Read Yucateco Hechos 13 Bible Online

Hechos 13 - Yucateco bible

Hechos 13

¹Ti' le iglesia yaan Antioquíao' yaan aj bóobato'ob yéetel j ca'anbesajo'ob. Lelo'oba' Bernabé, Simón (máax cu ya'ala'al xan ti'e' j Boox), Lucio Cireneil, Manaén (máax yéet ch'íijac Herodes u jalachil Galilea) yéetel Saulo'.

²Jun p'éel kiine', ca'aliquil táan u kultico'ob Yuumtzil táan u su'ukino'obe', Quili'ich Pixane' tu ya'alaj: Dza'ex teen jun páayil Bernabé yéetel Saulo u ti'al le meyaj ti' ba'ax o'olal tin t'aano'obo'.

³Cu dzo'ocol túun u payalchi'ob yéetel u su'ukino'obe', tu dzáalanto'ob u kabo'ob tu yóokol Bernabé yéetel tu yóokol Sauloe' ca tu utzil túuxtajo'ob.

⁴Cu dzo'ocole', Bernabé yéetel Sauloe', túuxta'abo'ob tumen Quili'ich Pixane', ca j bino'ob Seleucia; te'elo' j ooco'ob ti' jun p'éel cheeme' ca j bino'ob tac tu petenil chipre.

⁵Le ca j kucho'ob te'elo', tu caajil Salaminae', jo'op' u tze'ectico'ob u ma'alob péectzil Ku tu sinagoagaob le judíobo'. Juane' cu bin tu yéetelo'ob bey jun túul áantaje'.

⁶Tu xíimbalto'ob tuláacal le peteno' ca j kucho'ob Pafos. Te tu yilo'ob jun túul judío Barjesús u kaaba', lela' j meen, jun túul j tuusil wíinic, cu ya'alic táan u t'aan tu kaaba' Ku.

⁷Le meeno' ti' yaan tu yicnal jalach Sergio Pauloe', jun túul máac jach yaan u na'at. Le jalacho' tu túuxtaj t'anbil Bernabé yéetel Saulo, tumen u káat u yu'ub u ma'alob péectzil Ku.

⁸Ba'ale' le j meeno', u kaaba'e' j Elimas, tu dzajubáa ba'atel yéetelo'ob, tumen tu yóoltaj u wet' ca ocsaj óolnac le jalacho'.

⁹Saulo túune', Pablo xan u kaaba', chuup yéetel Quili'ich Pixane', tu jach pactaje'

¹⁰ca tu ya'alaj ti': ¡J tuusil wíinic, loolob máac, u paalech kaasil ba'al, u aj p'eec tuláacal ba'ax utz! ¿Ba'axten ma' ta p'atic a lo'olochic u toj bejilo'ob le Yuumtzilo'?

¹¹Bejla' túune', Yuumtzile' bin u ca'aj u jadzech; bin a ca'aj ch'óoptal, dze'edzec kiino'obe' ma' bíin a wil mix u sáasil kiini'. Tu séebalquil j p'áat ich éekjoche'enil, ca jo'op' u caxantic máax bisic tu kab, tumen ma' táan u páajtal u paacat.

¹²Le ca tu yilaj le jalach lela', ocsaj óolnaji, tumen jaka'an u yóol tu yo'olal u ca'ansajil Yuumtzil.

¹³Pablo yéetel le máaxo'ob láakintique' j luko'ob tu caajil Pafos ti' jun p'éel cheeme' ca j bino'ob tac Perge tu lu'umil Panfilia, ba'ale' Juane' j luk tu yicnalo'obe' ca j suunaj Jerusalén.

¹⁴Cu dzo'ocole' leti'obe' j máano'ob Perge, ca j bino'ob tu caajil Antioquía tu lu'umil Pisidia. Te'elo' ti' u kiinil sábadoe' j ooco'ob ti' le sinagogao' ca j culajo'ob.

¹⁵Bey túuno', cu dzo'ocol u yúuchul xooc tu dzíibil le a'almaj t'aan yéetel le aj bóobato'obo', u nuuctaquil le sinagogao' tu túuxtajo'ob a'albil ti'ob: Sucu'une'ex wa yaan tzol xiquino'ob a dza'ex ti' le máaco'oba', cu páajtal a wa'alique'ex bejla'e'.

¹⁶Pablo' túune' ca tu beetaj yéetel u kab ca u mac u chi'ob, ca tu ya'alaj: u'uye'ex j israelile'ex, bey xan te'ex ti' máaxe'ex yaan u sajaquilil Junab Ku:

¹⁷U Ku u caajil Israele' tu yéeyaj c úuchben taataobe' ca tu beetaj jun p'éel nojoch caaj tu yéetelo'ob, ca'aliquil caja'ano'ob tu lu'umil Egiptoe' beyo'ob j táanxel lu'umilo'obe'. Cu dzo'ocole' tu jóokesajo'ob te j lu'umo' yéetel u páajtalil.

¹⁸Kue' tu mukyajtaj ba'ax tu beetajo'ob te x tocoy lu'umo' míin cuarenta ja'abo'ob,

¹⁹ca tu xu'ulsaj siete caajo'ob yano'ob tu lu'unil Canaane' u ti'al u dzáic u lu'umo'ob ti' c úuchben ch'i'ilancabilo'ob.

²⁰Cu dzo'ocole' ichil cuatrocientos cincuenta ja'abo'obe' tu beetaj u jalachil tu yóokolo'ob yéetel jueso'ob tac tu kiinilo'ob aj bóobat Samuel.

²¹Leti'ob túune' tu káatajo'ob jun túul ajaw u ti'al u beet u jalachil tu yóokolo'ob, Ku túune' tu dzaj ti'ob u ti'al cuarenta ja'abo'obe' jun túul ajaw u kaaba'e' Saul, u paal Cis, jun túul máac taalaja'an ti' u chi'ibalil Benjamín.

²²Cu dzo'ocole' ca tu lu kesaj Saul tu cúuchile', ca tu dzaj Davide' ajawil tu yóokolo'ob tu yo'olal máax tu ya'alaj: Dzo'oc in caxtic David, u paal Isaí, jun túul máac cu lúubul teen utzil yéetel máax cu bin beet tuláacal ba'ax in káate'.

²³Jun túul ti' u ch'i'ibal Davide' Jesús máax líikesa'ab tumen Ku u ti'al u toc Israel je'el bix u ya'almaje'.

²⁴Ma'ili' taalac Jesuse' Juane' tze'ecnaj ti' tuláacal u máaquilo'ob Israel, táan u ya'alic ti'ob kabéet u kexic u tuuculo'ob yéetel kabéet u yocja'ob.

²⁵Le ca j náadz u xuul u cuxtal Juane', leti'e' tu ya'alaj: Ma' teen le máax ca tucultique'ex teno'; ba'ale' tin paache' táan u taal jun túul máax ma' táan in najmatic in wach'ic mix u táabil u xanab.

²⁶Sucu'une'ex, paalale'ex a taalbale'ex tu chi'ibal Abraham, yéetel le máaxo'ob ichile'ex yaan u sajaquilil Ku ti'obo', ti' te'ex túuxta'ab le ma'alob péectzil u ti'al tocsajila'.

²⁷Tumen le máaxo'ob cajnáalo'ob Jerusaleno' yéetel u nuuctaquilo'obo' ma' u yojelo'ob máax Jesusi', mix táan u na'atico'ob u t'aan le aj bóobato'ob cu xo'ocol ti' le sinagogaob ti' sábadoo'; beyo' leti'ob tu dzo'ocbesajo'ob ba'ax cu ya'alic le Quili'ich Dzíibo'ob le ca tu xot kintajo'ob Jesuso'.

²⁸Quex ma' tu caxtajo'ob ba'ax o'olal u quiimsico'obe', tu káatajo'ob ti' Pilato ca u túuxt quíimsbil.

²⁹Bey túuno', le ca j dzo'oc u beetico'ob tuláacal le ba'ax cu ya'ala'al tu yo'olal leti' te j Quili'ich Dzíibo', tu yéemsajo'ob ti' le cruzo' ca tu mucajo'ob.

³⁰Ba'ale' Kue' tu líiksaj ti' le quíimilo'.

³¹Ti' ya'abcach kiino'ob Jesuse' tu chíicbesajubáa ti' le máaxo'ob láakint ca'aliquil tu xíimbal ti' Galilea tac Jerusaleno', bejla'e' leti'ob máaxo'ob cu t'aano'ob tu yo'olal leti' ti' le máaco'obo'.

³²Bey túuno', to'one' táan c dzáic ti' te'exe' u ma'alob péectzilil le ba'ax tu ya'alaj Ku ti' c úuchben taataobo'.

³³Tumen ti' to'on, máaxo'ob u paalalo'one', leti'e' dzo'oc u dzo'ocbesic ba'ax tu ya'alaj iquil u ca'a púut cuxquintilac Jesús, je'elbix dzíibanil ti' le u ca'a p'éel salmo': Teche' in paalech; tene' dzo'oc in dzáic teech cuxtal bejela'e'.

³⁴Kue' u ya'almaje' yaan u ca'a púut cuxquintic, beyo' ma' tu kastal u wíinclil je'el bix tu ya'alaj te Quili'ich dzíibo': Bin in ca'aj in dzáa ti' te'exe' siibalo'ob tin wa'alaj ti' David.

³⁵Le o'olal xan cu ya'alic ti' u láak salmoe': Ma' bíin in cha'a u kastal u wíinclil le a palitzil a yaabilmajo'.

³⁶U jaajile' Davide' tu meyajtaj le yéet kiinilo'obo' je'el bix a'ala'ab ti' tumen Ku, cu dzo'ocole' ca j quíimi, ca j much'laj yéetel u taataob, ca j tu'uji u wíinclil.

³⁷Ba'ale' u wíinclil le máax ca'a púut cuxquinta'ab tumen Kuo' ma' j tu'uchaji'.

³⁸Sucu'une'ex te'exe' unaj a wojéeltique'exe', u sa'atsajil le kebano'obo' cu tze'ecta'al ti' te'exe' tu yo'olal Jesús.

³⁹Tu yo'olal leti'e', tuláacal le cu yocsaj óolo'obo' cu sa'atsa'alo'ob ti' tuláacal le ba'ax ma' páajtji u sa'atsa'alo'ob tu yáanal u ya'almaj t'aan Moisesi'.

⁴⁰Canantaba'ex ma' lúubul ta wóokole'ex le ba'ax tu dzíibtaj le aj bóobato'ob, le ca tu ya'alajo'ob:

⁴¹Ile'ex, j p'a'as máaque'ex, ja'akac a wóole'ex yéetel sa'ataque'ex, tumen tene', Junab Kuen, quin beetic nucuch ba'alo'ob ta kiinile'ex ma' bíin a wocsaj óolte'exi', quex ca dzíibta'ac te'ex tumen wa máax.

⁴²Le ca jóok Pablo yéetel le máaxo'ob yano'ob ti' u sinagoga le judíobo', le máaxo'ob ma' sijnalo'ob judíobe' tu káat óoltajo'ob ti'ob ca tzicbalta'ac le ba'alo'ob ti'oba' ti' le u láak sábado cu taalo'.

⁴³Le ca dzo'oc u jóokolo'ob ti' le much'tal te sinagogao', ya'ab ti' le judíobo' bey xan ti' le máaxo'ob u kammajo'ob u yocsaj óolal le judíobo' yéetel táan u beetico'ob yéetel chuca'an óolale' j bino'ob tu paach Pablo yéetel Bernabé. Lelo'oba' tu tzolaj u xiquino'ob u ti'al ca p'áataco'ob mantadz ti' u yaacunaj Ku.

⁴⁴Ti' u láak semanae', ti' sábadoe', j much'laj óoli' tuláacal u cajnáalilo'ob le cúuchilo' u ti'al u yu'ubico'ob u ma'alob péectzilil Ku.

⁴⁵Ba'ale' le judíobo', le ca tu yilajo'ob buca'aj máaco'ob much'laje', tu yaj óoltajo'ob, ca jo'op' u káakat t'antico'ob u t'aan Pablo bey xan cu poch'ico'ob.

⁴⁶Pablo yéetel Bernabe' j t'aanajo'ob yéetel páajtalile' ca tu ya'alaj ti'ob: kabéet u tze'ecta'al u ma'alo'ob péectzil Ku yáaxil ti' te'ex judíoex; ba'ale' bey ma' a káat a kame'exo' yéetel táan a tucultique'ex ma' táan a najmatique'ex le cuxtalo' mina'an u xuulo', bejela'e' táan c bin ti' le máaxo'ob ma' judíobo'.

⁴⁷tumen bey tu túuxtilaco'on Yuumtzil, táan u ya'alic: In dzaamajech bey sáasilil ti' le caajo'obo', yéetel u ti'al a bis tocsajil tac tu xuul yóokolcaab.

⁴⁸Le ca tu yu'ubajo'ob lela', le máaxo'ob ma'judíobo', qui'imacchaj u yóolo'ob ca jo'op' u ya'alico'obe' jach ma'alob u péectzil Ku. Ca j ocsaj óolnajo'ob tuláacal le yéeya'ano'ob u ti'al ca yanac ti'ob cuxtal mina'an u xuulo'.

⁴⁹Bey tze'ecta'abic u ma'alob péectzil Yuumtzil ti' tuláacal le lu'umo'.

⁵⁰Ba'ale' le judíobo' j t'aanajo'ob yéetel dze'edzec co'olelo'ob ma'alob u cuxtalo'ob yéetel yaan u tzicbe'enilo'obe' bey xan yéetel u nuuctaquilo'ob le caajo', ca tu líikesajo'ob u yóolo'ob tu yóokol Pablo yéetel ti' Bernabé ca tu ch'a'apachtajo'ob tu yo'olal u jóokesico'ob te j lu'umo'.

⁵¹Leti'ob túune' tu tíitajo'ob u lu'umil u yooco'ob bey jun p'éel chíiculal u ti'al le máaco'obo', ca j bino'ob tu caajil Iconio.

⁵²Ba'ale' le ocsaj óolo'obo' jach qui'imac u yóolo'ob yéetel chuupo'ob xan yéetel Quili'ich Pixan.