Read Yucateco Hechos 16 Bible Online

Hechos 16 - Yucateco bible

Hechos 16

¹Pablo yéetel Silase' u kucho'ob tu caajilo'ob Derbe yéetel Listra, tu'ux tu yilajo'ob jun túul j ocsaj óol, u paal jun túul co'olel judía x ocsaj óol, ba'ale' u taatae' Greciail.

²Le sucu'uno'ob cajacbalo'ob Listra yéetel Iconioe' cu ya'alico'ob ba'ax utz tu yo'olal.

³Pabloe' tu yóoltaj ca láakinta'ac tumen Timoteo, ca tu beetaj u súut kuptcubáa u ti'al ma' u beetic u kuuxil le judíob cajacbalo'ob ti' le cúuchilo'obo', tumen tuláacalo'ob u yojéeltmajo'ob greciail u taata.

⁴Ti' tuláacal le caajo'ob tu'ux máano'obo' tu ya'alajo'ob ti' le sucu'uno'ob le tzol xiquino'ob tu dzaj le apóstolo'ob yéetel le anciano'ob yano'ob Jerusaleno' u ti'al ca u dzo'ocbeso'ob.

⁵Bey túuno' le iglesiaobo' mu'uka'anchajo'ob ti' u yocsaj óolalo'ob yéetel sáamsamal cu bin u ya'abtalo'ob.

⁶Quili'ich Pixane' ma' tu cha'aj ti'ob u tze'ectico'ob le ma'alob péectzil tu lu'umil Asiai. Le o'olale' tu ch'actajo'ob u lu'umil Frigia yéetel Galaciae'

⁷ca j kucho'ob tac tu lu'umil Misia. Te'elo' tu tu cultajo'ob u yoclo'ob tu lu'umil Bitinia ba'ale' Quili'ich Pixane' ma' tu cha'aj ti'obi'.

⁸Táadz máano'ob túun Misiae' ca j taalo'ob Troas.

⁹Te'elo' j chíicpaj jun p'éel náay yéetel áakab ti' Pabloe' jun túul máac Macedoniail, wa'alacbal táan u káat óoltic ti': Máanen Macedonia ca a wáanto'oni'.

¹⁰Cu dzo'ocol u yilic Pablo le chíiculala', tu séeblaquil t líiksabáa u ti'al c binbal Macedonia, tumen t ojéeltaj beyo' Kue' táan u t'anico'on u ti'al c tze'ectic ti'ob le ma'alob péectzilo'.

¹¹J ooco'on ti' jun p'éel cheem yaan tu caajil Troase' ca j bino'on jun taadz tac tu petenil Samatrocia, tu jeel kiine' ca j kucho'on tac Neápolis.

¹²J luko'on te'elo' ca j bino'on Filipos, lela' ti' yaan yáanal u páajtalil Romae', bey xan u noj caajil le jun tzéelil u lu'umil Macedoniao'. Ti' anchajo'on dze'edzec kiino'obi'.

¹³Jun p'éel u kiinil sábadoe' jóoko'on tu paach le caajo', tu jáal le áalcab ja', tu'ux suuca'an u bin máac payalchi'i'. J culajo'on te'elo' ca t tzicbaltaj le ma'alo'ob péectzil ti' le co'olelo'ob much'lajo'obo'.

¹⁴jun túul ti' leti'obe', Lidia u kaaba', Tiatira u caajal, jun túul x coon bonbil nook. Le co'olela' máax cu kultic Kue', táan u yu'ubic ba'ax cu ya'ala'al, je'eb túun u pucsi'ikal tumen Yuumtzil u ti'al ca u yocsaj óolt ba'ax tu ya'alaj Pablo.

¹⁵Ocja'anaj yéetel u láaktzilo'ob, cu dzo'ocole' tu káatóoltaj to'on: Wa ca tucultique'ex tu jaajil in wóol dzo'oc in wocsajóoltic Yuumtzile', co'otene'x je'elel tin wotoch. Ca tu beetaj c p'áatali'.

¹⁶J úuch jun téene' ca'aliquil táan c bin tu'ux cu yúuchul le payalchi'o', t ilaj jun túul x ch'úupal, ti' máax oca'an jun túul pixan cu na'at. Leti'e' jun túul x palitzil, cu náajaltic xan ya'ab taakin u ti'al u yuumilo'ob iquil u na'at.

¹⁷Le x ch'úupala' jo'op' u taal tu paach Pablo yéetel t paach, táan u yaawtic: Le máaco'oba' táan u meyajtico'ob le Ca'anil Kuo' yéetel táan u tze'ectic te'ex u bejilo'ob tocsajil.

¹⁸Ya'ab kiino'ob tu beetaj lela', tac ca j kuuxilnaj Pabloe', ca tu sutubae', ca tu ya'alaj ti' le pixan oca'an ti' le x ch'úupalo'; tu kaaba' Jesucristoe' quin wa'alic teech ca jóokoquech ti'. Tu séebalquil j p'a'at tumen le pixano'.

¹⁹Ba'ale' u yuumilo'ob le x ch'úupalo', le ca tu yilajo'ob ma' tu páajtal náajaltico'ob u láak taakin tu yéetele', tu machajo'ob Pablo yéetel Silase' ca tu jíilt u biso'ob tu táan jalach wíinico'ob yano'ob chúumuc kíiwico'.

²⁰Tu taasajo'ob tu táan le j p'is óolo'obo' ca tu ya'alajo'ob: Le máaco'oba' judíob, táan u p'u'ujsico'ob u yóol c caajal,

²¹táan u ca'ansico'ob ba'alo'ob ma' tu páajtal c kamic mix c beetic, tumen to'one' Romailo'on.

²²Le caajo' j líik tu yóokolo'ob. Le p'is óolo'ob túuno' tu ya'alajo'ob ca pi'itic u nooko'obe' yéetel ca ja'adzaco'ob yéetel jíil.

²³Cu dzo'ocol u sen ja'adzalo'obe', ca j ka'alo'ob, ca j a'ala'ab ti' le máax canantic le najo', ca u cananto'ob jach ma'alo'ob.

²⁴Le j canano' le ca tu kamaj le kuben t'aana', tu bisajo'ob tu jach taamil le najo' ca tu jep'aj u yooco'ob ti' jolbil che'ob.

²⁵Ba'ale' míin chúumuc áakabe', táan u payalchi' Pablo yéetel Silas yéetel táan u kayico'ob kaayo'ob ti' Kue', táan u yu'ubalo'ob tumen u láak máaco'ob kala'ano'obo'.

²⁶Ca téec taal jun p'éel nojoch quíilbal lu'um ca tu péecsaj tac u chuun pakil le najo'. Ti' le súutuco' je'epaj tuláacal le jool najo'obo' yéetel cha'apaj tuláacal u cadenailo'ob le máaxo'ob kala'ano'obo'.

²⁷Le ca j aaj le j canano', ca tu yilaj je'ekab u jool najilo'ob le najo', tu jíilpaytaj u táadz máascabe' ca tu yóoltaj u quiimsubáa, tumen tu tucultaj tuláacal le máaxo'ob kala'ano'obo' dzo'oc u púudzulo'ob.

²⁸Ba'ale' Pabloe' tu yaawtaj ti': Ma' a loobilticabáa tumen tuláacalo'one' wayano'one'.

²⁹Le j canano' tu káataj jun p'éel sáasile', j ooc áalcabile', táan u quiquilanquil tu yo'olal u sajaquile' ca j noclaj tu ni' u yooc Pablo yéetel Silas,

³⁰ca tu káataj ti'ob: taate'ex, ¿ba'ax úuchac in beetic u ti'al ca to'ocoquen?

³¹Leti'obe' tu núucajo'ob: Ocsaj óolt Yuumtzil Jesucristo ca to'ocoquech yéetel tuláacal a wotoch.

³²Ca tu tze'ectajo'ob u ma'alob péectzil Yuumtzil ti' leti' yéetel ti' tuláacal le máaxo'ob yano'ob tu yotocho'.

³³Ti'ili' le áakabo' le j canano' tu p'o'aj u yajilo'ob Pablo yéetel Silase' ca ocja'anaj leti' yéetel tuláacal u láaktzilo'ob.

³⁴Cu dzo'ocole' ca tu bisajo'ob tu yotoche' ca tu dzaj ba'al u jaanto'ob, leti' yéetel tuláacal u láaktzilo'obe' jach qui'imac u yóolo'ob tumen dzo'oc u yocsaj óoltico'ob Ku.

³⁵Le ca j sáasjie' le p'is óolo'obo' tu túuxtajo'ob j canan máaco'ob u ti'al a'alique' ca jáalkabta'aco'ob.

³⁶Le j canano' tu ya'alaj ti' Pablo: Dzo'oc u ya'ala'al tene' ca in jáalkabte'ex. Le o'olale' je'el u páajtal a jóokole'ex yéetel utze'.

³⁷Ba'ale' Pabloe' tu ya'alaj ti' le j canan máaco'obo': To'on Romailo'on ja'adzo'on tu táan caaj quex tumen mina'an c si'ipil, cu dzo'ocole' ca j ka'alo'on. ¿Bejela'e' x mucul c jáalkabta'al wa? ¡Lelo' ma'! Talaco'ob leti'ob u ti'al jóoksico'on.

³⁸Le j canan máaco'obo' tu tzicbaltajo'ob lela' ti' le j p'is óolo'obo', leti'ob túune' sajacchajo'ob le ca tu yojéeltajo'ob Romailo'ob.

³⁹J bino'ob túun u káato'ob sa'atsaj ti' Pablo yéetel ti' Silase' ca tu káat óoltajo'ob ti'ob ca jóokoco'ob te j caajo'.

⁴⁰Le ca jóoko'ob te j naj tu'ux kala'ano'ob ca'acho', j bino'ob tu yotoch Lidia. Cu dzo'ocol u yilico'ob le sucu'uno'ob yéetel u cux óoltico'obe' ca j bino'ob.