'ale' mix máac beete.

⁴⁵Le palitzilo'obo' j suunajo'ob tac tu'ux yaan le fariseobo' yéetel u nuuctaquil le aj kiino'obo', lelo'oba' tu káat chi'ito'ob ti'ob: ¿Ba'axten ma' ta taase'exi'?

⁴⁶Le palitzilo'obo' tu núucajo'ob: Mix jun téen t'aanac mix máac je'el bix u t'aan le máaco'.

⁴⁷Le fariseobo' tu ya'alajo'ob túun ti'ob: ¿Tac te'ex dzo'oc a cha'ique'ex a tu'usule'ex?

⁴⁸¿Dzo'oc wa u yocsaj óolta'al tumen wa máax ti' le c nuuctaquilo'obo', wa ti' le fariseobo'?

⁴⁹Ba'ale' le máaco'oba', tumen ma' u kaj óolo'ob le a'almaj t'aano', yáanal loolob t'aan yano'ob.

⁵⁰Nicodemo' jun túul ti' le fariseobo' le máax j bin u yil Jesús yéetel áakabe', tu ya'alaj:

⁵¹C a'almaj t'aane' cu ya'alique' ma' tu páajtal c xot kintic jun túul máac, wa ma' táanil kaabéet c u'uyic u ti'al c ojéeltic ba'ax u beetmaj.

⁵²Tu núucajo'ob túun ti': ¿Galileailech wa xan? Xakalt le Quili'ich Dzíibo'obo' ca a wila'e' mix jun túul aj bóobat taalaja'an ti' Galilea.

⁵³Bey túuno' jujun túule' j bin tu yotoch.