Read Yucateco Hechos 1 Bible Online

Hechos 1 - Yucateco bible

Hechos 1

¹Ti' le yáax libroe', in yaabilaj Teófilo, tin dzíibtaj tuláacal ba'ax tu beetaj yéetel tu ca'ansaj Jesús tu yáax chuun

²tac le kiin ca j na'ac ca'ano'. Ma'ili' xi'ic ca'ane', tu yéeyaj u apóstolo'ob, yéetel túun Quili'ich Pixane' tu ca'ansajti'ob ba'ax unaj u beetico'ob.

³Jesuse' cu dzo'ocol u quíimile' j chíicpaj ti'ob; ichil cuarenta kiino'ob táan u chíicbesicubáa ti'ob, táan u dzáic u ma'alob ojéelto'ob leti'e' cuxa'an; yéetel táan u tzolic ti'ob bix u ajawil Ku.

⁴Ma'ili' lukuc tu yicnal le apóstolo'obo', Jesuse' tu jach kubentaj ti'ob ma' u lukulo'ob tu caajil Jerusalén. Tu ya'alaj ti'ob: Pa'ate'ex u dzo'ocpajal le t'aan u dzaamaj ti' te'ex in taatao', je'el bix in wa'almaj ti' te'exo'.

⁵Tu jaajile' Juane' tu dzaj ocja' yéetel ja', ba'ale' ichil dze'edzec kiino'obe' te'exe' yaan u dza'abal a wocja'ex yéetel Quili'ich Pixan.

⁶Le ca j much'lajo'ob tu yéetel Jesuse' tu káatajo'ob ti': ¿Yuumtzil, ti' wa le kiino'ob le quéen a dzáa ti' u caajil Israel u páajtalil u ajawil tu ca'a téeno'?

⁷Jesuse' tu núucaj ti'ob: Ma' dza'an ti' te'ex u páajtalil a wojéeltique'ex ba'ax kiin quéen u beet le taatao' le ba'alo'ob chéen leti' cu páajtal u beetico';

⁸ba'ale' le quéen taalac le Quili'ich Pixan ta wóokole'exe', yaan a kamique'ex páajtalil u ti'al ca jóokoque'ex a tze'ecte'ex in kaaba' Jerusalén, ti' tuláacal Judea yéetel Samaria, tac le cúuchilo'ob yaan tu xuul yóokolcaabo'.

⁹Le ca'a dzo'oc u ya'alic lela', ca'aliquil leti'ob táan u pactico'obe', Jesuse' j líiksabij ca j bisa'ab ca'an; ca j taal jun p'éel múuyale' ca j ba'ali, ma' túun tu yilajo'ob tu ca'a téeni'.

¹⁰Táan u paacato'ob ca'an ca'aliquil táan u na'acal Jesuse', ca j chíicpaj tu tzéelo'obe' ca'a túul máaco'ob sac u nooko'ob.

¹¹Lelo'oba' tu ya'alajo'ob ti'ob: Galileaile'ex, ¿ba'axten táan a paacate'ex ca'an? Leti' le Jesusa', máax luk ichile'ex ca j na'ac ca'ano', yaan u taal tu ca'a téen je'el bix ta wilaje'ex u bino'.

¹²J luko'ob túun ti' le pu'uc u kaaba'intmaj Olivo'obo', ca j suunajo'ob Jerusalén, ma' ya'ab tu xíimbaltajo'obi', chéen le cu ya'alic le a'almaj t'aan cu páajtal u xíimbalta'al sábadoo'.

¹³Le ca j kucho'ob ich caaje', j na'aco'ob tu ca'anlil le naj tu'ux caja'ano'obo'. Ichilo'obe' ti' yaan Pedro, jacobo, Juan, Andrés, Felipe, Tomás, Bartolomé, Mateo, Jacobo u paal alfeo, Simón, máax jun túul ti' u múuch'ul le j cananitaobo' yéetel Judas u yíidzin Jacobo'.

¹⁴Tuláacal le lo'oba' mantadz cu múuch' payalchi'ob yéetel u yíidzino'ob Jesús;[1] yéetel María u maama bey xan yéetel le u láak co'olelo'obo'.

¹⁵Ti' le kiino'obo', wa'alchaj Pedro chúunuc ti' le sucu'uno'obo', tuláacalo'obe' míin ciento veinteob, ca tu ya'alaj ti'ob:

¹⁶Sucu'une'ex ka'abéetchaj u dzo'ocpajal ba'ax tu ya'alaj Quili'ich Pixan ti' le quili'ich dzíibo', le ca j t'aana tu chi' David tu yo'olal Judas, le máax tu nu'uctaj u beel le máaxo'ob tu mach u biso'ob Jesuso'.

¹⁷Judase' jun túul ti' to'on ca'achi yaan ba'al u beet ca'ach ti' le meyaja'.

¹⁸Ba'ale' j bine' ca tu manaj jun p'éel lu'um yéetel le taakin bo'ota'abic u kasa'anilo'; cu dzo'ocole' ca j lúub chinchinpoolil ca j xíic u jobnel ca j tuulnaj u choochel.

¹⁹Le ca j ojéeta'ab tumen u cajnáalilo'ob Jerusalén le ba'ax úucha' ca tu dzajo'ob u kaaba' le lu'umo' Acéldama, lela' u káat u ya'al ichil u t'aano'obe' u lu'umil ki'ik.

²⁰Tumen u libroil Salmo'obe' cu ya'alic beya': X tocoychajac u yotoch, ma' u yantal máax cajtali'. Cu ya'alic xane': Ch'a'abac u meyaj tumen yaanal.

²¹Yaan way ichilo'one' máaco'ob tu láakinto'ono'ob yanchaj Yuumtzil Jesús ichilo'ono',

²²cáajic le kiin ca j dzaab u yocja' tumen Juane' tac le kiin ca j na'ac ca'ano'. Kabéet túune' jun túul ti' leti'obe' ca nu'upuc t éetel u ti'al u jaajcuntic u ca'a púut cuxtal Jesús.

²³Ca tu yéeyajo'ob ca'a túul ti' leti'obi': Jun túule' José máax cu kaba'intic Barsabás bey xan cu ya'ala'al Justo ti'; u láak jun túule' Matías.

²⁴Ca j payalchi'inajo'ob beya': Yuumtzil, teech a kaj óol u pucsi'ikal tuláacalo'obe', e'es to'on máacalmáac a yéeymaj ti' le ca'a túula'

²⁵u ti'al ca u beet u meyjul aj túuchi', le meyaj tu p'ataj Judas tu yo'olal u kebano', le ca'aj bin ti'; le cúuchil tu najmato'.

²⁶Bey túuno' ca j buulnajo'ob u ti'al u yilico'ob máax yéeya'an ti' le ca'a túula', ca tu jóokesaj matías. Ti' le kiin túuno' Matíase' j nu'up ti' le once apóstolo'obo'.