Read Yucateco Hechos 14 Bible Online

Hechos 14 - Yucateco bible

Hechos 14

¹Tu caajil Iconioe' Pablo yéetel Bernabee' j ooco'ob tu sinagoga le judíobo'. Tumen j t'aanajo'ob yéetel páajtalile', ya'ab máax ocsaj óolajo'ob, ichil le judíobo' bey xan ichil le máaxo'ob ma' judíobo'.

²Ba'ale' le judíob ma' ocsaj óolnajo'obo' tu líiksaj u yóol le máaxo'ob ma' judíobo' ca tu beetajo'ob u tuuculo'ob kaas tu yóokol le sucu'uno'obo'.

³Tu yo'olal lela' j p'áato'ob ya'abcach kiino'ob te'elo' ca j t'aanajo'ob yéetel páajtalil, u dzaamajo'ob u alab óolalo'ob ti' Yuumtzil. Yuumtzile' cu béeycuntic le ba'ax cu ya'alico'ob tu yo'olal u yaacunaj Ku iquil u dzáic páajtalil ti'ob u ti'al u beetico'ob jakbe'en ba'alo'ob yéetel chíiculalo'ob.

⁴Ba'ale' u yuumilo'ob le caajo' u jatzmajuba'ob, dze'edzeco'obe' ti'ano'ob yéetel le judíobo', u láako'obe' yéetel le j canbalo'obo'.

⁵Le judíobo' tu much'juba'ob yéetel le ma' judíobo' ca j t'aanajo'ob yéetel u jalachilo'ob le caajo' u ti'al u po'opoch'ico'ob yéetel u muluxtuuntico'ob le j canbalo'obo'.

⁶Ba'ale' Pablo yéetel Bernabe' tu yojéeltajo'obe' caj púudzo'ob tu caajilo'ob Listra yéetel Derbe, lelo'oba' ti' yano'ob tu lu'umil Licaoniae' bey ti' le lu'umo'ob yaan tu bakpacho',

⁷tu'ux tu tze'ectajo'ob xan le ma'alob péectzilo'.

⁸Tu caajil Listrae' yaan jun túul máac ma' tu páajtal u xíimbal. Culucbal te'elo' tumen j móoch ooc sijnalil, mix jun téen xíimbalnac.

⁹Le máaca' táan u yu'ubic ba'ax cu ya'alic Pablo, Pabloe' tu pactaje' ca tu yilaj yaan ocsaj óolal u ti'al u yutztal.

¹⁰Ca tu ka'am a'alaj ti': Wa'alen. Le máaco' síit' wa'alaje' ca jo'op' u xíimbal.

¹¹Le máaco'obo', le ca tu yilajo'ob ba'ax tu beetaj Pabloe', jo'op' u yawato'ob ti' licoaniail táan u ya'alico'ob: ¡Kuob chica'ano'ob ti' máaco'ob dzo'oc u yéemelo'ob ti' to'on!

¹²Táan u ya'alico'obe' Bernabé ku Júpiter yéetel Pabloe' ku Mercurio, tumen leti' máax cu t'aan.

¹³U yuum j kiinil u kulnajil Júpiter, le yaan jool caajo', tu taasaj wacaxo'ob yéetel julbil nicte'ob; leti' yéetel le máaco'obo' tu yóoltajo'ob u kulto'ob Pablo yéetel Bernabé táan quiimsico'ob le wacaxo'ob bey quíimsbil ti'ibil óolalo'obe'.

¹⁴Ba'ale' le j canbalo'ob le ca tu yilajo'ob lela', tu jatajo'ob u nooko'obe' ca j ooco'ob ichil le máaco'obo' táan u yaawtico'ob:

¹⁵Máaque'ex, ¿ba'ax teen ca beetique'ex lela'? To'one' máaco'on je'el bix te'exe', j taalo'on u ti'al ca c a'al te'exe' ca a p'ate'ex le ba'alo'ob mix ba'al u biilala' yéetel ca xi'ique'ex tu paach cuxa'an Junab Ku tu beetaj le ca'ano', le lu'uma', le ka'anabo' yéetel tuláacal le ba'alo'ob yano'obo'.

¹⁶Ti' le úuchben kiino'obo' tu p'ataj u xíimbal máaco'ob je'el bix tu yóoltajo'obe',

¹⁷quex mantadz táan u ye'esic ti'ob máax leti', tu yo'olal le utz cu beetic ti'obo'. Leti' túuxtic to'on le cháaco' yéetel le ma'alob ichanquilo', yéetel cu dzáic to'on tuláacal ba'ax kabéetto'on u ti'al c jaant yéetel u ti'al qui'imacchajal c óol.

¹⁸Ba'ale' quex tu ya'alajo'ob le ba'alo'oba', jach talam tu luksilaco'ob tu tuucul le máaco'obo' u quiimsico'ob le wacaxo'ob u ti'al u kulta'alo'obo'.

¹⁹J kucho'ob túun dze'edzec judíob j luko'ob Antioquía yéetel Iconioe', tu yocsajo'ob tu tuucul le máaco'obo', ca tu muluxtuunto'ob Pablo. Le ca tu tucultajo'ob dzo'oc u quiimsico'obe' tu jíiltajo'obe' ca tu bisajo'ob paach caaj.

²⁰Ba'ale' le ca j much'laj le ocsaj óolo'ob tu bakpach Pabloe', leti'e' ca j líike' ca j ooc tu ca'a téen ich caaj; tu jeel kiine' j bin yéetel Bernabé tac Derbe.

²¹Cu dzo'ocol u tze'ectico'ob le ma'alob péectzil tu caajil Derbee', tu'ux yanji ya'abcach ocsaj óolo'obe', suunajo'ob Listra, Iconio yéetel Antioquía.

²²Ti' le cúuchilo'oba' tu cux óoltaj le j ocsajóolo'obo' ca tu kubentajo'ob ti'obe' ca p'áataco'ob ti' le ocsaj óolo', ca tu ya'alajo'ob ti'obe' u ti'al ca ococ máac tu ajawil Kue' kabéet u máan ti' ya'abcach mukyajilo'ob.

²³tu dzajo'ob xan anciano'ob ti' le iglesiaobo'. Cu dzo'ocol u payalchi'ob yéetel u su'ukino'obe' tu kubentajo'ob ti' Yuumtzil dzo'oc u yocsaj óoltico'obo'.

²⁴Cu dzo'ocole' j máano'ob tu lu'umil Pisidia ca j kucho'ob tu lu'umil Panfilia.

²⁵Tu tze'ectajo'ob le ma'alob péectzil tu caajil Pergeo', caj bino'ob tac Atalia.

²⁶Te'elo' j ooco'ob ti' jun p'éel cheeme' ca j bino'ob tac Antioquía, leti' le caaj tu'ux kubenta'ano'ob ti' u yaacunaj Kuo' u ti'al u beetico'ob le meyaj táant u dzo'ocsico'obo'.

²⁷Le ca j kucho'ob Antioquíae' tu much'quintajo'ob le iglesiao' ca tu tzicbaltajo'ob tuláacal le ba'alo'ob tu beetaj Ku tu yéetelo'obo', yéetel bix tu je'ejilac jool naj Yuumtzil u ti'al le máaxo'ob ma'judíobo' u ti'al ca páatac u yocsaj óolo'ob tac leti'ob.

²⁸Pablo yéetel Bernabee' j p'áato'ob ya'abcach kiino'ob te'elo' yéetel le ocsaj óolo'obo'.