Read Yucateco San Juan 8 Bible Online

San Juan 8 - Yucateco bible

San Juan 8

¹Ba'ale' Jesuse' j bin tu pu'uquil Olivo'ob.

²Ti' u jeel kiine le ca j sáaschaje', j suunaj kulnaj. Tuláacal le máaco'obo' tu nadzuba'ob ti', leti'e' j culaji' ca jo'op' u ca'ansico'ob.

³U aj ca'anbesajilo'ob le a'almaj t'aano' yéetel le fariseobo' tu taasajo'ob jun túul co'olel j chu'uc tan u nup keban. Tu dzajo'ob chúumuc ti' le máaxo'ob yano'ob te'elo'

⁴ca tu ya'alajo'ob ti' Jesús: aj ca'anbesaj, le co'olela' j chu'uc jach tu yorail táan u nup kebanchajal.

⁵U ya'almaj t'aan Moisese' cu ya'alic to'on ca muruxtunta'ac le co'olelo'ob beyo'oba'. Teche' ¿Ba'ax ca wa'alic?

⁶Lela' tu ya'alajo'ob táan u túuntico'ob u yóol, u ti'al ca yanac ba'ax o'olal u taquico'ob u pool. Jesuse' j chinlaj túun ca jo'op' u dzíib te j lu'umo' yéetel u yaal u kab.

⁷Ba'ale' tumen láili' táan u káatico'ob ti'e', tu líiksaj u yiche' ca tu ya'alaj ti'ob: Je'el máacalmáac ti' te'ex mina'an u kebane', u ch'in u yáax tuunich tu yóokol.

⁸Ca j chinlaj dzíib tu ca'a téen te j lu'umo'.

⁹Ba'ale' leti'obe', le ca tu yu'ubajo'ob lela', lúub u yóolo'ob tumen tu tuclajo'ob ba'ax u beetmo'ob, ca jóoko'ob jujun túulil, cáajic yéetel u mas nuxibilo'ob. Le ca láaj jóoko'obe', Jesuse' j p'áat chéen tu juunal yéetel le co'olelo', máax wa'alacbal te'elo'.

¹⁰Le ca tu líiksaj u yich Jesuse', mix máac u láak tu yilaj chéen le co'olelo' ca tu ya'alaj ti': Co'olel, ¿Tu'ux yano'ob le máaxo'ob cu taquico'ob a pool ca'acho'? ¿Mix jun túul tu xot kintechi'?

¹¹Leti'e' tu ya'alaj ti': Ma', Yuumtzil, mix jun túul. Jesuse' tu ya'alaj túun ti': Mix teen quin xot kintiquech. Xeen ma' a suut kebanchajal.

¹²Jesuse' t'aanaj tu ca'a téen yéetel le máaco'obo' ca tu ya'alaj ti'ob: Teen u sáasil yóokolcaab, le máax cu tzaypachtiquene' bíin yanac sáasil cu dzáic cuxtalo', yéetel mix bikin bíin máanac ti' éekjoch'e'enil.

¹³Le fariseobo' tu ya'alajo'ob túun ti': Teche' táan a t'aan chéen ta wo'olal, a t'ane' mixba'al u biilal.

¹⁴Jesuse' tu núucaj ti'ob: In t'ane' yaan ba'ax u biilal, quex teen ca in wa'al tin wo'olal. Tumen tene' in wojel tu'ux taalen yéetel tu'ux quin bin. Ba'ale' te'exe' ma' a wojele'ex tu'ux taalen mix tu'ux quin bin.

¹⁵Te'exe' ca p'is óole'ex je'el bix u p'is óol yóokolcaabe'. Tene' ma' táan in p'is óoltic mix máac.

¹⁶Ba'ale' wa quin p'is óole', tu beel quin in beete tumen ma' táan in p'is óol tin juunal, le Taata máax túuxteno' cu p'is óol jun múuch' tin wéetel.

¹⁷Ti' a wa'almaj t'aane'exe' dzíiba'an wa ca'a túul jaajcunajo'ob cu ya'alico'ob jun p'éelili' ba'ale', unaj u yocsaj óolta'al ba'ax cu ya'alico'ob.

¹⁸Ma'alob túun, tene' jun túulen ti' le jaajcunajo'ob tin wo'olalo', le Taata máax túuxteno' leti' le u láak jun túul jaajcunajo'.

¹⁹Tu káat chi'ito'ob túun ti': ¿Tu'ux yaan a Taata? Jesuse' tu núucaj ti'ob: Te'exe' ma' a kaj óolene'exi', mix in Taata a kaj óole'ex. Wa ca kaj óoltene'exe', je'el xan a kaj óoltique'ex in Taatae'.

²⁰Jesuse' tu ya'alaj le ba'alo'oba' ca'aliquil táan u ca'ansaj te j kulnajo', tu'ux dza'an u nu'uculilo'ob siibalo'ob. Ba'ale' mix máac mache, tumen ma' kuchuc u kiinili'.

²¹Jesuse' tu ya'alaj ti'ob tu ca'a téen: Tene' táan in bin, te'ex túune' bíin a caxtene'ex, ba'ale' bíin quíimque'ex ichil a kebane'ex. Tumen te tu'ux quin bino' te'exe' ma' tu páajtal a bine'exi'.

²²Le judíobo' tu ya'alajo'ob túun: ¿Bin u ca'aj wa u quiimsubáa, le o'olal cu ya'alic: Te tu'ux quin bino' te'exe' ma' tu páajtal a bine'exi'?

²³Jesuse' tu ya'alaj ti'ob: Te'exe' cabalile'ex, tene' ca'analilen. Te'exe' yóokolcaabile'ex, ba'ale' tene' ma' yóokolcaabileni'.

²⁴Le o'olal tin wa'alaj ti' te'exe' bin quíimque'ex ichil a kebane'ex, tumen wa ma' ta wocsaj óoltique'ex wa teen le máaxen teno', bíin quíimque'ex ichil a kebane'ex.

²⁵Tu káatajo'ob túun ti': ¿Máaxech teech? Jesuse' tu núucaj ti'ob: Dzo'oc in wa'alic ti' te'ex tu yáax chuun.

²⁶Ya'ab ba'alo'ob yaan in wa'al yéetel in p'is óolt ta wo'olale'ex, ba'ale' le máax túuxteno' cu ya'alic ba'al jaaj. Le ba'alo'ob in wu'uymaj u ya'alic leti'o' le quin wa'alic ti' yóokolcaab.

²⁷Ba'ale' leti'obe' ma' tu na'atajo'ob wa tan u t'aan tu yo'olal le Taatao'.

²⁸Le o'olal tu ya'alaj ti'ob: Le quéen a líikese'ex u Paal Máaque', bíin túun a kaj óolte'ex máaxen teen. Bíin a wile'ex xan tu jaajil tene' ma' tin beetic mixba'al chéen tu juunal in wóolal. Ba'ale' quin wa'alic chéen le ba'ax tu ca'ansaj teen le Taatao'.

²⁹Tumen le máax túuxteno' ti' yaan tin wéetele'. In Taatae' ma' u p'atmajen tin juunali', tumen tene' mantadz quin beetic le ba'ax utz tu t'ano'.

³⁰Le ca tu ya'alaj Jesús lela', ya'ab máaxo'ob tu yocsaj u yóolo'ob ti'.

³¹Jesuse' tu ya'alaj túun ti' le judíob dzo'oc u yocsic u yóolo'ob ti'o': Wa ca p'áatale'ex ti' le ba'axo'ob quin wa'alic ti' te'exa', jach tu jaajile' te'exe' in aj canbale'ex.

³²Bíin a kaj óolte'ex le jaajo', le jaaj túuno' bíin u jáalkabte'ex.

³³Leti'obe' tu núucajo'ob ti': To'one' u ch'i'ibalo'on Abraham yéetel mix jun téen palitzilta'aco'on tumen mix máac. ¿Bix a wa'alic teech yaan c jáalkabta'al?

³⁴Jesuse' tu ya'alaj ti'ob: Tu jaajil tu jaajil quin wa'alic ti' te'ex, tuláacal máax cu kebanchajle' palitzilta'an tumen le kebano'.

³⁵Jun túul palitzile' ma' tu p'áatal mantadz ichil láaktzilo'ob.

³⁶Bey túuno' wa le Paal cu jáalkabtique'exe' jach tu jaajil jáalkabe'ex.

³⁷In wojel te'exe' u ch'i'ibale'ex Abraham, ba'ale' a káat a quiimsene'ex, tumen ma' táan a kamique'ex ba'ax quin wa'alic ti' te'ex.

³⁸Tene' quin wa'alic le ba'ax u ye'esmaj teen in Taatae', te'exe' ca beetique'ex le ba'ax cu ya'alic te'ex a taataexo'.

³⁹Leti'obe' tu núucajo'ob ti': C taatae' Abraham. Jesuse' tu ya'alaj ti'ob: Wa tu jaajil Abraham a taataexe', je'el a beetique'ex le ba'ax tu beetaj leti'o'.

⁴⁰Ba'ale', quex dzo'oc in wa'alic ti' te'ex le jaaj tu ca'ansaj teen Kuo', te'exe' a káat a quiimsene'ex. ¡Abrahame' mix jun téen tu beetaj ba'al beyo'!

⁴¹Te'exe' ca beetique'ex le ba'ax cu beetic a taataexe'. Leti'ob túune' tu ya'alajo'ob ti': To'one', ma' síijo'on ti' nupkebani' jun túulili' taata yaan ti' to'on, lela' Ku.

⁴²Jesuse' tu ya'alaj túun ti'ob: Wa tu jaajil Ku a taataexe' je'el a yaabiltiquene'exe', tumen tene' taalaja'anen ti' Yuum Ku yéetel way yanene'. Ma' j taalen chéen tu juunal in wóolali' ba'ale' Ku túuxten.

⁴³¿Ba'axten ma' tu páajtal a na'atique'ex ba'ax quin wa'alic? Tumen ma' a káat a wu'uye'ex in ca'ansaji'.

⁴⁴Te'exe' u ti'ale'ex kasilba'al, tumen leti' a taataex. Le o'olale' a káat a beete'ex le ba'ax u káat leti'o'. Kasilba'ale' jun túul quiimsaj wíinic tu yáax chuun, Mix jun téen u ch'a'a u muuk ti' le jaajo', yéetel mix bikin cu ya'alic u jaajil. Le quéen tuusnaque' cu t'aan je'el bix leti'e', tumen leti'e' jun túul j tuus yéetel u taata le tuuso'.

⁴⁵Ba'ale' tumen táan in wa'alic u jaajile' te'exe' ma' ta wocsaj óoltiquene'ex.

⁴⁶¿Máax ti' te'ex cu páajtal u ye'esic wa yaan wa ba'ax kebanil ti' teen? Wa táan in wa'alic u jaajile' ¿Ba'axten ma' ta wocsaj óoltiquene'ex?

⁴⁷Le máax u ti'al Kue' cu yu'ubic u t'aan Ku. Te'exe' ma' a káat a wu'uye'ex u t'aani' tumen ma' u ti'ale'ex Kui'.

⁴⁸Le judíobo' tu ya'alajo'ob túun ti': Ti' u jaajil yano'on le ca t a'alaj samariailech yéetel yaan jun túul kaakas pixan ti' teech.

⁴⁹Jesuse' tu núucaj ti'ob: Mina'an mix jun túul kaakas pixan ti' teen. Ba'ax quin beetique' in tziquic in Taata, te'ex túune' ma' ta tziquiquene'ex.

⁵⁰Tene' ma' in káat ca a tziquiltene'exi', quex yaan máax u káat ca tziquilta'aquen, leti' xan cu p'is óol.

⁵¹Tu jaajil tu jaajil quin wa'alic ti' te'ex, le máax cu dzáic u yóol ti' ba'ax quin wa'alique' mix bikin cun quíimil.

⁵²Le judíobo' tu núucajo'ob túun ti': Bejela' jach tu jaajil c ojel yaan jun túul kaakas pixan ti' teech. Abraham yéetel tuláacal le aj bóobato'obo' j quíimo'ob, ba'ale' teche' ca wa'alic: Le máax cu dzáic u yóol ti' ba'ax quin wa'alique' mix bikin cun quíimil.

⁵³¿Mas nojochech wa ti' c taata Abraham? leti'e' j quíimi, le aj bóobato'obo' j quíimo'ob xan. ¿Máaxech ca tuclicabáa?

⁵⁴Jesuse' tu núucaj ti'ob: Wa teen quin tzijquinbáa tin juunale' in tziquile' mixba'al u biilal. In Taata máax tziquiquen, le máax ca wa'alique'ex a Kue'exo'.

⁵⁵Ba'ale' te'exe' ma' a kaj óole'exi'. Tene' in kaj óol. Wa ca in wa'al ma' in kaj óole', táan in tuus je'el bix te'exe'. Ba'ale' tene' jach tu jaajil in kaj óol, yéetel quin dzáic in wóol ti' ba'ax cu ya'alic.

⁵⁶Abraham le a úuchben láake'exo', j qui'imacchaj u yóol tumen bin u ca'aj u yil in kiinil. Tu yilaj xan, ca j chu'up u pucsi'ikal yéetel qui'imac óolal.

⁵⁷Le judíobo' tu ya'alajo'ob túun ti' Jesús: Mina'an mix cincuenta a ja'abilo'ob ¿cu dzo'ocole' ca wa'alic ta wila Abraham?

⁵⁸Jesuse' tu núucaj ti'ob: Tu jaajil tu jaajil quin wa'alic ti' te'ex, ma'ili' síijic Abrahame', yanili'en tene'.

⁵⁹Tu ch'a'ajo'ob tuunicho'ob túun u ti'al u ch'inico'ob Jesús, ba'ale' leti'e' tu baluba'e' ca jóok ti' le kulnajo'. Ca j máan chúumuc ti'obe', ca j bini'.