Read Yucateco Hechos 10 Bible Online

Hechos 10 - Yucateco bible

Hechos 10

¹Tu caajil Cesareae' yaan ca'ach jun túul máaque' u kaaba'e' Cornelio, leti'e' u náacom jun múuch' aj ba'atelo'ob cu kaaba'inta'al le Italianoo'.

²Lela' jun túul máac cu kultic Ku jun múuch' yéetel tuláacal u yotoch yéetel cu tziquic xan. Bey xan cu dzáic ya'ab taakin u ti'al u yáanta'al le judíobo', yéetel mantadz cu payalchi' ti' Ku.

³Jun p'éel kiine', míin las tres u binbal kiine', j e'esa'ab jun p'éel chíiculal ti': tu yilaj u yocol jun túul u ángel Ku tac tu'ux yano', ca j a'ala'ab ti' ¡Cornelio!

⁴Cornelioe' p'áat táan u pactic le ángel yéetel nojoch sajaquil, ca tu káat chi'itaj ti': ¿Ba'axi' Yuumtzil? Le ángel túuno' tu ya'alaj ti': Kue' dzo'oc u kamic a payalchi'ob bey xan ba'ax dzo'oc a beetic u ti'al a wáantic le óotzilo'obo'.

⁵Túuxt máaco'ob tac tu caajil Jope u ti'al u t'anic Simón, u láak u kaaba'e' Pedro.

⁶Lela' kucha'an tu yotoch u láak máac, Simón u kaaba' xan, jun túul máac cu meyajtic kéewel, cajacbal tu jáal ka'anab. Leti' máaxcun a'alic teech ba'ax unaj a beetic.

⁷Le ca j bin le ángel t'aanaj yéetelo', Cornelioe' tu t'anaj ca'a túul u palitzilo'ob, bey xan ichil le máaxo'ob meyajtico' jun túul aj ba'atel yaan u sajaquil Ku ti'.

⁸Tu tzicbaltaj tuláacal ti'obe' ca tu túuxtajo'ob Jope.

⁹Tu jeel kiine' ca'aliquil táan u bino'ob te bejo' yéetel dzo'oc u naadz yanilo'ob tu caajil Jope, Pedroe' j na'ac tu yóokol le najo' óoli' chúumuc kiin u ti'al u payalchi'.

¹⁰Jach wi'ijchaje' ca tu yóoltaj janal; ba'ale' ca'aliquil táan u nu'ucta'al le janalo' tu yilaj jun p'éel chíiculal.

¹¹Tu yilaj u je'epajal le ca'ano' yéetel táan u yéemel jun p'éel ba'al bey jun p'éel nojoch nooke', kaxa'an tu can ti'itzil.

¹²Ti' le nooko' yaan jejeláas ba'alche'ob can dzíit u yooco'ob, yaan xan caano'ob yéetel ch'íich'o'obi'.

¹³Tu yu'ubaj túun jun p'éel t'aan táan u ya'alic ti': Líiken, Pedro, quiimsajnen ca janaquech.

¹⁴Ba'ale' Pedroe' tu núucaj: Ma' Yuumtzil; mix jun téen in jaant ba'al ma' utz u jaanta'ali' mix wa ba'ax ma' kambe'eni'.

¹⁵Le t'aano' tu ya'alaj túun ti' tu ca'atéen: Le ba'ax ma'alob quinta'an tumen Kue' ma' wa'alic, ma' utzi'.

¹⁶Lela' j úuch óox téen, cu dzo'ocole' le nooko'j na'acsa'ab tu ca'a téen.

¹⁷Ca'aliquil Pedro táan u sen tucultic ba'ax tu yilajo', j kucho'ob jool naj le máaco'ob túuxta'abo'ob tumen Cornelio', táan u káat péectziltico'ob tu'ux yaan u yotoch Simón.

¹⁸Le ca j kucho'obe' tu káat péectzilto'ob wa ti' kucha'an jun túul máac Simón u kaaba', máax cu ya'ala'al xan Pedro ti'.

¹⁹Tumen Pedroe' láili' táan u tucultic le ba'ax tu yilajo', a'ala'ab ti' tumen quili'ich Pixan: Ile, óox túul máaco'ob, caxtiquech.

²⁰Líiken j éemen ca xi'iquech yéetelo'ob. Ma' u ca'a p'éeltal a wóolal tumen teen túuxto'ob.

²¹Pedroe' j éem túun tac tu'ux yaan le máaco'ob túuxta'ano'ob tumen Cornelio' ca tu ya'alaj ti'ob: Teen wa le máax ca caxtique'exo'. ¿Ba'ax taale'ex a beete'ex?

²²Leti'obe' tu núucajo'ob: Túuxta'abo'on tumen náacom Cornelio, jun túul máac toj u cuxtal, yéetel yaan u sajaquil Ku ti', máax yaabilta'an xan tumen tuláacal le judíobo'. Jun túul u ángel Yuum Ku a'alti' unaj u túuxtic t'anbilech u ti'al ca xi'iquech tu yotoch, u ti'al ca u yu'ub ba'ax yaan a wa'al ti'.

²³Pedroe' tu beetaj u yocolo'obe' ca j p'áto'ob tu yicnal ti' le áakabo'. Tu jeel kiine' Pedroe' j bin yéetelo'ob, j bin xan yéetelo'obe' dze'edzec ti' le sucu'uno'ob cajacbalo'ob Jopeo'.

²⁴Tu jeel kiine' j kucho'ob Cesarea, tu'ux táan u pa'atalo'ob tumen Cornelio yéetel jun múuch' u láaktzilo'ob bey xan le máaxo'ob jach utz u biscuba'ob tu yéetele', máaxo'ob j t'a'ano'ob tumen Cornelio.

²⁵Le ca j kuch Pedro te j najo', Cornelioe' jóok u kame' caj xolaj tu táan u ti'al u kulte.

²⁶Ba'ale' líiksa'ab tumen Pedroe' ca a'ala'ab ti': Wa'alen, tumen teen xane' wíiniquen je'el bix techo'.

²⁷Ca'aliquil táan u t'aan yéetele' j ooque' ca tu yilaj ya'ab máaco'ob much'ucbalo'ob.

²⁸Pedro túune' tu ya'alaj ti'ob: Te'exe' a wojele'ex wet'a'an ti' jun túul judío tu yo'olal u yocsaj óolale' u bisicubáa yéetel jun túul táanxel lu'umil wa u yocol tu yotoch. Ba'ale' Kue' dzo'oc u ca'ansic ti' tene' ma' unaj in wa'alic ti' mix máac kaas yanil wa mix kambe'eni'.

²⁹Le o'olale' le ca j t'a'anene' mix ba'al tin wa'alaj, ca j taalen. In káat túun in wojéelte' ba'ax o'olal ta t'anjene'ex.

³⁰Cornelio túune' tu núucaj: Míin can p'éel kiino'ob bejela'e', míin walquila', ti' yanen way tin wotoche' táan in su'ukin yéetel táan in payalchi', las tres u binbal u t'úubul kiine' ca chíicpaj teen jun túul j xiib u búuquintmaj jun p'éel nook cu léembal.

³¹Ca tu ya'alaj teen: Cornelio, Kue' dzo'oc u yu'ubic a payalchi' yéetel dzo'oc u ka'ajsic ba'ax ca beetic u ti'al a wáantic óotzilo'ob.

³²Túuxt túun ch'a'abil tu caajil Jope jun túul Simón, máax xan Pedro u kaaba'. Kucha'an tu yotoch Simón, lela' jun túul j bon kéewel, caja'an tu jáal ka'anab. Le quéen taalaque' yaan u t'aan ta wéetel.

³³Bey túuno' tin túuxtaj cha'abilech tu séebalquil, ta beetaj utz a taal. Bejla'e' tuláacalo'on ti'ano'on tu táan Kue', c káat u'uy tuláacal le ba'ax u ya'almaj teech Yuumtzil ca a wa'al to'ono'.

³⁴Pedroe' j chu'unpaj u t'aane' ca tu ya'alaj: Bejla'e' quin na'atique' Kue' mix máac jela'an u pactic,

³⁵ba'ale' ti' je'el ba'alac caajile' cu kamic le máax tziquique' yéetel cu beetic ba'ax utzo'.

³⁶Kue' tu t'anaj u ch'i'ibal Israel, táan u tze'ectic ma'alob péectzilil tu yo'olal Jesucrito, lela' u Yuumtzil tuláacal.

³⁷Te'exe' ma'alob a wojelile'x ba'ax úuch tuláacal u lu'umil judíobo', lela' cáaj Galilea, cu dzo'ocol u tze'ec yéetel u dzáic ocja' Juan.

³⁸A wojele'ex bix Yuum Kue' tu dzaj páajtalil Quili'ich Pixan ti' Jesús Nazaretil, bix máanic xan leti' táan u beetic utz yéetel táan u dzáic toj óolal ti' tuláacal le máaxo'ob cu mukyajo'ob yáanal u páajtalil kaasil ba'alo'. Lela' tu beetaje' tumen Kue' ti' yaan tu yéetele'.

³⁹To'one' jajcunajo'on ti' tuláacal ba'axo'ob tu beetaj Jesuso', ma' chéen tu lu'umil Judeai' ba'ale' tac tu caajil Jerusalén. Cu dzo'ocole' ca tu quiimsajo'ob úuchic u sinico'ob ti' jun p'éel cruz.

⁴⁰Ba'ale' Kue' tu ca'a púut cuxquintaj tu yóox p'éel kiine' ca tu beetaj u chíicpajal ti' to'on.

⁴¹Ma' chíicpaj ti' tuláacal máaqui', ba'ale' ti' to'on máaxo'on yéeya'ano'on tumen Ku tu yáax chuun u ti'al jaacunaj. To'one' jaano'on, ukulnajo'ob xan tu yéetel cu dzo'ocol u ca'a púutcuxtal ichil le quimeno'obo'.

⁴²Ca tu ya'alaj to'on ca tze'ecnaco'on ti' le máaco'obo'; yéetel u ti'al ca c a'ale' Kue' dzo'oc u dzáic Jesús je'el bix jun túul Aj p'is óol tu yóokol cuxa'ano'ob yéetel quimeno'ob.

⁴³Bey xan, ma'ili' úuchuque', tuláacal le aj bóobato'obo' j t'aanajo'ob tu yo'olal Jesús, táan u ya'alico'obe' tuláacal le máaxo'ob cu yocsic u yóolo'ob ti'e' cu kamico'ob sa'atsaj si'ipil tu kaaba'.

⁴⁴Láili' táan u t'aan Pedroe', ca j taal Quili'ich Pixan tu yóokol tuláacal le máaxo'ob u'uyic u tze'eco'.

⁴⁵Le ocsaj óolo'ob judíob j taalo'ob yéetel Pedroe' ja'ak u yóolo'ob tumen dza'ab Quili'ich Pixan tac ti' le máaxo'ob ma' Judíobo'.

⁴⁶Tumen tu yu'ubajo'ob u t'aano'ob ichil jejeláas t'ano'ob yéetel u qui'iqui' t'antico'ob Ku.

⁴⁷Pedro túune' tu ya'alaj ti'ob: ¿Je'el wa túun u páajtal u we'et'el u yocja' le máaxo'ob dzo'oc u kamico'ob Quili'ich Pixan jeel bixto'one'?

⁴⁸Ca tu túuxtaj ca ocja'anaco'ob tu kaaba' Jesucristo. Cudzo'ocole' ca tu káat óoltajo'ob ti' Pedro ca p'áatac tu yicnalo'ob u láak dze'edzec kiino'ob.